1. Башо со шај те пучен амен амаре колеге или соученикија?

 САР осетинеа тут кеда тло колега или тло соученико пучела тут нешто башо тле верувања? Дали иси тут трема? Повише џенен амендар иси лен. Ама асавко пучибе шај те откринел башо со некој размислинела или ко со верујнела хем те дел амен прилика те вакера леске о шукар хабери. Ама понекогаш, шај некој те пучел амен пучиба адалеске со на согласинела пе аменцар или мангела те распрајнел пе. Адава на ваљани те изненадинел амен соске несаве мануша шунѓе погрешна информацие башо амаре верувања (Апо. 28:22). Освен адава живинаја ко „последна диве“, ко време коте со бут џене „нане те овен спремна башо било саво договор“ па чак тане „сурова“ (2. Тим. 3:1, 3).

2. Соске тано шукар те овел пе кротко?

² Шај пучеа тут: „Сар шај те ачховав љубезно хем тактично кеда дикхава кај некој мангела те распрајнел пе манцар башо адава ко со верујнава? Јекх бути со шај те поможинел туке, тани и кроткост. О кротко мануш на хољанела сигате хем ачхола смиримо кеда некој провоциринела ле или кеда нане сигурно сар те одговоринел ки несави ситуација (Изр. 16:32). Ама, шај мислинеа туке кај нане секогаш локхо те ачхове смиримо. Сар шај те ачхове смиримо кеда некој мангела те распрајнел пе туја башо тле верувања? Хем ако сиан родители, сар шај те поможине тле чхавенге сикљовен љубезно те бранинен пумаро верување? Ајде те дикха.

3. Соске шај те вакера кај некој сој кротко нане слабо, него силно? (2. Тимотеј 2:24, 25).

³ Ако некој тано кротко на значинела кај тано слабо. Ваљани те ова силна те шај те ачхова смириме кеда аракхљоваја ки јекх пхари ситуација. О свети дух поможинела аменге те на хољана сигате (Гал. 5:22, 23). Јекх облик таро грчко лафи кова сој преведимо сар „те на хољанел пе сигате“ понекогаш користинела пе сине те шај те опишинел пе јекхе диво грасте кова со сине дресиримо те овел питомо. Замислин туке сар јекх диво грас овела питомо хем кротко. Иако тано кротко, сепак тано силно. Сар амен шај те ова кротка, а ко исто време силна? Нашти коркори те кера адава. Ваљани те молина е Девле преку пли сила те поможинел аменге те развина акаја бут шужи особина. Бут искуствија сикавѓе кај шај те овел адава. На пример, бут пхраља ачхиле смириме кеда несаве мануша пробинѓе те провоциринен лен. Адалеа бут џене иси лен шукар мислење башо Сведокија. (Читин 2. Тимотеј 2:24, 25.) Со шај те кере и кроткост те овел тли силно страна?

4. Со шај те сикљова таро Исак башо адава те ачхова смириме?

⁴ Ки Библија иси бут извештаија кола со истакнинена кобор тано важно те ачхова смириме. Те дикха е Исакоскоро пример. Кеда живинела сине ко филистејско подрачје Герар, лескере комшие сине леске љубоморна хем адалеске пхерѓе о бунарија кола со лескере дадескере слуге ранле лен. Наместо те боринел пе башо пле правија, о Исак селинѓа пе заедно пле фамилијаја ко јавер тхан хем ранља неве бунарија (1. Мој. 26:12-18). Ама о Филистејција вакерѓе кај о пани таро адала да бунарија тано ленгоро. Сепак, о Исак понадари да ачхило смиримо (1. Мој. 26:19-25). Со поможинѓа леске те ачховел смиримо, чак кеда јасно дикхела пе сине кај о јавера намерно провоциринена ле? Ов сигурно дикхља о пример пле родителенгоро хем бут сиклило таро адава сар о Авраам постапинела сине ко смиримо начин хем сар и Сара сикавѓа „мирно хем кротко духо“ (1. Пет. 3:4-6; 1. Мој. 21:22-34).

5. Кова пример сикавела кај о родителија шај те поможинен пумаре чхавен те хаљон кобор тани важно и кроткост?

⁵ Тумен о родителија шај те овен увериме кај шај те сикавен тумаре чхавен кобор тано важно те овен кротка. Те дикха јекх пример. О Максонс, коле со иси ле 17 берш, ваљани сине те икљовел ко крајо нервозна манушенцар ки школа хем ки служба. Лескере родителија стрпливо поможинѓе леске те ачхол смиримо. Ола вакерена: „О Максонс халило кај локхе шај те хољане хем те реагирине насилно ама те шај те ачхове смиримо ваљани туке бари сила“. Кобор тано шукар со о Максонс уло кротко.

6. Сар шај и молитва те поможинел аменге те ачхова смириме?

⁶ Со шај те кера кеда некој провоциринела амен, сар на пример кеда некој вакерела лошна буќа башо Јехова или баши Библија? Ваљани те молина е Јехова те дел амен пло духо хем мудрост те шај те ачхова смириме. Со шај те кера ако покасно хаљоваја кај на реагиринѓем шукар? Шај палем те молина амен башо адава хем те размислина сар шај јавер пути те постапина пошукар. Тегани о Јехова ка дел амен пли сила те шај те ачхова смириме хем те ова кротка.

7. Сар адава со ка памтина несаве стихија ка поможинел аменге ко стресна ситуацие? (Изреки 15:1, 18).

⁷ Несаве стихија шај те поможинен аменге те контролирина амари чхиб кеда некој провоциринела амен. Е Девлескири сила шај те сетинкерел амен ко адала стихија (Јован 14:26). На пример, о начелија таро Изреки шај те поможинен аменге те ачхова смириме. (Читин Изреки 15:1, 18.) Акава библиско  лил исто аѓаар поможинела аменге те хаљова соске тано амаре шукарипаске те ачхова смириме ко стресна ситуацие (Изр. 10:19; 17:27; 21:23; 25:15).

8. Соске ваљани те размислина баши причина соске некој пучела амен нешто?

⁸ Јавер бути со шај те поможинел аменге тано о хаљојбе или и проникливост (Изр. 19:11). Окова сој проникливо сикавела самоконтрола кеда некој мангела те распрајнел пе леа башо лескере верувања. Те вакера јекх пример. Кеда дикхаја јекх санта мразо, дикхаја само јекх тикно дело упро пани. Ама о побаро дела таро адава мразо тано тело пани. Слично, некој шај те пучел амен нешто ама бут пути на џанаја соске чаче пучела амен адава. Значи, англедер те одговорина ка овел шукар хари те ачхова хем те размислина соске некој пучела амен нешто (Изр. 16:23).

9. Сар о Гедеон сикавѓа проникливост хем кроткост кеда керѓа лафи е манушенцар таро Ефрем?

⁹ Размислин башо адава сар о Гедеон одговоринѓа е манушенге таро Ефрем. Ола бут хољанѓе хем пучле ле соске порано на викинѓа лен те џан леа те боринен пе против о Израелска душмања. Ама со сине и чачутни причина соске сине добором хољаме? Шај осетинѓе пе понижиме. Бизи разлика со сине и причина, о Гедеон постапинѓа мудро. Ов трудинѓа пе те хаљовел соске осетинена пе аѓаар хем одговоринѓа ленге ко смиримо начин. Саво  сине о резултати? И Библија вакерела кај ола смиринѓе пе (Суд. 8:1-3).

10. Со ка поможинел аменге те џана сар те одговорина околенге со критикујнена амаро верување? (1. Петарескоро 3:15).

¹⁰ Со ако амаро колега или соученико критикујнела амен адалеске со живинаја спрема о библиска мерилија? Ка трудина амен те објаснина леске ко најшукар начин амаре верувања, а ко исто време ка сикава кај поштујнаја ле. (Читин 1. Петарескоро 3:15.) Наместо ко лескоро пучибе те дикха сар напад или критика, ваљани те размислина сар лескоро пучибе шај те поможинел амен те дознајна сој леске важно. Бизи разлика тари сави причина некој пучела амен нешто, ваљани те одговорина леске ко јекх смирено хем љубезно начин. Амаро одговор шај ка поттикнинел ле те испитинел пло стави. Чак ако понашинела пе аменцар грубо или лела амен ки хајгара, амари цел ваљани те овел те одговорина леске ко љубезно начин (Рим. 12:17).

11-12. а) Башо кола буќа ваљани те размислина кеда некој пучела амен несави спорно тема? (Дикх хем и слика.) б) Вакер пример башо адава сар шај те почмина шукар разговор кеда некој пучела нешто.

¹¹ На пример, ако тло колега пучела тут соске на славинеа роденден, размислин башо акала пучиба: „Дали мислинела кај е Јеховаскере сведоконге нане дозволимо те забавинен пе? Или дали мислинела кај тло стави шај негативно те влијајнел упри атмосфера ки бути?“ Ка овел шукар те пофалине тле колега башо адава со мангела сарине те осетинен пе шукар, а пало адава шај те уверине ле кај ту да мангеа о исто. Адава шај те дел тут прилика ко јекх опуштимо разговор те објаснине леске со сикавела и Библија башо роденден.

¹² Шај те кера нешто слично кеда некој пучела амен башо несаве јавера спорна теме. На пример, несаво соученико шај те вакерел кај е Јеховаскере сведокија ваљани те менинен пумаро стави баши хомосексуалност. Дали ов вакерела адава адалеске со на џанела ко со верујнена е Јеховаскере сведокија? Или шај иси ле амал или некој тари фамилија кова сој хомосексуалцо? Дали мислинела кај мрзинаја е хомосексуалцон? Шај ка ваљани те уверина ле кај мангаја са е манушен хем кај поштујнаја секоле јекхескоро право те живинел сар мангела b (1. Пет. 2:17). Пало адава шај те овел амен прилика те вакера леске со вакерела и Библија хем сар адава шај те поможинел аменге те овел амен пошукар живото.

13. Сар шај те поможине некаске со мислинела кај нане логично те верујнел пе ко Девел?

¹³ Кеда кераја некасаја лафи со иси ле цврсто стави хем ни хари на сложинела пе аменцар, дали ваљани одма те мислина аменге кај џанаја ко со верујнела? (Тит 3:2). На пример, со ако тло соученико вакерела кај нане логично те верујнел пе ко Девел? Дали ваљани одма те мислина кај ов верујнела ки еволуција хем кај џанела бут баши лате? Уствари, ов шај на џанела бут баши адаја тема, него вакерела адава со шунѓа. Наместо те почмине те кере лафи баши еволуција, шај те почмине те кере лафи баши нешто колеске со покасно ка размислинел. На пример, шај те сикаве леске амари интернет-страница jw.org коте со иси теме башо створиме буќа. Покасно шај ка мангел те керел лафи баши несави статија или видеоклипи со дикхља атхе. Ако кераја лафи љубезно, адава шај те поттикнинел ле те сикљовел нешто повише баши Библија.

14. Сар о Нил шукар користинѓа амари интернет-страница те шај те поможинел пле соученикоске коле со сине ле погрешно мислење башо е Јеховаскере сведокија?

¹⁴ Јекх тинејџери со викинела пе Нил, користинѓа амари интернет-страница те шај те сикавел кај адава со несаве вакерена башо  е Јеховаскере сведокија нане чаче. Ов вакерела: „Мло соученико бут пути вакерела сине манге кај на верујнава ки наука адалеске со иси ман доверба ки Библија која сој пхерди парамисенцар“. Адалеске со лескоро соученико на дозволинѓа леске те објаснинел пле верувања, о Нил вакерѓа леске те пхравел ки амари интернет-страница ко дело „И наука хем и Библија“. c Покасно о Нил халило кај лескоро соученико најверојатно читинѓа о материјали хем сине поспремно те керел лафи башо адава сар почминѓа о живото. Тут да шај те овел тут слично искуство.

15. Сар шај о родителија те поможинен пумаре чхавенге те одговоринен ко јекх љубезно начин?

¹⁵ О родителија шај те сикавен пумаре чхавен башо адава сар те одговоринен ко љубезно начин кеда бранинена пумаре верувања (Јак. 3:13). На пример, несаве родителија ки Фамилијарно рат вежбинена сар шај о чхаве те керен адава. Ола заедно разглединена теме баши коленде со шај те пучен лен ки школа. Керена лафи хем вежбинена сар те одговоринен ко несаво пучибе хем сикавена пумаре чхавен сар шај те керен лафи ко јекх смирено хем љубезно начин. (Дикх и рамка „ Практична вежбе кола со шај те поможинен тле фамилијаке“.)

16-17. Сар шај о вежбе те поможинен е терненге?

¹⁶ Асавке вежбе шај те поможинен е терненге те уверинен коркори пес хем те објаснинен е јаверенге кола шукар причине иси лен башо адава ко со верујнена. Ки рубрика „О терне пучена“ со аракхљовела ки jw.org иси хем работна листија башо тинејџерија. d Ола тане керде те шај те поможинен е терненге те керен позорали пумари вера хем те спреминен одговорија  пле лафенцар. Адава со сар фамилија ка проучина акаја рубрика, ка поможинел аменге те бранина амари вера ко јекх смиримо хем љубезно начин.

¹⁷ Јекх терно пхрал со викинела пе Метју објаснинела сар поможинѓе леске асавке вежбе. Ки Фамилијарно рат, о Метју хем лескере родителија бут пути истражинена башо теме коленге со шај те керел пе лафи ки школа. Ов вакерела: „Размислинаја саве пучиба шај некој те пучел хем пало адава вежбинаја сар шај те одговорина ки ленде спрема адава со истражинѓем. Кеда манге јасно соске верујнаја ко нешто, осетинава ман сигурно хем полокхе манге те ачховав смиримо џикоте одговоринава некаске“.

18. Спрема Колошања 4:6, сој тано важно те кера?

¹⁸ Џанѓола пе, чак ако објаснинаја о буќа ко јасно хем уверливо начин адава на значинела кај секој ка прифатинел адава со вакераја. Ама адава со ка кера лафи ко тактично хем љубезно начин шај те поможинел. (Читин Колошања 4:6.) Кеда кераја некасаја лафи башо амаре верувања адава тано сар те пхене фрдаја топка. И топка шај те фрда ла похари или посилно. Ако фрдаја похари тегани најверојатно о јавер џено ка шај те астарел и топка хем те продолжинел е играја. Слично, ако кераја лафи ко тактично хем љубезно начин тегани о мануша шај те овен поспремна те шунен хем те продолжинен о разговор. Џанѓола пе, ако некој мангела те распрајнел пе аменцар, или те вреџинел амен, на сием должна те продолжина о разговор (Изр. 26:4). Ама асавке мануша тане ретка. Повише џене веројатно ка манген те шунен амен.

19. Со ваљани те поттикнинел амен те ова љубезна кеда бранинаја амаре верувања?

¹⁹ Јасно тано кај ка овел амен бари корист ако сикљоваја те ова кротка. Молин тут е Јеховаске баши сила те шај те ачхове смиримо кеда ваљани те одговорине некаске баши несави спорно тема или кеда неправедно критикујнена тут. Ма бистре кај ако ачховеа смиримо адава шај те поможинел те на авел џи ко расправие кеда иси различна ставија. Исто аѓаар, ако одговоринеа ко смирено хем љубезно начин, адава шај те поттикнинел несавен те променинен пумаро стави баши аменде хем баши Библија. Секогаш те ова спремна те бранина амаре верувања, хем адава те кера ле шукарипаја хем те сикава хор поштовање (1. Пет. 3:15). Адалеске, и кроткост нека овел тли силно страна!