Соске о мануш со викинела пе „адава хем адава“ вакерѓа кај лескоро наследство ка овел „уништимо“ ако женинела пе е Рутаја? (Рут 4:1, 6).

Ако ко библиско време јекх женимо мануш муло, а на сине ле чхаве, со случинела пе сине лескере пхувјаја со сине ле? Дали лескири фамилијарно лоза ка нашавѓовел засекогаш? Е Мојсеескоро закони поможинела сине те одговоринел пе ко акала пучиба.

Со случинела пе сине е манушескере пхувјаја ако ов мерела или овела чороло хем бикинела пли пхув? О пхрал или јекх паше фамилија шај сине палем те кинел адаја пхув. Аѓаар адаја пхув ачхола сине ки фамилија (3. Мој. 25:23-28; 4. Мој. 27:8-11).

Ама сар адава поможинела те на нашавел пе и фамилијарно лоза е манушескири со муло? Адава шај сине те керел пе преку о деверско брако сар со сине случај е Рутаја. Деверско брако тано кеда некој женинела пе пле пхралескере удовицаја те шај те овел ла чхаво. Ама адава чхаво ваљани сине те продолжинел и фамилијарно лоза е манушескири со муло хем те наслединел лескоро имот. Акава закони исто аѓаар заштитинела сине е удовица (5. Мој. 25:5-7; Мат. 22:23-28).

Те дикха о пример е Ноеминакоро. Ој сине женими јекхе манушеа со викинела пе Елимелех. Кеда ов хем ленгере дуј чхаве муле на сине кој те грижинел пе лаке (Рут 1:1-5). Кеда и Ноемина иранѓа пе ки Јуда, ој вакерѓа пе бојраке, е Рутаке, те вакерел е Воозеске те кинел и пхув која со англедер сине ленгири. О Вооз хем о Елимелех сине паше фамилија (Рут 2:1, 19, 20; 3:1-4). Ама ов џанља кај јавер мануш сине панда попаше фамилија леа, коле со и Библија викинела ле „адава хем адава“. Адалеске, ле сине ле предност те овел откупители (Рут 3:9, 12, 13).

Ко почеток о „адава хем адава“ мангља те поможинел (Рут 4:1-4). Ов сине свесно кај ка овел ле трошакија, ама исто аѓаар џанља кај и Ноемина тани бут пхури хем ка нашти те овел ла чхаво кова со ка наслединел и пхув таро Елимелех. Аѓаар о „адава хем адава“ ка шај сине те лел и пхув хем те овел дело таро лескоро наследство. Шај мислинела песке сине кај ка овел ле корист ко материјално поглед.

Ама о „адава хем адава“ предомислинѓа пе кеда халило кај ваљани те женинел пе е Рутаја. Ов вакерѓа: „Ме нашти те откупинав ла соске аѓаар шај те уништинав мло наследство“ (Рут 4:5, 6). Соске предомислинѓа пе?

Ако о „адава хем адава“ или некој јавер женинела пе сине е Рутаја хем ој бијанела мурш, адава чхаво ка наслединел сине и пхув која со ачхили таро Елимелех. Сар акава шај сине те уништинел адале манушескоро наследство? И Библија на вакерела, ама иси некобор причине соске шај аѓаар вакерѓа или мислинѓа.

• Прво, ов ка нашавел пле паре коленцар со ка кинел сине е Елимелехескири пхув, соске ко крајо адаја пхув нане сине те овел лескири, него е чхавескири коле со ка бијанел сине и Рут.

• Дујто, ов ка ваљани сине те грижинел пе хем баши Ноемина хем баши Рут.

• Трито, ако е Рута сине ла јавера да чхаве таро „адава хем адава“ мануш, ола да ка лен дело таро лескоро наследство исто сар лескере јавера чхаве.

• Штарто, ако о „адава хем адава“ на сине ле чхаве, е Рутакере чхаве ка овел ле сине право те лел о наследство хем таро Елимелех хем лескоро наследство. Хем аѓаар кеда ка мерел, лескири пхув ка припадинел сине јекхе чхавеске кова со ка пхиравел е Елимелехескоро анав или кова со ка авел тари лескири лоза. Шај башо акала причине о „адава хем адава“ дарандило кај ка нашавел пло наследство хем на сине спремно те поможинел е Ноеминаке. Наместо адава, леске сине пошукар те мукхел адаја одговорност е следно откупителеске со авела пали лесте, о Вооз. О Вооз сине спремно те лел акаја одговорност соске мангља „о наследство е мулескоро те ачхол ки лескири фамилија“ (Рут 4:10).

Таро извештај дикхела пе кај о „адава хем адава“ сине повише секиримо баши пли фамилијарно лоза хем пло наследство. Ов сине себично. Иако о „адава хем адава“ бут трудинѓа пе те икерел пло фамилијарно анав, амен авдиве ни на џанаја сар викинела пе. Ов исто аѓаар нашавѓа и посебно предност со сине е Воозе те овел дело тари фамилијарно лоза котар со авела о Месија, о Исус Христос. Кобор тано жално со о „адава хем адава“ себично отфрлинѓа и прилика те поможинел некаске каске со ваљани помош (Мат. 1:5; Лука 3:23, 32).