1. Кола возбудлива буќа ка случинен пе џикоте трајнена о милја берша?

 КОБОР шужо време ка овел кеда ка почминел о воскресение ки пхув џикоте трајнена о милја берша. Сарине кастар со муло некој, едвај аџикерена палем те дикхен ле. О Јехова да едвај аџикерела те дикхел лен (Јов 14:15). Шај те замислина аменге кобор ка ова сарине бахтале кеда палем ка дикха амаре манглен. Сар со дикхлем ки англуни статија, о праведна ка „воскреснинен животоске“ соске ленгере анава тане пишиме „ко лил е животоскоро“ (Дела 24:15; Јован 5:29). Шај бут џене таро амаре мангле ка овен машкар о прва со ка воскреснинен. b А о неправедна — окола со на сине лен шукар прилика те запознајнен е Јехова хем те служинен леске англедер те мерен — „ка воскреснинен судибаске“.

2-3. а) Спрема Исаија 11:9, 10 која ка овел и најбари образовно програма ки манушикани историја? б) Башо со ка кера лафи ки акаја статија?

² Са о воскресниме ка ваљани те овен сикавде (Иса. 26:9; 61:11). Значи, ка ваљани те организиринел пе и најбари образовно програма ки цело манушикани историја. (Читин Исаија 11:9, 10.) Соске? Јекх причина тани адаја со о неправедна  со ка воскреснинен ка ваљани те сикљовен башо е Девлескоро Царство, башо Исус Христос хем лескири откупно жртва, башо адава кобор тано важно е Јеховаскоро анав хем соске само ле иси ле право те владинел. Чак о праведна ка ваљани те сикљовен кола јавера да буќа керѓа о Јехова те шај те исполнинел пли намера. Несаве таро акала верна мануша муле англедер те овел завршими и Библија. Значи хем о неправедна хем о праведна ка ваљани те сикљовен башо бут буќа.

³ Ки акаја статија ка кера лафи башо следна пучиба: Ко саво начин ка организиринел пе акаја бари образовно програма? Со ка случинел пе околенцар со ка реагиринен позитивно ко адава со ка сикљовен, а со ка случинел пе околенцар со нане те реагиринен позитивно? О одговорија таро акала пучиба тане аменге важна авдиве. Сар со ка дикха, несаве интересна пророштвија таро лил Даниел хем Откровение ка поможинен аменге поточно те хаљова со ка случинел пе кеда о муле ка воскреснинен. Прво, те дикха о возбудлива настанија сој пророкујме ко Даниел 12:1, 2.

4-5. Со откринаја таро Даниел 12:1 башо последна диве?

⁴ Читин Даниел 12:1. О лил Даниел откринела аменге ко кова редо ка случинен пе несаве возбудлива настанија ко последна диве. На пример ко Даниел 12:1 пишинела кај о Михаел, о Исус Христос, „терѓола те поможинел [е Девлескере] народоске“. Адава дело таро пророштво почминѓа те исполнинел пе ко 1914 берш кеда о Исус уло Цари ко е Девлескоро небесно Царство.

⁵ Ама е Даниелеске исто аѓаар сине вакердо кај о Исус „ка уштел“ ко „време е неволјакоро сави со на сине откеда постојнела народо па џи ко адава време“. Акава „време е неволјакоро“ тани и „бари неволја“ која сој спомними ко Матеј 24:21. О Исус уштела, или керела нешто, те шај те бранинел е Девлескере народо ко крајо таро акава време е неволјакоро, јавере лафенцар, ко Армагедон. Ко лил Откровение баши ленде вакерела пе кај тане „о баро мноштво“ со авена тари бари неволја (Отк. 7:9, 14).

6. Со ка случинел пе откеда о баро мноштво ка преживинел и бари неволја? Објаснин. (Дикх хем ко Пучиба таро читателија ко акава број тари кула кова со керела лафи башо воскресение животоске ки пхув.)

⁶ Читин Даниел 12:2. Со ка случинел пе откеда о баро мноштво ка преживинел акава време е неволјакоро? Акава пророштво на исполнинела пе ко симболично начин — сар со англедер хаљоваја сине кај е Девлескере слуге ка воскреснинен ко духовно поглед ко последна диве. c Наместо адава, акале пророштвоја мислинела пе ко воскресение со ка случинел пе ко нево свето. Соске вакераја адава? О лафи „право“ користинела пе исто аѓаар ко Јов 17:16 хем таро контекст шај те дикха кај акале лафеа мислинела пе ко гробо. Акава сикавела кај ко Даниел 12:2 мислинела пе ко дословно воскресение кова со ка случинел пе откеда ка завршинен о последна диве хем пали и војна Армагедон.

7. а) Ки сави смисла несаве ка овен воскресниме „башо вечно живото“? б) Соске тано адава „пошукар воскресение“?

⁷ Тегани, со значинена о лафија таро Даниел 12:2 коте со пишинела кај несаве  ка воскреснинен „башо вечно живото“? Адава значинела кај о воскресниме со ка продолжинен те запознајнен е Јехова хем ка овен леске послушна хем е Исусеске џикоте трајнена о милја берша, ко крајо ка добинен вечно живото (Јован 17:3). Акава ка овел „пошукар воскресение“ таро окола со случинѓе пе ко пурано време (Евр. 11:35). Соске? Адалеске со адала несовршена мануша со сине воскресниме ко крајо палем муле.

8. Соске јавера ка воскреснинен „баши вечно лаџ“?

⁸ Ама на са о воскресниме ка манген те прифатинен те овен сикавде таро Јехова. Е Даниелескоро пророштво вакерела кај несаве ка воскреснинен „баши вечно лаџ“. Адалеске со ка сикавен бунтовно стави ленгере анава нане те овен пишиме ко лил е животоскоро хем нане те добинен вечно живото. Наместо адава ка добинен „вечно лаџ“ или уништување. Значи ко Даниел 12:2 керела пе лафи башо адава со ка случинел пе ко крајо са околенцар со ка воскреснинен хем кај и одлука со ка анел пе баши ленде ка зависинел таро адава со ка керен откеда ка воскреснинен d (Отк. 20:12). Несаве ка добинен вечно живото а несаве на.

9-10. Со јавер ка случинел пе откеда ка завршинел и бари неволја хем кој тане адала со „ка светинен сар о ѕвезде“?

⁹ Читин Даниел 12:3. Со јавер ка случинел пе откеда ка накхел о „време е неволјакоро“? Ко трито стихо таро Даниел 12-то поглавје исто аѓаар керела пе лафи башо нешто со ка случинел пе откеда ка завршинел и бари неволја.

¹⁰ Кој тане адала со „ка светинен сар ѕвезде“? О Матеј 13:43 поможинела аменге те открина кој тане адала кеда вакерела: „Тегани о праведникија ка светинен сар о кхам ко Царство пумаре Дадескоро“. Кеда о Исус вакерѓа акала лафија ов керела сине лафи башо „чхаве е Царствоскере“ кола сој лескере помазиме пхраља хем со ка служинен заедно леа ко небесно Царство (Мат. 13:38). Значи ко Даниел 12:3 сигурно мислинела пе башо помазаникија хем баши задача која со ола ка керен ла џикоте трајнена о милја берша.

11-12. Сави задача ка овел е 144.000 џикоте трајнена о милја берша?

¹¹ Сар ка анен о помазаникија буте џенен ки праведност? О помазаникија ка соработинен заедно е Исусеа те шај те водинен и образовно програма која со ка икерел пе ки пхув џикоте трајнена о милја берша. О 144.000 нане те владинен само сар царија него исто аѓаар ка служинен сар свештеникија (Отк. 1:6; 5:10; 20:6). Адалеске ола ка шај те поможинен ко „сасљарибе е народон“ хем те поможинен е манушенге хари по хари те авен џи ко совршенство (Отк. 22:1, 2; Езек. 47:12). Кова баро бахталипе ка овел адава е помазаниконге.

¹² Кој ка овен машкар о адала „бут џене“ кола со ка овен анде џи ки праведност? Ки адаја група ка овен окола со ка воскреснинен хем исто аѓаар окола со ка преживинен о Армагедон заедно е чхавенцар со ка бијанѓовен ко нево свето. Џи ко крајо таро милја берша са окола со ка овен џивде ки пхув ка овен совршена. Тегани, кеда точно ка овен пишиме ленгере анава трајно пенкалоја ко лил е животоскоро?

13-14. Со ка ваљани са о совршена мануша те сикавен англедер те добинен вечно живото?

¹³ На ваљани те бистра кај ако некој тано совршено на значинела кај автоматски ка добинел вечно живото. Размислин башо Адам хем и Ева. Иако ола сине совршена сепак ваљани сине те сикавен кај тане послушна е Јеховаске те шај те добинен вечно живото. Ама жално тано адава со ола на сине леске послушна (Рим. 5:12).

¹⁴ А сар ка овел са околе манушенцар со ка овен џивде ки пхув ко крајо таро милја берша? Ола сарине ка овен совршена. Дали са адала совршена мануша ка поддржинен е Јехова ки цело вечност? Или несаве лендар ка овен сар о Адам хем и Ева кола со иако сине совршена на ачхиле верна? Сар шај те џана о одговор ко акала важна пучиба?

15-16. а) Кеда ка овел саринен прилика те сикавен пумари верност е Јеховаске? б) Со ка случинел пе пало акава испит?

¹⁵ О Сатана ка овел пханло милја берша. Ко адава периоди ов ка нашти никас те ховавел. Ама ко крајо таро адала милја берша ов ка овел ослободимо. Тегани ов ка пробинел те ховавел е совршена манушен. Ко адава испит са е совршена манушен ки пхув ка овел лен прилика јасно те сикавен дали ка ден чест е Јеховаскере анавеске хем ка поддржинен лескоро владибе (Отк. 20:7-10).  Дали ленгере анава ка овен трајно пишиме ко лил е животоскоро бут ка зависинел таро адава ки каскири страна ка овен ко адава испит.

¹⁶ И Библија вакерела кај ка овен мануша со ка отфрлинен е Јеховаскоро владибе, исто сар о Адам хем и Ева. Со ка случинел пе ленцар? Ко Откровение 20:15 пишинела: „Секова јекх со на сине пишимо ко лил е животоскоро сине фрдимо ко јагало езеро“. Акава сикавела кај акала бунтовникија ка овен уништиме засекогаш. Ама побаро дело таро совршена мануша ка ачховен верна ко акава последно испит. Ленгере анава ка овен пишиме трајно ко лил е животоскоро.

17. Со вакерѓа о ангели е Даниелеске кај ка случинел пе ко амаро време? (Даниел 12:4, 8-10).

¹⁷ Кобор сием воодушевиме кеда размислинаја башо акала настанија со ка случинен пе ки иднина. Ама о Даниел исто аѓаар добинѓа јекх важно информација таро јекх ангели башо адава со ка случинел пе ко амаро време, „ко време е крајоскоро“. (Читин Даниел 12:4, 8-10; 2. Тим. 3:1-5). О ангели вакерѓа е Даниелеске: „О чачутно пенџарибе  ка бајрол“. Значи акава пророштво ка овел бут појасно е Девлескере народоске ко амаро време. Ама о ангели исто аѓаар вакерѓа кај „о лошна ка керен лошнипе хем нијекх таро адала лошна нане те хаљовел“.

18. Со ка случинел пе панда хари околенцар сој лошна?

¹⁸ Авдиве бут џене шај мислинена песке кај ништо нане те случинел пе околенге со керена лошнипе (Мал. 3:14, 15). Ама панда хари о Исус ка судинел околенге сој сар бузња хем ка одвојнел лен таро окола сој сар бакхре (Мат. 25:31-33). Акала лошна нане те преживинен и бари неволја, а нане ни те воскреснинен ко нево свето. Ленгере анава нане те овен ко „лил е сетибаскоро“ башо кова со керела пе лафи ко Малахија 3:16.

19. Со ваљани те кера панда акана хем соске? (Малахија 3:16-18).

¹⁹ Акана тано време кеда амаре постапкенцар ваљани те сикава кај на сием машкар окола сој лошна. (Читин Малахија 3:16-18.) О Јехова авдиве кхедела околен сој леске сар „скапоцено сопственост“, околен со бут ценинела. Сигурно мангаја те ова јекх таро адала.

20. Саво ветување сине дендо ко крајо е Даниелеске хем соске едвај аџикереа те исполнинел пе адава ветување?

²⁰ Авдиве амен живинаја ко бут возбудливо време. Ама панда хари ка случинен пе панда бут по интересна буќа. Панда хари ка дикха сар са о лошнипе ка овел цидимо. Пало адава ка дикха сар исполнинела пе о ветување е Јеховаскоро со денѓа ле е Даниелеске: „Ко крајо таро дивеса ка уште те шај те добине тло дело“ (Дан. 12:13). Дали едвај аџикереа те авел о диве кеда о Даниел заедно тле мангленцар палем ка уштел? Ако оја, тегани де тутар са панда акана те ове верно хем шај те ове сигурно кај тло анав ка ачховел пишимо ко е Јеховаскоро лил е животоскоро.