1. Со сикавела кај о списија сине важна е Исусеске?

 ЗАМИСЛИН сар осетинѓе пе о мануша со шунена сине е Исусе сар поучинела. Ов бут пути напамет цитиринѓа таро света списија. Уствари, о прва лафија со вакерѓа лен кратко откеда крстинѓа пе хем несаве таро лескере последна лафија кратко англедер те мерел, о Исус цитиринѓа таро списија b (5. Мој. 8:3; Пс. 31:5; Лука 4:4; 23:46). Хем џикоте керела сине пли служба трин текваш берш, о Исус бут пути јавно читинѓа, цитиринѓа хем објаснинѓа о списија (Мат. 5:17, 18, 21, 22, 27, 28; Лука 4:16-20).

2. Со поможинѓа е Исусеске шукар те пенџарел о списија џикоте бајрола сине? (Дикх и слика тари насловно страна.)

² Бут берша англедер те почминел пле службаја, о Исус често читинѓа хем шунѓа е Девлескоро Лафи. Кхере сигурно шунела сине сар и Марија хем о Јосиф редовно цитиринена сине таро списија џикоте керена сине лафи сар фамилија c (5. Мој. 6:6, 7). Шај те ова сигурна кај о Исус хем лескири фамилија секова сабат џана сине ки синагога (Лука 4:16). Џикоте сине атхе сигурно внимателно шунѓа кеда читинела пе сине таро списија. Пало несаво време ов сиклило коркори те читинел акала света списија. Адалеске о Исус на само со шукар џанела сине о списија, него исто аѓаар мангља адава со пишинела сине ки ленде хем дозволинѓа ола те влијајнен упро лескере постапке. На пример, размислин башо адава со случинѓа пе ко храми кеда е Исусе сине ле 12 берш. О учителија кола со бут шукар џанена  сине е Мојсеескоро закони сине „воодушевиме таро [е Исусескоро] хаљојбе хем одговорија“ (Лука 2:46, 47, 52).

3. Со ка дикха ки акаја статија?

³ Амен да шај пошукар те запознајна хем те заманга е Девлескоро Лафи кеда редовно читинаја и Библија. Сар шај те извлечина побари корист таро адава со читинаја? Шај те сикљова таро адава со вакерѓа о Исус околенге со џанена о Закони, машкар коленде со сине о книжникија, о фарисеија хем о садукеија. Акала религиозна водачија читинена сине бут пути о списија ама на сине лен корист таро адава со читинѓе. О Исус истакнинѓа трин буќа кола со акала мануша ваљани сине те керен те шај те овел лен побари корист таро списија. Ки акаја статија ка дикха сар адава со вакерѓа ленге шај те поможинел аменге 1) те хаљова адава со читинаја, 2) те аракха скапоцена поуке хем 3) те дозволина е Девлескоро Лафи те обликујнел амен.

4. Со сикљоваја таро Лука 10:25-29 башо читибе е Девлескоро Лафи?

⁴ Амен мангаја те хаљова адава со читинаја ко е Девлескоро Лафи, иначе нане те овел амен целосно корист таро читибе. На пример, те дикха е Исусескоро разговор со сине ле јекхе манушеа со џанела сине шукар о Закони. (Читин Лука 10:25-29.) Кеда адава мануш пучља ле со ваљани те керел те шај те добинел вечно живото, о Исус поможинѓа леске те аракхел о одговор ко е Девлескоро Лафи аѓаар со пучља ле: „Сој тано пишимо ко Закони? Со читинеа атхе?“ О мануш шај сине точно те одговоринел аѓаар со цитиринѓа о списија башо адава те мангел пе е Девле хем е пашутне (3. Мој. 19:18; 5. Мој. 6:5). Ама приметин со вакерѓа пало адава: „Кој тано чаче мло пашутно?“ Акалеа сикавѓа кај на халило со чаче значинела адава со читинѓа. Адалеске на џанља сар те применинел адала стихија ко исправно начин.

5. Сар и молитва хем адава со ка читине похари шај те поможинел аменге?

⁵ Амен шај пошукар те хаљова е Девлескоро Лафи ако развинаја шукар навика читибаске. Аке несаве предлогија со шај те поможинен туке: Молин тут англедер те почмине е читибаја. Ваљани аменге е Јеховаскири помош те хаљова и Библија, адалеске ваљани те молина ле башо лескоро свети дух те шај те концентририна амен. Пало адава ма сиѓар него читин похари. Акава шај те поможинел туке те хаљове адава со читинеа. Шај ка овел туке корисно те читине ко гласо или, ако достапно ки тли чхиб, те пратине и аудиоснимка таро читибе е Библијакоро. Адава шај те поможинел туке те хаљове, те памтине хем повише те сикљове (Ис. Нав. 1:8). Кеда завршинеа е читибаја, молин тут панда јекх пути те шај те благодарине е Јеховаске баши Библија, хем те шај те поможинел туке те применине адава со читинѓан.

6. Соске адава со ка пуче тут пучиба хем ка кере кратка белешке шај те поможинел туке џикоте читинеа? (Дикх хем и слика.)

⁶ Те дикха панда дуј предлогија со шај те поможинен туке пошукар те хаљове и Библија. Пуч тут пучиба башо адава со читинеа. Џикоте читинеа несаво извештај пуч тут: „Баши касте керела пе лафи ко акава извештај? Кој керела лафи? Касаја керела лафи, хем соске? Коте хем кеда  случинела пе адава?“ Асавке пучиба ка поможинен туке те размислине хем те хаљове о најважна поуке таро адава со читинеа. Исто аѓаар, кер кратка белешке џикоте читинеа. Кеда пишинеа, ту уствари пренесинеа тле мисле ко лафија хем аѓаар хаљовеа лен пошукар. О пишибе шај те поможинел туке те памтине адава со читинеа. Шај те пишине пучиба со иси тут, те пишине адава со истражинѓан, те пишине о главна мисле, шај те пишине сар те применине адава со читинѓан или шај само те пишине со мислинеа башо адава со читинѓан. Акала буќа ка поможинен туке те дикхе ко е Девлескоро Лафи сар нешто сој туке лично пишимо.

7. Сави особина ваљани аменге џикоте читинаја хем соске? (Матеј 24:15).

⁷ О Исус истакнинѓа јекх важно особина со ваљани аменге те шај те хаљова адава со читинаја ко е Девлескоро Лафи — и проникливост. (Читин Матеј 24:15.) Сој тани и проникливост? Способност те хаљовел пе сар тани поврзими јекх мисла јавере мислаја, хем сар ола разликујнена пе тари несави јавер мисла, хем те хаљова адава со на дикхјола пе одма. О Исус исто аѓаар сикавѓа кај ваљани аменге проникливост те шај те открина настанија кола со исполнинена библиска пророштвија. Ваљани аменге исто аѓаар акаја особина те шај те овел амен целосно корист таро адава со читинаја ки Библија.

8. Сар шај те ова прониклива џикоте читинаја?

⁸ О Јехова дела пле слугенге проникливост. Адалеске, роде лестар ки молитва помош те развине акаја особина (Изр. 2:6). Сар шај те постапине ко склад тле молитваја? Внимателно размислин башо адава со читинеа хем споредин адава е јавере буќенцар со џанеа. На пример, сар помош шај те користине о Прирачнико истражибаске е Јеховаскере сведоконгоро. Акава прирачнико  шај те поможинел туке те хаљове о значење таро јекх библиско извештај хем те дикхе сар шај те применине адава ко тло живото (Евр. 5:14). Ако иси тут проникливост џикоте читинеа, тло хаљојбе ка бајрол.

9. Кова библиско чачипе на прифатинѓе о садукеија?

⁹ О садукеија бут шукар пенџарена сине о прва панџ лила таро Хебрејска списија ама ола на прифатинѓе несаве важна чачипа сој пишиме ко адала лила. На пример, дикх сар о Исус одговоринѓа кеда о садукеија пучле ле башо воскресение. Ов пучља лен: „Зарем на читинѓен ко е Мојсеескоро лил, ко извештај баши грмушка, кај о Девел вакерѓа леске: ’Ме сиум о Девел е Авраамескоро, о Девел е Исакоскоро хем о Девел е Јаковескоро‘?“ (Мар. 12:18, 26). Иако о садукеија бут пути читинѓе акала лафија, сепак е Исусескоро пучибе сикавѓа кај ола на прифатинѓе јекх бут важно библиско чачипе — о воскресение (Мар. 12:27; Лука 20:38). d

10. Со ваљани те трудина амен те открина џикоте читинаја?

¹⁰ Со сикљоваја таро акава? Кеда читинаја ваљани те трудина амен те открина са со шај те сикљова таро стихо или таро библиско извештај. Амен на мангаја те хаљова само о основна буќа него исто аѓаар о похор чачипа хем начелија кола со нашти локхе те аракхен пе.

11. Спрема 2. Тимотеј 3:16, 17, сар шај те аракхе скапоцена поуке ки Библија?

¹¹ Сар шај те аракхе скапоцена поуке џикоте читинеа и Библија? Размислин башо адава со пишинела ко 2. Тимотеј 3:16, 17. (Читин.) „Цело Лил... корисно тано“ 1) те дел поуке, 2) те сикавел аменге сој тано погрешно, 3) те испрајнел са о буќа хем 4) те сикавел сар те живинел пе праведно. Шај те овел тут корист таро акала штар буќа чак таро библиска лила со на читинеа лен често. Проучин о извештај те шај те дикхе саве поуке шај те дел тут башо Јехова, баши лескири намера или башо библиска начелија. Размислин сар поможинела туке те открине кола буќа тане погрешна. Акава шај те кере аѓаар со ка приметине сар о стихија поможинена туке те открине хем те отфрлине погрешна желбе или ставија хем те ачхове верно е Јеховаске. Испитин сар шај те користине о стихо те шај те испрајне о погрешна ставија, на пример те испрајне несаво стави со шунѓан ле ки служба. Хем дикх сар о стихија поможинена туке те живине праведно сар со мангела о Јехова. Ако икереа тут ко акала штар буќа ка аракхе скапоцена поуке кола со ка керен тло читибе и Библија панда покорисно.

12. Соске пучља о Исус е фарисеен „На читинѓен ли?“

¹² О Исус пучља е фарисеен да „На читинѓен ли?“ те шај те откринел кај сине лен погрешно стави башо адава со читинена сине ко списија (Мат. 12:1-7). e Ки адаја прилика о фарисеија вакерѓе кај е Исусескере ученикија на икерѓе пе ко сабат. О Исус одговоринѓа ленге аѓаар со спомнинѓа дуј примерија таро списија хем цитиринѓа јекх стихо таро Осија кова со сикавела кај о фарисеија на халиле соске сине дендо о закони башо сабат хем адалеске нашти сине те сикавен милост. Соске акала мануша на дозволинѓе те овен обликујме џикоте читинена сине е Девлескоро Лафи? Соске сине лен критизерско хем гордо стави. Адава стави на дозволинѓа ленге те хаљовен и смисла таро адава со читинена сине (Мат. 23:23; Јован 5:39, 40).

13. Саво стави ваљани те овел амен џикоте читинаја и Библија хем соске?

¹³ Таро е Исусескере лафија сикљоваја кај ваљани те овел амен исправно стави џикоте читинаја и Библија. На ваљани те ова сар о фарисеија него ваљани те ова понизна хем спремна те сикљова. Мора кротко те прифатина те садинел пе ки аменде е Девлескоро Лафи (Јак. 1:21). Ако сием кротка тегани ка дозволина е Девлескоро Лафи те мукхел корено ко амаро вило. О библиска поуке баши милост, сочувство хем мангипе шај те обликујнен амен само ако избегинаја о критизерско или о гордо стави.

14. Котар шај те џана дали дозволинаја и Библија те обликујнел амен? (Дикх хем о слике.)

¹⁴ О начин сар понашинаја амен е јаверенцар шај те сикавел дали дозволинаја е Девлескоро Лафи те обликујнел амен. О фарисеија на дозволинѓе е Девлескоро  Лафи те влијајнел упри ленде хем адалеске ола судинѓе „околен со на керѓе нисави грешка“ (Мат. 12:7). Слично, сар дикхаја ко јавера хем сар понашинаја амен ленцар откринела дали дозволинаја е Девлескоро Лафи те обликујнел амен. На пример, дали обично спомнинаја е јаверенгере шукар буќа или повише кераја лафи башо ленгере маане? Дали сием милостива хем спремно простинаја или критикујнаја е јаверен хем икераја ленцар холи? О одговорија ко акала пучиба шај те откринен аменге дали дозволинаја адава со читинаја те обликујнел амаре мисле, чувствија хем постапке (1. Тим. 4:12, 15; Евр. 4:12).

15. Со мислинела сине о Исус башо света списија?

¹⁵ О Исус мангела сине о света списија хем о лафија таро Псалм 40:8 сикавѓе саве чувствија ка овен е Исусе башо е Девлескоро Лафи, атхе пишинела: „Бут мангава те керав тли волја Девла, хем тло закони тано манге хор ко вило“. Адалеске со мангела сине о света списија, о Исус сине радосно хем успешно ки служба башо Јехова. Амен да шај те ова радосна хем успешна ако дозволинаја е Девлескоро Лафи те влијајнел упро амаро вило (Пс. 1:1-3).

16. Со мангеа те кере те шај те овел тут побари корист таро читибе и Библија? (Дикх и рамка „ Е Исусескере лафија шај те поможинен туке те хаљове адава со читинеа“.)

¹⁶ Е Исусескоро пример хем адава со вакерѓа ваљани те поттикнинен амен похор те читина и Библија. Шај пошукар те хаљова и Библија аѓаар со ка молина амен, ка читина похари, ка пуча пучиба хем ка кера кратка белешке. Шај те ова прониклива аѓаар со ка користина амаре публикацие те шај панда пошукар те хаљова адава со читинаја. Шај те сикљова пошукар те користина и Библија, чак стихија со нане аменге баш позната, аѓаар со ка рода поуке ко асавке извештаија. Хем шај те дозволина е Девлескоро Лафи те обликујнел амен ако понадари да иси амен о исправно стави џикоте читинаја. Ако даја амендар са те кера акала буќа тегани ка овел амен побари корист таро адава со читинаја ки Библија хем ка ова попаше е Јеховаја (Пс. 119:17, 18; Јак. 4:8).