1-2. Соске на ваљани те обесхрабрине тут ако панда на сиан спремно те крстине тут? (Дикх и слика тари насловно страна.)

 АКО МАНГЕА те крстине тут тегани чхивѓан туке јекх бут шужи цел. Дали сиан спремно акана те крстине тут? Ако мислинеа кај сиан спремно хем о старешине одобринена адава тегани ма аџикер, крстин тут ки следно прилика. Ако кереа адава аџикерена тут баре берекетија ки служба башо Јехова.

² А со ако вакерена туке кај ваљани панда нешто те кере англедер те крстине тут, или шај ту коркори сиан свесно башо адава? Тегани ма обесхрабрин тут. Ту шај те напредујне хем те исполнине адаја цел, бизи разлика дали сиан терно или пхуро.

3. Со пучља о етиопско службенико е Филипе, хем саво пучибе шај те пуча амен? (Дела 8:36, 38).

³ Читин Дела 8:36, 38. Јекх етиопско службенико пучља е Филипе: „Со чхинавела ман те крстинав ман?“ Акава Етиопјани мангела сине те крстинел пе, ама дали сине чаче спремно баши асавки важно одлука?

4. Сар о Етиопјани сикавѓа кај мангела те џанел нешто повише?

⁴ О Етиопјани гело ко Ерусалим те обожавинел е Девле (Дела 8:27). Значи најверојатно ов сине јекх прозелити кова со прифатинѓа и еврејско религија. Сигурно ов дознајнѓа башо Јехова таро Хебрејска света списија. Сепак мангља те дознајнел повише. Уствари, со керела сине акава  Етиопјани кеда о Филип аракхља ле? Ов читинела сине о свиток таро Исаија (Дела 8:28). Ко акава свиток сине хор библиска чачипа. Ов на сине задоволно те сикљовел само некобор основна буќа, него мангља те дознајнел нешто повише.

5. Сар о Етиопјани применинѓа адава со сиклило?

⁵ Акава етиопјани служинела сине сар важно службенико е царицаке тари Етиопија хем „сине одговорно упро цело лакоро барвалипе“ (Дела 8:27). Значи иако сине бут зафатимо хем сине ле бут одговорностија, сепак одвојнѓа време те обожавинел е Јехова. Ов на мангља само те џанел о чачипе, него постапинѓа спрема адава со џанља. Адалеске патујнѓа чак тари Етиопија џи ко Ерусалим те шај ко храми те обожавинел е Јехова. Сигурно башо акава друмо ваљанѓа леске бут време хем паре, ама кеда керела пе сине лафи башо Јехова ов сине спремно те керел са.

6-7. Сар о Етиопјани бајрарела сине пло мангипе спрема о Јехова?

⁶ О Етиопјани дознајнѓа таро Филип несаве неве важна чачипа, сар сој кај о Исус тано о Месија (Дела 8:34, 35). Адава со дознајнѓа со о Исус керѓа баши лесте сигурно бут погодинѓа ле. Со керѓа одкеда дознајнѓа адала буќа? Ов шај сине те ачхол сар со сине, јекх еврејско прозелити со о јавера поштујнена сине. Наместо адава, ов повише мангља е Јехова хем лескере Чхаве. Адава поттикнинѓа ле те анел и најважно одлука ко пло живото — те крстинел пе хем те овел следбенико е Исусескоро. О Филип дикхља кај акава мануш сине спремно, хем адалеске крстинѓа ле.

⁷ Ако џаја пало пример е Етиопјанескоро, шај те ове спремно крстибаске. Тегани ту да шај те вакере „со чхинавела ман те крстинав ман?“ Акана те дикха сар шај ту да те кере о иста буќа со керела сине о Етиопјани: Ов понадари да сикљола сине башо Јехова, постапинела сине спрема адава со сикљовела хем бајрарела сине пло мангипе спрема о Девел.

8. Спрема Јован 17:3, со ваљани те кере?

⁸ Читин Јован 17:3. Дали акала лафија е Исусескере поттикнинена тут те проучине и Библија? Буте џенен поттикнинѓе. Ама дали акала лафија поттикнинена амен понадари да те сикљова? Оја. Никогаш нане те чхинава „шукар те пенџара... е јекхе чачутне Девле“ (Проп. 3:11). Ки цели вечност ка продолжина те сикљова баши лесте. Со повише сикљоваја, добором попаше ка ова е Јеховаја (Пс. 73:28).

9. Со ваљани те кера откеда сиклилем о основна библиска чачипа?

 ⁹ Џанѓола пе, те шај те сикљова башо Јехова ваљани те почмина е едноставна буќенцар. Ко пло писмо џи ко Евреија, о апостол Павле башо едноставна сикљојба вакерѓа кај тане „основна буќа“. Ов на мангља те вакерел кај о „основна сикљојба“ нане важна, наместо адава спорединѓа лен тхудеа кова со хранинела јекхе бебе (Евр. 5:12; 6:1). Ама, исто аѓаар поттикнинѓа са е христијанен те напредујнен хем те сикљовен о похор чачипа таро е Девлескоро Лафи. Дали барили тли желба башо похор библиска чачипа? Дали мангеа понадари да те напредујне хем те сикљове башо Јехова хем баши лескири намера?

10. Соске несаве џененге тано пхаро те проучинен?

¹⁰ Сепак, буте џененге тано пхаро те проучинен. Сар тано туја? Дали ки школа сиан сине шукар ученико? Дали уживинеа сине те учине, или мислинеа кај на овела тут читибаске лила? Ако оја, тегани на сиан коркори о Јехова шај те поможинел тут. Ов тано совршено хем о Најшукар Учители со постојнела.

11. Сар о Јехова сикавела кај тано о „Најбаро Учители“?

¹¹ И Библија вакерела кај о Јехова тано амаро Најбаро Учители (Иса. 30:20, 21). Ов тано Учители кова сој стрпливо, љубезно хем хаљовела амен. Ов родела о шукар ко пле ученикија (Пс. 130:3). Никогаш на очекујнела амендар повише таро адава со шај те кера. Ма бистре, о Јехова тано адава со створинѓа и годи која сој бут чудесно (Пс. 139:14). Бијаме сием желбаја те сикљова. Амаро Створители мангела ки цели вечност те сикљова хем те уживина ко адава. Адалеске мудро тано панда акана те развина желба башо библиска чачипа (1. Пет. 2:2). Чхив туке целија со шај те исполнине лен, хем редовно читин хем проучин и Библија (Ис. Нав. 1:8). О Јехова ка поможинел тут са повише те уживине ко читибе хем ко сикљојбе баши лесте.

12. Соске ваљани те проучина е Исусескоро живото хем служба?

¹² Редовно одвојн туке време те размислине башо е Исусескоро живото хем служба. Ако мангаја те служина е Јеховаске бут тано важно ко са те џа пало е Исусескоро пример, посебно ко акала пхаре времија (1. Пет. 2:21). О Исус јасно вакерѓа пле учениконге кај ка овел лен проблемија (Лука 14:27, 28). Ама ов сине уверимо кај лескере следбеникија шај те ачховен верна, исто сар лесте (Јован 16:33). Проучин е Исусескоро живото хем чхив туке цел те џа пало лескоро пример секова диве.

13. Башо со ваљани понадари да те молине е Јехова, хем соске?

¹³ Нане доволно само те сикљова нешто, него адава со сикљоваја ваљани те поможинел амен пошукар те пенџара е Јехова хем те развина особине сар сој вера хем мангипе спрема лесте (1. Кор. 8:1-3). Џикоте продолжинеа те сикљове, молин е Јехова те дел тут побари вера (Лука 17:5). Ов спремно ка одговоринел ко асавке молитве. И чачутни вера која со темелинела пе ко точно пенџарибе е Девле ка поможинел туке те напредујне (Јак. 2:26).

14. Сар о апостол Петар истакнинѓа кобор тано важно те постапина спрема адава со сикљоваја? (Дикх хем и слика.)

¹⁴ О апостол Петар истакнинѓа кобор тано важно е Христосескере следбеникија понадари да те применинен адава со сикљовена. Ов спомнинѓа о библиско извештај  башо Ное. О Јехова вакерѓа е Ноеске кај ко адава време ка уништинел е лошна манушен потопеа. Адава со о Ное хем лескири фамилија џанле кај ка овел Потоп на сине доволно те шај те овен заштитиме. Приметин кај о Петар керѓа лафи башо време англедер о Потоп „џикоте градинела пе сине и арка“ (1. Пет. 3:20). О Ное хем лескири фамилија постапинѓе спрема адава со сиклиле таро Девел аѓаар со градинѓе и арка — јекх баро броди (Евр. 11:7). Тегани о Петар спорединѓа адава со керѓа о Ное е крстибаја, ов пишинѓа: „О крстибе, сој претставимо адалеа, акана спасинела тумен да“ (1. Пет. 3:21). Ки несави смисла адава со кереа те шај те крстине тут шај те спорединел пе адалеа со бершенцар керѓе о Ное хем лескири фамилија те градинен и арка. Со ваљани те кере те шај те спремине тут башо крстибе?

15. Со сикавела кај чаче каинаја амен?

¹⁵ Јекх таро прва буќа со мора те кера лен тано таро вило те каина амен башо амаре гревија (Дела 2:37, 38). Ако чаче каинаја амен, тегани чаче шај те кера промене. Дали чхинавѓан те кере о буќа со на мангела о Јехова сар сој те живинел пе неморално, те пушинел пе или те користинел пе вулгарна лафија? (1. Кор. 6:9, 10; 2. Кор. 7:1; Еф. 4:29). Ако панда на успејнѓан ко адава, тегани продолжин те трудине тут те кере адала промене. Кер лафи околеа со проучинела туја или роде помош хем водство таро старешине. Ако сиан терно хем живинеа тле родителенцар, роде лендар помош те шај те чхинаве е лошна навикенцар кола со шај спречинена тут те крстине тут.

16. Сој тано вклучимо ки јекх шукар духовно рутина?

¹⁶ Исто аѓаар важно тано те овел тут шукар духовно рутина. Ко адава тано вклучимо те ове присутно ко состанокија хем те учествујне ки ленде (Евр. 10:24, 25). Ако добинѓан и предност те џа ки служба, тегани кер адава редовно. Со повише ка проповедине, добором повише ка уживине ки служба (2. Тим. 4:5). Ако сиан терно хем живинеа тле родителенцар пуч тут: „Дали мле родителија мора секогаш те вакерен манге кај ваљани те џав ко состанокија или ки служба? Или ме коркори керава адава?“  Адалеа со ту коркори кереа акала буќа сикавеа кај иси тут вера ко Јехова, кај мангеа ле хем кај сиан благодарно башо буќа со денѓа тут. Акала тане поклонија со шај те да лен е Јеховаске (2. Пет. 3:11; Евр. 13:15). Кеда спремно даја бизо некој те теринел амен, адава радујнкерела е Јехова. (Споредин 2. Коринќаните 9:7.) Кераја акава соске сием радосна кеда даја амаро најшукар е Јеховаске.

17-18. Која особина ка поможинел туке те напредујне те шај те крстине тут, хем сар ка поможинел тут? (Изреки 3:3-6).

¹⁷ Џикоте напредујнеа те крстине тут ка овен тут проблемија. Несаве шај те асан туке баши тли вера хем шај чак те противинен пе туке (2. Тим. 3:12). Шај трудинеа тут те чхинаве несаве лошно навикаја, ама понекогаш переа ко искушение палем те кере адава. Или шај сиан разочаримо соске нашти те исполнине тли цел. Со ка поможинел туке те истрајне? Јекх важно особина — о мангипе спрема о Јехова.

¹⁸ Тло мангипе спрема о Јехова тани јекх бут шужи особина. Адава тано о најшукар со шај те овел тут. (Читин Изреки 3:3-6.) О баро мангипе спрема о Девел ка поможинел туке те икљове ко крајо е проблеменцар. И Библија бут пути керела лафи башо е Јеховаскоро верно мангипе спрема пле слуге. Адава со е Јехова иси ле верно мангипе значинела кај никогаш нане те мукхел пле слуген или те чхинавел те мангел лен (Пс. 100:5). Ту сиан кердо спрема е Девлескоро лико (1. Мој. 1:26). Сар шај те сикаве асавко мангипе?

19. Сар шај те бајраре тли благодарност башо адава со керѓа туке о Јехова? (Галатите 2:20).

¹⁹ Прво ов благодарно (1. Сол. 5:18). Секова диве пуч тут: „Сар о Јехова сикавѓа кај мангела ман?“ Пало адава ма бистре ки молитва те благодарине тут е Јеховаске хем спомнин конкретна буќа со керѓа туке. Дикх ко буќа со керѓа лен о Јехова таро мангипе сар нешто со керѓа туке лично, баш сар со керѓа о апостол Павле. (Читин Галатите 2:20.) Пуч тут: „Дали ме да мангава те сикавав леске кај мангава ле?“ Тло мангипе спрема о Јехова ка поможинел туке успешно те истрајне кеда иси тут искушенија хем проблемија. Адава ка поттикнинел тут те овел тут шукар духовно  рутина хем секова диве те сикаве тле Дадеске кај мангеа ле.

20. Со мора те кере те шај те де лафи е Јеховаске, хем кобор тани важно адаја одлука?

²⁰ Сар накхела о време, тло мангипе спрема о Јехова ка поттикнинел тут те вакере јекх посебно молитва — те де лафи е Јеховаске кај ка служине леске. Ма бистре, кеда ка кере акава ка овел тут јекх бут шужи надеж, шај те припадине е Јеховаске ки цели вечност. Кеда деа завет е Јеховаске, ту деа лафи кај ка служине леске хем ко шукар хем ко лошно. Акава завет дела пе само јекх пути. Акаја тани чаче сериозно одлука. Размислин башо акава: Ка ане бут одлуке ко тло живото, несаве лендар ка овен бут шукар, ама нијекх нане те овел пошукар тари адаја те де лафи е Јеховаске кај ка служине леске цело живото (Пс. 50:14). О Сатана ка мангел те шудрарел тут таро Јехова те шај те на ачхове леске верно. Никогаш ма дозволин о Сатана те побединел! (Јов 27:5). Тло мангипе спрема о Јехова ка поможинел тут те икере тло завет хем те ове са попаше тле небесно Дадеа.

21. Соске шај те вакера кај о крстибе нане крајо него само почеток?

²¹ Откеда денѓан завет е Јеховаске, кер лафи е старешиненцар таро тло собрание башо следно важно чекори со ваљани те кере. Ама никогаш ма бистре, о крстибе нане крајо него само почеток. Почеток кова со пхравела туке друмо те служине е Јеховаске ки цели вечност. Адалеске панда акана бајрар тло мангипе спрема о Јехова. Чхив туке целија со ка поможинен туке секова диве те бајраре тло мангипе спрема лесте, а о мангипе ка поттикнинел тут те крстине тут. Адава ка овел бут шужо диве. Ама о крстибе тано само почеток. Адалеске тло мангипе спрема о Јехова хем лескоро Чхаво нека бајрол ки цели вечност!