СТАТИЈА ПРОУЧИБАСКЕ 22
Понадари да џа ко „Свето Друмо“
Адари ка овел јекх друмо... о Свето Друмо (ИСА. 35:8)
ГИЛИ 31 Џа е Јеховаја, тле Девлеа!
БАШО СО КА КЕРА ЛАФИ a
1-2. Која важно одлука мора сине те анен о Евреија таро Вавилон? (Езра 1:2-4).
О ЕВРЕИЈА кола со околу 70 берш сине робија ко Вавилон, шунѓе јекх бут шужо хабери — шај сине слободно те иранен пе ки пумари пхув, ко Израел. (Читин Езра 1:2-4.) Акава случинѓа пе само адалеске со о Јехова мангља те овел аѓаар. Акава вакераја ле соске о Вавилонција обично никогаш на ослободинена сине пумаре робон (Иса. 14:4, 17). Ама акана адалеске со о Вавилон сине освојмо хем некој јавер владинела, о Евреија шај сине слободно те џан песке тари адаја пхув. Адалеске секова Евреи, посебно о поглаварија, ваљани сине те одлучинен дали ка џан песке таро Вавилон или ка ачховен атхе. Шај на сине локхе те анел пе акаја одлука. Соске?
2 Машкар ленде сине бут пхуре кола со нашти сине те издржинен адава баро друмо. Исто аѓаар, бут Евреија бијандиле ко Вавилон хем адалеске атхе осетинена пе сине сар кхере. Ленге о Израел сине пхув ленгере парапапонгири. А несаве Евреија барвалиле ко Вавилон хем адалеске шај сине ленге пхаро те мукхен пумаре шуже хем удобна кхера или пумари бути те шај те џан ки јекх пхув која со на џанена ла.
3. Кова благослов аџикерела сине е Евреен кола со мангена сине те иранен пе ко Израел?
3 О верна Евреија џанле кај о благословија таро адава со ка иранен пе ко Израел сине бут побаре тари било која жртва со ваљани сине те керен ла. И најбари награда сине ленге адаја со шај сине те обожавинен е Јехова ко чисто начин. Ко Вавилон сине повише таро 50 паганска храмија, ама на сине нијекх храми башо Јехова. Адари на сине жртвенико коте со о Израелција шај сине те ден пумаре жртве спрема е Мојсеескоро закони хем на сине организириме свештеникија кола со шај сине те ден адала жртве. Исто аѓаар, ки адаја диз о мануша обожавинена сине ховавне девлен хем на поштујнена сине ни хари е Јехова или лескере мерилија. Адалеске о Евреија кола со мангена сине е Јехова едвај аџикерена сине те иранен пе ки пумари пхув коте со шај палем те обожавинен ле ко чисто начин.
4. Сави помош ветинѓа о Јехова кај ка дел е Евреенге со ка иранен пе ко Израел?
4 О дословно патујбе таро Вавилон џи ко Израел сине пхаро хем шај сине те трајнел околу штар масек. Ама о Јехова ветинѓа ленге кај ка цидел секоја пречка со шај сине те чхинавел лен ко адава друмо. О Исаија пишинѓа: „Спреминен о друмо е Јеховаске... Керен право о друмо ки пустина амаре Девлеске. О тхана коте со иси брегија нека овен рамна хем о нерамна тхана те исправинен пе“ (Иса. 40:3, 4). Замислин туке друмо ки пустина коте со брегија тане рамноме. Адала со ка патујнен ки лесте ка уживинен соске ка овел ленге бут полокхо те џан ко јекх право друмо него те уклен или те хулен таро брегија. Исто аѓаар ко јекх асавко друмо бут посигате шај те патујнел пе.
5. Сар викинела пе сине о симболично друмо таро Вавилон џи ко Израел?
5 Авдиве бут дословна друмија иси лен анава или броја. О симболично да друмо баши колеске со о Исаија пишинѓа иси ле анав. Ов пишинѓа: „Адари ка овел јекх друмо хем ка викинел пе Свето Друмо. Ки лесте нане те џал нијекх со нане чисто“ (Иса. 35:8). Со значинела сине акава ветување е Израелцонге ко адава време? Хем со значинела аменге авдиве?
„О СВЕТО ДРУМО“ КО ПУРАНО ВРЕМЕ ХЕМ АВДИВЕ
6. Соске акава друмо сине викимо свето?
6 „Свето Друмо“, кобор шужо анав јекхе друмоске. Соске акава друмо сине викимо свето? Адалеске со ко Израел нашти сине те џал о „нечисто“, јавере лафенцар било кова Евреи со керела сине неморал, со обожавинела сине идолија, или керела сине јавера сериозна гревија. О Евреија со иранѓе пе ко Ерусалим ваљани сине те овен „свето народо“ пле Девлеске (5. Мој. 7:6). Ама адава на значинела сине кај ола на ваљани те керен промене те шај те керен е Јеховаскири волја.
7. Саве промене ваљани сине те керен несаве Евреија? Вакер пример.
7 Сар со спомнинѓем англедер, бут Евреија бијандиле ко Вавилон хем бут џене лендар леле несаве ставија хем размислувања таро Вавилонција. Пало 69 берша откеда о Евреија иранѓе пе ко Израел, о Езра дознајнѓа кај несаве Евреија женинѓе пе паганска џувленцар (2. Мој. 34:15, 16; Езра 9:1, 2). Покасно о Неемија сине изненадимо кеда дознајнѓа кај о чхаве со бијандиле ко Израел на сиклиле и хебрејско чхиб (5. Мој. 6:6, 7; Неем. 13:23, 24). Акала чхаве нашти сине те манген хем те обожавинен е Јехова ако на хаљовена сине и хебрејско чхиб, ки која со побаро дело таро е Девлескоро Лафи сине пишимо (Езра 10:3, 44). Значи адала Евреија мора сине те керен баре промене. Ама сине ленге бут полокхо те керен адала промене соске живинена сине ко Израел, коте со о чисто обожавибе похари иранела пе сине (Неем. 8:8, 9).
Таро 1919 берш а.е., милиоња мурша, џувља хем чхаве мукхле о Баро Вавилон хем почминѓе те патујнен ко „свето друмо“ (Дикх ко пасус 8.)
8. Соске ваљани те интересинен амен несаве настанија со случинѓе пе веконцар англедер? (Дикх и слика тари насловно страна.)
8 Несаве шај те вакерен: „Акава тано бут интересно, ама сави врска иси аменцар адава со случинѓа пе е Евреенцар бут берша англедер?“ Слично сар ленде, амен да авдиве ки несави смисла џаја ко „Свето Друмо“. Бизи разлика дали сием помазаникија или таро „јавера бакхре“, сарине амен ваљани те ачхова ко Свето Друмо, соске ов поможинела амен те ова ко духовно рај акана хем те добина о благословија со ка анел лен е Девлескоро Царство b (Јован 10:16). Таро 1919 берш а.е., милиоња мурша, џувља хем чхаве иклиле таро Баро Вавилон, о светско царство е ховавне религијакоро, хем почминѓе те џан ко акава симболично друмо. Ту да сиан јекх лендар. Иако акава друмо сине пхравдо отприлика шел берш англедер, сепак ко акава друмо почминѓа те керел пе бути веконцар англедер.
СПРЕМИНЕЛА ПЕ О ДРУМО
9. Спрема Исаија 57:14, сар сине спремимо о „Свето Друмо“?
9 Кеда о Евреија ваљани сине те икљон таро Вавилон о Јехова цидинѓа о пречке таро адава друмо. (Читин Исаија 57:14.) А сар тано е „Свето Друмоја“ ко понево време? Веконцар англедер о 1919 берш, о Јехова почминѓа те користинел манушен кола со поштујнена ле сине те поможинен те спреминел пе о друмо те шај о мануша те икљовен таро Баро Вавилон. (Споредин Исаија 40:3.) Ола керѓе важна подготовке те шај покасно о искрена мануша те икљон тари ховавни религија хем те кхувен ко духовно рај коте со шај те обожавинен е Јехова лескере народоја. Те дикха несаве таро буќа со керѓе пе те шај те спреминел пе акава друмо.
Веконцар англедер, о мануша со поштујнена е Девле поможинѓе те спреминел пе о друмо те шај те икљол пе таро Баро Вавилон (Дикх ко пасусија 10-11)
10-11. Сар о печатибе хем о преведибе е Библијакоро поможинѓа те ширинел пе о чачипе? (Дикх хем и слика.)
10 Печатибе. Џи ки средина таро 15-то веко, и Библија препишинела пе сине рачно. Башо адава ваљани сине бут време хем адалеске сине хари копие тари Библија хем ола сине бут скупа. Ама кеда почминѓе те користинен пе машине печатибаске, полокхе шај сине те керен пе копие тари Библија хем те ден пе е манушенге.
11 Преведибе. Веконцар скоро са о библиска преводија сине ки латинско чхиб, која со само о шукар школујме мануша шај сине те хаљовен ла. Ама кеда о мануша почминѓе повише те користинен о печатибе, окола со поштујнена сине е Девле почминѓе те превединен и Библија ко чхибја со шај сине локхе те хаљовен пе. Аѓаар, окола со читинена сине и Библија шај сине те спорединен дали адава со сикавела и црква тано о исто со пишинела ки Библија.
О мануша со поштујнена е Девле поможинѓе те спреминел пе о друмо те шај те икљол пе таро Баро Вавилон (Дикх ко пасусија 12-14) c
12-13. Вакер пример башо адава сар о искрена истражувачија е Библијакере таро 19-то веко почминѓе те откринен о ховавне религиозна сикљојба.
12 Публикацие проучибаске и Библија. О искрена истражувачија е Библијакере откринѓе бут буќа џикоте проучинена сине е Девлескоро Лафи. Ама е свештениконге на свиџинела пе сине адава со о истражувачија вакерена сине е јаверенге адава со дознајнѓе. На пример, ко 19-то веко, бут искрена мануша почминѓе те икален трактатија коленцар со откринѓе е црквакере ховавне сикљојба.
13 Отприлика ко 1835 берш, јекх мануш со поштујнела сине е Девле, о Хенри Гру, икалѓа јекх трактати кова со керела сине лафи башо адава со овела е манушенцар пало мерибе. Ки лесте е Библијаја докажинѓа кај и бесмртност дела ла о Девел, а на сар со сикавена бут цркве кај бијанѓоваја аѓаар. Ко 1837 берш, јекх свештенико, о Џорџ Сторс аракхља копија таро адава трактати џикоте сине ко вози. Ов читинѓа ле хем сине сигурно кај аракхља јекх важно библиско чачипе. Адалеске одлучинѓа те вакерел е јаверенге адава со дознајнѓа. Ко 1842 берш, ов икерѓа серија таро говорија јекхе интересно темаја: „Пучибе — Дали о лошна тане бесмртна?“. Адава со пишинела сине о Џорџ Сторс влијајнѓа позитивно упро јекх терно кова со викинела пе сине Чарлс Тејс Расел.
14. Сар поможинѓа е пхралеске е Раселеске хем лескере соработниконге адава со англедер спреминѓа пе о Свето Друмо? (Дикх хем и слика.)
14 Сар поможинѓа е пхралеске е Раселеске хем лескере соработниконге о буќа со англедер керѓе пе ко адава Свето Друмо? Адалеске со више англедер сине речникија, списако лафенцар хем различна библиска преводија ола шај сине те користинен лен џикоте истражинена сине. Исто аѓаар, бут поможинѓа ленге адава со о Хенри Гру, о Џорџ Сторс хем јавера англедер више истражинѓе и Библија. О пхрал о Расел хем лескере соработникија исто аѓаар поможинѓе те спреминел пе адава Свето Друмо аѓаар со икалѓе бут лила хем трактатија коленде со пишинела со чаче вакерела и Библија.
15. Која важно бути случинѓа пе ко 1919 берш?
15 Таро 1919 берш, о Баро Вавилон на сине ле више влијание упро е Девлескоро народо. Ко адава берш сине чхивдо о „верно хем разборито робо“ те шај те поможинел е искрена манушенге те почминен те џан ко „Свето Друмо“ кова само со пхравдило (Мат. 24:45-47). Адалеске со више англедер сине керде подготовке, бут мануша шај сине те џан ко адава друмо хем те дознајнен повише башо Јехова хем лескири намера (Изр. 4:18). Ола исто аѓаар шај сине те почминен те живинен спрема е Јеховаскере мерилија. О Јехова на очекујнѓа таро пло народо те керен промене таро јекх пути. Наместо адава, сар со накхела сине о време ов хари похари прочистинела сине пле народо. (Дикх и рамка „ О Јехова постепено прочистинела пле народо“.) Кобор радосна ка ова кеда ка шај те кера амаре Девлескири волја ко са со кераја (Кол. 1:10).
„О СВЕТО ДРУМО“ ПАНДА ТАНО ПХРАВДО
16. Таро 1919 берш сар одржинела пе о „Свето Друмо“? (Исаија 48:17; 60:17).
16 Секова друмо ваљани редовно те одржинел пе. Слично, таро 1919 берш на чхинавѓа пе те керел пе бути ко „Свето Друмо“ те шај са повише мануша те икљон таро Баро Вавилон. О верно хем разборито робо одма почминѓа те керел бути хем ко 1921 берш ов издајнѓа јекх лил колеа со о интересентија шај сине те дознајнен о библиска чачипа. Таро лил, Е Девлескири харфа, пало несаво време сине керде шов милиоња примерокија ко 36 чхибја хем бут џене дознајнѓе о чачипе лестар. А акана иси амен јекх бут шужо лил колеа со шај те почмина библиска курсија, о лил Ов бахтало засекогаш! Џикоте трајнена о последна диве о Јехова преку пли организација дела амен редовно духовно храна те шај те поможинел аменге понадари да те џа ко „Свето Друмо“. (Читин Исаија 48:17; 60:17.)
17-18. Коте ингарела амен о „Свето Друмо“?
17 Шај те вакера кај кеда некој почминела те проучинел и Библија, ов почминела те џал ко „Свето Друмо“. Несаве ачхона само кратко време ко адава друмо хем пало адава икљона лестар. А јавера тане одлучна те ачхон ко адава друмо џикоте на ресена ки пли цел. Која тани ленгири цел?
18 Окола со иси лен небесно надеж, о „Свето Друмо“ ингарела лен ко е „Девлескоро рај“ ко небо (Отк. 2:7). А окола со иси лен надеж те живинен ки пхув адава друмо ингарела лен џи ко крајо таро милја берша кеда сарине ка овен совршена. Ако сиан ко адава друмо ма иран тут палал те дикхе о буќа со мукхљан лен хем ма икљов лестар џикоте на ресеа ки тли цел ко нево свето! Нека овел пхравдо тло друмо.
ГИЛИ 24 Авен ки е Јеховаскири планина
a Сине јекх симболично друмо со ингарела таро Вавилон џи ко Израел коле со о Јехова викинѓа ле „Свето Друмо“. Дали о Јехова спреминѓа јекх слично друмо пле народоске ко понево време? Оја. Таро 1919 берш а.е., милиоња иклиле таро Баро Вавилон хем почминѓе те џан ко „Свето Друмо“. Сарине амен мора те ачхова ко акава друмо са џикоте на ресаја ки амари цел.
b Дикх о лил Пророштвото на Исаија – светлина за целото човештво II, стр. 56-57.
c ОБЈАСНИМИ СЛИКА: О пхрал о Расел хем лескере соработникија користинѓе адава со сине англедер спремимо те шај те истражинен и Библија.