И Јомара хем лакере пхраља о Марчело хем о Ивер живинена ко јекх тикно гав ки Гватемала. Ој почминѓа јекхе пхењаја те проучинел и Библија хем кратко пало адава лакере пхраља да почминѓе те проучинен. Ама сине јекх проблеми. О сотрин тане короле хем на џанена сине те читинен ко Брајово писмо. Адалеске, и пхен со проучинела сине ленцар читинела сине о материјали хем о стихија со сине денде ки лекција.

Исто аѓаар сине ленге пхаро те овен присутна ко состанокија. Ола нашти сине коркори те патујнен 40 минутија ки најпаше дворана. Ама о пхраља таро собрание поможинѓе ленге те овен присутна ко са о состанокија. Хем кеда почминѓе те учествујнен ки теократско школа, о пхраља поможинѓе ленге те памтинен пумаре презентацие.

Ко Мај 2019 берш почминѓе те икерен пе состанокија ко ленгоро гав. Ко адава време јекх брачно пари сој општа пионерија селинѓа пе ко адава гав. Иако ола на џанена сине сар те пишинен хем те читинен ко Брајово писмо, сепак чхивѓе песке цел те сикавен акале трине џенен те читинен хем те пишинен. Адалеске геле ки јекх библиотека те сикљовен башо Брајово писмо те шај те џанен сар те сикавен е јаверен те користинен адава писмо.

Пало несаве масекија о сотрин шај сине шукар те читинен ко брајово писмо хем адава поможинѓа ленге духовно те напредујнен. a Акана и Јомара, о Марчело хем о Ивер служинена сар општа пионерија. О Марчело тано слуга-помошнико. Ола цело курко тане зафатиме ки служба башо Јехова. Ленгири ревност поможинѓа е јаверенге да те овен ревна.

О сотрин тане бут благодарна баши поддршка со добинена ла таро собрание. И Јомара вакерела: „Таро почеток сикавѓе аменге о Сведокија чачутно христијанско мангипе“. О Марчело вакерела: „Иси амен бут шукар амала ко амаро собрание хем сием дело тари јекх меѓународно фамилија сој ко јекхипе“. И Јомара хем лакере пхраља едвај аџикерена о диве кеда и пхув ка овел рај (Пс. 37:10, 11; Иса. 35:5).