1. Соске на изненадинела амен адава со е манушен нане лен доверба ко јавера?

 О МАНУША таро е Сатанаскоро свето на џанена више каске шај те верујнен. Ола тане бут пути разочариме таро трговско систем, таро политичарија хем таро религиозна водачија. Бут џене, исто аѓаар, нашти те верујнен пумаре амаленге, комшиенге па чак ни пумаре фамилијаке. Акава на ваљани те изненадинел амен. Ки Библија пишинела: „Ко последна диве... о мануша нане те овен верна... ка овен клеветникија... предавникија“. Јавере лафенцар, о мануша ка овен сар о девел акале светоскоро каске со ни хари нашти те верујнел пе (2. Тим. 3:1-4; 2. Кор. 4:4).

2. а) Ки касте шај те овел амен целосно доверба? б) Со шај те пучен пе несаве?

² Ама сар христијања џанаја кај шај те овел амен целосно доверба упро Јехова (Ерем. 17:7, 8). Сием увериме кај ов мангела амен хем кај „никогаш нане те мукхел“ пле амален (Пс. 9:10). Шај исто аѓаар те овел амен доверба ко Исус соске ов денѓа пло живото аменге (1. Пет. 3:18). Хем таро лично искуство џанаја кај и Библија дела амен водство колесте со шај потприна амен (2. Тим. 3:16, 17). Амен сием увериме кај шај те овел амен доверба ко Јехова, ко Исус хем ки Библија. Ама несаве шај пучена пе дали секогаш шај те овел лен доверба ко пхраља хем ко пхења таро собрание. Ако о одговор тано оја, соске шај те вакера адава?

3. Сави бари предност иси амен? (Марко 10:29, 30).

³ О Јехова биринѓа амен те ова дело тари лескири фамилија сој ко цело свето. Размислин само која бари предност иси амен хем кобор берекетија анела аменге адава! (Читин Марко 10:29, 30.) Ко цело свето, иси амен пхраља хем пхења со мангена е Јехова исто сар аменде хем кола со дена  пестар са те шај те живинен спрема лескере мерилија. Иако амари чхиб, култура хем о начин сар ураваја амен разликујнела пе лендар, сепак осетинаја амен паше ленцар чак кеда прво пути дикхаја амен. Посебно уживинаја кеда заедно ленцар славинаја хем обожавинаја амаре мангле Даде (Пс. 133:1).

4. Соске ваљанена аменге амаре пхраља хем пхења?

⁴ Акана повише таро било кеда англедер ваљани те ачхова ко јекхипе амаре пхраленцар хем пхењенцар. Ола понекогаш поможинена аменге те пхирава амаро пхарипе (Рим. 15:1; Гал. 6:2). Исто аѓаар, охрабринена амен те ачхова активна ки служба хем понадари да те ова духовно зорале (1. Сол. 5:11; Евр. 10:23-25). Размислин само со би овела сине аменцар те на овел амен сине о собрание кова со поможинела амен те борина амен против амаре душмања — о Сатана хем лескоро лошно свето. Панда хари о Сатана хем окола сој тели лескири власт ка нападинен е Девлескере слуген. Ко адава периоди ка ова бут благодарна со амаре пхраља хем пхења тане узи аменде!

5. Соске шај некаске те овел пхаро те овел ле доверба ко пхраља хем ко пхења?

⁵ Ама несавенге шај те овел пхаро те овел лен доверба ко пхраља хем пхења, шај адалеске со вакерѓе ленге нешто доверливо а ола ширинѓе адава е јаверенге, или на икерѓе пе ко пло лафи. Или некој таро собрание вакерѓа или керѓа нешто со бут поврединѓа лен. Ако случинѓа пе аменге нешто асавко, со шај те поможинел аменге те ирана амари доверба ко пхраља?

6. Сар шај о мангипе те поможинел аменге те овел амен доверба? (1. Коринќаните 13:4-8).

⁶ О мангипе тано темели баши доверба. Ко 1. Коринќаните 13 поглавје тане опишиме бут аспектија таро мангипе кола со  поможинена аменге те овел амен или те ирана амари доверба ко јавера. (Читин 1. Коринќаните 13:4-8.) На пример, о 4 стихо вакерела кај „о мангипе тано стрпливо хем љубезно“. О Јехова тано аменцар стрпливо иако грешинаја леске. Адалеске, амен да мора те ова стрплива е пхраленцар ако вакерена или керена нешто со поврединела или со нервиринела амен. О 5 стихо вакерела „о мангипе на хољанела локхесте, на памтинела о лошнипе“. Ако мангаја те бистра о лошнипе на ваљани те икера ки годи адава со керѓе аменге о пхраља хем пало адава кеда ка овел амен прилика те спомнина ленге. Ко Проповедник 7:9 пишинела „ма вреџин тут сигате“. Наместо адава, ваљани те применина о лафија со аракхљовена ко Ефешаните 4:26: „Ма мукхен те накхел о диве, а тумен панда те овен хољаме!“

7. Сар о начелија таро Матеј 7:1-5 поможинена аменге те овел амен доверба ко јавера?

⁷ Јекх јавер бути со шај те поможинел аменге те овел амен доверба ко пхраља тани ако дикхаја ки ленде сар о Јехова со дикхела. Ов мангела лен хем на памтинела ленгере грешке, а на ваљани ни амен (Пс. 130:3). Наместо те концентририна амен ко ленгере слабостија, ваљани те трудина амен те дикха ленгере шукар особине хем те ла ко предвид кај тане спремна те керен шукарипе е јаверенге. (Читин Матеј 7:1-5.) На сумнинаја амен ки ленде соске о мангипе „са верујнела“ (1. Кор. 13:7). Адава на значинела кај о Јехова очекујнела амендар те верујна е јаверенге бизи причина, него те овел амен доверба ки ленде адалеске со сикавѓе кај тане доверлива. b

8. Сар шај те сикљове те овел тут доверба ко пхраља?

⁸ Исто сар о поштовање, и доверба да ваљани те заслужинел пе а башо адава ваљани време. Сар шај те овел тут доверба ко пхраља? Запознајн лен пошукар. Кер ленцар лафи кеда сиан ки дворана. Џа ленцар ки служба. Ов ленцар стрпливо аѓаар со ка де лен и прилика те сикавен кај тане доверлива. Ко почеток шај нане те вакере са тутар некаске со сигенде запознајнѓан ле. Ама, сар овена попаше, шај ка ове поспремно те вакере леске повише буќа тутар (Лука 16:10). А со ако јекх пхрал сикавѓа кај нане доверливо? Наместо сигате те откажине тут лестар, ов стрпливо леа. Хем ма дозволин башо постапке таро некобор џене те нашаве тли доверба ко јавера пхраља. Поврзимо акалеа, те дикха примерија таро некобор слуге е Јеховаскере кола со иако сине разочариме некастар сепак сине лен доверба ко јавера.

9. а) Сар и Ана понадари да сикавѓа доверба ко Јехова иако несаве кола со поставинѓа лен о Јехова грешинѓе? б) Со сикљовеа таро е Анакоро пример башо адава те овел амен доверба ко мануша касте со о Јехова поставинѓа? (Дикх и слика.)

⁹ Дали некогаш сиан сине разочаримо тари постапка несаве пхралескири со иси ле несави одговорно задача ки организација? Ако оја, бут ка поможинел туке ако размислинеа башо е Анакоро пример. Ко адава време првосвештенико сине о Илиј хем ов предводинела сине е Израелцон ко обожавибе е Јехова. Ама лескири фамилија ни хари на сине примерно. Лескере чхаве кола со сине свештеникија понашинена пе сине лошно хем керена сине неморал. Сепак, ленгоро дад на керѓа скоро ништо те шај те исправинел о буќа. О Јехова на цидинѓа ле  одма тари првосвештеничко служба. Ама и Ана понадари да џала сине ко свето шатори иако о Илиј панда сине првосвештенико. Ки јекх прилика, ој тари дукх молинела пе сине хем о Илиј мислинѓа песке кај тани мати. Наместо те испитинел, ов бизо те пучел критикујнѓа ла (1. Сам. 1:12-16). И Ана англедер денѓа лафи кај ако овела ла чхаво ка дел ле те служинел ко свето шатори. Ој сине спремно те икерел пе ко пло завет, иако адава значинела сине кај о Илиј ка грижинел пе лакере чхавеске (1. Сам. 1:11). Дали е Илијаскере чхаве понадари да понашинена пе сине лошно? Оја, хем о Јехова керѓа нешто ко право време (1. Сам. 4:17). А е Ана наградинѓа ла јекхе чхавеа кова со викинела пе Самоил (1. Сам. 1:17-20).

10. Сар о Давид сикавѓа кај иси ле доверба ко јавера иако сине изневеримо?

¹⁰ Дали некогаш сиан сине изневеримо таро несаво паше амал? Ако оја, размислин башо цари о Давид. Јекх таро лескере амала сине о Ахитофел. Ама кеда е Давидескоро чхаво о Авесалом мангља те лел лестар о престол, о Ахитофел гело тари е Авесаломескири страна. Веројатно бут дукхандило е Давиде со хем лескоро чхаво хем лескоро најпаше амал противинѓе пе леске. Ама, адаја ситуација на чхинавѓа е Давиде те овел ле доверба ко јавера. Ле сине ле понадари да доверба ко јекх јавер верно амал, ко Хусај, кова со на приклучинѓа пе ки побуна. Е Давиде сине ле шукар причине те верујнел е Хусајеске, ов докажинѓа кај тано шукар амал чак ризикујнѓа пло живото те шај те поможинел е Давидеске (2. Сам. 17:1-16).

11. Сар јекх таро е Навалескере слуге сикавѓа кај иси ле доверба ки Авигеја?

¹¹ Размислин исто аѓаар башо јекх таро е Навалескере слуге. О Давид хем лескере мануша заштитинена сине Навалескере слуген, иако на сине дужна те керен адава. Пало несаво време о Давид родинѓа хари хајбаске таро Навал кова со сине бут барвало. Ама кеда о Навал на мангља те дел лен, о Давид сине добором хољамо со одлучинѓа те мударел секоле мурше таро е Навалескоро кхер. Јекх слуга вакерѓа акава е Навалескере ромњаке, е Авигејаке. Адалеске со живинела сине ко е Навалескоро кхер, ов  џанела сине кај лескоро живото зависинела тари Авигеја. Наместо те нашел, ле сине ле доверба кај и Авигеја шај те смиринел и ситуација соске ој сине пенџарди сар мудро џувли. Покасно дикхља пе кај шукар керѓа со верујнѓа лаке. И Авигеја храбро убединѓа е Давиде те на керел адава со планиринѓа (1. Сам. 25:2-35). Ла сине ла доверба кај о Давид ка овел разумно.

12. Сар о Исус сикавѓа кај сине ле доверба ко пле ученикија иако сине лен маане?

¹² Е Исусе сине ле доверба ко пле ученикија иако сине лен маане (Јован 15:15, 16). Кеда о Јаков хем о Јован родинѓе лестар те чхивел лен ко јекх посебно тхан ко Царство, ов на вакерѓа ленге кај таро погрешна мотивија служинена е Јеховаске хем на вакерѓа кај нашти више те овен апостолија (Мар. 10:35-40). Пало несаво време са е Исусескере ученикија мукхле ле и рат кеда астарѓе ле (Мат. 26:56). Ама о Исус на чхинавѓа те верујнел ленге. Ов шукар џанела сине ленгере слабостија ама мангља лен џи ко крајо (Јован 13:1). Откеда воскреснинѓа, ов чак денѓа пле 11 апостоленге јекх бари одговорност, те предводинен ко проповедибе хем те грижинен пе башо лескере скапоцена бакхре (Мат. 28:19, 20; Јован 21:15-17). Ле сине ле шукар причине те верујнел акале несовршена манушенге. Сарине ола ачхиле верна џи ко крајо таро пло живото. Џи акана дикхлем кај и Ана, о Давид, е Навалескоро слуга, и Авигеја хем о Исус сикавѓе аменге кај шај те овел амен доверба ко несовршена мануша.

13. Со шај те керел аменге пхаро те овел амен доверба ко јавера?

¹³ Дали вакерѓан несаве пхралеске јекх доверливо бути а пало адава дознајнѓан кај вакерѓа адава е јаверенге? Адава шај бут те поврединел тут. Јекх пути јекх пхен доверинѓа пе јекхе старешинаске баши јекх лично бути. О јавер диве е старешинаскири ромни јавинѓа пе лаке те охрабринел ла хем тегани и пхен халили кај о старешина вакерѓа пле ромњаке со керѓа лаја лафи. Адалеске е пхењаке сине више пхаро те овел ла доверба ко адава старешина. Ама ој сепак постапинѓа исправно хем родинѓа помош. Ој керѓа лафи јавере старешинаја хем ов поможинѓа лаке палем те овел ла доверба ко старешине.

14. Со поможинѓа јекхе пхралеске палем те овел ле доверба ко дуј старешине?

¹⁴ Јекх пхрал повише време сине хољамо дује старешиненге хем на сине ле доверба ки ленде. Ама ов почминѓа те размислинел башо нешто со вакерѓа јекх пхрал коле со бут поштујнела сине. Акава пхрал вакерѓа јекх едноставно ама бут јако изјава: „О Сатана тано амаро душмани, а на амаре пхраља“. Ов бут размислинѓа башо акала лафија хем молинѓа пе е Јеховаске баши помош. Пало несаво време ов шај сине палем те смиринел пе акале дује старешиненцар.

15. Соске ка ваљани време те накхел те шај палем те иранел пе и доверба? Вакер пример.

¹⁵ Дали некогаш нашавѓан несави задача ко собрание? Адава шај бут те дукхал. И Грете хем лакири дај сине сведокија ки нацистичко Германија англедер и дујто светско војна кеда амаре активностија сине забраниме. И Грете уживинела сине те куцинел копие тари Стражарско кула башо пхраља. Ама кеда о пхраља дознајнѓе кај лакоро дад сине противнико, ола леле латар адаја задача соске дарандиле кај лакоро дад ка вакерел несаве информацие е противниконге. Ама акава на сине единствено проблеми со сине е Грета. Ки дујто светско војна, о  пхраља на дена сине лаке хем лакере дајаке копие таро списанија хем на керена сине ленцар лафи кеда ка дикхен лен ки улица. Адава добором бут поврединѓа ла со бут време нашти сине те простинел ленге хем палем те верујнел адале пхраленге. Ама сар со накхела сине о време, ој халили кај о Јехова простинѓа ленге хем кај ој да ваљани те керел адава. c

16. Ако нашавѓем амари доверба ко пхраља, соске ваљани те трудина амен те ирана ла?

¹⁶ Ако накхљан таро слично разочарување трудин тут те иране тли доверба. Шај ка ваљани туке време ама адава ка исплатинел пе. На пример, ако астарѓан отровање таро несаво хајбе, шај пало адава повише ка пазине со хаја. Ама адава со отрујнѓан тут таро јекх хајбе нане те чхинавел тут те на ха више. Слично, на ваљани те дозволина башо јекх лошно искуство те нашава доверба ко са амаре пхраља хем пхења, кола со џанаја кај тане несовршена. Кеда иранаја амари доверба, тегани сием побахтале хем адава ка поможинел аменге те концентририна амен ко адава со ваљани амен те кера те шај ко собрание те овел доверба.

17. Соске и доверба тани бут важно хем башо со ка кера лафи ки следно статија?

¹⁷ Пхаро тано те овел тут доверба упри некасте ко е Сатанаскоро свето. Ама шај те овел амен доверба ко амаре пхраља соске иси амен мангипе машкар аменде. Асавки доверба анела аменге бахталипе хем јекхипе панда авдиве хем ка заштитинел амен ко пхаре времија со ка авен ки иднина. Со ваљани те кере ако некој разочаринѓа тут хем на верујнеа леске више? Трудин тут те дикхе ки ситуација сар со дикхела о Јехова, применин о библиска начелија, развин мангипе тле пхраленге хем сикљов таро библиска примерија. Шај те борина амен против амаре негативна чувствија хем палем те овел амен доверба ко јавера. Ако кераја са акава ка овен амен бут амала кола со ка овен аменге „попаше таро пхрал“ (Изр. 18:24). Ама баши доверба нане доволно јекх џено, ваљанена дуј џене. Ки следно статија ка дикха сар шај амен те сикава е пхраленге кај шај те овел лен доверба ки аменде.