1-2. Со шај те пуча амен башо амаре молитве?

 ПУЧЉАН тут ли некогаш дали о Јехова одговоринела ко тле молитве? Ако оја, на сиан коркори. Бут пхраља хем пхења вакерѓе кај пучена пе о исто, посебно кеда накхена таро пхаре времија. Ако иси амен несаво проблеми шај аменге да те овел пхаро те дикха сар о Јехова одговоринела ко амаре молитве.

² Те дикха соске шај те ова увериме кај о Јехова одговоринела ко молитве пле слугенгере (1. Јов. 5:15). Исто аѓаар ка дикха акала пучиба: Соске понекогаш изглединела сар те пхене о Јехова на одговоринела ко амаре молитве? Ко саве начинија о Јехова авдиве одговоринела ко амаре молитве?

3. Соске о Јехова мангела те молина амен леске?

³ И Библија уверинела амен кај о Јехова бут мангела амен хем кај сием леске скапоцена (Агеј 2:7; 1. Јов. 4:10). Адалеске ов поттикнинела амен те рода лестар помош ки молитва (1. Пет. 5:6, 7). Ов мангела те поможинел аменге те ачхова леа паше хем те икљова ко крајо е проблеменцар со иси амен.

4. Котар џанаја кај о Јехова одговоринела ко молитве пле слугенгере? (Дикх хем и слика.)

⁴ Ки Библија бут пути читинаја кај о Јехова одговоринѓа ко молитве пле слугенгере. Дали авела туке ки годи јекх асавко пример? Шај мислинеа ко цари о Давид. Ле сине ле бут опасна душмања, адалеске ов бут пути молинела сине е Јехова баши помош. Ки јекх прилика хор таро вило вакерѓа: „Јехова, шун мли молитва, шун сар молинава тут баши  помош. Хем одговорин манге адалеске со сиан верно хем праведно“ (Пс. 143:1). О Јехова одговоринѓа ко е Давидескере молитве (1. Сам. 19:10, 18-20; 2. Сам. 5:17-25). Адалеске о Давид шај сине те вакерел: „О Јехова тано паше узи сариненде со родена ле“. Амен да шај те ова увериме ко адава (Пс. 145:18).

5. Дали о Јехова секогаш одговоринѓа пле слугенге ко начин сар со ола очекујнѓе? Вакер пример. (Дикх хем и слика.)

⁵ О Јехова шај нане те одговоринел ко амаре молитве аѓаар сар со амен очекујнаја. Асавко нешто доживинѓа о апостол Павле. Ов молинѓа е Девле те цидел лестар о каро таро тело. О Павле ко трин прилике молинѓа пе конкретно башо акава пхаро проблеми. Дали о Јехова одговоринѓа ко лескере молитве? Оја, ама на аѓаар сар со очекујнѓа о Павле. Наместо те цидел лестар о проблеми, о Јехова денѓа ле и сила со ваљанѓа леске те шај понадари да верно те служинел леске (2. Кор. 12:7-10).

6. Соске понекогаш шај те изглединел сар те пхене о Јехова на одговоринела ко амаре молитве?

⁶ Понекогаш амен да шај те добина одговор ко начин со на очекујнѓем. Ама шај те ова сигурна кај о Јехова најшукар џанела сар те поможинел аменге. Ов шај чак „те керел бут повише таро са о буќа со родаја лестар или со замислинаја аменге“ (Еф. 3:20). Адалеске ко амаре молитве шај те одговоринел ко време или ко начин со амен на очекујнаја.

7. Соске шај ка ваљани те молина амен башо нешто јавер? Вакер пример.

⁷ Откеда појасно ка хаљова е Јеховаскири волја шај ка дикха кај ваљани те молина амен башо нешто јавер. Те дикха о пример јекхе пхралескоро со викинела пе Мартин Пецингер. Кратко откеда женинѓа пе, о пхрал Пецингер сине пханло ко нацистичко концентрационо логори. Ко почеток ов молинѓа е Јехова те икљол адатхар те шај те грижинел пе пле ромњаке хем те продолжинел пле службаја. Ама пало дуј курке ов на дикхља нисаво знако кај о Јехова ка керел нешто те шај те икљол. Адалеске ки молитва вакерѓа: „Јехова, молинава тут сикав манге со мангеа те керав“. Тегани почминѓа те размислинел таро со накхена јавера да пхраља сој тане ко логори. Бут лендар исто аѓаар секиринена пе сине башо пумаре ромња хем чхаве. Адалеске о пхрал Пецингер ки молитва вакерѓа: „Јехова, фала баши мли неви задача.  Молинава тут поможин манге те зајакнинав хем те охрабринав мле пхрален“. Ко следна 9 берш керѓа баш адава.

8. Која важно бути на ваљани те бистра кеда молинаја амен?

⁸ На ваљани те бистра кај е Јехова иси ле намера хем ов ка исполнинел ла ко време кова со одрединѓа. Ки адаја намера тано вклучимо целосно хем засекогаш те цидел са о проблемија со анена аменге баре муке, сар сој о природна катастрофе, насвалипе хем мерибе. О Јехова ка исполнинел пли намера преку пло Царство (Дан. 2:44; Отк. 21:3, 4). Ама џикоте на авела адава време, о Јехова мукхела о Сатана те владинел упро акава свето b (Јован 12:31; Отк. 12:9). Ако о Јехова панда акана решинела са о проблемија, адава шај те изглединел сар те пхене о Сатана шукар владинела. Ама, иако мора те аџикера о Јехова те исполнинел пле ветувања, адава на значинела кај ов мукхела амен бизи помош. Те дикха ко саве начинија о Јехова керела адава.

9. Сар шај о Јехова те поможинел аменге кеда ваљани те ана мудра одлуке? Вакер пример.

⁹ Ов дела амен мудрост. О Јехова ветинела кај ка дел амен мудрост која со ваљани аменге те шај те ана шукар одлуке. Посебно ваљани аменге мудрост кеда анаја одлуке кола со влијајнена упро цело амаро живото сар сој дали те женина амен или на (Јак. 1:5). Те дикха о пример јекхе пхењакоро со викинела пе Марија. c Џикоте служинела сине сар општо пионерка запознајнѓа јекхе пхрале. Ој вакерела: „Со попаше амала оваја сине, добором повише свиџинаја амен сине јекх јекхеске, адалеске мора сине те одлучинав со те керав. Бут молинѓум ман е Јеховаске баши акаја бути. Ваљанѓа манге лескоро водство, ама исто аѓаар џанљум кај о Јехова нане манге ко тхан те анел одлука“. Ој дикхља кај о Јехова одговоринѓа ко лакере молитве баши мудрост. Сар? Џикоте истражинела сине ко амаре публикацие, ој аракхља конкретна статие со одговоринѓе ко лакере пучиба. Исто аѓаар шунѓа о мудро совет со добинѓа ле тари пли верно дај. Адава совет поможинѓа е Маријаке те испитинел пле чувствија. Ко крајо ој шај сине те анел мудро одлука.

10. Спрема Филипјаните 4:13, со ка керел о Јехова те шај те поможинел пле слугенге? Вакер пример. (Дикх хем и слика.)

¹⁰ Ов дела амен сила те шај те истрајна. О Јехова ка дел амен сила која со ваљани аменге те шај те истрајна кеда иси амен неволје, исто сар со керѓа адава е апостол Павлеске. (Читин Филипјаните 4:13.) Те дикха  сар о Јехова поможинѓа јекхе пхралеске со викинела пе Бенјамин те истрајнел ко пхаре околностија. Побаро дело таро пло тикнипе о Бенјамини хем лескири фамилија живинѓе ко избегличка кампија ки Африка. О Бенјамини вакерела: „На чхинавѓум те молинав ман е Јеховаске те дел ман сила те шај те керав адава сој шукар англо лескере јакхја. О Јехова одговоринѓа ко мле молитве аѓаар со денѓа ман андруно мир, храброст понадари да те проповединав хем о публикацие те шај те ачховав духовно зорало“. Ов понадари вакерела: „Адава со читинѓум е пхраленгере искуствија хем сар о Јехова поможинѓа ленге те истрајнен, бајрарѓа мли одлучност те ачховав верно е Јеховаске“.

11-12. Сар шај о Јехова те користинел амаре духовно фамилија те шај те одговоринел ко амаре молитве? (Дикх хем и слика.)

¹¹ Ов користинела амаре духовно фамилија. И рат англедер те мерел, о Исус бут молинѓа пе. Ов молинѓа е Јехова, ако шај, о јавера те на дикхен ки лесте сар некој со керела лошно лафи башо Девел. Наместо те керел адава, о Јехова поможинѓа леске аѓаар со бичхалѓа јекх таро лескере небесна пхрален — јекхе ангеле те зајакнинел ле (Лука 22:42, 43). О Јехова шај аменге да те поможинел аѓаар со ка поттикнинел некас таро амаре пхраља или пхења те јавинен пе аменге или те посетинен амен. Сарине амен шај те рода прилике те вакера „јекх шукар лафи“ амаре пхраленге хем пхењенге (Изр. 12:25).

¹² Те дикха о искуство јекхе пхењакоро со викинела пе Мириам. Некобор курке откеда муло лакоро ром, и Мириам сине коркори кхере хем на сине ла сила ништоске соске сине пхаѓи тари дукх. Ој нон-стоп ровела сине хем ваљанѓа лаке некој касаја со шај те керел лафи. Ој вакерела: „На сине ман сила те јавинав ман некаске, адалеске молинѓум ман е Јеховаске. Џикоте панда ровава сине хем молинава ман сине, ѕвонинѓа мло телефони. Јавинѓа пе манге јекх старешина, јекх шукар амал“. Акава старешина хем лескири ромни бут утешинѓе е Мириама. Ој тани уверими кај о Јехова поттикнинѓа акале пхрале те јавинел пе лаке.

13. Вакер пример башо адава сар о Јехова шај те користинел околен со на служинена леске те шај те одговоринел ко амаре молитве.

 ¹³ Ов шај те користинел манушен кола со на служинена леске (Изр. 21:1). Понекогаш о Јехова користинела е манушен со на служинена леске те шај те одговоринел ко молитве пле слугенгере. На пример, ов керѓа о цари о Артаксеркс те мукхел е Неемија те иранел пе ко Ерусалим те шај те поможинел палем те градинел пе и диз (Неем. 2:3-6). Авдиве да о Јехова шај те поттикнинел чак околен со на служинена леске те поможинен амен.

14. Сар охрабринела тут о искуство тари Су Хинг? (Дикх хем и слика.)

¹⁴ Јекх пхен со викинела пе Су Хинг осетинѓа е Јеховаскири помош преку пло доктори. Лакере чхаве сине ле некобор психичка насвалипа. Пало несаво време пело таро јекх бут учо тхан хем бут поврединѓа пе. Те шај те грижинен пе леске и Су хем лакоро ром мукхле пумари бути. Адалеске сине лен финансиска проблемија. И Су вакерѓа кај нашти сине више те издржинел о пхарипе со сине ла. Адалеске ој таро вило молинѓа е Јехова те поможинел лаке. О доктори мангља несар те поможинел цело фамилијаке. Адалеске со поможинѓа ленге ола добинѓе помош тари држава хем тхан живибаске со на сине добором скупо. Пало адава и Су вакерѓа: „Осетинѓем е Јеховаскоро вас. Ов чаче тано адава со шунела о молитве“ (Пс. 65:2).

15. Со поможинѓа јекхе пхењаке те хаљовел кај о Јехова одговоринѓа ко лакере молитве?

¹⁵ Најчесто о Јехова на одговоринела ко амаре молитве ко јекх посебно начин. Ама о одговорија со добинаја лен тане баш адала со ваљани аменге те шај те ачхова верна амаре небесно Дадеске. Адалеске шукар приметин сар о Јехова одговоринела ко тле молитве. Јекх пхен со викинела пе Јоко мислинела сине кај о Јехова на одговоринела ко лакере молитве, ама тегани почминѓа те пишинел песке о буќа баши коленде со молинѓа е Јехова. Откеда накхља несаво време ој дикхља пле белешке хем приметинѓа кај о Јехова одговоринѓа ко побаро дело таро лакере молитве, чак ко молитве со бистерѓа лен. Понекогаш амен да ваљани те одвојна аменге време хем те размислина башо адава сар о Јехова одговоринела ко амаре молитве (Пс. 66:19, 20).

16. Сар шај те сикава вера кеда керела пе лафи баши молитва? (Евреите 11:6).

 ¹⁶ Амен на сикаваја вера само кеда молинаја амен него исто аѓаар кеда прифатинаја е Јеховаскоро одговор ко амаре молитве бизи разлика ко саво начин одговоринела аменге. (Читин Евреите 11:6.) Те дикха о пример таро Мајк хем лескири ромни и Криси. Лен сине лен цел те служинен ко Бетел. О Мајк вакерела: „Бершенцар даја сине молба хем често молинаја амен сине е Јеховаске баши амари цел, ама никогаш на викинѓе амен“. О Мајк хем и Криси сине увериме кај о Јехова најшукар џанела сар те користинел лен. Адалеске ола понадари да денѓе пестар са аѓаар со служинѓе сар општа пионерија ко тхан коте со сине потреба хем поможинѓе те градинен пе теократска објектија. Акана тане ки покраинско служба. О Мајк понадари вакерела: „О Јехова на одговоринѓа секогаш ко амаре молитве сар амен со очекујнѓем, ама одговоринѓа, чак ко начин со никогаш на замислинѓем аменге“.

17-18. Спрема Псалм 86:6, 7, ко со шај те ова увериме?

¹⁷ Читин Псалм 86:6, 7. О псалмисти о Давид сине сигурно кај о Јехова шунѓа лескере молитве хем одговоринѓа ки ленде. Ту да шај те ове уверимо ко адава. О искуствија баши коленде со керѓем лафи ки акаја статија уверинена амен кај о Јехова шај те дел амен и мудрост хем и сила со ваљани аменге те шај те истрајна. Ов шај те користинел амаре духовно фамилија или понекогаш чак околен со на служинена леске те шај те поможинен аменге.

¹⁸ Иако о Јехова шај нане секогаш те одговоринел ко амаре молитве сар амен со очекујнаја, сепак увериме сием кај ов ка одговоринел ки ленде. Ов ка дел амен баш адава со ваљани аменге хем ко време кеда ваљани. Адалеске понадари да молин тут хем нека овел тут доверба кај о Јехова ка шунел тут хем ов уверимо кај ов ка грижинел пе туке акана хем кај ко нево свето ка дел сариненге адава со мангена (Пс. 145:16).