1. Сар осетинена пе несаве кеда некој таро ленгере мангле тано исклучимо?

ДАЛИ некој таро тле мангле тано исклучимо таро собрание? Адава шај бут те дукхал! Јекх пхен со викинела пе Хилда вакерела: „Кеда пало 41 берш брако мо ром муло, мислинѓум кај адава тано нешто најпхаро со шај сине те случинел пе манге. * Ама кеда мо чхаво мукхља о чачипе, пле ромња хем пле чхавен, адава сине манге бут, бут попхаро“.

2-3. Спрема Псалм 78:40, 41, сар осетинела пе о Јехова кеда лескере слуге цидена пе лестар?

² Замислин само кобор дукхандило е Јехова кеда несаве таро ангелија иранѓе леске пло думо! (Јуда 6). Хем размислин кобор бут сине разочаримо кеда о Израелција, колен со бут мангела лен сине, бут пути бунинѓе пе против лесте. (Читин Псалм 78:40, 41.) Шај те ове сигурно кај амаре небесно Даде исто аѓаар дукхала ле кеда некој таро амаре мангле цидела пе лестар. Адалеске со хаљовела кобор туке пхаро, ов ка сикавел туке сочувство аѓаар со ка охрабринел тут хем ка поддржинел тут.

³ Ки акаја статија ка дикха со шај амен те кера те шај о Јехова те поможинел аменге те икљова ко крајо акале дукхаја. Исто аѓаар ка дикха сар шај амен те поможина е јаверенге ко собрание со соочинена пе акале пхарипаја. Ама, најангле те дикха саво негативно размислување ваљани те избегина.

4. Сар осетинена пе бут родителија кеда о чхаво или и чхај мукхена е Јехова?

⁴ Кеда јекх чхаво или чхај ка мукхен е Јехова, о родителија бут пути пучена пе, дали шај те керен сине нешто повише те шај те поможинен е чхавеске те ачхол ко чачипе. Откеда лескоро чхаво сине исклучимо, о пхрал о Лук признајнела: „Мислинава сине кај ме сиум криво. Чак сине ман лошна суне. Понекогаш ровава сине хем ми душа дукхала ман сине“. И Елизабет, колакоро чхаво исто аѓаар сине исклучимо, бут пути пучела пе сине: „Коте грешинѓум? Мислинава сине кај на трудинѓум ман доволно те сикавав ме чхаве те мангел е Јехова“.

5. Кој тано одговорно ако некој цидела пе таро Јехова?

⁵ На ваљани те бистра кај о Јехова секоле јекхеске денѓа слободно волја. Акава значинела кај шај те бирина дали ка шуна ле или на. Несаве чхавен на сине лен родителија со сине ленге шукар пример. Ама, ола одлучинѓе те служинен е Јеховаске хем ачхиле леске верна. А јаверен сине лен родителија кола со бут трудинѓе пе те сикавен лен те манген е Јехова, ама кеда бариле мукхле о чачипе. Значи секова јекх амендар мора те одлучинел дали ка служинел е Јеховаске (Ис. Нав. 24:15). Адалеске, ако тумаре чхаве чхинавѓе те служинен е Јеховаске, на ваљани те мислинен кај тумен сиен крива!

6. Сар шај те осетинен пе о терне кеда ленгере родителија цидена пе таро Девел?

⁶ Понекогаш о родители мукхела о чачипе, па чак пле фамилија (Пс. 27:10). Акава шај те овел бут страшно е чхавенге кола со поштујнена сине пумаре родителен. И Естер, колакоро дад сине исклучимо вакерела: „Бут пути ровава сине, соске халиљум кај ов на само со цидинѓа пе таро чачипе, него ов свесно одлучинѓа те мукхел е Јехова. Ме мангава ме даде, адалеске кеда сине исклучимо, бут пути сиум сине секирими баши лесте. Некобор пути чак сине ман панична нападија“.

7. Со мислинела о Јехова башо терне коленгере со родителија тане исклучиме?

⁷ Тернален, ако јекх таро тумаре родителија тано исклучимо, бут аменге жал! Овен сигурна кај о Јехова да џанела кобор туменге пхаро. Ов мангела тумен хем ценинела тумари верност, хем исто аѓаар амен да — тумаре пхраља хем пхења. Освен адава, ма бистрен кај тумен на сиен одговорна башо тумаре родителенгере одлуке. Сар со дикхлем англедер, о Јехова мукхља секова мануш коркори те одлучинел. Хем секова крстимо објавители мора „те пхиравел пло товар“ (Гал. 6:5).

8. Со шај те керен о верна членија тари фамилија џикоте аџикерена ленгоро мангло те иранел пе ко Јехова? (Дикх хем и рамка „ Иран тут ко Јехова“.)

⁸ Кеда некој кас со мангеа цидела пе таро Јехова, тегани нормално тано те надине тут кај јекх диве палем ка иранел пе. Ама со шај те кере џикоте на овела адава? Шај те кере бути ки тли духовност. Ако кереа адава, ка де шукар пример е јаверенге тари фамилија хем шај чак околеске сој исклучимо. Исто аѓаар, ка ове посилно те шај те издржине и дукх. Те дикха акана со шај те кере те шај тли вера те ачховел зорали.

9. Ко саве начинија шај те добине сила таро Јехова? (Дикх хем и рамка „ Стихија со ка утешинен тут ако некој кас со мангеа цидинѓа пе таро Јехова“.)

⁹ Икер тут ко тле шукар духовна навике. Бут тано важно те зајакнине тут хем тле фамилија. Сар шај те кере адава? Шај те добине сила таро Јехова аѓаар со редовно ка читине е Девлескоро лафи, ка размислине башо адава со читинеа хем аѓаар со ка ове редовно ко состанокија. И Џоана, колакоро дад хем пхен мукхле о чачипе, вакерела: „Осетинава ман по смирими кеда читинава башо библиска личностија сар сој и Авигеја, и Естира, о Јов, о Јосиф хем о Исус. Ленгере примерија пхерена ми годи хем мо вило позитивна мисленцар кола со локхјарена ми дукх. Исто аѓаар дикхљум кај кеда шунава амаре современа гиља адава бут охрабринела ман“.

10. Спрема Псалм 32:6-8 со ваљани те кера те шај те истрајна кеда иси амен пхарипа?

¹⁰ Вакер е Јеховаске са со мучинела тут. Кеда сиан разочаримо, ма чхинав те молине тут леске. Молин ле те поможинел туке те дикхе ки ситуација сар ов со дикхела хем те поможинел туке те хаљове о буќа хем „те сикавел тут башо друмо кова со ваљани те џа“. (Читин Псалм 32:6-8.) Џанѓола пе, шај те овел туке бут пхаро те вакере е Јеховаске сар осетинеа тут. Ама о Јехова хаљовела тли дукх ко вило. Ов бут мангела тут хем поттикнинела тут те вакере леске са со бешела туке ко вило (2. Мој. 34:6; Пс. 62:7, 8).

11. Спрема Евреите 12:11, соске ваљани те овел амен доверба кеда о Јехова дела укор мангипаја? (Дикх хем и рамка „ О исклучибе сикавела е Јеховаскоро мангипе спрема аменде“.)

¹¹ Поддржин и одлука. О исклучибе тано јекх начин сар о Јехова воспитинела амен. Акава тано башо сариненгоро шукарипе, хем башо шукарипе околескоро со грешинѓа. (Читин Евреите 12:11.) Несаве таро собрание  шај те вакерен кај о старешине грешинѓе со исклучинѓе некас. Ама ма бистре, асавке мануша обично на мангена те вакерен о лошна буќа со керѓа лен адава со грешинѓа. Амен на џанаја са о детали. Адалеске, те овел амен доверба кај о старешине денѓе пестар са те шај те применинен о библиска начелија хем те судинен „е Јеховаске ко анав“ (2. Лет. 19:6).

12. Сави корист сине несавен адалеске со поддржинѓе е Јеховаскоро укор?

¹² Адалеа со поддржинена е старешиненгири одлука те исклучинен тумаре мангле, тумен шај те поможинен леске те иранел пе ко Јехова. И Елизабет, кола со цитиринѓем англедер вакерела: „Сине аменге бут пхаро те на кера лафи амаре чхавеа кова со сине возрасно. Ама откеда иранѓа пе, ов признајнѓа кај заслужинѓа те овел исклучимо. Покасно, ов вакерѓа кај бут сиклило таро адава со сине исклучимо“. Ој признајнела: „Халиљум кај е Јеховаскоро укор тано секогаш исправно“. Лакоро ром, о Марк, исто аѓаар вакерела: „Бут берша покасно мо чхаво вакерѓа манге кај јекх таро причине соске мангља те иранел пе, сине адаја со амен керѓем баш адава со ваљани сине те кера. Бут сиум благодарно е Јеховаске со поможинѓа аменге те ова послушна“.

13. Со шај те поможинел туке те издржине и дукх?

¹³ Кер лафи несаве амаленцар со шај те хаљовен тут. Дружин тут зрела објавителенцар кола со шај те поможинен туке те овел тут позитивно стави (Изр. 12:25; 17:17). И Џоана, која со спомнинѓем ла англедер, вакерела: „Осетинава ман сине коркори, ама адава со керава сине лафи амаленцар касте со сине ман доверба, бут поможинѓа манге“. А со шај те кере ако некој таро собрание вакерела туке нешто колеа со керела те осетине тут панда полошно?

14. Соске ваљани те трпина амен јекх јекхеа хем цело вилеа те простина аменге?

¹⁴ Ов стрпливо те пхраленцар хем пхењенцар. Нашти саринендар те очекујна секогаш те вакерен и исправно бути (Јак. 3:2). Сарине амен сием несовршена, адалеске ма изненадин тут ако некој на џанела со те вакерел, или ако вакерела нешто колеа со дукхавела тут, иако шај на мангља намерно те керел адава. На ваљани те бистра е Павлескоро совет: „Трпинен тумен јекх јекхеа хем цело вилеа простинен туменге, чак кеда некој ка вреџинел тумен“ (Кол. 3:13). Јекх пхен колакоро чхаво сине исклучимо вакерела: „О Јехова поможинѓа манге те простинав е пхраленге со пумаре лафенцар поврединѓе ман, иако мангле те охрабринен ман“. Сар шај о собрание те поможинел околенге тари фамилија со ачхиле верна?

15. Со шај те поможинел е фамилиенге колендар со сигенде сине некој исклучимо?

¹⁵ Ов љубезно околенцар тари фамилија со ачхиле верна. Јекх пхен со викинела пе Мирјам, признајнела кај сине лаке незгодно  те џал ко состанокија откеда лакоро пхрал сине исклучимо. Ој вакерела: „Дарава сине со ка вакерен о јавера. Ама сине бут пхраља хем пхења кола со исто аѓаар сине тажна башо адава со случинѓа пе, хем на сине хољаме а ни на вакерѓе нешто негативно башо мо пхрал. Ола керѓе те на осетинав ман коркори“. Јекх јавер пхен вакерела: „Откеда амаро чхаво сине исклучимо, амаре мангле пхраља але те утешинен амен. Несаве вакерѓе аменге кај на џанле со те вакерен, ама рунѓе манцар хем несаве пишинѓе манге охрабрувачко писмо. Адава бут поможинѓа манге“.

16. Сар шај о собрание понадари да те дел поддршка е фамилијаке?

¹⁶ Понадари да поддржин околен сој верна тари фамилија. Посебно акана ваљани ленге тло мангипе хем охрабрување (Евр. 10:24, 25). Понекогаш и фамилија околенгири сој исклучиме приметинѓе кај несаве таро собрание на керена сине више ленцар лафи, сар те пхене ола да сине исклучиме. Ма дозволин те случинел пе адава! Посебно ваљани те пофалина хем те охрабрина е тернен каскере со о родителија чхинавѓе те служинен е Јеховаске. И Марија, колакоро ром сине исклучимо хем мукхља пле фамилија, вакерела: „Несаве пхраља хем пхења але ки манде кхере, керѓе манге хајбаске хем поможинѓе манге те проучинав е чхавенцар. Џанена сине кобор манге пхаро хем рунѓе манцар. Ола бранинѓе ман кеда о јавера вакерена сине буќа баши манде со на сине точна. Чаче бут охрабринѓе ман!“ (Рим. 12:13, 15).

17. Сар шај о старешине те утешинен околен со иси лен пхарипа?

¹⁷ Тумен о старешине, користинен секоја прилика те шај те охрабринен околен тари фамилија со ачхиле верна. Иси тумен бари одговорност те утешинен лен (1. Сол. 5:14). Спремно охрабринен лен, керен ленцар лафи англедер хем пало состанокија. Џан ки ленде кхере хем молинен тумен ленге. Џан ленцар ки служба, или понекогаш викинен лен ки тумари фамилијарно рат. О старешине ваљани те грижинен пе околенге со иси лен пхарипа, хем те сикавен ленге сочувство хем мангипе кова со ваљани ленге (1. Сол. 2:7, 8).

18. Спрема 2. Петрово 3:9, со мангела о Девел те керен окола со грешинѓе?

¹⁸ О Јехова на мангела „никој те овел уништимо него саринен те овел лен прилика те каинен пе“. (Читин 2. Петрово 3:9.) Иако некој шај те керел сериозно грево, сепак лескоро живото тано скапоцено е Девлеске. Ма бистре кај о Јехова платинѓа бари цена башо живото е грешниконгоро — денѓа и откупно жртва пле мангле чхавескири. О Јехова љубезно трудинела пе те поможинел асавкенге те иранен пе ки лесте. Ле иси ле надеж кај ола ка керен адава, сар со шај те дикха тари е Исусескири споредба башо бунтовно чхаво (Лука 15:11-32). Бут џене со мукхле о чачипе покасно иранѓе пе ко пло мангло небесно Дад. Хем о собрание доџакерѓа лен пхравде вастенцар. И Елизабет, кола со цитиринѓем ла англедер, сине бут бахтали кеда лакоро чхаво иранѓа пе. Ој вакерела: „Бут ценинава адава со о јавера охрабринѓе амен те на откажина амен тари амари надеж“.

19. Соске шај понадари да те овел амен доверба ко Јехова?

¹⁹ Секогаш шај те овел амен доверба ко Јехова. Ов никогаш нане те вакерел аменге те кера нешто со ка овел аменге ки штета. Ов тано дарежливо хем сочувствително Дад со бут мангела саринен со мангена ле хем обожавинена ле. Ов сигурно кај о Јехова нане те мукхел тут кеда туке најпхаро (Евр. 13:5, 6). О Марк, со спомнинѓем ле англедер, вакерела: „О Јехова никогаш на мукхља амен. Ов секогаш ка поможинел амен кеда накхаја таро пхаро периоди“. Ов понадари да ка дел тут „и сила која со накхавела и нормално“ (2. Кор. 4:7). Оја, ту шај те ачхове верно хем те овел тут надеж чак кеда некој со мангеа ле мукхела е Јехова.