1. Соске коментиринаја ко состанокија?

 СОСКЕ џаја ко состанокија? Најангле те шај те фалина е Јехова (Пс. 26:12; 111:1). Исто аѓаар адалеске со мангаја те охрабрина јекх јекхе ко акала пхаре времија (1. Сол. 5:11). Кеда ваздаја амаро вас хем коментиринаја, амен кераја о солдуј буќа.

2. Кеда шај те коментирина ко амаре состанокија?

² Секова курко иси амен прилика те коментирина ко амаре состанокија. На пример, ко викендија шај те коментирина кеда проучинаја и Стражарско кула. А ко состанок со икерела пе ко работна диве шај те коментирина ко духовна бисерија, ко проучибе и Библија ки дворана или ко јавера делија коте со шај те коментиринел пе.

3. Саве предизвикија шај те овен амен хем сар шај о Евреите 10:24, 25 те поможинел аменге?

³ Сарине амен мангаја те фалина е Јехова хем те охрабрина е пхрален амаре коментаренцар. Ама шај иси амен трема те коментирина или шај бут мангаја те коментирина ама понекогаш о пхраља на дена амен те коментирина секова пути кеда ваздаја амаро вас. Со шај те поможинел аменге ко асавке ситуацие? О одговор шај те аракха ле ко писмо со пишинѓа ле о апостол Павле е Евреенге. Кеда керѓа лафи башо адава кобор тано важно те џа ко состанокија ов истакнинѓа кај ваљани те „охрабрина амен јекх јекхеа“. (Читин Евреите 10:24, 25.) Кеда хаљоваја кај чак е  едноставна коментаренцар шај те охрабрина е јаверен ко состанок, тегани адава шај те керел аменге полокхо те коментирина. Хем ако на дена амен те коментирина секова пути кеда ваздаја амаро вас, тегани шај те радујна амен башо адава со о јавера шај те коментиринен (1. Пет. 3:8).

4. Башо кола трин буќа ка кера лафи ки акаја статија?

⁴ Ки акаја статија прво ка дикха сар шај те охрабрина амен јекх јекхеа ко јекх тикно собрание коте со похари џене коментиринена. Пало адава, ка дикха сар шај те охрабрина амен јекх јекхеа ко јекх баро собрание коте со бут џене ваздена пумаро вас те шај те коментиринен. Ко крајо ка дикха сар адава со вакераја ко амаре коментарија шај те охрабринел е јаверен.

5. Сар шај те охрабрина амен јекх јекхеа ако иси хари џене ко состанок?

⁵ Ко јекх тикно собрание или група нане бут џене кола со ваздена пумаро вас те коментиринен. Понекогаш о пхрал кова со водинела ваљани несаво време те аџикерел џикоте ваздела некој пло вас. Аѓаар о состанок шај те овел досадно хем адава нане охрабрувачко. Со шај те кере? Ов спремно повише пути те вазде тло вас. Адалеа ка поттикнине е јаверен повише те коментиринен.

6-7. Со шај те поможинел амен те овел амен похари трема кеда коментиринаја?

⁶ Со ако чак адава со размислинеа те коментирине керела те овел тут трема? Бут џене осетинена пе аѓаар. Сепак, те шај повише те охрабрине тле пхрален хем пхењен роде начинија со ка поможинен туке те овел тут похари трема кеда ка коментирине. Сар шај те кере адава?

⁷ Шај те поможинен туке несаве предлогија со аракхљовена ко изданија тари Стражарско кула кола со иклиле англедер. b На пример, јекх лендар тано те спремине тут шукар (Изр. 21:5). Со пошукар пенџареа о материјали, добором полокхе ка овел туке те коментирине. Исто аѓаар де кратка коментарија (Изр. 15:23; 17:27). Со пократко тано тло коментари, добором похари ка овел тут трема. О пхраља шај полокхе те хаљовен јекх кратко коментари таро јекх или дуј реченице, него јекх баро коментари коте со иси бут мисле. Адалеа со кратко коментиринеа тле лафенцар сикавела кај сиан шукар спремимо хем кај шукар хаљовеа о материјали.

8. Сар дикхела о Јехова ко адава со трудинаја амен те да амаро најшукар?

⁸ Со ако применинеа несаве таро акала предлогија ама иси тут панда трема те коментирине повише таро јекх или дуј пути? Ов уверимо кај о Јехова ка ценинел тло трудо те кере адава со шај (Лука 21:1-4). Те де тло најшукар на значинела те чхиве туке товар со нашти те пхираве ле (Фил. 4:5). Размислин со шај те кере, чхив туке цел те кере адава хем молин тут башо андруно мир. Ко почеток тли цел шај те овел те де јекх кратко коментари.

9. Саво предизвик шај те овел некас ко јекх баро собрание?

⁹ Ако сиан ко јекх баро собрание шај иси тут јавер предизвик. Шај добором бут пхраља хем пхења ваздена пло вас те коментиринен со бут пути шај те случинел  пе о пхрал со водинела те на дикхел кај ту да ваздеа тло вас. На пример, и Даниела c секогаш уживинела сине те коментиринел ко состанокија. Ој ко коментарија дикхела сар дело таро лакоро обожавибе, начин сар шај те охрабринел е јаверен хем сар прилика те бајрарел пли вера ко библиска чачипа. Ама кеда гели ко јекх побаро собрание на дена ла сине те коментиринел добором често, понекогаш чак нијекх пути ко цело состанок. Ој вакерѓа: „Бут сиум сине хољами, осетинѓум ман сар те пхене нашавѓум јекх предност. Кеда адава случинела пе повише пути почминеа те мислине кај адава тано намерно“.

10. Со шај те кере те шај те овен тут повише прилике те коментирине?

¹⁰ Дали ту да некогаш осетинѓан тут сар и Даниела? Ако оја, шај нане те манге више те коментирине хем ка манге само те беше хем те шуне. Ама ма чхинав те трудине тут те коментирине. Со шај те кере? Бут ка поможинел тут ако спреминеа повише коментарија башо секова состанок. Тегани ако на дена тут ко почеток те коментирине, сепак ка овен тут панда прилике те коментирине џикоте трајнела о состанок. Кеда спреминеа тут башо проучибе и Стражарско кула размислин башо адава сар секова пасус тано поврзимо е главно темаја. Ако кереа адава, тегани шај те де шукар спремиме коментарија. Исто аѓаар, шај те спремине тут те коментирине ко пасусија со керена лафи башо похор библиска чачипа кола сој попхаре објаснибаске (1. Кор. 2:10). Соске? Адалеске со шај нане те овен бут џене кола со ка коментиринен ко адала пасусија. Со ако пало некобор состанокија на сине тут прилика те коментирине, иако кереа са акала буќа? Англедер о состанок шај те вакере е пхралеске со водинела, ко кова пучибе мангеа те коментирине.

11. Ко со охрабринела амен о стихо таро Филипјаните 2:4?

¹¹ Читин Филипјаните 2:4. Водимо таро свети дух, о апостол Павле охрабринѓа е христијанен те дикхен е јаверенге те овел шукар. Сар шај ко состанокија те применина акава совет? Аѓаар со ка овел амен ки  годи кај о јавера да мангена те коментиринен.

12. Сар шај те охрабрина е јаверен ко состанокија? (Дикх хем и слика.)

¹² Размислин башо акава. Кеда сиан тле амаленцар, дали нашти те авен тутар ко лафи адалеске со само ту вакереа нешто? Сигурно кај на. Ту мангеа ола да те керен лафи. Слично, ко состанокија мангаја те мукха кобор со шај повише џене те коментиринен. Уствари, јекх таро најшукар начинија сар шај те охрабрина амаре пхрален хем пхењен тано аѓаар со ка да лен прилика те сикавен пумари вера (1. Кор. 10:24). Те дикха сар шај те кера адава.

13. Сар шај те мука повише џене те коментиринен?

¹³ Јекх начин сар шај те кера адава тано аѓаар со ка да кратка коментарија те шај те овел време повише џене те коментиринен. О старешине хем јавера искусна објавителија шај те овен пример ко адава. Чак ако деа кратко коментари ма вакер бут мисле. Ако вакереа са таро пасус, тегани нане те мукхе о јавера те вакерен нешто. На пример, ко акава пасус тане денде дуј предлогија — те да кратка коментарија хем те на вакера бут мисле. Ако ту сиан о прво со ка коментиринел ко акава пасус, тегани трудин тут те вакере само јекх бути.

14. Со шај те поможинел аменге те одлучина кобор често те вазда амаро вас? (Дикх хем и слика.)

¹⁴ Ов обѕирно кеда одлучинеа кобор пути ка манге те коментирине. Ако бут пути ваздаја амаро вас, шај те кера притисок е пхралеске со водинела те дел амен повише пути те коментирина иако е јаверен панда на сине лен прилика те коментиринен. Адава шај те обесхрабринел е јаверен хем те на манген више те вазден пумаро вас (Проп. 3:7).

15. а) Сар ваљани те реагирина кеда на дена амен те коментирина? б) Сар шај о пхрал со водинела те сикавел обѕирност сариненге? (Дикх и рамка „ Ако сиан пхрал со водинела“.)

¹⁵ Кеда ко состанок бут објавителија ваздена пумаро вас, шај нане те овел амен  прилика те коментирина кобор амен со мангаја. Понекогаш, о пхрал со водинела нашти те дел амен те коментирина секова пути кеда ка вазда амаро вас. Адава шај те разочаринел амен ама кеда ка случинел пе асавко нешто ма ле адава упри туте (Проп. 7:9).

16. Сар шај те охрабрина е јаверен со коментиринена?

¹⁶ Ако нашти те коментирине кобор со ту мангеа, тегани соске на шунеа внимателно сар о јавера коментиринена хем пало состанок те пофалине лен? Ако пофалинеа е пхрален, адава тано исто добором охрабрувачко сар те пхене коментиринѓан (Изр. 10:21). Адава тано јекх јавер начин сар шај те охрабрина амен јекх јекхеа.

17. а) Сар шај о родителија те поможинен пумаре чхавенге те спреминен коментарија со одговоринена ленгере бершенге? б) Спрема о видеоклипи, кола тане штар чекорија те шај те спремине коментари? (Дикх хем и фуснота.)

¹⁷ Ко саво јавер начин шај те охрабрина јекх јекхе ко амаре состанокија? Ако сиан родители, поможин тле чхавенге те спреминен коментарија со одговоринена ленгере бершенге (Мат. 21:16). Понекогаш ко состанокија проучинена пе сериозна теме, сар сој брачна проблемија или морална мерилија. Адалеске веројатно ка овен само јекх или дуј пасусија коте со јекх чхаво шај те коментиринел. Исто аѓаар, поможин тле  чхавенге те хаљовен соске нане те ден лен те коментиринен секова пути кеда ка вазден пумаро вас. Ако објаснинеа ленге акава, нане те овен разочариме кеда е јаверенге ка ден те коментиринен наместо ленге (1. Тим. 6:18). d

18. Сар шај те избегина те фалина амен кеда коментиринаја? (Изреки 27:2).

¹⁸ Сарине амен шај те спремина охрабрувачка коментарија кола со ка славинен е Јехова хем ка охрабринен амаре пхрален (Изр. 25:11). Ако иси амен прилика те вакера амаро кратко искуство, на ваљани те вакера бут баши аменде. (Читин Изреки 27:2; 2. Кор. 10:18.) Наместо адава, ваљани те трудина амен те вакера повише башо Јехова, башо лескоро Лафи хем башо лескоро народо (Отк. 4:11). Џанѓола пе, нане погрешно те вакера амаро лично мислење ако о пучибе башо пасус поттикнинела амен те кера адава. Асавко пучибе иси ко следно пасус.

19. а) Џи ко со ка анел адава со ка размислина е јаверенге да? (Римјаните 1:11, 12). б) Соске ту лично ценинеа о коментирибе ко состанокија?

¹⁹ Иако нане амен строга правилија коментирибаске, амен ваљани те да са амендар амаре коментаренцар те охрабрина е јаверен. Адава шај те значинел те коментирина повише пути. Или шај те значинел те ова задоволна бизи разлика кобор пути сине амен прилика те коментирина хем те ова радосна кај е јаверен да иси лен прилика те коментиринен. Кеда аменге важно о јавера те осетинен пе шукар ко амаре состанокија тегани сарине амен шај заедно те охрабрина амен. (Читин Римјаните 1:11, 12.)