1-2. Со ваљани те кера џикоте аџикераја о нево свето?

 БУТ сием благодарна башо е Јеховаскоро ветување со ка анел јекх нево праведно свето (2. Пет. 3:13). Иако на џанаја кеда точно ка исполнинел пе акава, о буќа со случинена пе ко свето сикавена кај на ваљани панда бут те аџикера (Мат. 24:32-34, 36; Дела 1:7).

² Бизи разлика кобор време сием ко чачипе, сарине амен ваљани те бајрара амари вера ко адава ветување са џикоте на исполнинела пе. Соске? Адалеске со чак и силно вера шај те слабонел. Уствари, о апостол Павле баши слабо вера вакерѓа кај тани „грево кова со шај локхе те перавел амен“ (Евр. 12:1). Те шај амари вера те на тикњол, ваљани редовно хор те размислина башо буќа кола со докажинена кај о нево свето панда хари ка авел (Евр. 11:1).

3. Башо со ка кера лафи ки акаја статија?

³ Ки акаја статија ка дикха ко кола трин начинија шај те бајрара амари вера ко е Јеховаскоро ветување башо нево свето: 1) аѓаар со хор ка размислина баши откупнина, 2) аѓаар со ка размислина баши е Јеховаскири моќ хем 3) аѓаар со ка ова зафатиме духовна активностенцар. Пало адава ка дикха сар е Јеховаскири порака со вакерѓа ла е Авакумеске бајрарела амари вера. Ама прво те дикха ко саве ситуацие шај те аракхљова панда авдиве хем сар и силно вера ко ветување башо нево свето шај те поможинел аменге.

 КЕДА ВАЉАНИ ТЕ СИКАВА СИЛНО ВЕРА?

4. Башо кола одлуке ваљани аменге силно вера?

⁴ Секова диве анаја одлуке коленге со ваљани те овел амен бари вера. На пример, анаја одлуке башо друштво, забава, образование, брако, чхаве хем бути. Ко асавке ситуацие шукар тано те пуча амен: „Дали мле одлуке сикавена кај сиум сигурно кај акава свето тано привремено хем кај панда хари ка авел е Девлескоро нево свето, или мукхава ко мле одлуке те влијајнен мануша кола со верујнена кај акале светоја завршинела са?“ (Мат. 6:19, 20; Лука 12:16-21). Ка ана шукар одлуке ако бајрараја амари вера ко адава кај о нево свето ка авел бут сигате.

5-6. Соске ваљани аменге силно вера кеда накхаја таро пхаре времија? Вакер пример.

⁵ Исто аѓаар иси амен неволје баши коленде со ваљани аменге силно вера. Шај иси амен прогонство или ваљани те икљова ко крајо сериозно насвалипаја или јавере буќенцар кола со шај те обесхрабринен амен. Ко почеток шај те мислина аменге кај шај те истрајна ки адаја неволја. Ама обично о неволје трајнена повише време, адалеске ваљани аменге силно вера те шај те истрајна хем понадари да те служина радосно е Јеховаске (Рим. 12:12; 1. Пет. 1:6, 7).

⁶ Џикоте трајнела несави неволја, шај те мислина аменге кај о нево свето никогаш нане те авел. Дали акава значинела кај иси амен слабо вера? Нане секогаш аѓаар. Те вакера јекх пример. Ко јекх бут шудро јевен шај те мислина аменге кај о нилај никогаш нане те авел. Ама сепак о нилај авела. Слично, кеда сием бут обесхрабриме шај мислинаја аменге кај о нево свето никогаш нане те авел. Ама ако иси амен силно вера тегани џанаја кај е Девлескере ветувања ка исполнинен пе (Пс. 94:3, 14, 15; Евр. 6:17-19). Кеда сием увериме ко адава амен шај понадари да те чхива е Јехова ко прво тхан ко амаро живото.

7. Таро кова негативно стави ваљани те аракха амен?

⁷ Јекх јавер бути коте со исто аѓаар ваљани аменге силно вера тано о проповедибе. Бут мануша каске со проповединаја мислинена кај „о шукар хабери“ башо нево свето со ка авел нане реално (Мат. 24:14; Езек. 33:32). Никогаш на мангаја те дозволина асавко негативно стави те влијајнел упри аменде. Те шај те на случинел пе аменге адава мора понадари да те бајрара амари вера. Те дикха трин начинија сар шај те кера адава.

ХОР РАЗМИСЛИН БАШИ ОТКУПНИНА

8-9. Сар адава со хор ка размислина баши откупнина шај те бајрарел амари вера?

⁸ Јекх начин сар шај те бајрара амари вера тани ако хор размислинаја баши откупнина. И откупнина тани гаранција кај е Девлескере ветувања ка исполнинен пе. Кеда шукар размислинаја башо адава соске сине денди и откупнина хем која бари жртва керѓа о Јехова, тегани бајрараја амари вера кај сигурно ка исполнинел пе е Девлескоро ветување башо вечно живото ко пошукар свето. Соске шај те вакера акава?

⁹ Те размислина хари башо адава со мора сине те керен о Јехова хем о Исус баши откупнина. О Јехова таро небо бичхалѓа пле мангле првобијаме Чхаве колеа со сине најпаше, те бијанѓовел ки пхув сар совршено мануш. Ки пхув о Исус доживинѓа разна пхарипа. Пало адава сине мучимо хем муло баре дукхенцар. Акаја сине бут бари цена со платинѓа ла о Јехова. Амаро мангло Девел никогаш на би дозволинела сине лескоро Чхаво те овел мучимо хем те мерел те шај само јекх кратко време те уживина ко живото (Јован 3:16; 1. Пет. 1:18, 19). Адалеске со о Јехова  платинѓа бари цена, ов ка керел са те шај те овел амен прилика вечно те живина ко нево свето.

РАЗМИСЛИН БАШИ Е ЈЕХОВАСКИРИ МОЌ

10. Спрема Ефешаните 3:20, со шај те керел о Јехова?

¹⁰ Дујто начин сар шај те бајрара амари вера тано ако размислинаја баши е Јеховаскири моќ. Ле иси ле моќ те исполнинел са со ка ветинел. Бут мануша мислинена кај нашти те исполнинел пе о ветување башо вечно живото ко јекх нево свето. Ама о Јехова бут пути ветинела буќа кола со о мануша никогаш нашти те исполнинен лен, а ов шај соске тано Семоќно Девел (Јов 42:2; Мар. 10:27). Адалеске на изненадинела амен адава со ов ветинела аменге буќа кола со никој јавер нашти те исполнинел лен. (Читин Ефешаните 3:20.)

11. Вакер јекх таро е Девлескере необична ветувања. (Дикх и рамка „ Несаве необична ветувања со исполнинѓе пе“.)

¹¹ Те размислина башо несаве ветувања кола со о Јехова денѓа пле народоске таро пурано време а изглединена сине кај нашти те исполнинен пе. Кеда о Авраам хем и Сара сине пхуре, ов вакерѓа ленге кај ка овел лен чхаво (1. Мој. 17:15-17). О Јехова исто аѓаар вакерѓа е Авраамеске кај лескере потомција ка живинен ко Ханаан. О Израелција, кола со сине е Авраамескере потомција, шај мислинѓе песке кај акава ветување никогаш нане те исполнинел пе соске бут берша сине робија ко Египет. Ама ко крајо исполнинѓа пе. Покасно, о Јехова вакерѓа кај е Елисавета ка овел ла чхаво иако сине пхури. Ов исто аѓаар вакерѓа е Маријаке, која со сине чхај, кај ка бијанел лескере Чхаве. Акалеа ваљани сине те исполнинел пе јекх ветување кова со о Јехова денѓа ле англедер некобор милја берша ки Еденско градина (1. Мој. 3:15).

12. Ко со уверинена амен о лафија таро Исус Навин 23:14 хем Исаија 55:10, 11 баши е Јеховаскири моќ?

¹² Кеда размислинаја башо са о ветувања со денѓа лен о Јехова хем сар исполнинѓа лен, хаљоваја која бари моќ иси ле хем тегани амари вера ко лескоро ветување башо јекх нево свето овела панда посилно. (Читин Исус Навин 23:14; Исаија 55:10, 11.) Аѓаар ка шај пошукар те поможина е јаверенге те хаљовен кај о ветување башо јекх нево свето нане суно или фантазија. Кеда о Јехова керѓа лафи башо нево небо хем неви пхув, ов вакерѓа: „Ко акала лафија шај те верујнел пе хем тане чачутне“ (Отк. 21:1, 5).

ОВ ЗАФАТИМО ДУХОВНА АКТИВНОСТЕНЦАР

13. Сар шај о состанокија те бајрарен амари вера? Објаснин.

¹³ Трито начин сар шај те бајрара амари вера тано аѓаар со ка ова зафатиме духовна активностенцар. На пример, размислин сар поможинена аменге амаре состанокија. И Ана, која со бут берша служинѓа ко различна врсте полновремено служба, вакерела: „О состанокија поможинена манге понадари да те овел ман силно вера. Чак ако о говор на сине баш интересно или о пхрал на вакерѓа нешто нево, ме бут пути шунава сине нешто со поможинѓа манге пошукар те хаљовав и Библија хем адава керела мли вера позорали“. b Амари вера шај исто аѓаар те бајрара кеда шунаја е јаверенгере коментарија ко состанок (Рим. 1:11, 12; 10:17).

14. Сар и служба поможинела аменге те бајрара амари вера?

¹⁴ Јавер начин сар бајрараја амари вера тано аѓаар со џаја ки служба (Евр. 10:23). И Барбара која со служинела е Јеховаске повише таро 70 берш вакерела: „Ме секогаш дикхава сине ки служба сар нешто со  бајрарела мли вера. Со повише керава сине лафи е јаверенцар башо е Јеховаскере бут шуже ветувања, добором повише мли вера овела сине позорали“.

15. Сар и лично студија поможинела аменге те кера посилно амари вера? (Дикх хем и слика.)

¹⁵ Јекх јавер бути која со керела амари вера те овел позорали тани и лично студија. Е Сузанаке бут поможинела адава со иси ла распоред кеда хем со ка проучинел. Ој вакерела: „Недела спреминава и Стражарско кула башо следно курко. Понеделник хем вторник спреминава ман башо состанок Амаро живото хем служба. О јавера диве иси ман несаво библиско проекти кова со проучинава ле“. Адалеске со и Сузана редовно икерела пе ко пло распоред проучибаске ој цело време керела бути ки пли вера. И Ирена која со бершенцар служинѓа ко главно седиште вакерела кај адава со проучинела о библиска пророштвија поможинела лаке те бајрарел пли вера. Ој вакерела: „Бут воодушевинела ман адава со е Јеховаскере пророштвија исполнинѓе пе џи ко најтикне деталија“. c

„СИГУРНО КА ИСПОЛНИНЕЛ ПЕ“

16. Соске о лафија со вакерѓа лен о Јехова е Авакумеске важинена аменге да авдиве? (Евреите 10:36, 37).

¹⁶ Несаве слуге е Јеховаскере бут берша више аџикерена те авел о крајо акале светоскоро. Сар мануша шај те мислина аменге кај адалеске со о крајо акале светоскоро панда на ало о Јехова каснинела. Ама ов џанела сар осетинена пе лескере слуге, адалеске ов уверинѓа е пророко е Авакуме: „И визија ка исполнинел пе ко пло време хем сиѓарела спрема о крајо хем нане те ховавел. Чак хем те дикхјол сар те пхене каснинела, аџикер ла соске сигурно ка исполнинел пе хем нане те каснинел“ (Авак. 2:3). Дали о Девел вакерѓа акала лафија те шај те поможинел  само е Авакумеске, или акала лафија важинена аменге да авдиве? О Јехова водинѓа е апостол Павле те применинел адала лафија упро христијања кола со едвај аџикерена о нево свето. (Читин Евреите 10:36, 37.) Значи шај те ова сигурна кај чак ако мислинаја кај е Девлескоро ветување каснинела ов сигурно ка исполнинел пе, нане те каснинел!

17. Сар применинѓа јекх пхен о совет кова со о Јехова денѓа ле е Авакумеске?

¹⁷ Бут слуге е Јеховаскере применинѓе о совет те аџикерен, адава керѓе ле чак бут берша. На пример, и Луис почминѓа те служинел е Јеховаске ко 1939-то берш. Ој вакерела: „Ко адава време мислинава сине кај о Армагедон ка авел англедер те завршинав е средно школаја. Ама адава на случинѓа пе. Ко са адала берша бут поможинѓе манге о библиска извештаија башо мануша кола со аџикерѓе бут време англедер те добинен адава со сине ленге ветимо. Сар на пример, о извештаија башо Ное, о Авраам, о Јосиф хем јавера. И доверба кај о ветувања ка исполнинен пе поможинѓа манге хем е јаверенге те ова увериме кај о нево свето тано бут паше“. Бут џене кола со бут берша служинена е Јеховаске сложинена пе акале лафенцар.

18. Сар адава со ка размислина башо створиме буќа бајрарела амари вера башо нево свето?

¹⁸ Точно тано адава кај о нево свето панда на ало. Ама размислин башо несаве буќа со више тане акате — о ѕвезде, о кашта, о животне хем о јавера мануша. Никој нашти те вакерел кај са акала буќа на постојнена иако сине јекх време кеда акала буќа на постојнѓе. Ола постојнена само адалеске со о Јехова створинѓа лен (1. Мој. 1:1, 26, 27). Амаре Девле исто аѓаар иси ле намера те керел јекх нево свето хем ов ка исполнинел адаја намера. Ко нево свето о мануша ка уживинен вечно ко совршено састипе. Шај те ова сигурна кај ко време со одрединѓа ле о Девел, о нево свето ка постојнел исто сар со постојнела о универзум авдиве (Иса. 65:17; Отк. 21:3, 4).

19. Сар шај те бајраре тли вера?

¹⁹ Џикоте авела о нево свето кер са со шај те бајраре тли вера. Секогаш ов благодарно баши откупнина. Размислин баши е Јеховаскири моќ хем ов зафатимо е духовна активностенцар. Ако кереа акала буќа шај те ове машкар „окола со баши пли вера хем стрпливост добинена адава сој ветимо“ (Евр. 6:11, 12; Рим. 5:5).