1. Саво предизвик сине буте џенен амендар?

 ДАЛИ некогаш чхивѓан туке духовно цел ама сине туке пхаро те исполнине ла? b Ако оја, на случинѓа пе само туке адава. На пример, о Филип чхивѓа песке цел те молинел пе поредовно хем пошукар ама сине леске пхаро те одвојнел време башо адава. И Ерика чхивѓа песке цел те ресел ко време ко состанокија баши служба, сепак скоро секова состанок понадари да каснинела сине. О Томаш некобор пути пробинѓа те читинел цело Библија. Ов вакерела: „На сине манге интересно те читинав и Библија. Трин пути пробинѓум те читинав цело Библија ама секова пути ресљум само џи ки 3. Мојсеева“.

2. Соске на ваљани те обесхрабрина амен ако иси амен несави цел, а панда на исполнинѓем ла?

² Ако иси тут несави цел која со панда на исполнинѓан ла, молинаја тут ма обесхрабрин тут. Те шај те исполнинен пе чак тикне целија обично ваљани време хем бут трудо. Адава со понадари да кереа бути ки тли цел сикавела кај туке бут важно тло амалипе е Јеховаја хем кај мангеа те де леске тло најшукар. О Јехова бут ценинела тло трудо. Џанѓола пе, ов на очекујнела тутар нешто со нашти те кере (Пс. 103:14; Мих. 6:8). Адалеске, кеда чхивеа туке несави цел размислин дали тле околностија ка дозволинен туке те исполнине ла. Откеда ка бирине несави цел, со шај те кере те шај те исполнине ла? Те дикха несаве предлогија.

3. Соске и желба тани важно?

³ Бут тано важно те овел тут бари желба те шај те исполнине тле целија. Ако бут мангеа те кере нешто тегани ка кере са со ваљани те шај те исполнине адава. И желба шај те споредина ла бавлалаја која со ингарела е чамцо ки пли цел. Некој со патујнела чамцоја најверојатно ка ресел ки пли цел само ако и бавлал на чхинавела те пхудел. А шај чак те ресел посигате ако и бавлал пхудела посилно. Слично, кобор побари желба иси амен добором побари тани и веројатност кај ка исполнина амаре целија. Јекх пхрал таро Ел Салвадор, кова со викинела пе Давид, вакерела: „Кеда иси тут силно желба, повише трудинеа тут хем тегани на мукхеа ништо те чхинавел тут те исполнине адаја цел“. Адалеске, со шај те кере те шај те бајраре тли желба?

4. Башо со шај те молина амен? (Филипјаните 2:13). (Дикх хем и слика.)

⁴ Молин тут те овел тут побари желба. О Јехова преку пло духо шај те дел тут побари желба те шај те исполнине тли цел. (Читин Филипјаните 2:13.) Понекогаш чхиваја аменге цел адалеске со џанаја кај ваљани те кера адава, хем адава тано шукар. Ама шај нане амен несави бари желба те исполнина ла. Аѓаар сине јекхе пхењаја тари Уганда која со викинела пе Норина. Ој чхивѓа песке цел те почминел библиско курси иако на сине ла бари желба те керел адава соске мислинела сине кај ој нане баш шукар ки служба. Со поможинѓа лаке? Ој вакерела: „Почминѓум секова диве те молинав е Јехова те бајрарел мли желба башо библиско курси. Ама ко исто време трудинава ман сине те овав пошукар ки служба. Пало несаве масекија приметинѓум кај мли желба барили. Ко исто берш почминѓум дуј библиска курсија“.

5. Башо со шај те размислина те шај те бајрара амари желба?

⁵ Размислин башо адава со керѓа о Јехова туке (Пс. 143:5). О апостол Павле бут размислинѓа башо е Јеховаскоро шукарипе со на заслужинела пе хем адава бајрарѓа лескири желба те дел пе повише е Јеховаске (1. Кор. 15:9, 10; 1. Тим. 1:12-14). Слично, кобор повише размислинеа башо адава со о Јехова керѓа туке, добором повише ка манге те исполнине тли цел (Пс. 116:12). Те дикха со поможинѓа јекхе пхењаке таро Хондурас те овел општо пионерка, ој вакерела: „Размислинѓум башо адава кобор о Јехова мангела ман. Ов керѓа те овав дело таро лескоро народо, грижинела пе манге хем заштитинела ман. Адава со размислинава сине башо акала буќа керѓа те замангав повише е Јехова хем бајрарѓа мли желба те исполнинав мли цел“.

6. Со јавер ка поможинел амен те бајрара амари желба?

⁶ Размислин башо благословија со ка овен тут ако исполнинеа тли цел. Приметин со поможинѓа е Ерикаке, кола со спомнинѓем  ла англедер, те шај те на каснинел. Ој вакерела: „Халиљум кај бут буќа пропуштинава кеда каснинава ко состанок службаке. Ама ако ресава порано ка шај те поздравинав ман е пхраленцар хем е пхењенцар хем те дружинав ман ленцар. Исто аѓаар ка шај те шунав корисна предлогија кола со ка поможинен ман те керав пошукар мли служба хем те уживинав ки лате“. Адалеске со и Ерика размислинѓа башо благословија со ка овен ла, ој успејнѓа те исполнинел пли цел. Башо кола користија шај ту те размислине? Ако тли цел тани те читине и Библија или те кере пошукар тле молитве, размислин сар адава ка поможинел туке те ове попаше амал е Јеховаја (Пс. 145:18, 19). Или ако тли цел тани те развине христијанска особине, размислин сар адава ка поможинел тут те ове ко шукар односија е јаверенцар (Кол. 3:14). Шај те пишине туке таро кола причине мангеа те исполнине тли цел хем пало адава редовно дикх со пишинѓан. О Томаш, коле со спомнинѓем ле англедер, вакерела: „Кобор повише причине иси ман те исполнинав мли цел, добором повише ка трудинав ман“.

7. Со поможинѓа е Хулиоске хем лескере ромњаке те исполнинен пли цел?

⁷ Дружин тут околенцар со ка охрабринен тут те исполнине тли цел (Изр. 13:20). О Хулио хем лескири ромни чхивѓе песке цел те бајрарен пумари служба. Приметин со поможинѓа ленге, ов вакерела: „Биринѓем аменге амала коленцар со шај сине те кера лафи баши амари цел хем со охрабринѓе амен те исполнина ла. Адалеске со бут џене лендар више исполнинѓе слична целија шај сине те ден амен корисна предлогија. Ола исто аѓаар пучена амен сине сар џала аменге хем охрабринена амен сине кеда ваљани аменге адава“.

8. Со шај те случинел пе ако кераја бути ки амари цел само кеда иси амен желба? (Дикх хем и слика.)

⁸ Те ова искрена, саринен амен понекогаш нане амен бари желба те кера нешто. Дали адава значинела кај нашти те исполнина амари цел? На. Те вакера јекх пример: Јекх силно бавлал шај те ингарел е чамцо џи ки пли цел. Ама понекогаш шај те пхудел силно бавлал, а понекогаш на добором силно. А несаве диве шај чак те на овел ни хари бавлал. Дали акава значинела кај о чамцо нашти те ресел џи ки пли цел? На. Ко несаве чамција иси мотори, а ко несаве иси веслија хем о мануш сој ко чамцо шај те користинел или о мотори или о веслија те шај те ресел џи ки пли цел. Амари желба шај те споредина ла е бавлалаја. Некогаш шај те овел бут бари, а некогаш тикни. А несаве диве шај те на овел амен ни хари желба те кера бути ки амари цел. Значи, ако аџикераја те кера бути ки амари цел само кеда иси амен бари желба, шај никогаш нане те исполнина ла. Ама исто сар о мануш е чамцоја со користинела јавера начинија те шај те ресел џи ки пли цел, амен да шај те користина јавера начинија те шај те исполнина амари  цел чак кеда нане амен бари желба. Иако акава значинела кај ка ваљани те овел тут самоконтрола, ко крајо ка ове бут радосно адалеске со ка исполнине тли цел. Акана те кера лафи башо адава со шај те кера те шај те исполнина амари цел, ама прво те дикха јекх пучибе со шај те појавинел пе.

9. Дали тано погрешно те кера бути ки амари цел чак кеда нане амен бари желба? Објаснин.

⁹ О Јехова мангела те ова радосна џикоте служинаја леске хем адава те кера ле доброволно (Пс. 100:2; 2. Кор. 9:7). Тегани, дали ваљани понадари да те кера бути ки амари цел чак кеда на керела пе аменге адава? Те дикха о пример е апостол Павлескоро. Ов вакерѓа: „Марава мло тело, хем икерава ле сар робо“ (1. Кор. 9:25-27). О Павле силаја теринѓа пе те керел адава со родела лестар о Јехова чак кеда на керела пе сине леске адава. Дали о Јехова прифатинѓа адава со керѓа о Павле? Оја! Ов чак наградинѓа ле башо лескоро трудо (2. Тим. 4:7, 8).

10. Кола тане о користија ако кераја бути ки амари цел чак кеда нане амен желба?

¹⁰ Слично, о Јехова тано задоволно амендар да кеда дикхела кај кераја бути ки амари цел, чак кеда нане амен желба. Ов радујнела пе адалеске со џанела кај иако понекогаш на мангаја те кера несави бути, сепак адалеске со мангаја ле, кераја адава. Исто сар о Јехова со благословинѓа е Павле, аѓаар ка благословинел амен да башо амаро трудо (Пс. 126:5). Хем џикоте дикхаја сар о Јехова благословинела амен, шај чак те бајрол аменге желба баши адаја бути. Јекх пхен тари Полска која со викинела пе Лусина вакерела: „Понекогаш на џала пе манге ки служба, посебно кеда сиум уморно. Сепак, и радост со осетинава ла откеда џава ки служба тани бут бари“. Акана те дикха со шај те кера кеда нане амен желба.

11. Сар шај те поможинел амен о Јехова те овел амен побари самоконтрола?

¹¹ Молин тут баши самоконтрола. И самоконтрола тани способност те контролирине тле чувствија хем постапке. Акава лафи бут пути користинаја ле кеда мангаја те вакера кај ваљани те спречина амен те кера нешто со нане шукар. Ама и самоконтрола ваљани аменге те шај те поттикнинел амен те кера нешто шукар, посебно кеда адава тано пхаро или нане амен желба. Ма бистре кај и самоконтрола тани јекх таро особине со авена таро свети дух, адалеске молин е Јехова преку пло свети дух те поможинел тут те развине акаја важно особина (Лука 11:13; Гал. 5:22, 23). О Давид, коле со спомнинѓем ле англедер, вакерела сар поможинѓа леске и молитва. Ов чхивѓа песке цел те овел ле редовно и лично студија. Ов вакерела: „Молинѓум е Јехова те поможинел манге те овел ман самоконтрола. Ов поможинѓа ман хем адалеске шај сине те почминав мле лично студијаја хем адава те керав ле редовно“.

12. Сар о лафија таро Проповедник 11:4 поможинена амен те исполнина амаре целија?

¹² Ма аџикер те овен тут совршена условија. Ко акава свето веројатно никогаш нане те овен амен совршена условија. Ако аџикераја адава шај никогаш те на исполнина амари цел. (Читин Проповедник 11:4.) Јекх пхрал со викинела пе Даниел вакерела: „На постојнена совршена условија. Адалеске на ваљани те одложина него одма те почмина хем те користина о условија со иси амен“. Јекх пхрал тари Уганда со викинела пе Пол вакерела панда јекх причина соске на ваљани те одложина: „Кеда кераја бути ко амаре целија чак ко пхаре условија, тегани даја нешто е Јеховаске со шај те благословинел“ (Мал. 3:10).

13. Соске тано шукар те чхиве туке тикне целија?

¹³ Почмин тикне буќенцар. Шај нане амен желба адалеске со амари цел дикхјола аменге  пхари хем адалеске мислинаја кај нашти те исполнина ла. Ако ту да мислинеа аѓаар, дали шај тли цел те одвојне ла ко потикне целија? На пример, ако тли цел тани те развине несави особина, соске на пробинеа прво те сикаве ла ко потикне буќа? Ако иси тут цел те читине цело Библија, соске на почминеа аѓаар со ка читине похари материјали? О Томаш коле со спомнинѓем ле ко почеток тари акаја статија сине леске пхаро те исполнинел пли цел те читинел и Библија јекхе бершеске. Ов вакерела: „Халиљум кај нашти те ресав о распоред со чхивѓум манге те читинав и Библија јекхе бершеске. Адалеске одлучинѓум те пробинав палем, ама акава пути планиринѓум те читинав само јекх дело таро јекх поглавје хем те размислинав баши леске. Адава поможинѓа манге те уживинав џикоте читинава“. Сар накхела сине о време ов почминѓа те читинел повише материјали, пало несаво време ов читинѓа цело Библија. c

14. Кола буќа шај те керен аменге попхаро те исполнина амаре целија?

¹⁴ Понекогаш шај иси амен хем бари желба хем самоконтрола ама палем шај те овел аменге пхаро те исполнина амари цел. На пример, „о буќа со нашти те предвидинен пе“ шај те лен амаро време хем аѓаар те на овел амен бут време те кера бути ки амари цел (Проп. 9:11). А шај те овен амен проблемија со ка разочаринен амен хем ка лен амари сила (Изр. 24:10). Исто аѓаар, адалеске со сием несовршена шај те кера нешто со ка керел аменге панда попхаро те исполнина амари цел (Рим. 7:23). Или шај сием бут уморна (Мат. 26:43). Со ка поможинел аменге ако пераја или едноставно на џала аменге?

15. Ако пелем, дали адава значинела кај на успејнѓем? Објаснин (Псалм 145:14).

¹⁵ Ма бистре кај ако переа адава на значинела кај на успејнѓан. И Библија вакерела кај шај често те овен амен проблемија или пхарипа. Ама исто аѓаар вакерела кај амен шај  палем те ушта, посебно кеда о Јехова поможинела амен. (Читин Псалм 145:14.) О пхрал Филип коле со спомнинѓем ле англедер вакерела: „На концентриринава ман ко адава кобор пути пељум него ко адава кобор пути уштиљум“. О Давид коле со спомнинѓем ле англедер вакерела: „Пробинава ко пхаре ситуацие хем ко лошна диве те на дикхав сар пречка него сар прилика те сикавав е Јеховаске кобор бут мангава ле“. Оја, ако понадари да кереа бути ки тли цел, чак ко пхаре диве, ту сикавеа е Јеховаске кај мангеа те кере лескири волја. Ов сигурно кај о Јехова тано бут радосно кеда дикхела сар ту понадари да трудинеа тут те исполнине тли цел.

16. Со шај те сикљова таро пхаре ситуацие?

¹⁶ Сикљов таро пхаре ситуацие. Размислин сар ало џи ки адаја пхари ситуација хем пуч тут: „Со шај те керав те шај те на овел палем нешто асавко?“ (Изр. 27:12). Понекогаш, о пхаре ситуацие шај те сикавен аменге кај на чхивѓем аменге реално цел. Ако мислинеа кај акава шај те овел случај туја да, размислин панда јекх пути баши тли цел те шај те дикхе дали ту чаче шај те исполнине ла. d О Јехова нане те дикхел ки туте сар неуспешно ако на исполнинѓан тли цел која со нане реално спрема тле околностија (2. Кор. 8:12).

17. Соске на ваљани те бистра адава со џи акана керѓем?

¹⁷ Ма бистре со успејнѓан те кере џи акана. И Библија вакерела: „О Девел нане неправедно, па те бистрел адава со керѓен“ (Евр. 6:10). Адалеске на ваљани ни ту да те бистре адава со керѓан. Размислин башо целија со више исполнинѓан лен, сар на пример те ове паше амал е Јеховаја, те кере е јаверенцар лафи баши лесте или те крстине тут. Исто сар со напредујнѓан хем исполнинѓан тле целија со сине тут англедер, аѓаар ту шај понадари да те напредујне хем те успејне те исполнине тле целија со иси тут акана (Фил. 3:16).

18. Со на ваљани те бистра џикоте кераја бути ки амари цел? (Дикх хем и слика.)

¹⁸ Кеда о Јехова поможинела тут, ту шај те ресе ки тли цел исто сар јекх мануш е чамцоја со ресела ки пли цел. Ама ма бистре, бут мануша со патујнена чамцоја, уживинена џикоте патујнена. Слично, џикоте трудинеа тут те исполнине тли цел, ма бистре те уживине хем те дикхе сар о Јехова поможинела тут хем благословинела тут џикоте кереа адава (2. Кор. 4:7). Ако на откажинеа тут, ка добине панда побаре благословија (Гал. 6:9).