Те дикха сар и Библија одговоринела ко акала пучиба.

Ко Дела 24:15 пишинела кај „ка воскреснинен о праведна хем о неправедна“. О праведна тане окола со служинѓе е Девлеске џикоте сине џивде, хем адалеске ленгере анава тане пишиме ко лил е животоскоро (Мал. 3:16). Ко неправедна тане вклучиме окола со муле а на сине лен шукар прилика те запознајнен е Јехова, адалеске ленгере анава нане пишиме ко лил е животоскоро.

Ко Јован 5:28, 29 тане спомниме о иста дуј групе баши кола со пишинела ко Дела 24:15. О Исус атхе вакерела кај окола со „керѓе шукарипе“ ка овен воскресниме живибаске хем окола со „керѓе лошнипе“ ка овен воскресниме судибаске. О праведна керѓе шукарипе џикоте сине џивде. Ола ка воскреснинен башо живото адалеске со ленгере анава панда тане пишиме ко лил е животоскоро. Ама о неправедна керѓе лошнипе џикоте сине џивде. Адалеске ола ка воскреснинен судибаске. Ленгере анава панда нане пишиме ко лил е животоскоро хем адалеске ка ваљани те накхел несаво време коте со ка овен испитиме. Ко адава време ка овел лен прилика те сикљовен башо Јехова хем ленгере анава те овен пишиме ко лил е животоскоро.

Ко Откровение 20:12, 13 пишинела кај сарине со ка воскреснинен ка ваљани те керен о буќа сој пишиме ко неве свитокија, адала тане о неве законија кола со ка дел амен о Девел ко нево свето. Окола со нане те овен послушна ка овен уништиме (Иса. 65:20).

Ко Даниел 12:2 тано пророкујмо кај несаве таро адала со муле „ка уштен башо вечно живото хем јавера баши вечно лаџ“. Акава стихо керела лафи башо адава со ка случинел пе ко крајо околенцар со ка воскреснинен — ка добинен или „вечно живото“ или „вечно лаџ“. Значи ко крајо таро милја берша несаве ка добинен вечно живото а јавера ка овен уништиме засекогаш (Отк. 20:15; 21:3, 4).

Те шај те овел аменге акава појасно те вакера јекх пример. Акала дуј групе со ка воскреснинен шај те споредина лен е манушенцар со мангена те живинен ки јавер држава. О праведна тане сар окола мануша со добинена работно виза или виза башо престој колаја со иси лен пумаре одредена правија хем слобода. А тари јавер страна, о неправедна тане сар окола мануша колен со иси лен виза само башо кратко престој или туристичко виза. Ако мангена понадари те живинен ки адаја држава, акала мануша ка ваљани те исполнинен несаве условија. Слично, о неправедна со ка воскреснинен ка ваљани те овен послушна ко е Јеховаскере законија хем те постапинен праведно ако мангена те ачховен ко рај. Хем бизи разлика сави виза ка добинен о странција, кеда ка ресен ки јекх држава, несаве лендар ко крајо шај те добинен државјанство а јавера шај те овен палдиме. Сави одлука ка анел пе ленге бут ка зависинел таро адава сар ка постапинен ки адаја неви држава. Слично, сави одлука ка анел пе сариненге со ка воскреснинен бут ка зависинел тари ленгири вера хем таро ленгере постапке ко нево свето.

О Јехова нане само Девел е мангипаскоро него ов исто аѓаар тано праведно Девел (5. Мој. 32:4; Пс. 33:5). Ов ка сикавел пло мангипе сариненге со ка воскреснинен, хем околенге сој праведна хем околенге сој неправедна. Ама ов исто аѓаар ка очекујнел саринендар те овен послушна ко лескере мерилија башо адава сој исправно а сој погрешно. Хем само окола со ка манген ле хем ка живинен спрема лескере мерилија ка овел ленге дозволимо те живинен вечно ко нево свето.