1. Котар шај те џана дали шај те верујна некаске?

 О ДОВЕРЛИВО мануш трудинела пе те ачховел ко пло лафи хем те вакерел о чачипе (Пс. 15:4). О јавера џанена кај шај те верујнен леске. Амен мангаја о пхраља хем о пхења те дикхен аѓаар ки аменде. Со шај те кера те шај е јаверен те овел лен доверба ки аменде?

2. Сар шај те сикава кај сием доверлива?

² Нашти те очекујна о јавера одма те верујнен аменге. И доверба ваљани те заслужинел пе. Вакерела пе кај и доверба тани сар о паре, пхаро тано те заработинел пе ама бут локхо шај те нашавел пе. Некој со чаче заслужинела амари доверба тано о Јехова. Секогаш шај те овел амен доверба ки лесте соске „ов тано верно ко са со керела“ (Пс. 33:4). Хем ов очекујнела амен да те ова сар лесте (Еф. 5:1). Акана те дикха сар несаве таро лескере слуге геле пало лескоро пример хем сикавѓе кај тане доверлива. Исто аѓаар ка дикха 5 особине со ка поможинен амен те ова доверлива.

3-4. Сар сикавѓа о пророко о Даниел кај тано доверливо, хем кола важна пучиба шај те пуча амен?

³ О пророко о Даниел тано бут шукар пример баши доверливост. Иако сине робо ко Вавилон, ов бут сигате уло пенџардо сар мануш колеске со шај сине те верујнел пе. Е манушен сине лен панда повише доверба ки лесте кеда о Јехова поможинѓа леске те објаснинел о суне е Вавилонско цареске, е Навуходоносореске. Ки јекх прилика о Даниел ваљанѓа те вакерел е цареске пхаро хабери таро Јехова.  Башо адава ваљанѓа е Даниелеске храброст соске о Навуходоносор бут сигате хољанела сине (Дан. 2:12; 4:20-22, 25). Пало несаве берша, о Даниел палем сикавѓа кај тано доверливо аѓаар со јасно објаснинѓа со значинела и порака која со сине ко ѕидо ко Вавилон (Дан. 5:5, 25-29). Покасно, исто аѓаар о Медијцо о Дариј хем лескере управителија приметинѓе кај е Даниеле иси ле „посебно духо“. Ола халиле кај о Даниел тано „доверливо хем ки лескири бути нашти те аракхел пе нисави маана, а ни нешто сој нечесно“ (Дан. 6:3, 4). Уствари, чак о паганска управителија признајнѓе кај акава слуга е Јеховаскоро тано доверливо.

⁴ Џикоте размислинаја башо е Даниелескоро пример шај те пуча амен: „Сар сиум пенџардо машкар окола со нане е Јеховаскере сведокија? Дали сиум пенџардо сар некој кова со керела пле задаче хем тано доверливо?“ Соске тано важно те пуча амен акава? Адалеске со анаја фалба е Јеховаске кеда е јаверен иси лен доверба ки аменде.

5. Соске о Ананија сине пенџардо сар доверливо мануш?

⁵ Откеда о управители о Неемија палем градинѓа о ѕидија таро Ерусалим ко 455 берш а.а.е., ов родинѓа доверлива мануша кола со ка грижинен пе баши адаја диз. Јекх лендар со биринѓа лен сине о Ананија, кова со сине одговорно баши Тврдина. И Библија опишинела е Ананија сар „бут доверливо мануш кова со дарала сине таро чачутно Девел повише таро јавера“ (Неем. 7:2). О мангипе спрема о Јехова хем и дар  те на разочаринел ле, поттикнинѓа е Ананија те дикхел сериозно ки било сави задача со добинѓа ла. Асавке особине шај исто аѓаар аменге да те поможинен те ова доверлива ки амари служба башо Јехова.

6. Сар сикавѓа о Тихик кај тано верно амал е Павлеске?

⁶ Те дикха о пример таро верно амал е Павлескоро кова со викинела пе Тихик. Кеда о Павле сине пханло ко јекх кхер, о Тихик сине спремно те поможинел ле хем адалеске о Павле опишинѓа ле сар „верно слуга“ (Еф. 6:21, 22). О Павле на само со денѓа ле те ингарел о писмија е пхраленге ко Ефес хем ко Колоси, него исто аѓаар вакерѓа леске те охрабринел лен хем те утешинел лен. О Тихик сетинкерела амен ко авдисутне верна хем одговорна пхраља кола со грижинена пе башо амаре духовна потребе (Кол. 4:7-9).

7. Со шај те сикљове баши доверливост таро старешине хем слуга-помошникија таро тло собрание?

⁷ Амен бут ценинаја амаре старешинен хем слуга-помошникон баши ленгири доверливост. Исто сар о Даниел, о Ананија хем о Тихик, ола да дикхена сериозно ко пумаре задаче. На пример, кеда сием ко состанок Амаро живото хем служба, ни хари на сумнинаја амен кај са о точке ка овен обработиме. А о старешине тане бут благодарна со шај те овел лен доверба ко пхраља хем пхења кај ка спреминен хем ка икерен пумаре задаче. Исто аѓаар канинаја амаре интересентен ко состанок ко викенд соске на дараја кај нане те овел јавно говор. Хем иси амен доверба кај ка овел амен и литература со ваљани аменге службаке. Акала верна пхраља грижинена пе аменге бут шукар хем сием благодарна е Јеховаске со денѓа амен асавке пхраља. А сар шај амен те сикава кај сием доверлива?

8. Сар шај те ова урамнотежена кеда сикаваја интерес е јаверенге? (Изреки 11:13).

⁸ Амен мангаја амаре пхрален хем пхењен хем адалеске мангаја те џана сар тане. Ама мора те поштујна ленгири приватност. Несаве христијања таро прво веко керена сине е јаверенгоро лафи, мешинена пе сине ко е јаверенгере буќа хем вакерена сине буќа со на ваљанѓе те вакерен (1. Тим. 5:13). Сигурно на мангаја те ова сар ленде. Ама со ако некој вакерела туке нешто лично пестар хем замолинела тут те на вакере адава е јаверенге. На пример, јекх пхен вакерела туке кај тани насвали таро нешто или кај иси ла несаво проблеми хем замолинела тут те на вакере адава е јаверенге. Тегани ваљани те икера амен ко адава. b (Читин Изреки 11:13.) Акана ка дикха јавера да ситуацие коте сој тано важно те ова доверлива.

9. Сар шај секова јекх тари фамилија те сикавел кај тано доверливо?

⁹ Ки фамилија. Секоле јекхе тари фамилија иси ле одговорност те на ширинел е јаверенге несаве приватна фамилијарна буќа. На пример, е ромња шај иси ла несави навика баши која со о ром асала. Дали ка вакерел адава е јаверенге ако тано свесно кај ка лаџакерел ла? Сигурно кај на! Ов мангела пле ромња хем никогаш на би керела нешто колеа со ка поврединел ла (Еф. 5:33). О родителија на ваљани те бистрен кај е тинејџеренге да ваљани те сикавел пе поштовање. На би овела шукар те понижинен пумаре чхавен аѓаар со ка вакерен е јаверенге ленгере грешке (Кол. 3:21). О чхаве ваљани те сикљовен те чутинен ко одредена ситуацие,  аѓаар со нане те вакерен е јаверенге буќа кола со шај те лаџакерен е јаверен тари фамилија (5. Мој. 5:16). Ако сарине тари фамилија икерена несаве кхерутне буќа машкар песте тегани и фамилија ка овел попаше.

10. Со значинела те ове чачутно амал? (Изреки 17:17).

¹⁰ Ко друштво. Иси ситуацие ко живото кеда ка ваљани аменге паше амал каске со ка доверина амен. Понекогаш адава шај те овел пхаро. Шај на сием сикле те вакера е јаверенге сар осетинаја амен. Хем сигурно ка ова бут разочариме ако адава амал каске со пхенѓем сар осетинаја амен вакерела адава е јаверенге. А тари јавер страна, сигурно бут ценинаја ако амаро амал на ширинела о буќа со вакерѓем леске. Ов тано „чачутно амал“. (Читин Изреки 17:17.)

11. а) Сар сикавена о старешине хем ленгере ромња кај тане доверлива? б) Со шај те сикљова таро јекх старешина коле со сине ле јекх доверливо собраниско бути а пало адава сине пле фамилијаја? (Дикх хем и слика.)

¹¹ Ко собрание. О доверлива старешине тане „сар тхан гарајбаске тари бавлал, сар заштита тари бура“ пумаре пхраленге (Иса. 32:2). Џанаја кај ленцар шај те кера лафи башо са хем сием увериме кај нане те вакерен адава е јаверенге. На ваљани те рода те вакерен аменге буќа кола сој доверлива. Исто аѓаар, ценинаја амаре старешиненгере ромњен соске ола на мангена те дознајнен информацие таро пумаре рома. Чаче, шукар тано со е старешиненгере ромња на џанена лична буќа со на ваљани те џанен таро пумаре пхраља хем пхења. Јекхе старешинаскири ромни вакерела: „Бут сиум благодарно со мо ром на вакерела манге соске џала некасте ки пастирско посета а на вакерела манге ни касте џала. Ценинава адава со на оптоваринела ман проблеменцар башо кола со нашти ништо те керав. Аѓаар шај сариненцар те керав слободно лафи. Хем исто аѓаар, шај те овел ман доверба кај ако вакерава мле ромеске сар осетинава ман или иси ман несаво проблеми тегани ов нане те вакерел адава е јаверенге“. Џанѓола пе, сарине амен мангаја те ова  пенџарде сар доверлива мануша. Саве особине шај те поможинен те исполнина адаја цел? Те дикха 5 лендар.

12. Објаснин соске о мангипе тано темели баши доверба?

¹² О мангипе тано темели баши доверба. О Исус вакерѓа кај о дуј најбаре заповедија тане те манге е Јехова хем те манге тле пашутне (Мат. 22:37-39). О мангипе спрема о Јехова поттикнинела амен те џа пало лескоро совршено пример хем те ова доверлива сар лесте. На пример, кеда јекх пхрал или пхен вакерела аменге нешто пестар, о мангипе спрема ленде поттикнинела амен те на вакера адава е јаверенге. Никогаш на би мангаја те ширина нешто колеа со ка кера штета е јаверенге, ка лаџакера лен или ка дукхава лен (Јован 15:12).

13. Сар и понизност поможинела аменге те ова доверлива?

¹³ И понизност ка поможинел аменге те ова доверлива. Јекх понизно христијани нане те истакнинел пе англо јавера аѓаар со секогаш ов ка овел о прво со ка вакерел нешто со о јавера на џанена (Фил. 2:3). Нане те ваздел пе англо јавера аѓаар со ка керел те мислинен кај ов џанела несаве буќа башо кола со на смејнела те керел лафи. Освен адава, ако сием понизна, нане те вакера е јаверенге амаро лично мислење башо буќа коленге со и Библија или амари литература на керела лафи.

14. Сар и разборитост поможинела амен те ова доверлива?

¹⁴ И разборитост ка поможинел јекхе христијанеске те џанел кеда тано време „те чутинел пе хем време те керел пе лафи“ (Проп. 3:7). Јекх изрека вакерела „те керел пе лафи тано сребро, а те чутинел пе тано злато“. Јавере лафенцар, понекогаш тано пошукар те чутинел пе него те керел пе лафи. Адалеске, ко Изреки 11:12 пишинела: „Окова сој тано чаче разборито чутинела“. Те дикха јекх пример. Несаве старешине таро јекх собрание замолинена јекхе искусно старешина таро јавер собрание те поможинел лен несаве проблеменцар таро собрание. Јекх старешина баши леске вакерела: „Ов секогаш пазинела те на вакерел несаве важна информацие таро јавера собранија“. О јавера старешине таро лескоро собрание поштујнена ле соске ов тано разборито. Ола тане увериме кај ов никогаш нане те вакерел доверлива буќа е јаверенге.

15. Вакер пример кова со сикавела сар и искреност шај те керел о јавера те овел лен доверба ки туте?

¹⁵ И искреност исто аѓаар шај те поможинел аменге те ова доверлива. Амен иси амен доверба ко јекх искрено мануш соске џанаја кај ов секогаш ка вакерел о чачипе (Еф. 4:25; Евр. 13:18). На пример, шај мангеа те ове пошукар ко поучибе хем адалеске замолинеа некас те шунел тут џикоте икереа тло говор ко состанок те шај те вакерел туке коте шај те подобрине тут. Кас ка пуче башо искрено совет? Дали ка пуче некас кова со ка вакерел туке баш адава со мангеа те шуне или некас со љубезно ка вакерел туке о чачипе? О одговор тано јасно. И Библија вакерела: „Пошукар тано о директно укор него о гаравдо мангипе. О верно амал дела совет чак кеда адава дикхјола непријатно“ (Изр. 27:5, 6). Иако ко почеток шај нане те свиџинел пе аменге адава со шунаја, ама амаре амалескири искреност ка користинел аменге понадари ко живото.

16. Сар о Изреки 10:19 сикавела кај ваљани аменге самоконтрола?

¹⁶ И самоконтрола тани бут важно ако  мангаја о јавера те овел лен доверба ки аменде. Акаја особина ка поможинел аменге те контролирина амари чхиб кеда мангаја те вакера нешто со о јавера на ваљани те џанен. (Читин Изреки 10:19.) Кеда користинаја социјална мреже шај ка овел аменге пхаро те овел амен самоконтрола. Ако на пазинаја, шај англо бут мануша те ширина доверлива буќа. Хем откеда чхиваја нешто ко интернет тегани нане амен контрола упро адава сар о јавера ка користинен адала информацие или сави штета шај те керел пе. И самоконтрола шај исто аѓаар те поможинел аменге те чутина кеда несаве противникија ка манген те дознајнен информацие башо амаре пхраља хем пхења. Адава шај те случинел пе кеда ка ова испитиме тари полиција ки пхув коте со амаре активностија тане забраниме или ограничиме. Ко асавке или ко јавера ситуацие шај те применина о начело те контролирина амари чхиб (Пс. 39:1). Бизи разлика дали ки амари фамилија, ко амаро друштво, амаре пхраленцар хем пхењенцар или било касаја јавереа амен ваљани те ова доверлива. А башо адава ваљани аменге самоконтрола.

17. Со шај те кера те шај те овел доверба ко собрание?

¹⁷ Кобор сием благодарна со о Јехова керѓа те ова дело тари фамилија коте со сарине тане љубезна хем доверлива. Сарине амен ваљани те трудина амен те заслужина и доверба амаре пхраленгири хем пхењенгири. Са џикоте даја амендар са те сикава мангипе, понизност, разборитост, искреност хем самоконтрола кераја те овел доверба ко собрание. Ваљани понадари да те да амендар са те шај те сикава кај е јаверен шај те овел лен доверба ки аменде. Адалеске те џа пало е Јеховаскоро пример аѓаар со понадари да ка сикава кај сием доверлива.