1. Сар реагиринѓа о Петар кеда о Исус поможинѓа ле чудоја те астарел мачхе?

 О ПЕТАР цело рат на астарѓа нијекх мачхо. Ама, сепак о Исус вакерѓа леске: „Џа е чамцоја коте сој похор хем фрден тумаре мреже те астарен мачхе!“ (Лука 5:4). О Петар керѓа адава со вакерѓа леске о Исус иако мислинѓа кај нане те астарел ништо. Ама астарѓе добором бут мачхе со о мреже почминѓе те чхинѓон. Кеда халиле кај акава сине чудо со керѓа ле о Исус, о Петар хем о мануша со керена сине леа бути „чудинѓе пе“. Тегани о Петар вакерѓа: „Џа туке мандар Господаре, соске сиум грешно мануш!“ (Лука 5:6-9). Акала лафија сикавена кај о Петар мислинѓа кај на заслужинела чак те овел узо Исус.

2. Соске тано башо амаро шукарипе ако дикхаја е Петарескоро пример?

² Е Петаре сине ле право, ов сине „грешно мануш“. Ки Библија пишинела кај ов понекогаш вакерѓа или керѓа несаве буќа баши коленде покасно пело пишмани. Дали ту да, исто сар о Петар, боринеа тут несаве негативно особинаја или повише време трудинеа тут те накхаве несави слабост? Ако оја, шај те охрабринел тут е Петарескоро пример. Соске? Размислин башо акава: О Јехова шај сине те одлучинел те на овен пишиме е Петарескере грешке ки Библија. Ама, ов мукхља те овен пишиме те шај амен те сикљова нешто лендар (2. Тим. 3:16, 17). Адава со ка дознајна нешто повише башо акава мануш коле со сине ле слабостија хем чувствија исто сар амаре, ка поможинел аменге те дикха кај о Јехова на очекујнела амендар  те ова совршена. Ов на мангела те откажина амен, него понадари да те трудина амен иако иси амен слабостија.

3. Соске на ваљани те откажина амен иако иси амен слабостија?

³ Соске тано бут важно те на откажина амен? Адалеске со кеда трудинаја амен те кера несави бути повише време, обично оваја пошукар ко адава. Те вакера јекх пример: Кеда некој мангела те сикљол те башалел несаво инструменти ка ваљани леске бут време те вежбинел. Џикоте вежбинела ов ка керел бут грешке, ама ако на откажинела пе ов ка овел пошукар. Чак кеда ка овел да шукар музичари ов понекогаш шај палем те керел несави грешка. Сепак ов нане те откажинел пе, понадари да ка вежбинел те овел пошукар. Слично, чак кеда мислинаја кај накхавѓем несави слабост, амен шај палем те пера ки лате. Ама понадари да трудинаја амен те ова пошукар. Сарине вакераја или кераја нешто башо колесте покасно пераја пишмани. Сепак, ако на откажинаја амен о Јехова ка поможинел аменге те ова са пошукар хем пошукар (1. Пет. 5:10). Акана те дикха е Петарескоро пример коле иако сине ле слабостија на откжинѓа пе. О сочувство со сикавѓа о Исус е Петареске иако грешинела сине ка поттикнинел амен понадари да те служина е Јеховаске.

4. Спрема Лука 5:5-10, со вакерѓа о Петар баши песте, ама сар охрабринѓа ле о Исус?

⁴ Ки Библија на пишинела соске о Петар вакерѓа кај тано „грешно мануш“ или кола гревија сине ле ки годи. (Читин Лука 5:5-10.) Ама шај керѓа несаве сериозна грешке. О Исус џанља кај о Петар дарала сине соске шај мислинела песке сине кај нане доволно шукар. Сепак, о Исус џанља кај о Петар шај те ачховел верно. Адалеске, о Исус љубезно вакерѓа леске: „Ма дара“. И доверба која со о Исус сикавѓа е Петареске целосно менинѓа лескоро живото. Покасно о Петар хем лескоро пхрал о Андреј чхинавѓе е буќаја те астарен мачхе хем уле е Месијаскере следбеникија, тегани о Јехова ко бут начинија благословинѓа ле (Мар. 1:16-18).

5. Саве благословија доживинѓа о Петар адалеске со на дозволинѓа о негативна чувствија те чхинавен ле те овел е Исусескоро ученико?

⁵ Е Петаре сине ле бут шуже искуствија сар ученико е Христосескоро. Ов дикхља сар о Исус сасљарѓа е насвален, палдинѓа демонен хем чак сар воскреснинѓа е мулен. b (Мат. 8:14-17; Мар. 5:37, 41, 42). Исто аѓаар, ле сине ле прилика те овел присутно кеда о  Исус ки јекх визија сине сикавдо сар Цари ко е Девлескоро Царство. О Петар никогаш на бистерѓа акава настан (Мар. 9:1-8; 2. Пет. 1:16-18). Чаче, ов никогаш нане сине те дикхел акала буќа те на овел сине е Исусескоро следбенико. Сигурно бут радујнѓа пе со на мукхља о негативна чувствија баши песте те чхинавен ле те доживинел акала благословија!

6. Дали о Петар таро јекх пути успејнѓа те накхавел пле слабостија? Објаснин.

⁶ О Петар понадари да боринела пе сине пле слабостенцар иако шунѓа хем дикхља са со керѓа о Исус. Те дикха некобор примерија. Кеда о Исус објаснинѓа кај ка цидел муке хем кај ка овел мудардо сар со вакерела о пророштво, о Петар вакерѓа кај не мора те овел адава (Мар. 8:31-33). Исто аѓаар, о Петар хем о јавера апостолија цело време распрајнена пе сине башо адава кој тано најбаро (Мар. 9:33, 34). И последно рат англедер те мерел о Исус, о Петар нападинѓа јекхе мануше хем чхинѓа о кан лескоро (Јован 18:10). И исто рат, о Петар дарандило хем трин пути вакерѓа кај на пенџарела пле амале е Исусе (Мар. 14:66-72). Пало адава бут рунѓа (Мат. 26:75).

7. Сави прилика сине е Петаре откеда о Исус воскреснинѓа?

⁷ О Исус на откажинѓа пе таро пло апостоли кова со сине бут обесхрабримо. Откеда о Исус воскреснинѓа, ов денѓа прилика е Петареске те сикавел кај панда мангела ле. Ки адаја прилика о Исус вакерѓа леске те служинел сар понизно пастири лескере бакхренге (Јован 21:15-17). Ов спремно прифатинѓа адаја задача. Ов сине ко Ерусалим ки Педесетница хем сине машкар о прва кола со сине помазиме е Девлескере силаја.

8. Која сериозно грешка керѓа о Петар ки Антиохија?

⁸ О Петар мора сине те боринел пе пле слабостенцар чак кеда уло помазимо. Ко 36-то берш а.е. о Девел бичхалѓа е Петаре ко Корнелиј кова со на сине Евреи. Ки адаја прилика о Девел помазинѓа е Корнелија хем адава сине доказ кај о Девел „нане пристрасно“ хем кај окола со нане Евреија шај сине те овен дело таро христијанско собрание (Апо. 10:34, 44, 45). Пало адава настан, о Петар почминѓа те хал заедно маро околенцар со нане Евреија, нешто кова со никогаш на би керела сине англедер (Гал. 2:12). Ама, несаве Евреија со сине христијања мислинена сине кај ола хем окола со нане Евреија на ваљани те хан заедно. Кеда несаве со сине лен асавко стави але ки Антиохија, о Петар чхинавѓа те хал заедно е пхраленцар со на сине Евреија, адалеске со најверојатно дарандило те на вреџинел е христијанен со сине Евреија. Кеда о апостол Павле дикхља со керѓа о Петар, ов укоринѓа ле англо јавера (Гал. 2:13, 14). Иако керѓа акаја грешка о Петар на откажинѓа пе. Со поможинѓа ле?

9. Сар о лафија таро Јован 6:68, 69, сикавена кај о Петар сине верно?

⁹ О Петар сине верно, ов на мукхља ништо те чхинавел ле те слединел е Исусе. Ов сикавѓа пли верност ки јекх прилика кеда о Исус вакерѓа нешто со лескере ученикија на халиле. (Читин Јован 6:68, 69.) Бут џене чхинавѓе те слединен е Исусе бизо те аџикерен несаво одговор или објаснување. Ама, о Петар на керѓа адава. Ов халило кај само ко Исус „тане о лафија башо вечно живото“.

10. Сар о Исус сикавѓа кај иси ле доверба ко Петар? (Дикх хем и слика.)

¹⁰ О Исус на откажинѓа пе таро Петар. Ки последно рат таро лескоро живото, о Исус џанља кај о Петар хем о јавера апостолија ка мукхен ле. Сепак, о Исус сикавѓа доверба ко Петар кај ов кај ов ка овел духовно зорало  хем ка ачхол верно (Лука 22:31, 32). О Исус халило кај „о духо тано спремно... ама о тело тано слабо“ (Мар. 14:38). Адалеске, чак кеда о Петар вакерѓа кај на пенџарела ле, о Исус на откажинѓа пе таро пло апостоли. Откеда воскреснинѓа о Исус, појавинѓа пе е Петареске — веројатно кеда сине коркори (Мар. 16:7; Лука 24:34; 1. Кор. 15:5). Акава сигурно бут охрабринѓа е Петаре кова со сине разочаримо!

11. Сар о Исус уверинѓа е Петаре кај о Јехова ка грижинел пе башо лескере материјална потребе?

¹¹ О Исус уверинѓа е Петаре кај о Јехова ка грижинел пе леске. Откеда воскреснинѓа о Исус панда јекх пути поможинѓа е Петаре хем е јавере апостолен чудоја те астарен мачхе (Јован 21:4-6). Акава чудо уверинѓа е Петаре кај о Јехова бут локхесте шај те поможинел е Петаре те грижинел пе башо лескере материјална потребе. Шај ки адаја прилика о Петар сетинѓа пе ко е Исусескере лафија кеда мангља те вакерел кај о Јехова ка грижинел пе околенге со „најангле родена о Царство“ (Мат. 6:33). Са акава поможинѓа е Петареске те чхивел и служба ко прво тхан, а на те астарен пе мачхе. Ов храбро проповединѓа ки Педесетница 33-то берш а.е. хем поможинѓа повише милја манушенге те прифатинен о шукар хабери (Апо. 2:14, 37-41). Пало адава поможинѓа е Самарјаненге хем околенге со на сине Евреија те прифатинен е Исусе (Апо. 8:14-17; 10:44-48). О Јехова сигурно користинѓа е Петаре те поможинел манушенге таро различна нацие те авен ко собрание.

12. Сар шај о пример е Петарескоро те поможинел амен ако повише време боринаја амен те накхава несави слабост?

¹² О Јехова шај те поможинел амен те на откажина амен. Шај нане секогаш те овел аменге локхо, посебно ако повише време боринаја амен те накхава несави слабост. Понекогаш, амаре слабостија шај те дикхјон аменге попхаре таро адала со сине е Петаре. Ама о Јехова шај те дел амен сила те на откажина амен (Пс. 94:17-19). На пример, јекх пхрал живинела сине сар хомосексуалцо повише берша англедер те дознајнел о чачипе. Ов целосно керѓа промене ко пло живото хем почминѓа те живинел спрема о библиска мерилија. Сепак, понекогаш боринела пе сине погрешна желбенцар. Со поможинѓа леске те на откажинел пе? Ов вакерела: „О Јехова дела ман сила. Лескере духоја сиклиљум кај шај те живинав спрема о библиска мерилија.  О Јехова дозволинела манге те служинав ки лескири организација, хем иако сиум несовршено ов понадари да дела ман сила “.

13. Спрема Апостолија 4:13, 29, 31, сар шај те џа пало пример е Петарескоро? (Дикх хем и слика.)

¹³ Сар со дикхлем, о Петар повише пути керѓа сериозна грешке адалеске со дарандило таро мануш. Ама адалеске со молинѓа пе баши сила ов шај сине те постапинел храбро. (Читин Апостолија 4:13, 29, 31.) Амен да шај те победина амари дар. Те дикха со случинѓа пе јекхе терне пхралеске со викинела пе Хорст хем живинела сине ки нацистичко Германија. Ов повише пути пело ко притисок ки школа те вакерел: „Хајл Хитлер!“ Лескере родителија наместо те распрајнен пе леа, ола молинѓе пе заедно леа е Јеховаске те дел ле храброст. Адалеске со поможинѓе ле лескере родителија хем сине ле доверба ко Јехова, о Хорст ко крајо сине ле сила те ачховел цврсто. Ов покасно вакерѓа: „О Јехова никогаш на откажинѓа пе мандар“. c

14. Сар шај о грижлива пастирија те охрабринен околен сој обесхрабриме?

¹⁴ О Јехова хем о Исус нане те откажинен пе амендар. Адава дикхаја ле таро е Петарескоро пример. Откеда вакерѓа кај на пенџарела е Исусе, ов ваљанѓа те анел јекх бут важно одлука — дали ка откажинел пе или понадари да ка овел е Христосескоро ученико? О Исус таро вило молинѓа пе е Јеховаске те шај и вера е Петарескири те на слабонел. О Исус вакерѓа е Петареске баши акаја молитва хем сине ле доверба ко Петар кај ка охрабринел пле пхрален (Лука 22:31, 32). Кобор сине охрабримо о Петар кеда сетинела пе сине ко е Исусескере лафија! Кеда ваљани те ана важно одлука о Јехова шај те користинел грижлива  пастирен те охрабринен амен те шај те ачхова верна (Еф. 4:8, 11). О Пол кова со служинела бут берша сар старешина трудинела пе те керел акава. Ов вакерела околенге со размислинена дали понадари да те служинен е Јеховаске те сетинен пе ко адава сар о Јехова привлечинѓа лен ко чачипе. Пало адава уверинела лен кај о Јехова башо пло верно мангипе нане те откажинел пе лендар. Ко крајо вакерела: „Дикхљум буте џенен со сине обесхрабриме ама на откажинѓе пе адалеске со поможинѓа ленге о Јехова“.

15. Сар о пример таро Петар хем таро пхрал Хорст сикавена кај о лафија таро Матеј 6:33 тане чаче?

¹⁵ Ако чхиваја и служба ко прво тхан ко амаро живото, о Јехова ка грижинел пе башо амаре материјална потребе исто сар со грижинѓа пе е Петареске хем е јавере апостоленге (Мат. 6:33). Пали Дујто светско војна о Хорст, коле со спомнинѓем ле англедер, размислинела сине те овел пионери. Ама ов сине бут чороло хем на сине сигурно дали шај доволно те заработинел те шај те ачховел ки полновремено служба. Ов одлучинѓа те дикхел дали о Јехова чаче ка грижинел пе леске, аѓаар со цело курко гело ки служба џикоте сине и посета таро покраинско надгледнико. Ко крајо таро адава курко ов сине бут изненадимо кеда о покраинско надгледнико денѓа ле јекх плико паренцар ама на вакерѓа леске кастар тано.. Ко адава плико сине доволно паре те шај те продолжинел е пионерско службаја некобор масек. О Хорст ко акава поклон дикхља сар доказ кај о Јехова ка грижинел пе леске. Џи ко крајо таро пло живото ов чхивѓа о Царство ко прво тхан (Мал. 3:10).

16. Соске тано шукар те сикљова нешто повише таро пример е Петарескоро хем башо адава со пишинѓа ко пле писмија?

¹⁶ Кобор сине радосно о Петар со о Исус на шунѓа ле кеда вакерѓа леске: „Џа туке мандар Господаре“. О Исус продолжинѓа те обучинел е Петаре те овел верно апостоли хем шукар пример е христијаненге. Сарине амен шај те сикљова бут скапоцена поуке тари адаја обука. О Петар пишинѓа несаве таро адала поуке ко дуј писмија кола со бичхалѓа лен ко прво веко е собраниенге хем акана тане дело тари Библија. Ки следно статија ка дикха несаве важна поуке таро акала писмија хем сар шај те применина лен авдиве.