1. Башо со користинѓа о Јехова е Петаре кратко англедер те мерел?

 О АПОСТОЛ Петар служинѓа верно е Јеховаске бут берша. Ов сине заедно е Исусеа џикоте проповединела сине. Исто аѓаар, ов почминѓа те проповединел ко подрачја коте со на сине Евреија хем покасно уло члени ко водечко тело. Ко крајо таро лескоро живото кеда џанља кај панда хари ка мерел, о Јехова денѓа ле панда јекх задача. Отприлика 62-64 берш а.е., о Јехова водинѓа ле те пишинел дуј писмија — о библиска лила Прво хем Дујто Петарескоро. Е Петаре сине ле надеж кај пало лескоро мерибе акала писмија ка поможинен е христијаненге (2. Пет. 1:12-15).

2. Соске е Петарескере дуј писмија сине баш ко време?

² О Петар пишинѓа пле писмија ко време кеда лескере пхраља хем пхења сине лен „разна искушенија“ (1. Пет. 1:6). Несаве лошна мануша пробинѓе те чхивен ховавне сикљојба ко собрание хем те теринен е христијанен те постапинен погрешно (2. Пет. 2:1, 2, 14). О христијања со живинена сине ко Ерусалим панда хари ваљани сине те доживинен „о крајо башо са“, јавере лафенцар о Ерусалим хем о храми ваљани сине те овен уништиме тари римско војска (1. Пет. 4:7). Сигурно е Петарескере писмија поможинѓе е христијаненге те дикхен со шај те керен те шај те истрајнен ко пхарипа со сине лен хем исто аѓаар сар шај те спреминен пе башо пхарипа со ка овен лен ки иднина. b

3. Соске ваљани те дикха е Петарескере писмија?

³ Иако о Петар пишинѓа акала писмија е христијаненге таро прво веко, о Јехова мангља те овен вклучиме ко лескоро Лафи. Адалеске акана амен шај те овел амен корист лендар (Рим. 15:4). Слично сар адала христијања, амен да живинаја ко јекх свето кова со охрабринела ко погрешна постапке  хем адава шај те керел аменге пхаро те служина е Јеховаске. Освен адава, панда хари амен да ка доживина јекх неволја која со ка овел бут побари тари адаја со анѓа крајо башо Ерусалим хем башо храми. Ко дуј писмија е Петарескере иси несаве важна поуке. Ола ка поможинен амен те ова спремна башо крајо акале светоскоро, те чхинава те дара таро мануша хем те овел амен силно мангипе јекх јекхеске. Асавке поуке исто аѓаар ка поможинен е старешиненге те дикхен сар шај те грижинен пе е пхраленге таро собрание.

4. Спрема 2. Петарескоро 3:3, 4, со шај те чхивел ко испит амари вера?

⁴ Живинаја машкар о мануша кола со на верујнена ко адава со вакерела и Библија баши иднина. О противникија шај асана аменге адалеске со бут берша вакераја кај о крајо тано паше хем кај ка авел. А несаве вакерена кај о крајо никогаш нане те авел. (Читин 2. Петарескоро 3:3, 4.) Ако шунаја нешто асавко таро мануша каске со проповединаја, таро колеге или тари фамилија амари вера шај те овел ко испит. О Петар вакерѓа со шај те поможинел аменге.

5. Со ка поможинел аменге стрпливо те аџикера о крајо акале светоскоро? (2. Петарескоро 3:8, 9).

⁵ Несавенге шај те дикхјол кај о Јехова аџикерела бут џикоте анела о крајо акале светоскоро. Е Петарескере лафија шај те поможинен аменге те овел амен исправно стави адалеске со сетинкерена амен кај о Јехова на дикхела исто ко време сар со дикхена о мануша. (Читин 2. Петарескоро 3:8, 9.) Е Јеховаске милја берша тане сар јекх диве. Ов тано стрпливо хем на мангела нијекх те овел уништимо. Ама кеда ка авел адава диве о свето сигурно ка овел уништимо. Адалеске иси амен бари чест со шај те користина акава време со ачхило те шај те проповедина е манушенге ко цело свето.

6. Со ка поможинел аменге те икера Јеховаскоро диве ки годи? (2. Петарескоро 3:11, 12).

⁶ О Петар поттикнинела амен те икера ки годи е Јеховаскоро диве. (Читин 2. Петарескоро 3:11, 12.) Сар шај те кера адава? Шукар ка овел, ако шај секова диве те размислина башо благословија со ка добина лен ко нево свето. Шај те замислине туке сар дишинеа чисто воздух, сар хаја здраво храна, сар доџакереа тле манглен со воскреснинѓе хем сар сикавеа е манушен кола со живинѓе бут векија англедер башо адава сар исполнинѓе пе о библиска пророштвија. Асавко размислување ка поможинел аменге стрпливо те аџикера адава време хем те ова сигурна кај о крајо тано бут паше. Адава со англедер џанаја со ка случинел пе панда хари ка поможинел аменге те на ова цидиме таро ховавне учителија (2. Пет. 3:17).

7. Сар шај и дар таро мануш те влијајнел упри аменде?

⁷ Адалеске со џанаја кај о Јехова панда хари ка анел о крајо акале светоске, поттикниме сием те да амендар са те проповедина о шукар хабери е јаверенге. Ама понекогаш шај нане амен храброст башо адава. Соске? Адалеске со шај дараја со ка мислинен или со ка керен о мануша. Баш акава случинѓа пе е Петареске. И рат кеда астарѓе е Исусе, о Петар дарандило те вакерел кај тано е Исусескоро ученико хем трин пути вакерѓа кај на пенџарела ле (Мат. 26:69-75). Ама адалеске со о Петар побединѓа и дар ов шај сине покасно те пишинел: „Ма даран таро адава со ола дарана хем ма вознемиринен тумен“ (1. Пет. 3:14). Е Петарескере лафија уверинена амен кај амен да шај те победина и дар таро мануш.

8. Со шај те поможинел аменге те победина и дар таро мануш? (1. Петарескоро 3:15).

 ⁸ Со шај те поможинел аменге те победина и дар таро мануш? О Петар вакерела: „О Христос, сар Господари, нека овел свето ко тумаре виле“ (Читин 1. Петарескоро 3:15.) На ваљани те бистра кај о Исус Христос тано амаро Цари хем кај иси ле бари моќ. Ако дараја те сведочине некаске кеда иси тут прилика те кере адава тегани сетин тут ко амаро Цари. Замислин сар владинела ко небо хем сар терѓовена англи лесте милиоња ангелија. Ма бистре кај ле иси ле и „цело власт“ хем ко небо хем ки пхув хем кај ов ка овел туја „ко са о диве џи ко крајо акале светоскоро“ (Мат. 28:18-20). О Петар поттикнинела амен те ова секогаш спремна те бранина амари вера. Дали мангеа те сведочине некаске ки бути, ки школа или ки несаво јавер тхан? Тегани англедер размислин кеда шај те појавинел пе туке асавки прилика хем спремин тут башо адава со мангеа те вакере. Молин тут баши храброст хем нека овел тут доверба кај о Јехова ка поможинел туке те победине и дар таро мануш (Апо. 4:29).

9. Сар ки јекх прилика о Петар на сикавѓа мангипе? (Дикх хем и слика.)

⁹ О Петар сиклило сар те сикавел мангипе. Ов сине адатхе кеда о Исус вакерѓа: „Дава тумен неви заповед: манген тумен јекх јекхеа!  Сар ме со мангљум тумен, аѓаар тумен да манген тумен јекх јекхеа“ (Јован 13:34). Иако о Петар шунѓа акала лафија ов покасно на мангља те хал заедно е пхраленцар кола со на сине Евреија адалеске со дарандило таро еврејска христијања. О апостол Павле опишинѓа акаја ситуација ов вакерѓа кај о Петар постапинѓа лицемерно (Гал. 2:11-14). О Петар прифатинѓа лескоро строго совет хем адалеске сиклило нешто лестар. Ко пле солдуј писмија истакнинѓа кај на ваљани само те осетина мангипе башо амаре пхраља хем пхења, него исто аѓаар кај ваљани те сикава адава мангипе.

10. Со поможинела аменге те на сикава нелицемерно мангипе? Објаснин (1. Петарескоро 1:22).

¹⁰ О Петар вакерела кај ваљани те овел амен нелицемерно мангипе амаре пхраленге хем пхењенге. (Читин 1. Петарескоро 1:22.) Асавко мангипе шај те овел амен ако сием послушна е чачипаске. Ко акава чачипе тано вклучимо о сикајбе кај „о Девел нане пристрасно“ (Апо. 10:34, 35). Нашти те ова послушна ки е Исусескири заповед башо мангипе ако сикаваја мангипе само несавенге ко собрание, а јаверенге на. Џанѓола пе, шај несавенцар ка ова попаше него јаверенцар исто сар со сине о Исус. (Јован 13:23; 20:2). Ама о Петар сетинкерела амен кај ваљани те манга са е пхрален соске ола тане дело тари амари фамилија (1. Пет. 2:17).

11. Со значинела те манга е јаверен „силно таро вило“?

¹¹ О Петар поттикнинела амен „те манга амен силно таро вило“. Ко акава контекст те манге силно значинела те манге некас чак кеда тано пхаро те сикавел пе леске мангипе. На пример, со ако јекх пхрал ко несаво начин вреџинела тут или поврединела тут? Шај природно авела аменге те ирана леске наместо те сикава леске мангипе. Сепак, о Петар сиклило таро Исус кај о Девел на мангела те иранел лошнипаја (Јован 18:10, 11). Ов пишинѓа: „Ма иранен лошнипаја башо лошнипе, ни вреџибаја башо вреџибе, наместо адава, иранен шукарипаја“ (1. Пет. 3:9). Ако иси тут силно мангипе спрема о јавера адава ка поттикнинел тут те ове љубезно хем обѕирно чак околенцар со поврединѓе тут.

12. а) Ко со јавер поттикнинел амен о баро мангипе? б) Сар сој сикавдо ко видеоклипи Чувај го единството кое е скапоцен дар, со мангеа те трудине тут те кере?

¹² Ко пло прво писмо, о Петар исто аѓаар користинела о израз „баро мангипе“. Асавко мангипе на учхарела само некобор гревија, него „бут гревија“ (1. Пет. 4:8). Кеда вакерѓа акала лафија, о Петар шај сетинѓа пе ки поука башо простибе која со о Исус сикавѓа ле некобор берша англедер. Ко адава време о Петар веројатно мислинѓа песке кај тано дарежливо соске вакерѓа кај ка простинел пле пхралеске „џи ко ефта пути“. Ама о Исус сикавѓа лесте — хем амен — те простина џи ко 77 пути, јавере лафенцар секогаш (Мат. 18:21, 22). Ако туке пхаро те применине акава совет, ма обесхрабрин тут! Сарине амен сием несовршена, адалеске понекогаш аменге пхаро те простина. Ама важно тано те кере са со шај те простине тле пхралеске хем те смирине тут леа. c

13. Соске шај те овел пхаро е старешиненге те грижинен пе башо пумаре пхраља хем пхења?

¹³ О Петар сигурно никогаш на бистерѓа е Исусескере лафија со вакерѓа лен леске откеда воскреснинѓа: „Грижин тут мле тикне бакхренге“ (Јован 21:16). Ако сиан старешина, џанеа кај акала лафија важинена туке  да. Ама, понекогаш шај те овел пхаро јекхе старешинаске те аракхел време баши акаја важно задача. Ола најангле мора те грижинен пе пумаре фамилијаке ко материјално, емоционално хем духовно поглед. Ола исто аѓаар предводинена ки служба хем учествујнена ко состанокија хем ко конгресија. Несаве тане членија ко Одборија со поможинена машкар о докторија хем е Јеховаскере сведокија или служинена ко Локално оддел башо проектирибе хем градибе. Е старешинен чаче иси лен бут бути!

14. Со шај те керен о старешине ако мислинена кај тане бут зафатиме или уморна те шај те грижинен пе е стадоске? (1. Петарескоро 5:1-4).

¹⁴ О Петар поттикнинѓа е јавере старешинен те овен „пастирија е Девлескере стадоске“. (Читин 1. Петарескоро 5:1-4.) Ако сиан старешина, џанаја кај мангеа те пхрален хем пхењен хем кај мангеа те грижине тут ленге. Ама понекогаш мислинеа кај сиан бут зафатимо или осетинеа тут бут уморно те шај те кере адаја задача. Со шај те кере? Вакер е Јеховаске са со мучинела тут хем кобор мангеа те поможине те пхраленге хем пхењенге. О Петар пишинѓа: „Ако некој служинела, нека овел ле доверба кај шај те керел адава е силаја која со дела ла о Девел“ (1. Пет. 4:11). Те пхрален хем пхењен шај иси лен проблемија со нане целосно те решинен пе ко акава свето. Ама ма бистре о најбаро пастири, о Исус Христос, шај те поможинел ленге повише него било кој јавер. Ов шај те грижинел пе ленге хем авдиве хем ко нево свето. Са со родела о Јехова таро старешине тано те манген пумаре пхрален, те грижинен пе ленге хем те овен шукар „пример е стадоске“.

15. Сар јекх старешина грижинела пе е пхраленге? (Дикх хем и слика.)

¹⁵ О Вилијам кова со бершенцар служинела сар старешина халило кобор тано важно те грижинел пе е пхраленге хем е пхењенге. Кеда почминѓа и пандемија КОВИД-19, ов хем о јавера старешине чхивѓе песке цел секова курко те јавинен пе секоле објавителеске тари пли група. Ов објаснинела соске керена адава: „Бут таро адала пхраља ко адава време сине коркори кхере хем шај сине сигате те почминен те размислинен негативно“. Кеда несаве пхрале или пхења иси ле проблеми, о Вилијам внимателно шунела те шај те хаљовел со ваљани ленге или со мучинела лен. Тегани ов трудинела пе те аракхел  несаве публикацие или видеоклипија тари амари интернет-страница те шај те охрабринел адале пхрале или пхења. Ов вакерела: „Акана тано време кеда ваљани панда повише те грижина амен е пхраленге. Амен бут трудинаја амен те шај те поможина е манушенге те сикљовен башо Јехова. Ваљани исто добором те трудина амен те шај те поможина амаре пхраленге те ачховен ко чачипе“.

16. Ко саве начинија шај те применина о поуке со сиклилем лен таро е Петарескере писмија?

¹⁶ Ки акаја статија дикхлем само некобор поуке таро е Петарескере дуј писмија. Шај приметинѓан буќа коленде со мангеа те ове пошукар. На пример, дали мангеа почесто те размислине башо благословија со ка овен ко нево свето? Дали чхивѓан туке цел те сведочине ки бути, ки школа или ки несави јавер неформално прилика? Дали размислинѓан ко кола начинија шај те сикаве побаро мангипе те пхраленге хем те пхењенге? Тумен о старешине, дали сиен одлучна те грижинен тумен е Јеховаскере бакхренге спремно хем мангипаја? Ако искрено испитинеа тут шај ка дикхе кај иси тут несаве слабостија, ама ма обесхрабрин тут. Амаро Господари о Исус тано шукар хем ов ка поможинел туке те кере о потребна промене (1. Пет. 2:3). О Петар уверинела амен: „О Девел... целосно ка обучинел тумен, ка керел тумен зорале, ка поможинел туменге те ачховен верна, хем ка керел те терѓовен цврсто“ (1. Пет. 5:10).

17. Со ка добина ако на откажинаја амен хем ако мукхаја о Јехова те обучинел амен?

¹⁷ Ко почеток о Петар мислинела сине кај на заслужинела те овел е Исусескоро ученико (Лука 5:8). Ама адалеске со љубезно поможинѓе леске о Јехова хем о Исус, о Петар на откажинѓа пе таро адава те овел следбенико е Христосескоро. Адалеске о Јехова дозволинѓа о Петар „те кхувел ко вечно Царство амаре Господарескоро хем Спасителескоро, е Исус Христосескоро“ (2. Пет. 1:11). Адаја сине бут бари награда! Ако ту да на откажинеа тут сар о Петар хем мукхеа о Јехова те обучинел тут, ту да ка добине о вечно живото сар награда. Хем баши тли вера ка ове спасимо (1. Пет. 1:9).