СТАТИЈА ПРОУЧИБАСКЕ 39
Дали тло анав тано пишимо ко „лил е животоскоро“?
Хем англи лесте почминѓа те пишинел пе лил е сетибаскоро башо адала со дарана таро Јехова (МАЛ. 3:16)
ГИЛИ 61 Џан англе, сведокија е Девлескере!
БАШО СО КА КЕРА ЛАФИ a
Таро време е Авелескоро о Јехова чхивела јавера да анава ко „лил е животоскоро“ (Дикх ко пасусија 1-2)
1. Спрема Малахија 3:16, саво лил пишинела о Јехова хем со иси ки лесте?
АНГЛЕДЕР некобор милја берша, о Јехова почминѓа те пишинел јекх посебно лил. Ко акава лил о Јехова пишинела анава хем о прво анав сој тано пишимо ки лесте тано е прво верно сведокоскоро, е Авелескоро b (Лука 11:50, 51). Таро адава време, о Јехова чхивела јавера да анава ко адава лил хем авдиве иси милиоња анава ки лесте. Ки Библија акава лил тано викимо „лил е сетибаскоро“, „лил е животоскоро“ хем „свиток е животоскоро“. Ки акаја статија башо акава лил ка вакера „лил е животоскоро“ (Читин Малахија 3:16; Отк. 3:5; 17:8).
2. Каскере анава тане пишиме ко лил е животоскоро хем сар шај амаре анава те овен пишиме ко адава лил?
2 Ко акава посебно лил тане пишиме са о анава околенгере со обожавинена е Јехова тари исправно дар хем со ценинена лескоро анав. Лен ка овел лен прилика те добинен вечно живото. Амаре да анава шај те овен пишиме ко адава лил само ако развинаја паше амалипе е Јеховаја — амалипе кова со темелинела пе ки откупно жртва е Исусескири (Јован 3:16, 36). Сарине амен мангаја амаро анав те овел пишимо ко адава лил бизи разлика дали иси амен надеж те живина ко небо или ки пхув.
3-4. а) Ако амаро анав тано моментално пишимо ко лил е животоскоро, дали адава значинела кај сигурно ка добина вечно живото? Објаснин. б) Башо со ка кера лафи ки акаја хем ки следно статија?
3 Дали акава значинела кај сарине каскере со анава тане пишиме ко акава лил сигурно ка добинен вечно живото? О одговор аракхаја ле ки 2. Мојсеева 32:33 коте со о Јехова вакерѓа е Мојсееске: „Окова со грешинѓа против манде, ка бришинав ле таро мло лил“. Акава сикавела кај о анава со моментално тане пишиме ко адава лил шај те овен бришиме или цидиме. Сар те пхене о Јехова прво пишинѓа акала анава моливеа (Отк. 3:5). Адалеске ваљани те да амендар са те шај амаро анав те ачхол ко адава лил са џикоте на овела трајно пишимо, сар те пхене пенкалоја.
4 Ама акана шај пучаја амен: „Со вакерела и Библија башо окола каскере со анава тане пишиме ко лил е животоскоро хем башо окола каскере со анава нане пишиме атхе? Кеда ка добинен вечно живото окола каскере со анава ачхиле ко адава лил? Со ка овел околенцар со муле а на сине лен прилика те запознајнен е Јехова? Дали шај ленгере да анава те овен пишиме ко адава лил?“. О одговорија башо акала пучиба ка дикха лен ки акаја хем ки следно статија.
КАСКЕРЕ АНАВА ТАНЕ КО ЛИЛ?
5-6. а) Спрема Филипјаните 4:3, каскере анава тане пишиме ко лил е животоскоро? б) Кеда ленгере анава ка овен трајно пишиме ко лил е животоскоро?
5 Каскере анава тане пишиме ко акава симболично лил? Те шај те одговорина ко акава пучибе, ка кера лафи башо панџ групе мануша. Несавенгере анава таро акала панџ групе тане пишиме ко лил е животоскоро а несавенгере на.
6 Ки прво група тане окола сој бириме те владинен заедно е Исусеа ко небо. Дали ленгере анава тане пишиме ко лил е животоскоро? Оја. Спрема е Павлескере лафија џи ко пле соработникија ко Филипи дикхјола пе кај о анава е помазаниконгере кола со сине бириме те владинен заедно е Исусеа више тане пишиме ко лил е животоскоро. (Читин Филипјаните 4:3.) Ама те шај ленгере анава те ачхон ко адава симболично лил, ола мора те ачховен верна. Хем кеда ка добинен о конечно печати ленгере анава ка овен трајно пишиме ко акава лил. Адава ка овел англедер те мерен или кратко англедер те почминел и бари неволја (Отк. 7:3).
7. Спрема Откровение 7:16, 17 кеда ка овен трајно пишиме ко лил е животоскоро о анава околенгере сој таро баро мноштво?
7 И дујто група тани о баро мноштво таро јавера бакхре. Дали ленгере анава тане више пишиме ко лил е животоскоро? Оја. Дали ленгере анава ка овен ко лил е животоскоро понадари да откеда ка преживинен о Армагедон? Оја (Отк. 7:14). О Исус вакерѓа кај окола сој сар бакхре ка џан „ко вечно живото“ (Мат. 25:46). Ама адава на значинела кај пало Армагедон одма ка добинен вечно живото. Иако ленгере анава тане панда ко лил е животоскоро ама сар ка пхене тане пишиме моливеа. Џикоте трајнена о милја берша коте со ка владинел е Девлескоро Царство, о Исус „ка овел ленгоро пастири хем ка ингарел лен ко тхана котар со авела о пани е животоскоро“. Окола со ка шунен е Христосескоро водство хем ка ачховен верна е Јеховаске ко последно испит, ленгере анава ка овен трајно пишиме ко лил е животоскоро. (Читин Откровение 7:16, 17.)
8. Каскере анава нане пишиме ко лил е животоскоро хем со ка случинел пе ленцар?
8 И трито група тане о бузња со ка овен уништиме ко Армагедон. Ленгере анава нане пишиме ко лил е животоскоро. О Исус вакерѓа кај ола „ка џан ко вечно мерибе“ (Мат. 25:46). Водимо таро духо, о Павле вакерела кај о Девел ка уништинел лен засекогаш (2. Сол. 1:9; 2. Пет. 2:9). Исто аѓаар, са окола со џи акана намерно грешинѓе против о свети дух ка овен вечно уништиме а нане те добинен вечно живото. Јасно тано кај ола нане те воскреснинен (Мат. 12:32; Мар. 3:28, 29; Евр. 6:4-6). Акана те кера хари повише лафи башо дуј групе мануша кола со ка воскреснинен акате ки пхув.
ОКОЛА СО КА ОВЕН ВОСКРЕСНИМЕ
9. Спрема Дела 24:15, кола дуј групе ка воскреснинен ки пхув хем која тани и разлика машкар ленде?
9 И Библија керела лафи башо дуј групе мануша кола со ка воскреснинен, адала тане о праведна хем о неправедна, каске со ка овел денди прилика вечно те живинен ки пхув. (Читин Дела 24:15.) О праведна тане окола со верно служинѓе е Јеховаске џикоте сине џивде. А о неправедна на служинѓе е Јеховаске. Ола тане неправедна англо е Јеховаскере јакхја адалеске со на живинѓе спрема лескере праведна мерилија. Адалеске со о солдуј групе ка воскреснинен, шај ли те вакерел пе кај ленгере анава тане пишиме ко лил е животоскоро? Те шај те дознајна о одговор те кера лафи баши секоја група посебно.
10. Соске ка воскреснинен о праведна хем сави чест ка овел несавен лендар? (Дикх хем о Пучиба таро читателија таро акава број тари кула со керела лафи башо воскресение ки пхув.)
10 И штарто група тане „о праведна“. Ленгере анава сине пишиме ко лил е животоскоро џикоте сине џивде. Дали ленгере анава сине цидиме таро адава лил кеда муле? На, соске ола понадари да тане џивде англо Јехова. О Јехова „нане Девел е муленгоро него е џивденгоро, соске леске ола сарине тане џивде“ (Лука 20:38). Акава значинела кај кеда о праведна ка воскреснинен ки пхув ленгере анава понадари да ка овен пишиме ко лил е животоскоро, иако само моливеа (Лука 14:14). Сигурно несаве таро окола со ка воскреснинен ка овел лен чест те служинен сар „кнезија ки цело пхув“ (Пс. 45:16).
11. Со ка ваљани о неправедна те сикљовен те шај ленгере анава те овен пишиме ко лил е животоскоро?
11 Ко крајо те кера лафи баши панџто група — „окола со нане праведна“. Ола на живинѓе праведно, шај адалеске со на џанена сине со родела лендар о Јехова. Адалеске ленгере анава на сине пишиме ко лил е животоскоро. Ама адалеа со ка воскреснинел лен, о Девел дела лен прилика ленгере анава те овен пишиме ко лил е животоскоро. Акале групаке ка ваљани бари помош. Несаве лендар англедер те мерен керена сине бут лошна буќа. Адалеске ка ваљани те сикљовен те живинен спрема е Јеховаскере праведна мерилија. Ама те шај те керен адава, е Девлескоро Царство ка организиринел те овен сикавде добором бут мануша башо Девел сар никогаш џи акана.
12. а) Кој ка сикавел околен со нане праведна? б) Со ка случинел пе околенцар со нане те манген те применинен адава со сиклиле?
12 Кој ка сикавел околен со нане праведна? О баро мноштво хем о праведна со ка воскреснинен. Те шај о анава околенгере со нане праведна те овен пишиме ко лил е животоскоро, ка ваљани те овен паше е Јеховаја хем те ден леске лафи кај ка служинен леске. О Исус Христос хем о помазаникија внимателно ка дикхен таро небо сар напредујнена окола со нане праведна (Отк. 20:4). Секова јекх со нане те применинел адава со сикљовела нане те ачховел ко живото иако шај чак ка овел ле шел берш (Иса. 65:20). О Јехова хем о Исус шај те читинен о виле хем адалеске нане те дозволинен те ачхол некој ко живото со шај те керел штета ко нево свето (Иса. 11:9; 60:18; 65:25; Јован 2:25).
ВОСКРЕСЕНИЕ ЖИВИБАСКЕ ХЕМ СУДИБАСКЕ
13-14. а) Сар хаљоваја сине англедер е Исусескере лафија сој пишиме ко Јован 5:29? б) Кола деталија ваљани те приметина со аракхљона ко акава стихо?
13 О Исус да керѓа лафи башо окола со ка воскреснинен ки пхув. На пример, ов вакерѓа: „Соске авела време кеда сарине окола сој тане ко гробо ка шунен е Девлескере Чхавескоро гласо хем ка икљон, окола со керѓе шукарипе, башо воскресение живибаске, а окола со керѓе лошнипе башо воскресение судибаске“ (Јован 5:28, 29). Со мангља те вакерел о Исус?
14 Англедер хаљоваја сине кај о Исус акале лафенцар мислинѓа ко постапке со ка керен лен о воскресниме откеда ка воскреснинен. Мислинаја сине кај несаве со ка воскреснинен ка керен шукар буќа а јавера со ка воскреснинен ка керен лошна буќа. Ама ако приметинаја о Исус на вакерела кај окола со ка воскреснинен таро гробија ка керен шукарипе или ка керен лошнипе. О Исус акате користинела минато време. Ов керѓа лафи башо окола со керѓе шукарипе хем башо окола со керѓе лошнипе. Акатар дикхаја кај керела пе лафи башо буќа со керѓе лен англедер те мерен. Хем акава тано логично адалеске со никаске нане те овел дозволимо ко нево свето те керел лошна буќа. Значи о лошнипе со керѓе о неправедна мислинела пе ко буќа со керѓе лен англедер те мерен. Тегани сар те хаљова е Исусескере лафија башо „воскресение живибаске“ хем башо „воскресение судибаске“?
15. Кој ка добинел воскресение живибаске хем соске?
15 О праведна, окола со керѓе шукарипе, ка добинен воскресение живибаске соске ленгере анава тане више пишиме ко лил е животоскоро. Акава значинела кај хем окола со керѓе шукарипе таро Јован 5:29 хем окола сој праведна таро Дела 24:15 тане и исто група со ка воскреснинен. Точно тано кај спрема Римјаните 6:7 кеда некој ка мерел лескере гревија бришинена пе, ама шукар тано те џана кај лескири верно служба на бришинела пе. Значи о анава е праведниконгере понадари да тане ко лил е животоскоро (Евр. 6:10). Ама џанѓола пе, о праведна со ка воскреснинен исто аѓаар ка ваљани те ачховен верна те шај ленгере анава те ачховен ко лил е животоскоро.
16. Со значинела о „воскресение судибаске“?
16 А со ка овел околенцар со керѓе лошнипе англедер те мерен? Иако ленгере гревија сине бришиме ленгере мерибаја, сепак ола на служинѓе е Јеховаске џикоте сине џивде. Адалеске ленгере анава нане пишиме ко лил е животоскоро. Значи окола со керѓе лошнипе тане и исто група мануша сар о неправедна каске со керела пе лафи ко Дела 24:15. Ленгоро воскресение ка овел воскресение судибаске. c О неправедна ка овен судиме ки адаја смисла со ка овен испитиме (Лука 22:30). Ка ваљани те накхел време те шај те дикхел пе дали тане достојна ленгере анава те овен пишиме ко лил е животоскоро. Ленгере анава шај те овен пишиме ко лил е животоскоро само ако чхинавена те живинен сар со живинена сине англедер хем ако дена лафи кај ка служинен е Јеховаске.
17-18. Со ка ваљани те керен са о воскресниме хем башо кола постапке мислинела пе ко Откровение 20:12, 13?
17 Бизи разлика дали англедер сине праведна или неправедна са о воскресниме ка ваљани те овен послушна е законенге со ка аракхљовен ко неве свитокија кола со ка пхравѓон џикоте трајнена о милја берша. О апостол Јован опишинѓа со дикхља ки јекх визија: „Дикхљум е мулен, е барен хем е тикнен сар бешена англо престол хем пхравдиле свитокија. Ама пхравдило јекх јавер свиток, о свиток е животоскоро. Е муленге сине судимо таро адава со сине пишимо ко свитокија спрема ленгере постапке“ (Отк. 20:12, 13).
18 Башо кола постапке ка овен судиме о воскресниме? Дали башо адава со керѓе англедер те мерен? На. Сар со више дикхлем ола сине ослободиме таро пумаре гревија кеда муле. Значи на мислинела пе ко постапке со керѓе лен англедер те мерен, него ко адава сар ка реагиринен ки обука со ка добинен ла ко нево свето. Чак о верна мануша сар сој о Ное, о Самоил, о Давид хем о Даниел ка ваљани те сикљон башо Исус Христос хем те сикавен вера ки лескири откупнина. А кобор повише ка ваљани те керен адава о неправедна.
19. Со ка случинел пе околенцар со нане те манген те прифатинен акаја бут шужи прилика?
19 Со ка случинел пе околенцар со нане те манген те прифатинен акаја бут шужи прилика? Ко Откровение 20:15 пишинела: „Секова јекх со на сине пишимо ко лил е животоскоро сине фрдимо ко јагало езеро“. Значи ола ка овен вечно уништиме. Акава сикавела аменге кобор тано важно те да амендар са те шај амаре анава те овен пишиме ко лил е животоскоро хем те ачховен адатхе.
Јекх пхрал тано дело тари бари образовно програма која со ка овел организирими џикоте трајнена о милја берша. (Дикх ко пасус 20.)
20. Која важно задача ка овел организирими џикоте трајнена о милја берша? (Дикх и слика ки насловно страна.)
20 Кобор интересно време ка овел ко милја берша коте со ка владинел е Девлескоро Царство. Ко адава време сар никогаш англедер, добором бут мануша ка овен сикавде башо Девел. Ама исто аѓаар, ко адава време ка испитинен пе о постапке хем околенгере сој праведна хем околенгере сој неправедна (Иса. 26:9; Дела 17:31). Сар ка овен поучиме са адала мануша? И следно статија ка поможинел аменге те хаљова хем те ценина акала бут шуже подготовке.
ГИЛИ 147 Ка овел вечно живото
a Ки акаја статија иси промена ко амаро хаљојбе башо е Исусескере лафија сој пишиме ко Јован 5:28, 29 коте со керѓа лафи „башо воскресение живибаске“ хем „башо воскресение судибаске“. Ка дикха со значинена адала воскресенија хем кој тане вклучиме ко секова јекх лендар.
b Акава лил почминѓа те пишинел пе „панда таро почеток е светоскоро“, јавере лафенцар кеда почминѓе те живинен о мануша колен со иси лен прилика те овел лен корист тари е Исусескири откупно жртва (Мат. 25:34; Отк. 17:8). Значи, о праведно Авел сине о прво мануш каскоро со анав тано пишимо ко лил е животоскоро.
c Англедер објаснинаја сине кај о лафи „судибаске“ таро Јован 5:29 користинела пе ки негативно смисла или кај некој тано казнимо. Ки оригинално чхиб акава лафи иси ле пошироко значење. Иако шај те значинел осуда или казна, ко акава контекст о Исус веројатно користинѓа акава лафи ки пошироко смисла, ов мислинѓа ко јекх процес коте со проценинеа некас или сар со вакерела јекх библиско речнико „те испитине сар понашинела пе некој“.
