1. Која тани амари духовно потреба, хем сар адава тано поврзимо е бахталипаја?

 О ЧАЧУТНО бахталипе нане само шукар чувство кова со сигате накхела, него шај те трајнел цело живото. Соске вакераја аѓаар? О Исус објаснинѓа акава ки пли Проповед ки гора. Ов вакерѓа: „Бахтале тане окола сој свесна кај ваљани ленге о Девел“ (Мат. 5:3). О Исус џанља кај о мануша тане аѓаар створиме те овел лен бари желба те пенџарен хем те обожавинен пле Створителе, е Јехова. Хем адалеске со о Јехова тано „бахтало Девел“, окола со обожавинена ле исто аѓаар шај те овен бахтале (1. Тим. 1:11).

2-3. а) Спрема е Исусескере лафија кој јавер шај те овел бахтало? б) Башо со ка кера лафи ки акаја статија, хем соске ваљани те кера лафи башо адава?

² Дали ваљани те овел аменге са шукар ко живото те шај те ова бахтале? На. Ки Проповед ки гора о Исус вакерѓа нешто интересно. Чак „окола со тугујнена“ — адалеске со осетинена пе крива башо несаве гревија или адалеске со иси лен проблемија — шај те овен бахтале. О Исус исто аѓаар пхенѓа окола да сој прогониме хем вреџиме адалеске сој лескере ученикија шај исто аѓаар те овен бахтале (Мат. 5:4, 10, 11). Ама сар шај некој те овел чаче бахтало ко асавке околностија?

³ О Исус мангља те вакерел кај о бахталипе на зависинела таро адава дали иси амен идеална условија ко живото,  него кај ка ова чаче бахтале ако задоволинаја амаре духовна потребе хем ако оваја паше е Девлеа (Јак. 4:8). Сар шај те успејна ко адава? Ки акаја статија ка дикха трин буќа кола со ваљани те кера те шај те ова чаче бахтале.

4. Кова тано о прво чекори со ваљани те кера те шај те ова чаче бахтале? (Псалм 1:1-3).

⁴ 1. ЧЕКОРИ: Те шај те ова чаче бахтале мора те хранина амен ко духовно поглед. Хем о мануша хем о животне ваљани те хан те шај те преживинен ама само о мануша шај духовно те хранинен пе. Хем адава тано потребно. Адалеске о Исус вакерѓа: „О мануш на ваљани те живинел само таро маро, него таро секова лафи со икљола таро е Јеховаскоро муј“ (Мат. 4:4). Адалеске на ваљани те дозволина те накхел нијекх диве бизо те читина е Девлескоро скапоцено Лафи, и Библија. О псалмисти вакерѓа: „Бахтало тано о мануш со уживинела ко е Јеховаскоро закони хем читинела ле диве хем рат“. (Читин Псалм 1:1-3.)

5-6. а) Со шај те сикљова тари Библија? б) Сар ка поможинел аменге адава со ка читина и Библија?

⁵ Адалеске со о Јехова мангела амен ов мукхља ки Библија те овен пишиме важна информацие башо адава со ваљани те кера те шај те овел амен бахтало живото. Ки лате шај те читина која тани лескири намера аменцар, дознајнаја сар шај те ова леа паше хем со ваљани те кера те шај те простинел амаре гревија. Исто аѓаар, дознајнаја баши бут шужи надеж која со ветинѓа ла аменге (Ерем. 29:11). Акала чачипа со сикљоваја лен џикоте проучинаја и Библија керена амен бут бахтале.

 ⁶ Џанаја кај ки Библија исто аѓаар иси бут практична советија башо секојдневно живото. Кеда шунаја адала советија шај те ова бахтале. Секогаш кеда сиан разочаримо таро проблемија одвојн туке време повише те читине и Библија хем размислин башо адава со читинеа. О Исус вакерѓа: „Бахтале тане окола со шунена е Девлескоро лафи хем икерена ле“ (Лука 11:28).

7. Сар шај најшукар те користине о време кеда читинеа и Библија?

⁷ Кеда читинеа е Девлескоро Лафи, ма сиѓар уживин ко адава со читинеа. Те вакера јекх пример кова со веројатно повише џененге случинѓа пе. Шај некој кхере спреминѓа туке тло омилено хајбе. Ама шај адалеске со сиѓареа или сиан преукопиримо мисленцар сигате хаја бизо те уживине ко секова залаго со леа. Откеда завршинѓан е хајбаја халиљан кај бут сигате хаљан хем би мангеа те ха сине попохари те шај те уживине. Нешто слично шај те случинел пе кеда читинаја и Библија. Понекогаш добором сигате читинаја ла со нане амен време те уживина ко лакоро хабери. Одвојн туке време те шај те уживине џикоте читинеа и Библија. Кер туке слика ки годи, замислин туке о гласија таро библиска личностија хем размислин башо адава со читинѓан. Ако кереа акава, ка ове побахтало.

8. Сар „о верно хем разборито робо“ керела пли задача? (Дикх хем и фуснота.)

⁸ О Исус чхивѓа „е верно хем разборито робо“ те дел духовно храна ко право време, хем адалеске иси амен бут духовно храна * (Мат. 24:45). И Библија тани и главно состојка која со користинела о Верно робо ки секоја публикација (1. Сол. 2:13). Акаја духовно храна поможинела аменге те џана сар размислинела о Јехова. Адалеске читинаја и Стражарско кула хем Џангавѓовен! хем о статие со аракхљовена ки амари интернет-страница, спреминаја амен башо амаре состанокија хем секова масек дикхаја и емисија таро JW Broadcasting^®, ако тани достапно. Ако шукар хранинаја амен ко духовно поглед тегани ка шај те кера о дујто чекори со ка ингарел амен џи ко бахталипе.

9. Кова тано о дујто чекори со ингарела џи ко чачутно бахталипе?

⁹ 2. ЧЕКОРИ: Те шај те ова чаче бахтале ваљани те живина спрема е Јеховаскере мерилија. О псалмисти пишинѓа: „Бахтало тано секој со дарала таро Јехова хем џала пало лескере друмија“ (Пс. 128:1). Те дара таро Јехова значинела те поштујне ле добором со нане те кере нешто колеа со шај те разочарине ле (Изр. 16:6). Адалеске, на чхинаваја те да амендар са те шај те живина спрема е Јеховаскере мерилија башо исправно хем погрешно кола сој тане пишиме ки Библија (2. Кор. 7:1). Ка ова бахтале ако кераја о буќа со мангела о Јехова хем ако отфрлинаја адава со ов мрзинела (Пс. 37:27; 97:10; Рим. 12:9).

10. Освен со ваљани те џана сој тани е Девлескири волја, со јавер ваљани те кера? (Римјаните 12:2).

¹⁰ Читин Римјаните 12:2. Некој шај џанела кај е Јехова иси ле право те одлучинел сој исправно а сој погрешно ама адава нане доволно, ов мора исто аѓаар те прифатинел адала мерилија ко пло живото. На пример, јекх мануш шај џанела кај е влада иси ла право те одрединел коле брзинаја тано дозволимо те возинел пе. Ама шај нане спремно те прифатинел адала правилија хем адалеске возинела повише тари дозволими брзина. Значи, таро амаре постапке  дикхела пе дали чаче верујнаја кај е Јеховаскере мерилија тане најшукар аменге (Изр. 12:28). О Давид џанља акава хем адалеске вакерѓа: „Ка де ман те пенџарав о друмо е животоскоро. Бут сиум бахтало кеда терѓовава англи туте хем ко тло десно вас иси вечно бахталипе“ (Пс. 16:11).

11-12. а) Кеда иси амен проблемија или сием обесхрабриме ко со ваљани те пазина? б) Сар шај о лафија таро Филипјаните 4:8 те поможинен аменге кеда биринаја забава?

¹¹ Кеда иси амен проблеми или сием разочариме, шај мангаја те кера нешто колеа со ка цида амендар адава проблеми те шај те на секирина амен више. Адава тано нормално, ама мора те пазина те на кера нешто со о Јехова мрзинела (Еф. 5:10-12, 15-17).

¹² Ко пло писмо џи ко Филипјања о апостол Павле поттикнинѓа е христијанен понадари да те размислинен башо са сој „праведно... чисто... вредно мангипаске... [хем] са сој шукар“. (Читин Филипјаните 4:8.) Иако о Павле акате на пишинѓа конкретно баши забава ама акава ваљани бут те влијајнел упро адава сави забава биринаја. Размислин дали о гиља со шунеа, о филмија со дикхеа, о лила со читинеа хем о видеоигре со кхелеа тане ко склад е лафенцар со вакерѓа лен о Павле. Акава ка поможинел туке те хаљове сој тано прифатливо е Девлеске а со нане (Пс. 119:1-3). Амен мангаја те живина спрема е Јеховаскере уче мерилија. Тегани ка овел амен чисто совест хем ка шај те кера о следно чекори со ингарела џи ко чачутно бахталипе (Дела 23:1).

13. Кова тано о трито чекори со ингарела амен џи ко бахталипе? (Јован 4:23, 24).

¹³ 3. ЧЕКОРИ: Де тутар са те шај и служба башо Јехова те овел туке ко прво тхан. Адалеске со о Јехова створинѓа амен ов заслужинела те обожавина ле (Отк. 4:11; 14:6, 7). Значи, и најважно бути ко амаро живото ваљани те овел те обожавина е Јехова ко начин ов сар со мангела, „духоја хем чачипаја“. (Читин Јован 4:23, 24.) Амен дозволинаја о свети дух те водинел амен те шај амаро обожавибе те овел спрема о чачипе со аракхљола ко е Девлескоро Лафи. О обожавибе ваљани те овел аменге ко прво тхан чак ако живинаја ки пхув коте со амаре активностија тане ограничиме или забраниме. Ко акава моменти повише таро 100 пхраља хем пхења тане пханле ко затвор адалеске сој тане е Јеховаскере сведокија. * Чак ко асавке околностија тане бахтале хем керена са со шај те молинен пе, те проучинен хем те вакерен е јаверенге башо е Девлескоро Царство. Кеда о мануша критикујнена амен или прогонинена амен шај те ова бахтале соске џанаја кај о Јехова тано аменцар хем кај ов ка наградинел амен (Јак. 1:12; 1. Пет. 4:14).

14. Со случинѓа пе јекхе пхралеске таро Таџикистан хем соске?

¹⁴ Несаве пхрален хем пхењен сине лен бут пхаре околностија ама ола ачхиле бахтале соске керѓе о трин чекорија кола со дикхлем лен. О Јовидон Бобојонов, јекх пхрал таро Таџикистан, кеда сине ле 19 берш одбинѓа те џал ки војска. Адалеске ко 4 октомври 2019 берш силаја леле ле кхералдан хем чхивѓе ле ко затвор штар масек хем понашинѓе пе леа сар криминалцо. Некобор пхувја ки телевизија известинѓе баши акаја неправда. Сине известимо кај марѓе ле те шај те керен леске притисок те  дел заклетва хем те уравел униформа. Пало адава, ов сине осудимо хем бичхалдо ко затвор џикоте ко крајо о претседатели тари адаја пхув на ослободинѓа ле. Ко цело адава време о пхрал ачхило верно хем на нашавѓа пло бахталипе. Ов успејнѓа ко адава соске секогаш сине свесно башо пле духовна потребе.

15. Сар о Јовидон хранинела пе сине ко духовно поглед џикоте сине ко затвор?

¹⁵ Џикоте сине ко затвор о Јовидон хранинела пе сине духовно иако на сине ле и Библија или несави јавер публикација. Сар шај сине те керел адава? О пхраља хем о пхења со ингарена сине леске хајбаске пишинена сине ко торбе е дивескоро стихо. Аѓаар ов шај сине те читинел и Библија хем секова диве те размислинел башо адава. Откеда иклило таро затвор ов вакерѓа јекх совет са околенге со панда на доживинѓе пхаре неволје. Ов вакерѓа: „Бут тано важно шукар те користинен тумаро слободно време те шај пошукар те пенџарен е Јехова аѓаар со ка читинен лескоро Лафи хем амаре публикацие“.

16. Башо кола буќа размислинела сине о Јовидон?

¹⁶ Амаро пхрал живинѓа спрема е Јеховаскере мерилија. Наместо те размислинел башо погрешна желбе хем те почминел те постапинел ко погрешно начин ов размислинела  сине башо Јехова хем баши лескири волја. О Јовидон сине воодушевимо таро адава кобор шуже буќа створинѓа о Јехова. Секова сабајле шунела сине сар гиљавена о чирикља. Раќате дикхела сине и месечина хем о ѕвезде. Ов вакерела: „Адала поклонија таро Јехова керѓе ман бахтало хем охрабринѓе ман“. Кеда сием благодарна е Јеховаске башо са о буќа со дела амен ко духовно хем телесно поглед тегани сием бут бахтале хем адава бахталипе шај те дел амен сила те истрајна.

17. Сар шај о лафија таро 1. Петрово 1:6, 7, те поможинен некаске сој ки слично ситуација сар о Јовидон?

¹⁷ О Јовидон исто аѓаар чхивѓа ко прво тхан и служба башо Јехова. Ов сине свесно кобор тано важно те ачхол пе верно е чачутне Девлеске. О Исус вакерѓа: „Е Јехова тле Девле обожавин ле хем служин само леске“ (Лука 4:8). О командирија тари војска хем о војникија теринена ле сине те откажинел пе тари пли религија. Ама наместо те керел адава ов молинела пе сине секова диве хем секоја рат. Молинела сине е Јехова те поможинел леске ма те откажинел пе хем те ачхол леске верно. Иако доживинѓа бари неправда о Јовидон ачхило верно. Акана тано бут бахтало соске лескири вера тани побари него англедер те овел пханло хем мардо. (Читин 1. Петрово 1:6, 7.)

18. Сар шај те ачхова бахтале?

¹⁸ О Јехова џанела со ваљани аменге те шај те ова бахтале. Ако кераја о трин чекорија со ингарена џи ко чачутно бахталипе шај те ачхова бахтале чак кеда ка аракхљова ко пхаре ситуацие. Тегани амен да шај те вакера: „Бахтале тане о мануша каскоро Девел тано о Јехова“ (Пс. 144:15).