1. Ко со поттикнинела о Јехова пле слуген? (Дикх хем и слика.)

 КАСТАР шај те рода утеха хем водство? Амен џанаја кај шај те рода акала буќа таро Јехова ки молитва. О Јехова поттикнинела амен те кера баш адава. Ов мангела те молина амен секогаш (1. Сол. 5:17). Амен шај слободно те молина амен леске хем те рода лескоро водство баши секоја ситуација ко амаро живото (Изр. 3:5, 6). Адалеске со ов тано дарежливо амен шај те молина амен е Јеховаске кобор со мангаја.

2. Со ка дикха ки акаја статија?

² Амен бут ценинаја адава со шај те молина амен. Сепак, адалеске со сием бут зафатиме шај те овел аменге пхаро те аракха време те молина амен. Исто аѓаар, шај халилем кај ваљани те подобрина амаре молитве. Ама на сием мукхле коркори, благодарна сием со ки Библија шај те аракха поттик хем водство баши молитва. Ки акаја статија ка дикха сар шај те одвојна аменге време баши молитва аѓаар со ка џа пало пример е Исусескоро. Исто аѓаар ка дикха сар шај те подобрина амаре молитве аѓаар со ки ленде ка вклучина панџ важна буќа.

3. Со халило о Исус баши молитва?

³ О Исус халило кај амаре молитве тане бут важна е Јеховаске. Бут време англедер те авел ки пхув, ов дикхља сар лескоро Дад одговоринела ко молитве е верна муршенгере хем џувленгере. На пример, о Исус сине пле Дадеа кеда ов одговоринѓа ко искрена молитве е Анакере, е Давидескере,  е Илијаскере хем панда буте верна слугенгере (1. Сам. 1:10, 11, 20; 1. Цар. 19:4-6; Пс. 32:5). Адалеске на изненадинела амен адава со о Исус поттикнинѓа пле ученикон те молинен пе често хем те овел лен доверба кај о Јехова ка шунел лен (Мат. 7:7-11).

4. Со сикљоваја таро Исус баши молитва?

⁴ Адалеа со молинѓа пе е Јеховаске, о Исус денѓа шукар пример пле следбениконге. Џикоте трајнела сине лескири служба, о Исус бут пути молинела пе сине. Ов ваљани сине те одвојнел песке време баши молитва соске сине бут зафатимо хем ретко сине коркори (Мар. 6:31, 45, 46). Адалеске уштела сине рано сабајле те шај те овел ле време коркори те молинел пе е Јеховаске (Мар. 1:35). Најхари ки јекх прилика, ов молинѓа пе цело рат англедер те анел важно одлука (Лука 6:12, 13). Хем и рат англедер те мерел, о Исус бут пути молинѓа пе те шај те завршинел о најпхаро дело тари пли задача ки пхув (Мат. 26:39, 42, 44).

5. Сар шај те џа пало пример е Исусескоро кеда молинаја амен?

⁵ Е Исусескоро пример сикавела аменге кај бизи разлика кобор сием зафатиме, амен ваљани те одвојна аменге време баши молитва. Исто сар о Исус, амен да шај ка ваљани те ушта рано сабајле или те ачхова хари покасно раќате те шај те молина амен. Ако кераја аѓаар, ка сикава е Јеховаске кај ценинаја акава скапоцено поклон. Јекх пхен со викинела пе Лин сетинела пе кобор сине благодарно кеда прво пути дознајнѓа кај иси амен чест те молина амен. Ој вакерела: „Кеда халиљум кај шај те керав лафи е Јеховаске ко било саво време, адава поможинѓа ман те дикхав ки лесте сар мло паше амал хем те овел ман желба те керав мле молитве пошукар“. Сигурно бут џене амендар мислинена исто. Акана те дикха панџ важна буќа башо кола со шај те молина амен.

6. Спрема Откровение 4:10, 11, со заслужинела о Јехова?

⁶ Фалин е Јехова. Ки јекх визија, о апостол Јован дикхља 24 старешине ко небо со обожавинена е Јехова. Ола фалинѓе е Девле хем вакерѓе кај ов заслужинела и слава, и чест хем и моќ. (Читин Откровение 4:10, 11.) Исто аѓаар, е верна ангелен да  иси лен бут причине те фалинен е Јехова. Ола тане леа ко небо хем пенџарена ле бут шукар. Таро буќа со керела лен о Јехова, ола шај те дикхен саве особине иси ле. Е Јеховаскере постапке поттикнинела лен те фалинен ле (Јов 38:4-7).

7. Башо со шај те фалина е Јехова?

⁷ Амен да ваљани те фалина е Јехова ко амаре молитве. Шај те кера адава аѓаар со ка вакера леске со мангаја хем со ценинаја ки лесте. Џикоте читинаја хем проучинаја и Библија, ваљани те трудина амен те аракха е Јеховаскере особине кола со посебно привлечинена амен ки лесте (Јов 37:23; Рим. 11:33). Тегани, вакер адава е Јеховаске ки молитва. Исто аѓаар, шај те фалина е Јехова башо адава со поможинела аменге хем са амаре пхраленге хем пхењенге. Ов на чхинавела те грижинел пе аменге хем те заштитинел амен (1. Сам. 1:27; 2:1, 2).

8. Кола тане несаве таро бут буќа баши коленде со шај те благодарина амен е Јеховаске? (1. Солуњаните 5:18).

⁸ Благодарин тут е Јеховаске. Иси амен бут причине соске шај те благодарина амен е Јеховаске ки молитва. (Читин 1. Солуњаните 5:18.) Шај те благодарина амен леске баши секоја шукар бути со иси амен, уствари секова шукар поклон авела лестар (Јак. 1:17). На пример, шај те сикава амаро ценење е Јеховаске баши амари шужи пхув хем башо чудесна буќа со керѓа лен. Исто аѓаар, шај те вакера леске кобор сием благодарна башо амаро живото, амари фамилија, амаре амала хем и надеж со иси амен. Хем шај те благодарина е Јеховаске башо адава со шај те ова леа амала.

9. Соске шај ка ваљани те бајрара амари благодарност башо Јехова?

⁹ Шај ка ваљани бут те трудина амен те размислина таро кола причине амен лично ваљани те ова благодарна е Јеховаске. Живинаја ко свето коте со о мануша ни хари нане благодарна. Бут пути о мануша концентриринена пе ко адава со мангена те овел лен, наместо ко адава со више иси лен. Ако мукхаја асавко стави те влијајнел упри аменде тегани ка молина амен е Јеховаске само кеда ка ваљани те рода лестар нешто. Те шај те на случинел пе адава ваљани те продолжина те бајрара хем те сикава амаро ценење башо са со керела аменге о Јехова (Лука 6:45).

10. Сар и благодарност поможинѓа јекхе пхењаке те истрајнел? (Дикх хем и слика.)

¹⁰ Ако сием благодарна, адава ка поможинел амен те истрајна кеда иси амен пхарипа. Те дикха јекх искуство тари Кијунг-сук со аракхљола ки Стражарско кула таро 15 јануари 2015 берш. Лаке аракхле рако кова со сигате ширинела пе. Ој вакерела: „Акава насвалипе бут перавѓа ман. Осетинѓум ман сар те пхене нашавѓум са хем бут дарава сине“. Со поможинѓа лаке те икљол ко крајо акале ситуацијаја? Ој вакерела кај секоја рат англедер те совел уклела сине ко тавани хем гласно молинела пе сине е Јеховаске  хем вакерела сине панџ буќа баши коленде со сине благодарно адава диве. Адава поможинѓа ла те смиринел пе хем поттикнинѓа ла те вакерел леске кобор бут мангела ле. Ој ки пли кожа осетинѓа кобор о Јехова поддржинела пле верна слуген кеда иси лен несаве пхарипа. Хем ој халили кај амен иси амен повише благословија ко амаро живото наместо проблемија. Исто сар акаја пхен амен да иси амен бут причине те благодарина амен е Јеховаске чак ако ко моменти накхаја таро несаво пхарипе. Адава со ка сикава амари благодарност ки молитва шај те поможинел амен те истрајна хем те ачхова смириме.

11. Соске е Исусескере учениконге ваљанѓа храброст откеда о Исус иранѓа пе ко небо?

¹¹ Роде таро Јехова храброст баши служба. Кратко англедер те иранел пе ко небо, о Исус потсетинѓа пле ученикон баши задача со денѓа лен, те сведочинен башо лескоро анав „ко цело Ерусалим, ки цело Јудеја хем Самарија хем ко најдур тхана ки пхув“ (Дела 1:8; Лука 24:46-48). Кратко пало адава о еврејска верска водачија астарѓе е Петаре хем е Јоване хем ингарѓе лен ко судско совет. Ола вакерѓе акале верна муршенге те чхинавен те проповединен хем чак заканинѓе пе ленге (Дела 4:18, 21). Сар реагиринѓе о Петар хем о Јован?

12. Спрема Дела 4:29, 31, со керѓе о ученикија?

¹² Кеда заканинѓе пе ленге о еврејска верска водачија, о Петар хем о Јован вакерѓе: „Судинен коркори дали тано праведно англо Девел те шуна тумен, а на е Девле. Амен нашти те на кера лафи башо адава со дикхлем хем шунѓем“ (Дела 4:19, 20). Кеда о Петар хем о Јован сине ослободиме, о ученикија молинѓе пе е Јеховаске башо адава понадари да те керен лескири волја. Ола вакерѓе: „Поможин тле слугенге понадари да храбро те вакерен тло лафи“. О Јехова одговоринѓа ки акаја искрено молитва. (Читин Дела 4:29, 31.)

13. Со шај те сикљова таро пхрал Џин-хјук?

¹³ Амен да шај те џа пало пример е апостоленгоро аѓаар со понадари да ка проповедина, чак кеда о властија вакерена аменге кај мора те чхинава. Те дикха о пример е пхралескоро Џин-хјук кова со сине пханло адалеске со одбинѓа те џал ки војска. Ко затвор лескири задача сине те ингарел хајбаске хем јавера буќа несаве затворениконге со сине ки самица. Ов шај сине те керел ленцар лафи само башо адава со ваљани ленге, а башо јавера буќа, сар на пример баши Библија, на смејнела сине те керел ленцар лафи. Ов молинѓа пе те овел храбро хем тактично те шај те керел лафи башо чачипе ки секоја прилика со ка овел ле (Дела 5:29). Ов вакерела: „О Јехова одговоринѓа ко мле молитве аѓаар со денѓа ман храброст хем мудрост те почминав бут библиска курсија англо ленгере ќелие, кола со трајнена сине по панџ минутија. А акшамеске пишинава сине писмија кола со дава сине е затворениконге о јавер диве“. Амен да шај те ова сигурна кај о Јехова ка поможинел амен те кера амари служба. Исто сар о Џин-хјук, шај те молина амен баши храброст хем мудрост.

14. Со шај те поможинел амен кеда иси амен проблемија? (Псалм 37:3, 5.)

¹⁴ Роде помош таро Јехова те шај те икљове ко крајо е проблеменцар. Бут џене амендар цидена муке адалеске со иси лен несаво насвалипе или емоционално проблеми, муло лендар некој со мангена ле, проблемија ки фамилија, прогонство или нешто јавер. А и пандемија хем о војне  керѓе те овел аменге панда попхаро те икљова ко крајо акале буќенцар. Ама ма бистре, ту шај те вакере е Јеховаске са со пашљола туке ко вило. Објаснин леске тли ситуација сар со би вакереа јекхе паше амалеске хем ов уверимо кај о Јехова „ка поможинел тут“. (Читин Псалм 37:3, 5.)

15. Сар и молитва шај те поможинел амен те истрајна ко неволје? Вакер пример.

¹⁵ И молитва шај те поможинел амен „те истрајна ко неволје“ (Рим. 12:12). О Јехова џанела таро со накхена лескере слуге хем „шунела кеда родена ле“ (Пс. 145:18, 19). И Кристи, јекх пионерка со иси ла 29 берш, уверинѓа пе ко акава. Ла таро јекх пути почминѓа те овел ла пхаро насвалипе хем адалеске пели ки бари депресија. Покасно дознајнѓа кај лакири дај добинѓа насвалипе колестар со шај мерела пе. И Кристи вакерела: „Бут молинава ман сине е Јеховаске те дел ман сила која со сине манге потребно те шај те накхавав секова диве. Трудинава ман сине те овел ман шукар духовно рутина аѓаар со џава сине ко состанокија хем икерава сине мли лично студија“. Ој понадари вакерела: „И молитва поможинѓа ман те накхав таро акала пхаре времија. Адава со џанава сине кај о Јехова тано секогаш узи манде бут утешинѓа ман. Иако мло састипе на уло одма пошукар, сепак о Јехова одговоринѓа ко мле молитве аѓаар со денѓа ман андруно мир“. Никогаш ма те бистра кај „о Јехова џанела сар те спасинел таро искушение е манушен со служинена само леске“ (2. Пет. 2:9).

16. Соске ваљани аменге е Јеховаскири помош те шај те борина амен против о искушение?

¹⁶ Роде помош таро Јехова те шај те на пере ко искушение. Адалеске со сием несовршена амен мора постојано те борина амен те шај те на кера нешто сој погрешно. О Сатана керела са те шај адаја борба те овел кобор со шај попхари. Јекх начин сар пробинела те пхерел амари годи тано аѓаар со користинела и неморално забава. Асавки забава шај те пхерел амари годи румиме мисленцар  — мисле кола со шај те мељарен амари андруни личност хем шај те ингарен амен џи ко сериозно грево (Мар. 7:21-23; Јак. 1:14, 15).

17. Со ваљани те кера откеда ка молина амен баши помош те шај те на пера ко искушение? (Дикх хем и слика.)

¹⁷ Ваљани аменге е Јеховаскири помош те шај те борина амен против о искушение те кера адава сој погрешно. О Исус ки пли најпенџарди молитва спомнинѓа акала лафија: „Ма мукх те пера ко искушение, него спасин амен таро лошно“ (Мат. 6:13). О Јехова мангела те поможинел аменге, ама амен мора те рода лестар адава. Исто аѓаар мора те постапина спрема амаре молитве. Ваљани те избегина те читина хем те шуна погрешна буќа кола сој популарна ко е Сатанаскоро свето (Пс. 97:10). Ваљани те пхера амари годи шукар мисленцар аѓаар со ка читина хем ка проучина и Библија. Јавер бути со ка поможинел аменге те заштитина амаре мисле тани ако џаја ко состанокија хем ки служба. А о Јехова ветинела аменге кај нане те дозволинел те ова искушиме повише таро адава со шај те издржина (1. Кор. 10:12, 13).

18. Кеда керела пе лафи баши молитва, со ваљани сарине те кера?

¹⁸ Секова јекх амендар ваљани те молинел пе сар никогаш англедер те шај те ачховел верно е Јеховаске ко акала пхаре последна диве. Одвојн туке време секова диве те молине тут таро вило. О Јехова мангела те пхраве леске тло вило ки молитва (Пс. 62:8). Фалин е Јехова хем благодарин леске башо са со керела. Роде лестар помош те ове храбро ки служба. Молин ле те поможинел тут те истрајне било саво проблеми хем те на пере ко искушение кова со шај иси тут. Ма дозволин никој или ништо те чхинавел тут редовно те молине тут е Јеховаске. Ама, сар о Јехова одговоринела ко амаре молитве? О одговор таро акава важно пучибе ка дикха ле ки следно статија.