1-2. Спрема 1. Тимотеј 6:20, со сине дендо е Тимотееске?

СИГУРНО некогаш денѓем некаске несаве вредна буќа те шај те аракхел лен аменге. На пример, некој со џала несаво време ки јавер пхув, понекогаш мукхела пло кхер те аракхел ле несаво амал или некој тари фамилија. Најчесто адава керела ле соске мислинела кај адава амал или фамилија шукар ка грижинел пе башо кхер. Таро акава пример јасно дикхела пе кај ваљани те овел амен доверба ки некасте те шај те мукха те аракхел нешто сој тано аменге бут скапоцено.

² Читин 1. Тимотеј 6:20. О апостол Павле сетинкерѓа е Тимотее кај леске тано дендо нешто сој бут скапоцено — сине леске вакерди е Девлескири намера е манушенцар. Освен адава, сине леске денди и чест те проповединел е Девлескоро лафи, или о шукар хабери (2. Тим. 4:2, 5). О Павле поттикнинѓа е Тимотее те аракхел адава сој леске дендо. Исто сар о Тимотеј, аменге да тано дендо нешто сој тано скапоцено. Сој тано адава? Хем соске мора те аракха адава барвалипе со денѓа амен о Јехова?

3-4. Кола тане несаве причине соске о чачипа тари Библија тане скапоцена?

³ О Јехова поможинѓа аменге те хаљова о чачипа таро лескоро Лафи, и Библија. Акала чачипа тане скапоцена соске поможинена аменге те овел амен шукар однос е Јеховаја хем вакерена сар шај те ова чаче бахтале. Кеда прифатинаја акала чачипа хем живинаја спрема ленде, ослободиме сием таро ховавне сикљојба хем шај те ова морално чиста (1. Кор. 6:9-11).

 ⁴ Јавер причина соске о чачипа таро е Девлескоро Лафи тане скапоцена тани адалеске со о Јехова откринела лен само е понизна манушенге кола со „исправно дикхена ко вечно живото“ (Дела 13:48). Асавке мануша признајнена кај авдиве „о верно хем разборито робо“ откринела аменге адала чачипа (Мат. 11:25; 24:45). Амен сием свесна кај нашти коркори те хаљова лен, а ола тане добором скапоцена со ништо јавер нашти те спорединел пе ленцар (Изр. 3:13, 15).

5. Со јавер денѓа амен о Јехова?

⁵ О Јехова исто аѓаар денѓа амен и чест те сикава е јаверен о чачипе баши лесте хем баши лескири намера (Мат. 24:14). И порака со проповединаја ла тани бут скапоцено адалеске со поможинела е манушенге те овен дело тари е Јеховаскири фамилија хем дела лен прилика те добинен вечно живото (1. Тим. 4:16). Бизи разлика дали проповединаја ки побари или ки потикни мера, амен поддржинаја и најважно бути со керела пе ко амаро време (1. Тим. 2:3, 4). Аменге тани бут бари чест те ова е Девлескере соработникија! (1. Кор. 3:9).

6. Со уло несаве христијаненге таро прво веко со на пазинѓе доволно?

⁶ Ко е Тимотеескоро време, несаве христијања чхинавѓе те ценинен и предност те овен е Девлескере соработникија. Адалеске со мангела сине о свето, о Димас откажинѓа пе тари предност те служинел заедно е Павлеа (2. Тим. 4:10). О Фигел хем о Ермоген изгледа чхинавѓе те служинен е Јеховаске адалеске со дарана сине кај ка овен прогониме исто сар о Павле (2. Тим. 1:15). О Именеј, о Александар хем о Филет мукхле о чачипе хем уле отпадникија (1. Тим. 1:19, 20; 2. Тим. 2:16-18). Изгледа са акала мануша ко почеток мангена сине е Јехова, ама чхинавѓе те ценинен о скапоцена буќа со сине ленге денде.

7. Кола тактике користинела о Сатана против аменде?

⁷ Сар о Сатана трудинела пе те чхивел амен те откажина амен таро барвалипе со денѓа ле аменге о Јехова? Те дикха несаве тактике со ов користинела лен. О Сатана користинела и забава хем о медиумија те шај те мислина хем те понашина амен аѓаар со хари по хари ка чхинава те манга е Јехова хем те на шуна лескере законија. Освен адава, ов користинела о притисок тари околина хем о прогонство те шај те даравел амен хем те теринел амен те чхинава те проповедина. Исто аѓаар, трудинела пе те ховавел амен те шуна о „ховавно пенџарибе“ кова со ширинена ле о отпадникија те шај те откажина амен таро чачипе (1. Тим. 6:20, 21).

8. Со сикљовеа таро адава со уло е Даниелеске?

⁸ Ако на пазинаја, шај хари по хари те  цида амен таро Јехова. Те дикха о пример е Даниелескоро, * кова со бут мангела сине те кхелел видеоигре. Ов вакерела: „Почминѓум те кхелав видеоигре кеда сине ман деш берш. Ко почеток акала игре на сине бут лошна. Ама хари по хари почминѓум те кхелав игре сој насилна хем демонска“. Ко крајо, ов кхелела сине 15 саатија ко диве. О Даниел вакерела: „Свесно сиум сине кај адала игре хем о време со трошинава сине ки ленде, цидена ман сине таро Јехова. Ама, убединава сине коркори ман кај адава со кхелава сине адала игре на сине против о библиска мерилија“. Ако на пазинаја, и забава шај похари те цидел амен таро чачипе. Ако случинѓа пе аменге нешто асавко, ко крајо шај те нашава о скапоцена буќа со денѓа лен аменге о Јехова.

9. Спрема 1. Тимотеј 1:18, 19, со поттикнинѓа о Павле е Тимотее?

⁹ Читин 1. Тимотеј 1:18, 19. О Павле спорединѓа е Тимотее сар јекх војнико хем поттикнинѓа ле те водинел борба. Адаја борба на сине дословно, него духовно. Ко кова начин о христијања сине сар војникија со боринена пе? Саве особине ваљани те овен амен сар војникија е Христосескере? Те дикха панџ поуке со шај те сикљова тари е Павлескири споредба. Акала поуке ка поможинен аменге те аракха о чачипе сој тано аменге дендо.

10. Соске ваљани те ачхова верна само е Девлеске?

¹⁰ Ов верно само е Девлеске. Јекх шукар војнико тано верно. Ов ка боринел пе са пле силенцар те шај те заштитинел е манушен со мангела лен или о буќа сој леске важна. О Павле охрабринѓа е Тимотее те ачховел верно само е Девлеске хем хор те поштујнел ле (1. Тим. 4:7). Кобор посилно тано о мангипе хем амари верност спрема о Јехова, добором повише ка манга те аракха о чачипе сој аменге дендо (1. Тим. 4:8-10; 6:6).

11. Соске ваљани аменге самодисциплина?

¹¹ Нека овел тут самодисциплина. Те шај јекх војнико те овел секогаш спремно баши борба, мора те овел ле самодисциплина. О Тимотеј шај сине те боринел пе против е Сатанаскоро влијание адалеске со шунѓа е Павлескоро совет таро 2. Тимотеј 2:22. Ов боринѓа пе пле погрешно желбенцар, развинѓа шуже особине хем накхавѓа пло време е пхраленцар хем е пхењенцар. Башо адава ваљани сине леске самодисциплина. Аменге да ваљани акаја особина те шај те победина амаре грешна желбе (Рим. 7:21-25). Освен адава, ваљани аменге самодисциплина те шај те хуљава и пурани личност хем те урава и неви (Еф. 4:22, 24). А кеда сием уморна пало јекх напорно диве, понекогаш мора те терина амен те џа ко состанок (Евр. 10:24, 25).

12. Со ка поможинел аменге панда пошукар те пенџара и Библија?

¹² Јекх војнико ваљани шукар хем редовно те вежбинел те шај те џанел сар те користинел пло оружје. Слично аѓаар, амен да ваљани те сикљова шукар те користина е Девлескоро Лафи (2. Тим. 2:15). О состанокија поможинена аменге ко адава. Ама, те шај те уверина е јаверен кај о библиска чачипа тане бут корисна, мора коркори амен те проучина е Девлескоро Лафи. Ко асавко начин бајрараја амари вера. Акава на значинела само те читина и Библија, него те размислина башо адава со читинѓем хем те истражина ко амаре публикацие те шај шукар те хаљова о библиска стихија те џана сар те применина лен хем сар те објаснина лен (1. Тим. 4:13-15). Тегани ка шај те користина е Девлескоро Лафи кеда сикаваја е јаверен. Акава значинела кај нане доволно само те читина  ленге несаво библиско стихо. Амен мангаја те поможина ленге те хаљовен о стихија хем те џанен сар те применинен лен. Ако редовно проучинаја и Библија, ка шај панда пошукар те користина ла кеда сикава е јаверен (2. Тим. 3:16, 17).

13. Спрема Евреите 5:14, соске мора мудро те проценина о буќа?

¹³ Нека овел тут способност мудро те проценине о буќа. Јекх војнико мора англедер те дикхел и опасност те шај те избегинел ла. Амен да мора те сикљова те пенџара о опасна ситуацие хем те кера адава сој потребно те шај те избегина лен (Изр. 22:3; читин Евреите 5:14.) На пример, мора мудро те бирина амари забава хем и рекреација. Ко телевизиска емисие хем ко филмија често иси неморал. Ако дикхаја нешто асавко, адава шај хари по хари те тикњарел амаро мангипе спрема о Јехова. Џанаја кај ов мрзинела о неморал, хем кај окола со постапинена неморално керена штета песке хем е јаверенге (Еф. 5:5, 6).

14. Сар поможинѓа е Даниелеске и способност мудро те проценинел о буќа?

¹⁴ О Даниел кова со кхелела сине насилна хем демонска видеоигре, почминѓа те хаљовел кај адава тано сериозно проблеми. Адалеске истражинѓа ко амаре публикацие те дикхел сар шај те икљол ко крајо адале проблемеа. Сар адава влијајнѓа упри лесте? Ов чхинавѓа те кхелел асавке лошна игре. Откажинѓа пе таро онлајн-игре хем чхинавѓа са о контактија е манушенцар со кхелела сине. О Даниел вакерела: „Наместо те кхелав видеоигре, почминѓум те икљовав ки природа хем те дружинав ман е пхраленцар хем е пхењенцар таро собрание“. Акана ов служинела сар пионери хем старешина.

15. Соске о измислиме буќа со ширинена лен о отпадникија тане опасна?

¹⁵ Исто сар о Тимотеј, амен да ваљани те хаљова кобор тане опасна о ховавне информацие со ширинена лен о отпадникија (1. Тим. 4:1, 7; 2. Тим. 2:16). На пример, ола шај ширинена измислиме буќа башо амаре пхраља хем мангена те керен те сумнина амен ки е Јеховаскири организација. Асавке ховајба шај те керен послабо амари вера. На смејнаја те дозволина те ховавѓова тари асавки пропаганда. Соске? Адалеске со асавке измислиме буќа ширинена „мануша со иси лен румиме мисле хем нане лен о чачипе ки песте“. Ленгири цел тани те почминен расправие хем акошибе  (1. Тим. 6:4, 5). Ола мангена те верујна ко буќа со нане точна хем те на овел амен доверба ко амаре пхраља.

16. Таро со ваљани те аракха амен?

¹⁶ Ачхов концентриримо. Сар „шукар војнико е Христос Исусескоро“, о Тимотеј мора сине те ачховел концентриримо ки служба наместо те дозволинел о материјална буќа или јавера целија те лен лескоро внимание (2. Тим. 2:3, 4). Исто сар о Тимотеј, амен да на смејнаја те дозволина те манга те овел амен повише ко материјално поглед. „О ховавно барвалипе“ шај те керел те нашава амаро мангипе спрема о Јехова, похари те ценина е Девлескоро Лафи хем ма те овел амен желба те кера е јаверенцар лафи баши Библија (Мат. 13:22). Мора те трудина амен те водина едноставно живото хем те користина амаро време хем сила те рода „најангле е Девлескоро Царство“ (Мат. 6:22-25, 33).

17-18. Сар шај те заштитина амаро амалипе е Јеховаја?

¹⁷ Ов спремно одма те кере нешто. О војнико ваљани англедер те џанел со ка керел ако иси несави опасност те шај те заштитинел пе. Ако мангаја те аракха адава со о Јехова денѓа ле аменге, ваљани сигате те реагирина кеда ка дикха несави опасност. Со ка поможинел аменге те кера адава? Ваљани англедер те размислина башо адава со ка кера ако аракхљоваја ки опасно ситуација.

¹⁸ Те дикха јекх пример. Кеда иси несаво јавно настан, англедер те почминел и програма, е манушенге вакерела пе те дикхен коте тано о најпаше излез. Соске? Те шај одма те икљовен ако нешто уло. Ко слично начин ваљани англедер те размислина кова би овел о најшукар „излез“ ако таро јекх пути појавинена пе англи аменде неморална или насилна сцене, или материјали таро отпадникија. Акава шај те овел џикоте сием ко интернет или џикоте дикхаја телевизија. Ако англедер сием спремна башо асавке ситуацие, ка шај сигате те реагирина те шај те ачхова чиста англо е Јеховаскере јакхја хем аѓаар ка заштитина амаро амалипе леа (Пс. 101:3; 1. Тим. 4:12).

19. Кола берекетија ка овен амен ако аракхаја о скапоцена буќа со денѓа лен аменге о Јехова?

¹⁹ Мора те аракха о скапоцена буќа со денѓа лен аменге о Јехова — о бут шуже библиска чачипа хем и чест те сикава е јаверен баши ленде. Аѓаар ка овел амен чисто совест, ка овел амен смисла ко живото хем ка ова бахтале со шај те поможина е јаверенге те пенџарен е Јехова. Адалеске со ов ка поможинел аменге, ка шај те аракха адава сој аменге дендо (1. Тим. 6:12, 19).