1. Која шукар цел шај те чхива аменге сар со пхујроваја?

СО ПОПХУРЕ оваја, шај дараја кај на сием више корисна е Јеховаске сар со сием сине англедер. Шај на сием физички силна сар кеда сием сине потерне. Ама, шај те користина амари мудрост хем о искуство со стекнинѓем ле те шај те поможина е потерненге те овен корисна ки е Јеховаскири организација хем те прифатинен повише одговорностија. Јекх пхрал со бут берша тано старешина вакерѓа: „Кеда нашти сине повише те керав сар со керава сине англедер адалеске со пхуриљум, сиум сине благодарно со сине потерне способна пхраља кола со сине спремна те завршинен о задаче“.

2. Башо со ка кера лафи ки акаја статија?

² Ки англуни статија керѓем лафи башо адава сар е потернен шај те овел лен корист кеда овена паше амала е попхуренцар. Ки акаја статија, ка дикха сар и понизност, и скромност, и благодарност хем и дарежливост шај те поможинен е попхуренге те соработинен е потерненцар хем сар адава ка поможинел сариненге ко собрание.

3. Спрема Филипјаните 2:3, 4, сој тани и понизност, хем сар шај адава те поможинел јекхе христијанеске?

³ О попхуре мора те овен понизна ако мангена те поможинен е терненге. О понизно мануш дикхела е јаверен сар побаре пестар. (Читин Филипјаните 2:3, 4.) О попхуре кола со сикавена акаја особина, бут пути хаљовена кај иси повише библиска начинија сар шај шукар те завршинел пе јекх задача. Адалеске, ола на очекујнена таро јавера те керен  о буќа ко исто начин сар ола со керена лен сине англедер (Проп. 7:10). Иако иси лен баро искуство колеа со шај те сикавен е потернен, сепак ола хаљовена кај и „сцена акале светоскири менинела пе“ хем шај ка ваљани те прилагодинен пе ко неве околностија (1. Кор. 7:31).

4. Сар о покраинска надгледникија сикавена слично стави сар е левитенгоро?

⁴ О пхуре сој понизна, хаљовена кај сар со пхујровена нашти више те керен добором сар со керена сине англедер. На пример, размислин башо амаре покраинска надгледникија. Кеда пхерена 70 берш, ола тане замолиме те служинен ки јавер задача. Адава шај те овел ленге пхаро соске сине бахтале ки адаја задача хем бут мангена ла сине. Освен адава, иси лен бари желба понадари да те служинен ки лате. Ама, ола хаљовена кај пошукар тано о потерне пхраља те керен адаја задача. Адалеа сикавена кај иси лен слично стави сар о левитија таро пурано Израел, кола со ваљани сине те чхинавен е службаја ко свето шатори кеда ка пхерен сине 50 берш. Адала попхуре левитија сине бахтале бизи разлика сави задача сине лен. Ола ревно керена сине са со шај ко пле неве задаче хем поможинена сине исто аѓаар е терненге (4. Мој. 8:25, 26). Авдиве, окола со англедер сине покраинска надгледникија, иако чхинавѓе те посетинен о собранија, ола дена пестар са те поможинен ко собрание коте со служинена акана.

5. Со шај те сикљове таро Ден хем тари Кети?

 ⁵ Размислин башо Ден, кова со 23 берш служинѓа сар покраинско надгледнико. Кеда пхерѓа 70 берш, ов хем лескири ромни и Кети сине бичхалде те служинен сар специјална пионерија. Сар прилагодинѓе пе ко неве околностија? О Ден вакерела кај акана тано позафатимо него англедер! Акана грижинела пе башо пле собраниска одговорностија, поможинела е пхраленге те исполнинен о условија башо слуга помошникија, хем обучинела е јаверен те сведочинен ко прометна тхана хем ко затворија. Тумен о попхуре, бизи разлика дали сиен ки полновремено служба или на, шај бут те поможинен е јаверенге. Сар? Прилагодинен тумен ко тумаре неве околностија, чхивен туменге неве целија, хем концентриринен тумен ко адава со шај те керен, а на ко адава со нашти те керен.

6. Соске тано мудро те ова скромна? Вакер пример.

⁶ Јекх скромно мануш хаљовела џи кај тане лескере границе (Изр. 11:2). Адалеске, ов на очекујнела пестар повише таро адава со шај те керел. Аѓаар шај те овел бахтало хем успешно. Е скромно мануше шај те споредина ле некасаја со уклела јекх брего врдаја. О возачи мора те менинел ки потикни брзина те шај те уклел о брего врдаја. Акава значинела кај веројатно ка возинел побавно, ама сепак ка возинел. Слично, о скромно мануш џанела кеда ваљани „те менинел ки потикни брзина“ те шај понадари да те овел активно хем успешно ки служба башо Јехова (Фил. 4:5).

7. Сар сикавѓа о Варзелај скромност?

⁷ Размислин башо Варзелај, коле со сине ле 80 берш, кеда о цари о Давид викинѓа ле те живинел ко царско дворо. О Варзелај сине скромно хем на прифатинѓа е царескири покана. Адалеске со сине пхуро, ов џанља кај ка овел леске пхаро те керел адава хем адалеске денѓа предлог о Химам, кова со сине потерно, те џал леске ко тхан (2. Сам. 19:35-37). Слично сар о Варзелај, о попхуре тане бахтале со шај те ден е потерне пхраленге прилика те служинен.

8. Сар о Давид сикавѓа скромност кеда мангља те градинел о храми?

⁸ О цари о Давид исто аѓаар сине бут шукар пример баши скромност. Ов бут мангља те градинел кхер е Јеховаске. Ама кеда о Јехова вакерѓа леске кај акаја предност ка дел ла е Соломонеске, кова со сине потерно, о Давид прифатинѓа акаја одлука хем керѓа са те шај те поддржинел акава проекти (1. Лет. 17:4; 22:5). О Давид на мислинѓа кај ов пошукар ка керел адаја задача адалеске со о Соломон сине „терно хем на сине искусно“ (1. Лет. 29:1). Ов џанља кај о градибе е храмескоро зависинела таро е Јеховаскоро берекети, а на таро берша хем о искуство адаленгоро со ка водинен и бути. Слично сар о Давид, о попхуре авдиве панда тане активна, чак кеда ленгири задача менинела пе. Хем џанена кај о Јехова ка дел берекети е терненге со керена о задаче кола со ола керена сине англедер.

9. Сар јекх члени таро одбор е подружницакоро сикавѓа скромност?

⁹ Ко амаро време исто аѓаар иси амен примерија баши скромност сар сој о пхрал Шигео. Ко 1976 берш, кеда сине ле 30 берш, ов сине именујмо те служинел ко одбор јекхе подружницакоро. Ко 2004 берш ов почминѓа те служинел сар координатори ко адава одбор. Покасно, ов халило кај на сине ле више сила сар англедер хем кај нашти више сине те завршинел шукар и бути. Ов ки молитва размислинѓа кај ка овел шукар ако  јекх потерно пхрал лела адаја одговорност. Иако нане више координатори, ов понадари да служинела сар члени ко адава одбор. Сар со дикхлем таро Варзелај, таро Давид хем таро Шигео, окова сој понизно хем скромно, концентриринела пе ко е терненгере јака стране, а на ко адава кај нане искусна. Ов на дикхела лен сар конкуренција, него сар соработникија (Изр. 20:29).

10. Саво стави иси е попхурен спрема о потерне ко собрание?

¹⁰ О попхуре дикхена ко потерне сар поклонија таро Јехова хем ола тане благодарна башо адава со керена о терне. Кеда авена ко попхуре берша, ола ценинена е тернен сој тане спремна те користинен пли сила те завршинен о задаче хем те служинен ко собрание.

11. Сар о извештај таро лил Рут 4:13-16 сикавела кобор тано шукар е попхуренге кеда прифатинена помош таро потерне?

¹¹ Ки Библија, и Ноемина тани бут шукар пример башо попхуре кола со сикавѓе благодарност хем прифатинѓе помош таро потерне. Откеда муло лакоро чхаво, ој вакерѓа пле бојраке, е Рутаке, те иранел пе ки пли фамилија. Ама, и Рут сине упорно те џал лаја ко Витлеем, хем и Ноемина прифатинѓа адаја помош (Рут 1:7, 8, 18). Адаја одлука сине бут шукар е солдујенге. (Читин Рут 4:13-16.) И понизност ка поттикнинел е попхурен те џан пало е Ноеминакоро пример.

12. Сар о апостол Павле сикавѓа пли благодарност?

¹² О апостол Павле сине благодарно баши помош со добинѓа ла таро пхраља. На пример, ов благодаринѓа е христијаненге таро Филипи башо поклонија со бичхалѓе леске  (Фил. 4:16). Сикавѓа благодарност баши помош со добинѓа ла таро Тимотеј (Фил. 2:19-22). Исто аѓаар, благодаринѓа е Девлеске башо пхраља со але те охрабринен ле кеда сар затворенико ингарѓе ле ко Рим (Дела 28:15). О Павле сине енергично мануш кова со патујнела сине бут милја километре те шај те проповединел хем те охрабринел е пхрален. Сепак, ов понизно прифатинела сине помош таро пхраља хем таро пхења.

13. Сар шај о попхуре те сикавен кај тане благодарна башо терне?

¹³ Тумен о попхуре, шај те сикавен тумари благодарност е терненге таро тумаро собрание ко повише начинија. Ако мангена те поможинен туменге башо превоз, пазарибе или башо јавера буќа, прифатинен ленгири помош. Ма бистрен кај адава тано јекх начин сар о Јехова сикавела туменге мангипе. Шај ка овен изненадиме кобор паше амала шај те овен околенцар со поможинена туменге. Секогаш, трудинен тумен те поможинен е терненге духовно те напредујнен, хем вакерен ленге кај сиен бут бахтале со дикхена кај ола мангена ки побари мера те служинен ко собрание. Накхавен ленцар време хем вакерен ленге о искуствија таро тумаро живото. Кеда керена аѓаар, ка сикавен кај сиен благодарна е Јеховаске башо терне со иси ко собрание (Кол. 3:15; Јован 6:44; 1. Сол. 5:18).

14. Сар сикавѓа о Давид дарежливост?

¹⁴ Таро цари о Давид сикљоваја панда јекх важно особина која со о попхуре ваљани те сикавен ла — дарежливост. Ов денѓа баро прилог таро пло барвалипе те шај те поддржинел о градибе е храмескоро (1. Лет. 22:11-16; 29:3, 4). Керѓа акава иако и заслуга башо градибе о храми ка овел денди лескере чхавеске е Соломонеске. Слично, кеда нане те овел амен више сила те учествујна ко градежна теократска објектија, шај понадари да те поддржина акала проектија аѓаар со ка да доброволна прилогија спрема амаре околностија. Исто аѓаар, шај те поможина е терненге амаре искуствоја со стекнинѓем ле.

15. Саве скапоцена поклонија денѓа о апостол Павле е Тимотееске?

¹⁵ Размислин исто аѓаар башо пример кова со денѓа ле о апостол Павле баши дарежливост. Ов викинѓа е Тимотее те џал леа ки мисионерско служба, хем о Павле дарежливо сикавѓа акале терне сар те проповединел хем те сикавел (Дела 16:1-3). Ов обучинѓа е Тимотее те овел шукар проповеднико хем учители (1. Кор. 4:17). Пало адава, о Тимотеј користинѓа адава со сиклило те шај те обучинел е јаверен.

16. Соске о Шигео обучинѓа е јаверен?

¹⁶ О попхуре авдиве на дарана кај нане више те овен корисна ако обучинена е потернен те керен о задаче кола со ола англедер керена лен сине ко собрание. На пример, о Шигео коле со спомнинѓем ле англедер, бершенцар обучинела сине е потернен со служинена ко одбор е подружницакоро. Ов керѓа акава те шај те поддржинел о активностија башо Царство ки пхув коте со живинела. Адалеске кеда ов нашти сине више те служинел сар координатори, јекх шукар обучимо пхрал шај сине те заменинел ле. О Шигео служинела повише таро 45 берш ко одбор е подружницакоро, хем ов понадари да користинела пло искуство те шај те поможинел е потерне пхраленге. О пхраља сар о Шигео тане баро берекети машкар е Девлескоро народо!

17. Спрема Лука 6:38, со шај о попхуре те ден е јаверенге?

 ¹⁷ Тумен о попхуре пхраља хем пхења сиен доказ кај о најшукар живото тано ако верно служинаја е Јеховаске. Тумаре примереа сикавена кај врединела те трудина амен те сикљова о библиска начелија хем те применина лен ко живото. Џанена сар керена пе сине о буќа англедер, ама исто аѓаар хаљовена кај ваљани те прилагодинен тумен ко неве околностија. Тумен о попхуре со сигенде крстинѓен тумен, шај исто аѓаар те поможинен е терненге ко бут начинија. Шај те вакерен ленге сар адава со запознајнѓен е Јехова ко попхуре берша керѓа тумен бахтале. О потерне ка уживинен те шунен тумаре искуствија хем о буќа со сиклилен ко тумаро живото. Ако сиен дарежлива аѓаар со ка обучинен е јаверен башо буќа со сиклилен лен ко тумаро живото, о Јехова ка дел тумен бут берекетија. (Читин Лука 6:38.)

18. Сар шај о пхуре хем о терне те поможинен јекх јекхеске?

¹⁸ Кеда тумен о попхуре ка овен паше е терненцар, тегани ка шај те поможинен јекх јекхеске (Рим. 1:12). Секоле јекхе иси ле нешто корисно со е јавере нане ле. Е пхурен иси лен мудрост хем искуство кола со стекнинѓе лен ко пло живото. А е потернен иси лен сила. Кеда о терне хем о пхуре соработинена сар амала, ола анена слава амаре небесно Дадеске хем тане берекети сариненге ко собрание.