1. Опишин со случинѓа пе кеда о Исус керѓа пло прво чудо?

 ЗАМИСЛИН туке и ситуација таро есен 29 берш а.е., кеда о Исус почминѓа пле службаја. О Исус хем лескири дај и Марија хем несаве таро лескере ученикија сине каниме ко бијав ки Кана, јекх гав северно таро Назарет, и диз коте со барило о Исус. Адалеске со и Марија сине паше е бојраја хем е џамутреа, ој веројатно поможинела сине ко бијав. Ама атхе случинѓа пе нешто со шај сине те лаџакерел е фамилија хем е брачно паре — на сине више мол. b Шај але ленге повише гостија таро адава со очекујнѓе. И Марија одма гели ко пло чхаво хем вакерѓа леске: „Нане лен више мол“ (Јован 2:1-3). Со керѓа о Исус? Ов керѓа нешто необично, чудоја претворинѓа о пани ки „шужи мол“ (Јован 2:9, 10).

2-3. а) Сар о Исус користинѓа пли моќ? б) Сави корист иси амен ако размислинаја башо е Исусескере чудија?

² Џикоте трајнела сине лескири служба о Исус керѓа бут чудија. c Ов користинѓа пли моќ те шај те поможинел буте милја манушенге. На пример, ки јекх прилика чудоја хранинѓа 5.000 муршен, а ки јавер прилика 4.000 муршен.  Ако вклучинаја е џувлен хем е чхавен кола со исто аѓаар сине присутна, о Исус хранинѓа вкупно 27.000 манушен (Мат. 14:15-21; 15:32-38). Ко солдуј случаија исто аѓаар сасљарѓа буте манушен (Мат. 14:14; 15:30, 31). Замислин туке кобор сине воодушевиме о мануша кеда дикхле сар о Исус чудоја хранинѓа хем сасљарѓа лен!

³ Амен шај бут те сикљова таро чудија со керѓа лен о Исус. Ки акаја статија ка дикха поуке со шај те сикљова таро чудија кола со ка керен амари вера те овел позорали. Пало адава ка дикха сар шај те ова сар о Исус кова со сикавѓа понизност хем сочувство џикоте керѓа о чудија.

4. Баши касте шај те сикљова поуке таро е Исусескере чудија?

⁴ О чудија со керѓа лен о Исус на само со бајрарена амари вера хем сикавена амен поуке баши лесте, него исто аѓаар лендар сикљоваја бут башо лескоро Дад. Шај те вакера акава соске о Јехова дела сине моќ е Исусеске те шај те керел о чудија. Ко Дела 10:38 пишинела: „О Девел помазинѓа е Исусе свети духоја хем силаја, а ов пхирела сине ки пхув хем керела сине шукарипе хем сасљарела сине са околен со мучинела лен сине о Бенг, адалеске со о Девел сине леа“. Исто аѓаар на ваљани те бистра кај о Исус пле лафенцар хем постапкенцар — коте сој вклучиме хем о чудија со керѓа лен — совршено сикавѓа сар размислинела лескоро Дад хем саве чувствија иси ле (Јован 14:9). Те дикха трин поуке со шај те сикљова таро е Исусескере чудија.

5. Со поттикнинѓа е Исусе те керел чудија? (Матеј 20:30-34).

⁵ Прво, о Исус хем лескоро Дад бут мангена амен. Џикоте о Исус сине ки пхув ов сикавѓа кобор мангела е манушен аѓаар со користинѓа пли моќ те шај те локхјарел ленгере муке. Ки јекх прилика, дуј короле мануша молинена ле сине те поможинел ленге. (Читин Матеј 20:30-34.) Приметин кај е Исусеске „пело жал“ хем тегани сасљарѓа лен. Ко акава тхан башо израз „пело леске жал“ користинела пе јекх грчко глаголи кова со сикавела кај е Исусе бут дукхандило ле кеда дикхља сар мучинена пе акала мануша. Акалеа о Исус сикавѓа баро мангипе кова со поттикнинѓа ле исто аѓаар те дел хајбаске е бокхален хем те сасљарел е лепрозна манушен (Мат. 15:32; Мар. 1:41). Шај те ова сигурна кај о Јехова, о Девел со иси ле баро сочувство, хем лескоро Чхаво бут мангена амен хем кај дукхала лен кеда дикхена сар мучинаја амен (Лука 1:78; 1. Пет. 5:7). Ола едвај аџикерена те циден са о проблемија со мучинена е манушен.

6. Сави моќ денѓа о Девел е Исусеске?

⁶ Дујто, о Девел денѓа е Исусеске моќ те решинел са е манушенгере проблемија. Преку о чудија о Исус сикавѓа кај шај те решинел проблемија кола со амен никогаш нашти те решина лен. На пример, ле иси ле моќ те цидел корендан е манушенгере проблемија, аѓаар со ка ослободинел амен таро грево хем лескере последице сар сој о насвалипе хем о мерибе (Мат. 9:1-6; Рим. 5:12, 18, 19). Лескере чудија сикавѓе кај ов шај те сасљарел секова насвалипе хем чак те ваздел е мулен (Мат. 4:23; Јован 11:43, 44). Исто аѓаар, ле иси ле моќ те контролиринел баро невреме хем те ослободинел е манушен таро демонија (Мар. 4:37-39; Лука 8:2). Кобор осетинаја амен сигурна адалеске со џанаја кај о Јехова денѓа асавки моќ пле Чхавеске.

7-8. а) Ко со уверинена амен о чудија со керѓа лен о Исус? б) Кова чудо ту едвај аџикереа те дикхе ко нево свето?

 ⁷ Трито, шај те ова целосно увериме кај о идна берекетија таро е Девлескоро Царство ка исполнинен пе. О чудија со керѓа лен о Исус сикавена со ка керел ки цели пхув сар цари ко е Девлескоро Царство. Те дикха со аџикерела амен панда хари кеда о Исус ка владинел упри пхув. Ка овел амен совршено састипе соске ов ка цидел секова насвалипе хем телесно маана со мучинела е манушен (Иса. 33:24; 35:5, 6; Отк. 21:3, 4). Никогаш нане те ачхова бокхале или те погодинел амен несави природно катастрофа (Иса. 25:6; Мар. 4:41). Исто аѓаар ка ова бут радосна со ка шај те доџакера амаре манглен кола со ка „уштен таро гробо“ (Јован 5:28, 29). Кова чудо ту едвај аџикереа те дикхе ко нево свето?

⁸ Кеда керела сине чудија, о Исус сикавѓа бари понизност хем сочувство — особине кола со ваљани амен да те сикава лен. Те дикха башо акава дуј примерија, прво ка разгледина о извештај башо бијав ки Кана.

9. Соске о Исус керѓа чудо ко јекх бијав? (Јован 2:6-10).

⁹ Читин Јован 2:6-10. Кеда на сине више мол ко бијав, дали о Исус мора сине те керел нешто? На. Нане ни јекх пророштво коте со вакерела кај о Месија ка керел чудоја мол. Сар би осетинеа тут сине ако сред  бијав тле гостија ачхона бизо пијбе? Е Исусеске веројатно пело жал баши фамилија, посебно баши бори хем о џамутро хем на мангља ола те овен лаџаке. Адалеске, сар со сине спомнимо ко почеток тари акаја статија, ов керѓа јекх чудо. Ов претворинѓа отприлика 390 литре пани ки бут квалитетно мол. Ов шај керѓа добором бут мол те шај те ачховел лен пало бијав да или те поможинел лен ко материјално поглед соске шај сине те бикинен ла. Сигурно о џамутро хем и бори сине бут благодарна башо акава!

10. Кола тане несаве важна деталија сој тане пишиме ко извештај таро Јован 2-то поглавје? (Дикх хем и слика.)

¹⁰ Те дикха несаве важна деталија сој пишиме ко извештај таро Јован 2-то поглавје. Дали приметинѓан кај о Исус на сине адава со пхерѓа о ќупија пани? Наместо те привлечинел внимание ки песте, ов вакерѓа околенге со служинена сине те пхерен о ќупија пани (стихија 6, 7). Откеда претворинѓа о пани ки мол, на ингарѓа ов и чаша мол ко управители е бијавескоро. Наместо адава, ов вакерѓа околенге со служинена те керен адава (стихо 8). О Исус сигурно на леља јекх чаша мол, те ваздел ла англо са о гостија хем те фрдел чалми: „Пробинен акаја мол која со акана керѓум ла!“

11. Со шај те сикљова таро е Исусескоро чудо?

¹¹ Со шај те сикљова таро чудо е Исусескоро кеда керѓа о пани те овел мол? Сикљоваја јекх поука баши понизност. О Исус на фрдинѓа чалми акале чудоја. Уствари, ов никогаш на фалинѓа пе е буќенцар со керѓа лен. Наместо адава, ов понизно секова пути дела сине цело фалба пле Дадеске (Јован 5:19, 30; 8:28). Ако џаја пало пример е Исусескоро аѓаар со иси амен понизно стави, нане те фрда чалми е буќенцар со кераја лен. Бизи разлика со кераја ки служба башо Јехова, на ваљани те фалина коркори амен него е Девле каске со служинаја (Ерем. 9:23, 24). Ваљани те да ле и чест која со заслужинела ла, соске бизи е Јеховаскири помош нијекх бути нашти те кера ла шукар (1. Кор. 1:26-31).

12. Ко саво јавер начин шај те ова понизна сар о Исус? Вакер пример.

¹² Те дикха ко саво јавер начин шај те ова понизна сар о Исус. Замислин туке акаја ситуација: Јекх старешина накхавела бут време јекхе терне слуга-помошникоја те шај те поможинел леске те спреминел пло прво јавно говор. Адалеске о терно пхрал керѓа јекх бут охрабрувачко говор хем о собрание уживинѓа ко адава. Пало состанок некој џала ко старешина хем вакерела: „Адава пхрал керѓа бут шужо говор, нели?“ Дали о старешина ваљани те вакерел: „Оја, ама ме накхавѓум бут време леа те шај те поможинав ле“, или понизно ка вакерел: „Оја бут шукар керѓа, дичинава ман леа“? Ако сием понизна, тегани нане те очекујна о јавера те фалинен амен башо шукар буќа со кераја е јаверенге. Доволно аменге адава со џанаја кај о Јехова дикхела хем ценинела адава со кераја. (Споредин Матеј 6:2-4; Евр. 13:16.) Оја, амен радујнаја е Јехова кеда сием понизна сар о Исус (1. Пет. 5:6).

13. Со дикхља о Исус паше узи диз Наин, хем со керѓа ов? (Лука 7:11-15).

¹³ Читин Лука 7:11-15. Замислин туке акаја ситуација која со случинѓа пе џикоте о Исус сине ки пхув. Ов патујнела сине ко Наин, јекх Галилејско диз која со сине паше узо Сунам, коте со о Елисеј англедер 900 берша воскреснинѓа јекхе Сунамкакере  чхаве (2. Цар. 4:32-37). Кеда о Исус ало попаше ки порта ов дикхља сар ингарена јекхе муле те парунен ле. Акаја ситуација сине бут тажно соске јекх удовица нашавѓа пле единствено чхаве. Ама акаја дај на сине коркори, бут џене тари диз сине лаја. О Исус ачхавкерѓа лен хем керѓа нешто со иранѓа и радост акале дајакири — ов воскреснинѓа лакере чхаве. Акава тано јекх таро трин воскресенија е Исусескере кола сој подетално опишиме ко евангелија.

14. Кола тане несаве важна деталија таро извештај со аракхљола ко Лука 7-то поглавје? (Дикх хем и слика.)

¹⁴ Те дикха несаве важна деталија таро извештај со аракхљола ко Лука 7 поглавје. Дали приметинѓан кај о Исус „дикхља“ адале тажно даја хем тегани „пело леске жал баши лате“? (стихо 13). Шај о Исус приметинѓа сар ој ровела џикоте пхирела сине англо пло муло чхаво хем адалеске ов чхивѓа пе лаке ки кожа. О Исус на само со жалинѓа адале даја, него ов сикавѓа лаке сочувство. Ко јекх љубезно начин вакерѓа лаке: „Ма ров“. Пало адава керѓа нешто те поможинел ла. Ов воскреснинѓа е чхаве хем „денѓа ле лескере дајаке“ (стихија 14, 15).

15. Со шај те сикљова таро е Исусескоро чудо?

¹⁵ Со шај те сикљова таро е Исусескоро чудо со воскреснинѓа е удовицакере чхаве? Сикљоваја кај ваљани те сикава сочувство адаленге со тугујнена. Џанѓола пе, амен нашти те воскреснина е мулен сар о Исус со керѓа. Ама шај те приметина адален со тугујнена хем те сикава ленге сочувство, исто сар со керѓа о Исус. На ваљани те аџикера те сикава сочувство, него ваљани те вакера хем те кера нешто колеа со ка поможина лен хем ка утешина лен d (Изр. 17:17; 2. Кор. 1:3, 4; 1. Пет. 3:8). Чак едноставна лафија хем тикне љубезна постапке шај бут те значинен адаленге со тугујнена.

16. Сар со дикхела пе ки слика, со сикљовеа таро искуство јекхе дајакоро колатар со мули и тикни чхај?

¹⁶ Те дикха јекх искуство. Англедер некобор берша џикоте гиљавела сине ко состанок,  јекх пхен приметинѓа сар јекх дај ровела. И гили сине баши надеж ко воскресение, а тари акаја дај сигенде мули лакири тикни чхај. Адалеске со џанља адава, акаја пхен одма гели узи лате, гушинѓа ла хем заедно гиљавѓе и гили џи ко крајо. Пало адава и дај вакерѓа: „Осетинѓум баро мангипе таро пхраља хем таро пхења“. Ој сине бут благодарно со сине ко адава состанок. Ој вакерела: „Ко амаре состанокија шај те добина и помош која со ваљани аменге“. Шај те ова сигурна кај о Јехова приметинела хем ценинела чак о тикне буќа со кераја те шај те сикава сочувство адаленге „сој пхаге духоја“ (Пс. 34:18).

17. Со сиклилем ки акаја статија?

¹⁷ Шај те ова бут охрабриме ако ки Библија проучинаја о извештаија башо е Исусескере чудија. Ола сикавена амен кај о Јехова хем о Исус бут мангена амен, кај е Исусе иси ле моќ те решинел о проблемија со мучинена е манушен хем кај шај те ова увериме кај о ветувања баши иднина ка исполнинен пе кеда ка владинел е Девлескоро Царство. Џикоте проучинаја акала извештаија, шај те размислина башо адава сар шај те сикава особине сар е Исусескере. Шај те проучине јавера да чудија е Исусескере ки Фамилијарно рат или ки лично студија. Размислин со шај те сикљове лендар хем тегани вакер адава е јаверенге да. Ако кереа адава, сигурно адала разговорија ка овен бут охрабрувачка (Рим. 1:11, 12).

18. Башо со ка кера лафи ки следно статија?

¹⁸ Ко крајо тари пли служба, о Исус керѓа о трито хем о последно воскресение кова сој пишимо ки Библија. Ама акава воскресение разликујнела пе сине таро јавера соске ов воскреснинѓа пле амале кова со сине штар диве муло. Кола поуке шај те сикљова таро чудија сој пишиме ко евангелија? Хем сар шај те бајрара амари вера ки надеж башо воскресение? Ки следно статија ка овен одговориме акала пучиба.