1. Сар и Библија опишинела о чачутно мангипе?

 Е МАНГИПАСКОРО „пламено тано јаг со тхабљола, јаг со дела ла о Јах. О поплаве нашти те ачхавен о мангипе, а ни о реке те ингарен ле“ b (Песна 8:6, 7). Кобор шуже лафенцар тано опишимо о чачутно мангипе ко брако. Акала лафија тане бут охрабрувачка соске сикавена кај тумен шај те овел тумен мангипе со на чхинавѓовела.

2. Со мора те керен о брачна парија те шај ленгоро мангипе те на шудрол?

² Дали ко јекх брако ка овел мангипе со ка трајнел цело живото бут зависинела таро ром хем тари ромни. Те вакера јекх пример. Јекх јаг шај те тхабљол са џикоте некој чхивела кашта ки лате. Ако никој на керела адава, и јаг ка ачхол. Слично, о мангипе машкар о ром хем и ромни шај те овел силно само ако керена нешто башо пумаро брако. Понекогаш шај те случинел пе о мангипе те шудрол, посебно кеда иси лен финансиска проблемија, проблемија састипаја или кеда бајрарена чхавен. Ако сиан ко брако, сар шај понадари да те на мукхе те ачхол и „јаг со дела ла о Јах“? Ки акаја статија ка кера лафи башо трин начинија кола со ка поможинен туменге те овел тумен успешно хем среќно брако. c

3. Сар о паше амалипе е Јеховаја поможинела е брачно паренге понадари да те манген пе? (Проповедник 4:12). (Дикх хем и слика.)

³ Те шај те на ачхол и „јаг со дела ла о Јах“, хем о ром хем и ромни ваљани те керен бути ко пло амалипе е Јеховаја. Сар шај адава те керел пошукар ленгоро брако? Ако јекхе брачно  пареске тано важно о амалипе е Јеховаја, тегани ка овен поспремна те применинен лескоро совет. А адава ка поможинел ленге те избегинен хем те накхавен о проблемија кола со шај те шудрарен ленгоро мангипе. (Читин Проповедник 4:12.) О духовна мануша исто аѓаар трудинена пе те овен сар о Јехова аѓаар со развинена хем сикавена особине сар сој љубезност, стрпливост хем те простинен (Еф. 4:32-5:1). Кеда о брачна парија сикавена акала особине тегани ленгоро мангипе полокхе ка бајрол. Јекх пхен, која со викинела пе Лена хем тани женими повише таро 25 берш, вакерела: „Локхо тано те манге хем те поштујне јекхе духовно мануше“.

4. Соске о Јехова биринѓа баш е Јосифе хем е Марија те овен е Месијаскере родителија?

⁴ Те дикха јекх библиско пример. Кеда о Јехова ваљанѓа те биринел родителија е Месијаске, ов таро са о потомција е Давидескере биринѓа е Јосифе хем е Марија. Соске? О солдуј сине паше амала е Јеховаја хем ов џанља кај ка чхивен ле ко прво тхан ко ленгоро брако. Тумен со сиен жениме, со шај те сикљовен таро Јосиф хем тари Марија?

5. Со шај о рома те сикљон таро Јосиф?

⁵ О Јосиф спремно применинѓа е Јеховаскере упатствија хем адава керѓа те овел пошукар ром. О Девел најхари ко трин прилике денѓа ле упатствија поврзиме лескере фамилијаја. Секова пути спремно шунѓа адала упатствија чак кеда сине леске бут пхаро (Мат. 1:20, 24; 2:13-15, 19-21). О Јосиф заштитинѓа е Марија хем грижинѓа пе лаке адалеске со шунѓа е Девлескере упатствија. Сигурно е Јосифескере постапке керѓе и Марија панда повише те мангел ле хем те поштујнел ле. Тумен о рома шај те џан пало пример е Јосифескоро аѓаар со ка роден библиско водство кеда грижинена тумен тумаре фамилијаке. d Кеда керена адава, чак кеда нане локхо, сикавена мангипе тумаре ромњенге хем керена позорало тумаро брако. Јекх пхен таро Вануати, која сој женими повише таро 20 берш, вакерела: „Кеда мло ром родела водство таро Јехова хем применинела ле, повише поштујнава ле. Осетинава ман сигурно хем иси ман доверба ко лескере одлуке“.

6. Со шај о ромња те сикљовен тари Марија?

⁶ Е Марија сине ла пло лично однос е Јеховаја, лакири вера на зависинела сине таро Јосиф. Ој шукар џанела сине о Списија (Лука 1:46). Ој исто аѓаар одвојнела сине песке време хор те размислинел башо адава со сикљовела сине (Лука 2:19, 51). Шај те ова сигурна кај и Марија сине шукар ромни адалеске со сине духовно личност. Авдиве бут пхења трудинена пе те овен сар лате. На  пример, јекх пхен со викинела пе Емико вакерела: „Англедер те женинав ман коркори грижинава ман сине баши мли духовност. Ама откеда женинѓум ман мло ром почминѓа те молинел пе аменге хем ов грижинела пе баши духовност ки амари фамилија, адалеске мли духовност почминѓа те зависинел лестар соске ов керела сине са о буќа. Халиљум кај ме коркори ваљани те грижинав ман башо мло однос е Јеховаја. Адалеске одвојнава манге време те овав коркори те шај те молинав ман мле Девлеске, те читинав и Библија хем те размислинав хор башо адава со читинава“ (Гал. 6:5). Пхењален, џикоте трудинена тумен те овен панда попаше е Јеховаја, тумаре рома панда повише ка фалинен тумен хем ка манген тумен (Изр. 31:30).

7. Со шај о брачна парија те сикљовен таро Јосиф хем тари Марија башо обожавибе?

⁷ О Јосиф хем и Марија исто аѓаар заедно трудинена пе сине те овен паше е Јеховаја. Ола халиле кобор тано важно те обожавинен е Јехова сар фамилија (Лука 2:22-24, 41; 4:16). Шај на сине ленге локхо, посебно кеда сине лен повише чхаве ама успејнѓе ко адава. Ола тане бут шукар пример е брачно паренге авдиве. Ако туте да иси тут чхаве шај туке пхаро те џа ко состанокија или те одвојне време баши Фамилијарно рат. А панда попхаро шај те овел туменге сар брачно пари те аракхен време те проучинен хем те молинен тумен. Ама ма бистрен, кеда обожавинена е Јехова заедно, тумен овена попаше леа хем јекх јекхеа. Адалеске о духовна буќа нека овен туменге ко прво тхан.

8. Со шај те керен о брачна парија колен со иси лен проблемија те шај те овел лен корист таро духовна активностија?

⁸ Со ако иси тут проблемија ко брако? Тегани шај те мислине кај нашти те керен заедно о духовна активностија. Ако тано аѓаар, почминен те керен нешто кратко колесте со ка уживинен. Шај те разглединен несави тема колаке о солдуј џене мангена те керен лафи. Ако керена акава, ка бајрол тумаро мангипе машкар туменде хем ка бајрол тумари желба те керен о духовна активностија заедно.

9. Соске о ром хем и ромни мора те накхавен време заедно?

⁹ Сар брачно пари, ако накхавена време заедно адава исто аѓаар шај те поможинел туменге те на шудрол тумаро мангипе. Аѓаар нане те циден тумен јекх јекхестар хем ка џанен сар о јавер осетинела пе хем со размислинела (1. Мој. 2:24). И Лилија хем о Руслан тане повише таро 15 берш ко брако хем и Лилија вакерела со халиле кратко откеда леле пе: „Приметинѓем кај нане те овел амен добором време те накха заедно кобор со мислинѓем аменге. Сием сине бут зафатиме ки бути, е кхерутне буќенцар хем покасно е чхавенцар. Халилем кај ако на одвојнаја аменге време те ова заедно сар ром хем ромни шај бут локхе те шудрова јекх јекхестар“.

10. Сар шај о брачна парија те применинен о начело таро Ефешаните 5:15, 16?

¹⁰ Со шај те керен о брачна парија те шај те накхавен време заедно? Шај ка ваљани англедер те керен туменге плани кеда те овен заедно. (Читин Ефешаните 5:15, 16.) Јекх пхрал тари Нигерија, со викинела пе Узонду, вакерела: „Кеда керава распоред башо буќа со ваљани те завршинав лен, ки лесте вклучинава о време со мангава те накхавав ле заедно мле ромњаја хем адаја бути манге јекх таро најважна ко адава распоред“ (Фил. 1:10). Те дикха сар и Анастасија, која сој женими  јекхе покраинскоја ки Молдавија, користинела најшукар пло време. Ој вакерела: „Трудинава ман те завршинав са мле буќа џикоте мло ром тано зафатимо пле одговорностенцар. Аѓаар покасно сием слободна хем шај те ова заедно“. Ама со ако сиен добором зафатиме со нашти те аракхен време те овен заедно?

11. Кола буќа керена сине заедно о Акила хем и Прискила?

¹¹ О брачна парија шај бут те сикљовен таро Акила хем тари Прискила, јекх брачно пари кола со сине бут цениме таро христијања ко прво веко (Рим. 16:3, 4). Иако ки Библија на пишинела бут деталија башо ленгоро брако, сепак ој откринела аменге кај ола заедно керѓе бути, проповединѓе хем поможинѓе е јаверенге (Дела 18:2, 3, 24-26). Уствари, секова пути кеда и Библија вакерела нешто башо Акила хем и Прискила ола тане спомниме заедно.

12. Со шај о ром хем и ромни те керен те шај те накхавен повише време заедно? (Дикх хем и слика.)

¹² Сар шај о брачна парија те овен сар о Акила хем и Прискила? Размислин кола буќа кереа лен ту хем кола буќа керела тло брачно партнери. Шај ли несаве таро адала буќа те керен лен заедно наместо коркори? На пример, о Акила хем и Прискила заедно џана сине ки служба. Дали тумен да редовно џана заедно ки служба? Ола исто аѓаар заедно керена сине бути. Шај ту хем тло брачно партнери на керена заедно бути ама дали шај о кхерутне буќа те завршинен лен заедно? (Проп. 4:9). Кеда заедно керена несави бути ка осетинен тумен сар јекх тими хем ка овел тумен прилика те керен туменге лафи. О Роберти хем и Линда тане повише таро 50 берш ко брако. Ов вакерела: „Искрено, нане амен бут време заедно ме ромњаја те икљова негде. Ама кеда тховава о чаре хем ми ромни косела лен или кеда срединава и бавча хем ој авела те поможинел ман, адава бут керела амен радосна. Кеда кераја о буќа заедно адава поможинела аменге те ова панда попаше јекх јекхеа хем амаро мангипе панда повише бајрола“.

13. Освен со ваљани те накхавен време заедно, со јавер да ваљани те керен о ром хем и ромни?

¹³ Ама ма бистре кај ако сар брачно пари накхавена време заедно адава на значинела кај автоматски ка овен попаше. Јекх женими пхен таро Бразил вакерела: „Адалеске со ко авдисутно време сием бут зафатиме, локхе шај те мислина аменге кај ако живинаја ко јекх кхер амен накхаваја време заедно. Халиљум кај ваљани те кера нешто повише него само те ова заедно. Исто аѓаар ваљани те сикавав внимание мле ромеске“. Приметин сар о Бруно хем лескири ромни и Тајс сикавена внимание јекх јекхеске. Ов вакерела: „Џикоте накхаваја време заедно цидаја о телефонија ки страна хем уживинаја ко време со накхаваја ле јекх јекхеа“.

14. Со шај те керен јекх ром хем ромни ако ленге пхаро те накхавен време заедно?

 ¹⁴ Ама со ако ту хем тло брачно партнери на уживинена кеда накхавена време заедно? Шај на интересинена тумен о иста буќа или шај џана туменге ко живце. Тегани со шај те керен? Те ирана амен ко пример е јагаја со спомнинѓем ле ко почеток тари статија. Кеда тхараја јаг ој нане одма силно. Ваљани хари похари те чхиве тикне кашта, а кеда и јаг овела посилно шај те чхиве побаре кашта. Слично, ко почеток шај те почминен аѓаар со секова диве ка накхавен кратко време заедно. Керен нешто со о солдуј џене мангена, а на нешто со ка керел те распрајнен тумен (Јак. 3:18). Ако почминена тикне буќенцар, тумаро мангипе шај палем те овел силно.

15. Соске о поштовање тано важно те шај ко брако те на шудрол о мангипе?

¹⁵ О поштовање тано бут важно ко јекх брако. Адава тано сар воздух со поможинела е јагаке те тхабљол. Бизо воздух и јаг сигате ачхола. Слично, бизо поштовање о мангипе машкар о ром хем и ромни шај сигате те шудрол. Тари јавер страна, ако о ром хем и ромни трудинена пе те сикавен поштовање јекх јекхеске тегани ленгоро мангипе ка овел посилно. Сепак на ваљани те бистре кај нане важно дали ту мислинеа кај сикавеа поштовање, него важно тано дали тло брачно партнери осетинела пе поштујмо. И Пени хем о Арет тане жениме повише таро 25 берш, ој вакерела: „Адава со поштујнаја амен керела ко амаро кхер те овел мангипе. О солдуј осетинаја амен слободна те вакера со мислинаја, соске важно аменге со мислинела о јавер“. Значи, со шај те кере те шај тло брачно партнери те дикхел кај поштујнеа ле? Те дикха е Авраамескоро хем е Саракоро пример.

16. Со шај о рома те сикљовен таро Авраам? (1. Петрово 3:7). (Дикх хем и слика.)

¹⁶ О Авраам поштујнела сине е Сара. Леске сине важно со мислинела хем сар осетинела пе. Ки јекх прилика ој сине бут вознемирими хем вакерѓа леске кобор тани нервозно, чак ле керѓа ле криво башо адава проблеми. Дали о Авраам нервиринѓа пе хем викинѓа лаке? На. Ов џанља кај и Сара поштујнела ле сине хем поддржинела ле. Адалеске о Авраам шунѓа ла хем трудинѓа пе те решинел о проблеми (1. Мој. 16:5, 6). Со шај амен те сикљова таро акава пример? Тумен о рома сиен одговорна те анен одлуке тумаре фамилијаке (1. Кор. 11:3). Сепак, ка овел шукар те пуче тле ромња со мислинела англедер те ане одлука, посебно ако адаја одлука влијајнела упри лате (1. Кор. 13:4, 5). Ко јавера ситуацие тли ромни шај тани вознемирими хем шај ка мангел те вакерел туке сар осетинела пе. Дали сикавеа кај туке важно сар  осетинела пе аѓаар со внимателно шунеа ла? (Читин 1. Петрово 3:7.) И Ангела хем о Димитри тане ко брако повише таро 30 берш. Ој објаснинела сар лакоро ром сикавела кај поштујнела ла: „О Димитри секогаш шунела ман, чак кеда сиум хари нервозно или мангава те вакерав леске нешто. Ов тано стрпливо манцар, чак кеда нашти ко смирено начин те вакерав сар осетинава ман“.

17. Со шај о ромња те сикљовен тари Сара? (1. Петрово 3:5, 6).

¹⁷ И Сара поштујнела сине е Аврааме хем поддржинела сине лескере одлуке (1. Мој. 12:5). Ки јекх прилика о Авраам анѓа гостија кхере бизо те договоринел пе е Сараја. Ов вакерѓа е Сараке те мукхел и бути со керела ла сине хем те почминел те спреминел бут хајбаске (1. Мој. 18:6). И Сара одма керѓа адава хем поддржинѓа лескири одлука. Тумен о ромња, шај те џан пало е Саракоро пример адалеа со ка поддржинен тумаре роменгере одлуке. Адалеа ка керен позорало тумаро брако. (Читин 1. Петрово 3:5, 6.) О Димитри коле со спомнинѓем ле ко претходно пасус објаснинела сар лескири ромни керела те осетинел пе поштујмо. Ов вакерела: „Бут ценинава кеда и Ангела трудинела пе те поддржинел мле одлуке чак кеда понекогаш на сложинела пе манцар. Ко крајо, ако о буќа на овена аѓаар сар со мислинѓем ој на критикујнела ман“. Бут тано локхо те мангел пе некас со поштујнела тут!

18. Сави корист ка овел е брачна парен ако трудинена пе ленгоро мангипе те на шудрол?

¹⁸ Авдиве о Сатана мангела те загушинел о мангипе со иси ко христијанска бракија. Ов џанела кај ако шудрола о мангипе машкар о брачна парија адава шај те керел те циден пе таро Јехова. Ама о чачутно мангипе нашти те загушинел пе. Адалеске о мангипе ко тло брако нека овел сар о мангипе сој тано опишимо ко лил Песна над песните. Овен одлучна те чхивен е Јехова ко прво тхан ко тумаро брако, одвојнен време јекх јекхеске хем поштујнен тумен јекх јекхеа. Аѓаар тумаро брако ка фалинел е Јехова кастар со авела о чачутно мангипе хем исто сар јекх силно јаг, тумаро мангипе ка ачхол силно ки цели вечност.