1-2. Сар о стихо таро Проповедник 11:6 тано поврзимо е проповедибаја о шукар хабери башо Царство?

КО НЕСАВЕ пхувја, о мануша спремно прифатинена о шукар хабери — сар те пхене едвај аџикерена сине те шунен ле! Ко јавера пхувја о мануша на сикавена баро интерес башо Девел или баши Библија. Сар реагиринена бут мануша ко шукар хабери ко тхан коте со живинеа ту? Бизи разлика сар ола реагиринена, о Јехова мангела амен понадари те проповедина са џикоте ов на вакерела кај о проповедибе завршинѓа.

² О Јехова више одлучинѓа кеда о проповедибе ка овел завршимо хем „тегани ка авел о крајо“ (Мат. 24:14, 36). Ама англедер те овел адава, сар шај те ова послушна ко лафија: „Ма мукх те одморинел тло вас“? * (Читин Проповедник 11:6.)

3. Со ка дикха ки акаја статија?

³ Ки англуни статија дикхлем штар буќа со шај те поможинен аменге успешно те проповедина о шукар хабери сар „рибарија со астарена манушен“ (Мат. 4:19). Ки акаја статија ка дикха трин начинија сар шај те ова поодлучна те проповедина, бизи разлика ки сави ситуација аракхљоваја. Ка дикха соске тано важно 1) те ачхова концентририме ко проповедибе, 2) те ова стрплива хем 3) те кера зорали амари вера.

4. Соске ваљани те ачхова концентририме ки задача со денѓа ла аменге о Јехова?

⁴ О Исус вакерѓа пле учениконге саве ка овен о мануша хем со ка овел ко последна диве. Ов џанља кај акала буќа шај те керен лескере следбеникија те на концентриринен пе ко проповедибе. Ов вакерѓа пле учениконге те „ачховен џангавде“ (Мат. 24:42). Ко е Ноескере диве, сине бут буќа со лена сине е манушенгоро внимание хем на пазинѓе ко адава со предупрединѓа лен ов. Авдиве, слична буќа шај те лен амаро да внимание (Мат. 24:37-39; 2. Пет. 2:5). Адалеске, амен мангаја те ачхова концентририме ки задача со денѓа ла аменге о Јехова.

5. Спрема о Дела 1:6-8, џи ки која мера ка овел проповедимо о шукар хабери?

⁵ Авдиве, чаче ваљани те концентририна амен ко проповедибе о шукар хабери баши Царство. О Исус пророкујнѓа кај пало лескоро мерибе лескере следбеникија понадари да ка проповединен хем адава ка керен ле ки побари мера лестар (Јован 14:12). Пало е Исусескоро мерибе, несаве таро лескере ученикија иранѓе пе ки пумари бути сар рибарија. Кеда воскреснинѓа, ов керѓа јекх чудо хем поможинѓа пле учениконге те астарен буте мачхен. Пало адава чудо, о Исус истакнинѓа кај о проповедибе хем те керен пе ученикија тано бут поважно тари било која бути (Јован 21:15-17). Кратко англедер те џал ко небо, вакерѓа пле учениконге кај о проповедибе со ов почминѓа ле нане те овел само ко Израел, него ко цело свето. (Читин Дела 1:6-8.) Бершенцар покасно, о Исус ки јекх визија сикавѓа е апостолеске, е Јованеске, со ка овел ко „е Господарескоро диве“. * Јекх таро буќа со дикхља о Јован сине јекх интересно визија сар јекх ангели „ингарела о шукар хабери со ка ачхол вечно... секоле нацијаке, племеске чхибјаке хем народоске“ (Отк. 1:10; 14:6). Јасно тано кај авдиве  о Јехова родела амен да те учествујна ко акава проповедибе ки цели Пхув са џикоте адава на завршинела.

6. Со ка поможинел аменге те ачхова концентририме ко проповедибе?

⁶ Шај те ачхова концентририме ко проповедибе ако размислинаја башо са адава со керела о Јехова те шај те поможинел аменге. На пример, ов дела амен бут духовно храна сар сој о печатиме или електронска публикацие, аудиоснимке, видеоклипија хем емисие ки амари интернет-телевизија. Само размислин башо акава: ки амари интернет-страница иси информацие ко повише таро 1.000 чхибја! (Мат. 24:45-47). О мануша ко свето тане одвојме адалеске со поддржинена различна политичка идее, припадинена ко различна религие или несаве тане бут барвале а о јавера чороле. Ама, повише таро офто милиоња слуге е Девлескере тане ко јекхипе са е пхраленцар ко цело свето. На пример, петок, 19 април 2019 берш, е Јеховаскере сведокија таро цело свето сине ко јекхипе адалеске со шај сине сарине те дикхен о видеоклипи коте со разглединѓа пе е Дивескоро стихо. Адаја рат, 20.919.041 мануша кхединѓе пе баши Спомен-свеченост те шај те сетинен пе ко е Исусескоро мерибе. Кеда размислинаја баши чест со иси амен те дикха ко амаро време са акала шуже настанија ко кола со амен да учествујнаја, тегани сием поттикниме те ова зафатиме те проповедина о шукар хабери башо Царство.

7. Сар е Исусескоро пример поможинела аменге те ачхова концентририме?

⁷ Јавер начин сар шај те ачхова концентририме ко проповедибе тано аѓаар со ка џа пало е Исусескоро пример. Ов на мукхља ништо те лел лескоро внимание таро адава те проповединел о чачипе (Јован 18:37). О Сатана нашти сине те ховавел ле адалеа со нудинѓа леске „о царствија таро цело свето хем ленгири слава“, хем на пело ко искушение кеда о јавера мангле те керен ле цари (Мат. 4:8, 9; Јован 6:15). На влијајнѓе упри лесте о желбе башо материјално барвалипе хем на дарандило кеда сине прогонимо (Лука 9:58; Јован 8:59). Со ка поможинел аменге те ачхова концентририме кеда амари вера тани ко испит? Адава со ка сетина амен ко совет со денѓа ле о Павле. Ов охрабринѓа е христијанен те џан пало е Исусескоро пример хем аѓаар нане те уморинен пе хем нане те откажинен пе (Евр. 12:3).

8. Сој тани и стрпливост, хем соске посебно ваљанела аменге акана?

⁸ И стрпливост тани способност мирно те аџикерел пе са џикоте на менинела пе несави ситуација. Ваљани те ова стрплива ко различна ситуацие. Шај мангаја јекх лошно ситуација те завршинел или бут време шај аџикераја те овел нешто шукар. О пророко о Авакум бут мангела сине те завршинел о насилство ки Јуда (Авак. 1:2). Е Исусескере ученикија надинена пе сине кај о Царство „одма ка овел воспоставимо“ хем ка спасинел лен тари римско власт (Лука 19:11). Едвај аџикераја о диве кеда е Девлескоро Царство ка цидел са о лошнипе хем ка анел нево свето коте со ка владинел и правда (2. Пет. 3:13). Ама, амен ваљани те ова стрплива хем те аџикера о време кеда о Јехова одрединѓа те керел адава. Те дикха несаве начинија сар о Јехова сикавела амен те ова стрплива.

9. Кола примерија сикавена кај о Јехова тано стрпливо?

⁹ О Јехова тано совршено пример баши стрпливост. Ов денѓа доволно време е Ноеске те градинел и арка хем те проповединел и праведност (2. Пет. 2:5; 1. Пет. 3:20). О Јехова шунела сине е Аврааме џикоте бут пути пучља ле баши лескири одлука те уништинел е лошна манушен кола со живинена сине ко дизја  Содом хем Гомор (1. Мој. 18:20-33). Веконцар, о Јехова сине бут стрпливо е израелско народоја кова со на сине леске верно (Неем. 9:30, 31). Авдиве дикхаја кај о Јехова тано стрпливо адалеске со са е манушенге со мангена те овен леа паше дела лен време „те каинен пе“ (2. Пет. 3:9; Јован 6:44; 1. Тим. 2:3, 4). Е Јеховаскоро пример дела амен шукар причина амен да те ова стрплива џикоте проповединаја е манушенге хем сикаваја лен. Ов исто аѓаар сикавела амен те ова стрплива преку јекх споредба со аракхљола ко лескоро Лафи.

10. Сар со пишинела ко Јаков 5:7, 8, со сикавела амен о пример таро земјоделцо?

¹⁰ Читин Јаков 5:7, 8. О пример таро јекх земјоделцо со аџикерела о плоди те бајрол сикавела аменге сар те ова стрплива. Точно тано кај несаве растенија бут сигате бајрона. Ама, повише растенија, а посебно адала со дена плоди, ваљани ленге повише време те шај те овен зрела. Ко Израел, и сезона те шај те овен зрела о растенија трајнела сине околу шов масек. О земјоделцо сејнела сине о семе ки средина таро октомври хем кхедела сине о плодија ки средина таро април (Мар. 4:28). Ка ова мудра ако амен да сикаваја стрпливост сар о земјоделцо. Ама, акава шај те овел пхаро.

11. Сар и стрпливост ка поможинел аменге ки служба?

¹¹ Обично о несовршена мануша мангена одма те дикхен о резултатија тари пумари бути. Ама, ако мангаја ки амари бавча те бајрон растенија хем те овен лен плодија ваљани стално те грижина амен ленге. Мора те ранда, те садина, те икала и штетно чар хем те вадина. Слично аѓаар, ако мангаја те кера ученикија, ваљани бут те трудина амен. Ваљани аменге време те откорнина таро интересентија о предрасуде хем те сикљон те грижинен пе е јаверенге. Ако сием стрплива нане те обесхрабрина амен кеда о мануша нане те шунен амен. Ама, исто аѓаар ваљани те ова стрплива кеда несаве мануша мангена те шунен хем те сикљовен. Нашти силаја те терина јекхе интересенте те овел ле вера. Понекогаш,  чак е Исусескере ученикија на халиле одма со значинена сине лескере лафија (Јован 14:9). Ма те бистра кај амен шај те садина хем те вадина, ама о Девел керела те бајрол (1. Кор. 3:6).

12. Сар шај те ова стрплива кеда проповединаја амаре фамилијаке?

¹² Ваљани те ова стрплива кеда проповединаја амаре фамилијаке. О начело таро Проповедник 3:1, 7 шај те поможинел аменге ко адава. Адатхе пишинела кај иси време „те чутинел пе хем време те керел пе лафи“. Амаре шукар понашибаја, шај те сведочина амаре фамилијаке бизо лафија. Тари јавер страна, мора секогаш те ова спремна те вакера ленге башо Јехова (1. Пет. 3:1, 2). Амен мора ревно те проповедина хем те сикава е јаверен, ама секогаш ваљани те ова стрплива са е манушенцар, а адава значинела амаре фамилијаја да.

13-14. Кола примерија баши стрпливост шај те следина?

¹³ Шај те сикљова те ова стрплива таро пример е верна манушенгоро ко пурано време хем е верна манушенгоро ко авдисутно време. О Авакум едвај аџикерела сине те авел о крајо е лошнипаске, ама ов сикавѓа стрпливост кеда вакерѓа: „Ко мло стражарско тхан ка терѓовав“ (Авак. 2:1). О апостол Павле вакерѓа кај мангела те завршинел пли служба хем те добинел пли небесно награда. Ама, ов стрпливо понадари да ’сведочинѓа темелно башо шукар хабери‘ (Дела 20:24).

¹⁴ Те дикха о пример таро јекх брачно пари кова со дипломиринѓа ки Школа Гилеад. Ола сине бичхалде те служинен ки пхув коте со сине само некобор Сведокија хем коте со повише мануша нане христијања. Бут хари лендар мангена сине те проучинен и Библија. Ама, о јавера со сине ленцар ко Гилеад хем служинена сине ко јавера пхувја вакерена сине ленге башо мануша касаја со проучинена сине и Библија хем со крстинѓе пе. Ама, акава брачно пари понадари да стрпливо проповединела сине, иако бут мануша ко ленгоро подрачје на шунена лен сине. Пало офто берш проповедибе ко подрачје со изглединела сине кај бут хари мануша шунена лен, сине бахтале кеда конечно јекх интересентка касаја со проучинена сине и Библија, крстинѓа пе. Со сикавена амен акала примерија таро пурано хем таро авдисутно време? Акала верна слуге на нашавѓе пли ревност хем на мукхле ленгоро вас те одморинел, а о Јехова наградинѓа лен баши ленгири стрпливост. Те ова амен да сар „окола со баши пли вера хем стрпливост добинена адава сој ветимо“ (Евр. 6:10-12).

15. Сар шај амари вера те керел амен те ова поодлучна те проповедина?

¹⁵ Иси амен вера ки порака со проповединаја ла хем адалеске бут мангаја те вакера ла со шај повише манушенге. Иси амен доверба ко ветувања со аракхљона ко е Девлескоро Лафи (Пс. 119:42; Иса. 40:8). Дикхаја сар исполнинена пе ко амаро време о библиска пророштвија. Дикхаја сар буте манушенгоро живото овела пошукар кеда почминена те икерен о библиска советија. Акала доказија керена амен те ова посигурна кај о шукар хабери башо Царство ваљани те шунен ле сарине.

16. Спрема адава со пишинела ко Псалм 46:1-3, сар и вера ко Јехова хем ко Исус поможинела аменге те ова поодлучна те проповедина?

¹⁶ Исто аѓаар иси амен вера ко Јехова, кастар со авела и порака со проповединаја ла, хем ко Исус, коле со о Јехова денѓа ле власт те овел Цари ко Царство (Јован 14:1). Бизи разлика со ка случинел пе аменге, о Јехова секогаш ка овел амари заштита хем сила. (Читин Псалм 46:1-3.) Освен адава, иси амен доверба кај о Исус таро небо водинела о проповедибе аѓаар со користинел пли сила хем и власт со денѓа ле о Јехова (Мат. 28:18-20).

17. Вакер јекх пример соске ваљани понадари да те проповедина.

 ¹⁷ И вера керела те ова панда посигурна кај о Јехова ка наградинел амаро трудо, хем адава шај те керел ле ко начинија со ни на очекујнаја (Проп. 11:6). На пример, секова диве милје мануша дикхена амари литература сој изложими ко количке хем ко штандија. Дали акаја тани шукар метода проповедибаске? Оја! Ки Амари служба башо Царство таро ноември 2014 берш пишинела сине баши јекх терни студентка која со мангела сине те пишинел јекх есеј башо е Јеховаскере сведокија. Нашти сине те аракхел амари дворана, ама аракхља амари литература ко штанди узо универзитети, хем о Сведокија денѓе ла материјали башо лакоро есеј. Ко крајо, ој крстинѓа пе хем акана служинела сар општо пионери. Асавке искуствија мотивиринена амен понадари да те проповедина соске иси панда мануша со ваљани те шунен башо Царство.

18. Соске шај те ова сигурна кај о проповедибе башо Царство ка овел завршимо ко време кеда о Јехова одрединѓа?

¹⁸ Шај те ова сигурна кај о проповедибе башо Царство ка завршинел ко време. Те дикха со уло е Ноеске ко диве. О Јехова докажинѓа кај ов секогаш керела о буќа ко најшукар време. Околу 120 берш англедер, о Јехова одлучинѓа кеда ка овел о Потоп. Бут берша покасно, о Јехова вакерѓа е Ноеске те градинел и арка. Изгледа 40 или 50 берша англедер те авел о Потоп, о Ное керела сине бут бути. Иако о мануша на шунена ле сине, ов понадари да проповединела сине са џикоте о Јехова на вакерѓа леске кај тано време те чхивел е животнен ки арка. Тегани, точно ко време, „о Јехова пханља о удар“ (1. Мој. 6:3; 7:1, 2, 16).

19. Со шај те очекујна ако на мукхаја амаро вас те одморинел?

¹⁹ Панда хари о Јехова ка анел крајо башо проповедибе. Пало адава, ов ка уништинел е Сатанаскоро свето хем ка керел нево свето кова со ка овел пхердо манушенцар со ка шунен е Девле. Џи тегани, те ова сар о Ное, о Авакум хем јавера кола со на мукхле те одморинел пе ленгоро вас. Понадари да те ачхова концентририме ко проповедибе, те ова стрплива хем те овел амен зорали вера ко е Јеховаскере ветувања.