1. Сар јекх чхаво сикавѓа кобор тани леске реално и надеж башо воскресение?

 ЈЕКХ чхаво со викинела пе Метју, иси ле пхаро насвалипе хем адалеске мора сине те овел повише пути операција. Кеда сине ле ефта берш, заедно пле фамилијаја дикхле е масекоскири емисија таро JW Broadcasting^®. Ко крајо тари емисија ола дикхле и музичко видеопрезентација коте со сикавела пе сар о јавера доџакерена околен со воскреснинена. b Откеда завршинѓа и емисија, о Метју гело ко пле родителија, астарѓа лен таро вас, хем вакерѓа: „Дикхена ли мамо, тато, чак хем те мерав ме палем ка уштав. А тумен аџикерен ман, ма секиринен тумен“. Шај ли те замислине туке сар осетинѓе пе акала родителија кеда дикхле кобор ленгере чхавеске тани реално и надеж башо воскресение!

2-3. Соске тано шукар сарине амен те размислина баши надеж ко воскресение?

² Ка овел шукар сарине амен понекогаш те размислина баши надеж со иси амен — о воскресение (Јован 5:28, 29). Соске? Адалеске со никогаш нашти те џана со ка случинел пе аменцар, шај те ова сериозно насвале или таро јекх пути те мерел амендар некој со мангаја ле (Проп. 9:11; Јак. 4:13, 14). Амари надеж ко воскресение шај те поможинел амен те истрајна кеда доживинаја асавко нешто (1. Сол. 4:13). И Библија уверинела амен кај амаро небесно Дад шукар џанела амен хем бут мангела амен (Лука 12:7). Размислин башо адава кобор шукар мора те пенџарел амен о Јехова, те шај те воскреснинел амен исто сар со сием сине коте сој вклучимо амаро карактер хем сеќавање. О Јехова бут мангела амен хем денѓа амен и прилика вечно те живина, чак хем те мера ов ка воскреснинел амен.

 ³ Ки акаја статија прво ка дикха соске шај те верујна ко ветување башо воскресение. Пало адава ка дикха о извештај тари Библија сој поврзимо амаре главно стихоја: „То пхрал ка уштел“ (Јован 11:23). Ко крајо ка дикха со ваљани те кера те шај и надеж башо воскресение те овел аменге панда пореално.

4. Ко со мора те ова увериме те шај те верујна ко јекх ветување? Вакер пример.

⁴ Те шај те верујна ко јекх ветување амен мора те ова увериме кај окова со дела о ветување иси ле и желба хем и моќ или способност те исполнинел адава. Те дикха јекх пример: Замислин кај тло кхер тано оштетимо таро јекх баро невреме. Јекх амал авела хем ветинела туке кај ка поможинел тут те поправине тло кхер. Ле иси ле искрено желба те поможинел туке хем адалеске сиан уверимо кај ка керел адава. Ако ов џанела сар те градинел хем иси ле о потребна алатија, тегани џанеа кај ов тано способно те керел адава. Адалеске ту верујнеа ко лескоро ветување. Тегани, со шај те вакера башо е Девлескоро ветување башо воскресение? Дали чаче иси ле желба хем моќ те шај те икерел пе ко пло лафи?

5-6. Соске шај те ова сигурна кај е Јехова иси ле желба те воскреснинел е мулен?

⁵ Дали е Јехова иси ле желба те воскреснинел е мулен? Сигурно кај иси ле. Ов водинѓа некоборе библиска писателен те пишинен лескоро ветување башо воскресение со ка овел ки иднина (Иса. 26:19; Оси. 13:14; Отк. 20:11-13). Кеда о Јехова дела лафи башо нешто, ов секогаш икерела пе ко адава (Ис. Нав. 23:14). Уствари, о Јехова едвај аџикерела те воскреснинел е мулен. Соске шај те вакера адава?

⁶ Размислин башо адава со вакерѓа о Јов. Ов сине сигурно кај чак ако мерела, е Јехова ка овел ле бари желба те дикхел ле палем џивдо (Јов 14:14, 15). Е Јехова иси ле и исто желба са пле слугенге со муле. Ов едвај аџикерела те иранел лен ко живото хем сарине те овен састе хем радосна. А со ка овел е милијарде манушенцар кола со муле бизо те овел лен прилика те дознајнен о чачипе башо Јехова? Амаро мангло Девел мангела лен да те воскреснинел (Дела 24:15). Ов мангела те дел лен прилика те овен лескере амала хем те живинен засекогаш ки пхув (Јован 3:16). Акава сикавела кај е Јехова иси ле желба те воскреснинел е мулен.

7-8. Соске шај те ова сигурна кај е Јехова иси ле моќ те воскреснинел е мулен?

⁷ Дали е Јехова исто аѓаар иси ле и моќ те воскреснинел е мулен? Сигурно кај оја, соске ов тано Семоќно (Отк. 1:8). Адава значинела кај ов тано добором моќно со шај те уништинел секоле душмане, чак о мерибе (1. Кор. 15:26). Адава со џанаја акава шај те дел амен сила хем те утешинел амен. Те дикха о искуство е пхењакоро Ема Арнолд. Ој хем лакири фамилија доживинѓе некобор испитија ки вера џикоте трајнела сине и Дујто светско војна. Ола нашавѓе пумаре манглен ко нацистичко концентрационо логори хем те шај те утешинел пле чхаја, и Ема вакерѓа: „Ако о мануша со муле нашти те воскреснинен тегани адава значинела кај амаро душмани, о мерибе, тано бут посилно таро Девел, ама адава нане аѓаар“. Џанѓола пе, ништо нане посилно таро Јехова! О Семоќно Девел кова со створинѓа о живото тано способно те иранел ко живото околен со муле.

⁸ Јавер причина соске џанаја кај о Девел тано способно те воскреснинел е мулен тано адава со лескоро памтибе нане ле граница. Ов викинела секоле ѕвезда ко анав (Иса. 40:26). Исто аѓаар на бистрела околен со муле (Јов 14:13; Лука 20:37, 38). Ов шај бут локхе те памтинел секова детали таро окола  со ка воскреснинел лен, чак ленгоро изглед, личност, искуство ко живото хем ленгоро сеќавање.

9. Соске верујнеа ко е Јеховаскоро ветување башо воскресение со ка овел ки иднина?

⁹ Значи, шај те верујна ко е Јеховаскоро ветување башо воскресение со ка овел ки иднина адалеске со џанаја кај ле иси ле хем и желба хем и моќ те керел адава. Те дикха јекх јавер причина соске шај те овел амен доверба ко е Девлескоро ветување башо воскресение: О Јехова више воскреснинѓа манушен. Ко пурано време ов денѓа моќ некоборе манушенге, коте сој вклучимо о Исус, те воскреснинен е мулен. Акана ка дикха јекх извештај со аракхљола ко Јован 11 поглавје хем керела лафи башо јекх таро воскресенија со керѓа ле о Исус.

10. Со случинѓа пе ки Витанија џикоте о Исус проповединела сине ки јавер страна таро Јордан, хем со керѓа ов? (Јован 11:1-3).

¹⁰ Читин Јован 11:1-3. Те размислина со случинѓа пе ко крајо таро 32 берш а.е., ки Витанија. Ко акава гав живинена сине е Исусескере паше амала о Лазар хем лескере пхења и Марија хем и Марта (Лука 10:38-42). Јекх диве о Лазар насвалило хем адалеске лескере пхења сине секириме. Ола бичхалѓе некас те известинел е Исусе кова со сине ки јавер страна таро Јордан. Таро адава тхан џи ки Витанија ваљани сине те пхирел пе дуј диве (Јован 10:40). Жално тано со о Лазар најверојатно муло адава диве кеда о мануш известинѓа е Исусе. Иако о Исус џанља кај лескоро амал муло, ов ачхило ко адава тхан панда дуј диве хем тегани гело ки Витанија. Кеда ресља, о Лазар сине више штар диве муло. О Исус мангља те керел нешто колеа со ка керел шукарипе пле амаленге хем ка славинел е Девле (Јован 11:4, 6, 11, 17).

11. Сави поука башо амалипе шај те сикљова таро акава извештај?

¹¹ Таро акава извештај сикљоваја јекх поука башо амалипе. Кеда и Марија хем и Марта известинѓе е Исусе на вакерѓе леске те авел ки Витанија, него ола само мангле ов те џанел кај лескоро амал тано насвало (Јован 11:3). Кеда о Лазар муло, о Исус шај сине те воскреснинел ле дуралдан. Ама наместо адава, ов одлучинѓа те џал ки Витанија те шај те овел е Маријаја хем е Мартаја. Дали иси тут јекх амал кова сој секогаш спремно те поможинел тут бизо те роде лестар адава? Тегани џанеа кај ов секогаш ка овел узи туте кеда ка овен тут „пхаре диве“ (Изр. 17:17). Исто сар о Исус амен да те ова асавко амал е јаверенге! Акана те ирана амен ко извештај хем те дикха со јавер случинѓа пе.

12. Со ветинѓа о Исус е Мартаке, хем соске шај сине те верујнел ко адава ветување? (Јован 11:23-26).

¹² Читин Јован 11:23-26. Кеда и Марта дознајнѓа кај о Исус тано паше узи Витанија, ој сигате гели ки лесте хем вакерѓа леске: „Господаре, те ове сине ту акате, мо пхрал нане те мерел сине“ (Јован 11:21). Џанѓола пе, ов шај сине те сасљарел е Лазаре ама о Исус мангља те керел нешто сој повпечатливо. Ов ветинѓа: „То пхрал ка уштел“.  Исто аѓаар вакерѓа е Мартаке: „Ме сиум о воскресение хем о живото“. Акале лафенцар денѓа ла панда јекх причина соске те верујнел ко лескоро ветување. Оја, о Девел денѓа е Исусеске и моќ те воскреснинел е мулен. Ов више воскреснинѓа јекхе тикне чхаја кратко откеда мули, хем исто аѓаар воскреснинѓа јекхе терне о исто диве кеда муло (Лука 7:11-15; 8:49-55). Ама дали шај сине те воскреснинел некас кова со сине муло више штар диве хем лескоро тело почминѓа те распадинел пе?

13. Спрема Јован 11:32-35, сар реагиринѓа о Исус кеда дикхља сар и Марија хем о јавера ровена? (Дикх хем и слика.)

¹³ Читин Јован 11:32-35. Замислин со случинѓа пе понадари. Е Лазарескири јавер пхен и Марија гели ко Исус хем повторинѓа адава со вакерѓа лакири пхен: „Господаре, те ове сине ту акате, мо пхрал нане те мерел сине“. Ој хем о јавера со сине лаја сине пхаге тари дукх. Е Исусеске пело бут жал кеда дикхља хем шунѓа сар ровена. Кеда дикхља сар тугујнена лескере амала, ов почминѓа те ровел. О Исус халило лен соске џанела кобор дукхала кеда мерела некој со мангеа ле. Ов едвај аџикерѓа те керел нешто те шај о јавера те чхинавен те ровен.

14. Со шај те сикљова башо Јехова таро адава сар о Исус реагиринѓа кеда дикхља сар и Марија ровела?

¹⁴ Адава сар о Исус реагиринѓа кеда дикхља е Марија сар ровела сикавела аменге кај о Јехова тано Девел пхердо сочувство. Соске шај те вакера адава? Сар со дикхлем ки англуни статија, е Исусе иси ле о исто размислување хем чувствија сар пле Дадескере (Јован 12:45). О Исус рунѓа адалеске со пело леске жал башо пле амала кола со тугујнена сине. Адалеске шај те ова сигурна кај е Јеховаске да тано бут пхаро кеда амен роваја (Пс. 56:8). На поттикнинела тут ли акава те ова попаше амаре сочувствително Девлеа?

15. Спрема Јован 11:41-44, со случинѓа пе ко е Лазарескоро гробо? (Дикх хем и слика.)

¹⁵ Читин Јован 11:41-44. О Исус ресља ко гробо е Лазарескоро хем вакерѓа те циден о бар. Ама и Марта вакерѓа кај пошукар ма те керел пе адава, соске о тело лескоро акана сигурно кхандела. О Исус одговоринѓа лаке: „На вакерѓум ли туке кај ако верујнеа ка  дикхе е Девлескири слава?“ (Јован 11:39, 40). Тегани о Исус ваздинѓа пло шеро хем англо сарине молинѓа пе. Ов мангља те дел цело слава е Јеховаске башо адава со ка случинел пе. Тегани о Исус вакерѓа: „Лазар икљов!“ Хем о Лазар иклило таро гробо. О Исус керѓа нешто со несаве мислинѓе кај нашти те керел пе. c

16. Сар о извештај со аракхљола ко Јован 11 поглавје бајрарела амари вера ки надеж башо воскресение?

¹⁶ О извештај со аракхљола ко Јован 11 поглавје бајрарела амари вера ки надеж башо воскресение. Сар? Сетин тут кај о Исус вакерѓа е Мартаке: „То пхрал ка уштел“ (Јован 11:23). Исто сар пло Дад, е Исусе да иси ле и желба хем и моќ те исполнинел адава ветување. Лескере асва сикавѓе кај ле иси ле желба те воскреснинел е мулен хем те уништинел о мерибе кова со керела тажна е манушен. Кеда о Лазар иклило таро гробо, о Исус панда јекх пути сикавѓа кај иси ле моќ те воскреснинел е мулен. Размислин исто аѓаар со вакерѓа о Исус е Мартаке: „На вакерѓум ли туке кај ако верујнеа ка дикхе е Девлескири слава?“ (Јован 11:40). Иси амен шукар причине те верујна кај о Девел ка исполнинел пло ветување те воскреснинел е мулен. Ама сар шај акаја надеж те овел аменге панда пореално?

17. Со ваљани те овел амен ки годи кеда читинаја о библиска извештаија башо воскресенија?

¹⁷ Читин хем размислин башо воскресенија со сине англедер. Ки Библија иси офто извештаија башо мануша со воскреснинѓе ки пхув. d Ка овел шукар внимателно те проучине акала извештаија. Џикоте кереа адава нека овел тут ки годи кај адала мурша, џувља хем чхаве чаче постојнѓе. Дикх кола поуке шај те сикљове лендар. Размислин сар секова извештај  сикавела кај е Девле иси ле и желба хем и моќ те воскреснинел е мулен. Исто аѓаар, ма бистре посебно те концентририне тут ко најважно воскресение — е Исусескоро. Адава со бут џене дикхле е Исусе откеда воскреснинѓа бајрарела амари вера кај ка овел воскресение ки иднина (1. Кор. 15:3-6, 20-22).

18. Сар шај те извлечине корист таро гиља баши надеж ко воскресение? (Дикх хем и фуснота.)

¹⁸ Шун хем гиљав о гиља баши надеж ко воскресение, хем размислин баши ленде e (Еф. 5:19). Акала гиља керена о воскресение те овел аменге панда пореално хем бајрарена амари вера ки акаја бут шужи надеж. Шун лен, вежбин лен хем ки Фамилијарно рат кер лафи башо тексти. Памтин о тексти хем хор размислин баши лесте те шај те бајрарел тли вера хем те кхувел туке ко вило. Тегани ако дознајнеа кај иси тут несаво сериозно насвалипе или мерела тутар некој, е Јеховаскоро духо ка поможинел тут те сетине тут ко акала гиља те шај те утешинен тут хем те ден тут сила.

19. Со шај те замислина аменге башо воскресение? (Дикх и рамка „ Со мангеа те пуче лен?“)

¹⁹ Кер туке слика ки годи. О Јехова денѓа амен способност те замислина амен ко нево свето. Јекх пхен објаснинела: „Одвојнѓум добором време те замислинав ман ко нево свето со шај сине чак те осетинав о мирис е лулуѓенгоро“. Замислин туке сар дикхеа е верна муршен хем џувлен таро библиско време. Кас едвај аџикереа те дикхе? Со мангеа те пуче ле? Исто аѓаар замислин сар палем ка ове заедно те мангленцар со муле. Кер туке слика ки годи — о прва лафија, о прво гушибе хем о асва тари радост.

20. Ко со ваљани те ова одлучна?

²⁰ Бут сием благодарна башо е Јеховаскоро ветување башо воскресение. Шај те ова сигурна кај лескоро ветување ка исполнинел пе, соске е Јехова иси ле хем и желба хем и моќ те керел адава. Те ова одлучна понадари да те бајрара амари вера ки акаја бут шужи надеж. Ако кераја адава ка ова попаше е Девлеа кова со, сар те пхене, секаске амендар вакерела: „Те мангле ка уштен!“