1-2. Со случинела пе бут пути кеда некој крстинела пе, хем башо со ваљани те размислина?

 ДАЛИ некогаш дикхљан сар о јавера крстинена пе? Тегани сигурно шунѓан сар гласно одговоринена ко дуј пучиба англедер те крстинен пе. Приметинѓан сар ленгири фамилија хем амала радујнена пе. Џикоте дикхеа сине сар икљона таро пани, ту сигурно шунѓан баро аплауз хем дикхљан сар ленгоро муј асала. Ко просек секова курко повише милја мануша дена лафи е Јеховаске кај ка служинен леске хем крстинена пе.

² А сар и туја? Ако размислинеа те крстине тут, тегани ту сиан нешто посебно ко акава лошно свето соске ту родеа е Јехова (Пс. 14:1, 2). Акаја статија тани туке бизи разлика дали сиан терно или пхуро, ама исто аѓаар аменге да кола со сием више крстиме соске мангаја те бајрара амари одлучност те служина е Јеховаске засекогаш. Адалеске те размислина башо трин таро бут причине соске мангаја те служина е Јеховаске.

3. Соске е Јеховаскере слуге мангена о чачипе хем и праведност? (Псалм 119:128, 163).

³ О Јехова заповединѓа пле народоске те мангел о чачипе (Зах. 8:19). О Исус поттикнинѓа пле следбеникон те роден и праведност (Мат. 5:6). Адава значинела кај ваљани те овел амен силно желба те кера адава сој исправно, шукар хем чисто англо е Девлескере јакхја. Дали мангеа о чачипе хем и праведност? Сигурно кај оја. Мрзинеа ховајбе хем са адава сој погрешно хем лошно. (Читин Псалм 119:128, 163.) Некој со ховавела имитиринела е Сатана, о владетели  акале светоскоро (Јован 8:44; 12:31). Јекх таро е Сатанаскере целија тани те каљарел е Јеховаскоро свето анав. Панда таро Еден о Сатана ширинела ховајба башо амаро Девел. Ов мангела о мануша те мислинен кај о Јехова тано себично хем кај нане искрено соске кратинела о шукарипе таро мануша (1. Мој. 3:1, 4, 5). Е Сатанаскере ховајба башо Јехова понадари да отрујнена е манушенгере мисле хем виле. Кеда о мануша биринена те на манген о чачипе, тегани о Сатана шај те влијајнел упри ленде те постапинен ко неправедно хем ко лошно начин (Рим. 1:25-31).

4. Сар сикавѓа о Јехова кај тано „о Девел е чачипаскоро“? (Дикх хем и слика.)

⁴ О Јехова тано „о Девел е чачипаскоро“ хем ов спремно сикавела о чачипе околенге со мангена ле (Пс. 31:5). Аѓаар ов ослободинела лен таро е Сатанаскере ховајба. О Јехова исто аѓаар сикавела пле слуген те овен чесна хем праведна. Акава поможинела ленге те овел лен шукар анав англо јавера хем андруно мир (Изр. 13:5, 6). Веројатно о Јехова тут да сикавѓа акала буќа џикоте проучинеа сине и Библија. Дознајнѓан кај е Јеховаскоро друмо тано корисно са е манушенге ама хем туке лично (Пс. 77:13). Адалеске мангеа те кере адава сој исправно англо е Девлескере јакхја (Мат. 6:33). Ту мангеа те бранине о чачипе хем те докажине кај адава со вакерела о Сатана башо Јехова тано погрешно. Сар шај те кере адава?

5. Сар шај те поддржине о чачипе хем и праведност?

⁵ Шај те живине аѓаар сар те пхене вакереа: „Ме отфрлинава е Сатанаскере ховајба хем поддржинава о чачипе. Ме мангава о Јехова те овел мло Владетели хем те керав адава со ов вакерела кај тано исправно“. Сар шај те кере акава? Аѓаар со ки молитва ка де лафи е Јеховаске кај ка служине леске хем пало адава јавно ка крстине тут. О мангипе башо чачипе хем и праведност ка поттикнинел тут те крстине тут.

6. Спрема Псалм 45:4, кола шукар причине иси амен те манга е Исусе?

⁶ Соске мангеа е Исусе? Дикх несаве шукар причине со аракхљона ко Псалм 45:4. (Читин.) О Исус мангела о чачипе, и понизност хем и праведност. Ако мангеа о чачипе хем и праведност логично тано те манге хем е Исусе. Ов храбро бранинѓа о  чачипе хем и правда (Јован 18:37). Ама сар о Исус сикавела амен те ова понизна?

7. Со свиџинела пе туке ки е Исусескири понизност?

⁷ О Исус пле примереа сикавѓа амен сар те ова понизна. На пример, ов секогаш дела сине и слава пле Дадеске, никогаш песке (Мар. 10:17, 18; Јован 5:19). Со мислинеа баши асавки понизност? На поттикнинела тут ли те манге е Девлескере Чхаве хем те џа пало лескоро пример? Сигурно кај оја. Соске о Исус тано понизно? Адалеске со мангела пле Даде кова сој понизно хем џала пало лескоро пример (Пс. 18:35; Евр. 1:3). На привлечинела тут ли акава ко Исус, кова со совршено сикавела е Јеховаскере особине?

8. Соске мангаја о Исус те овел амаро Цари?

⁸ Амен мангаја о Исус те овел амаро Цари соске ов тано о најшукар владетели. О Јехова лично обучинѓа пле Чхаве хем чхивѓа ле те владинел (Иса. 50:4, 5). Исто аѓаар, размислин башо самопожртвувано мангипе со сикавѓа о Исус (Јован 13:1). Сар тло Цари, о Исус целосно заслужинела тло мангипе. Ов вакерѓа кај окола со чаче мангена ле — лескере амала — сикавена пумаро мангипе аѓаар сој тане послушна ко лескере заповедија (Јован 14:15; 15:14, 15). Која бари чест иси амен те ова амала е Јеховаскере Чхавеа.

9. Сар о крстибе е христијаненгоро тано слично сар е Христосескоро?

⁹ Јекх таро е Исусескере заповедија тани лескере следбеникија те крстинен пе (Мат. 28:19, 20). Ов да керѓа адава. Ко несаве начинија лескоро крстибе разликујнела пе таро крстибе лескере следбениконгоро. (Дикх и рамка „ Сар о крстибе е Исусескоро разликујнела пе таро крстибе лескере следбениконгоро“.) А ко јавера начинија тано слично. Кеда крстинѓа пе, о Исус сикавѓа е Јеховаске кај ка керел лескири волја (Евр. 10:7). Слично, е Христосескере следбеникија крстинена пе те шај јавно те сикавен кај дена завет е Јеховаске. Ола акана концентриринена пе те керен е Јеховаскири волја, а на пумари. Хем аѓаар џана пало пример пумаре Господарескоро.

10. Соске о мангипе спрема о Исус ваљани те поттикнинел тут те крстине тут?

¹⁰ Ту прифатинѓан е Исусе сар е Јеховаскоро прво бијамо Чхаво хем сар Цари кова сој биримо таро Девел те владинел упри аменде. Ту дикхеа ко Исус сар некој со совршено хем понизно сикавела пле Дадескере особине. Дознајнѓан кај парварѓа е бокхален, утешинѓа околен сој тажна хем чак сасљарѓа е насвален (Мат. 14:14-21). Дикхљан сар водинела пло собрание авдиве (Мат. 23:10). Исто аѓаар, џанеа кај ки иднина сар Цари ко е Девлескоро Царство ка керел панда бут повише. Сар шај те сикаве кај мангеа ле? Аѓаар со ка џа пало лескоро пример (Јован 14:21). Шај те кере адава аѓаар со ка де лафи е Јеховаске кај ка служине леске хем ка крстине тут.

11. Која тани и најважно причина те крстине тут хем соске?

¹¹ Која тани и најважно причина те крстине тут? О Исус вакерѓа која тани е Девлескири најбари заповед: „Манг е Јехова, тле Девле, са тле вилеа, хем са тле душаја, хем са тле гоѓаја, хем са тле силаја“ (Мар. 12:30). Дали акала лафија опишинена тло мангипе спрема о Девел?

12. Соске ту мангеа е Јехова? (Дикх хем и слика.)

¹² Иси бут причине соске те мангел пе е Јехова. На пример, дознајнѓан кај ов тано о извор е животоскоро хем кај ов тано окова со дела секова шукар хем совршено поклон  (Пс. 36:9; Јак. 1:17). Секоја шукар бути колате со уживинеа авела таро амаро мангло Девел.

13. Соске и откупнина тани јекх скапоцено поклон?

¹³ И откупнина тани јекх скапоцено поклон со денѓа амен о Јехова. Соске шај те вакера адава? Размислин кобор сине паше о Јехова хем лескоро Чхаво. О Исус вакерѓа: „О Дад мангела ман“ хем ме „мангава е Даде“ (Јован 10:17; 14:31). Ола сине милијарде берша заедно хем уле са попаше хем попаше (Изр. 8:22, 23, 30). Адалеске шај те замислина аменге кобор бут дукхандило е Девле кеда дозволинѓа лескоро Чхаво те овел мучимо хем мудардо. О Јехова добором бут мангела са е манушен — коте со сиан вклучимо ту да — со сине спремно те дел пле мангле Чхаве сар жртва те шај тут хем е јаверен те овел тумен прилика вечно те живинен (Јован 3:16; Гал. 2:20). Акаја тани и најбари причина соске те манга е Девле.

14. Која тани и најшукар цел со шај те чхиве туке ко живото?

¹⁴ Тло мангипе спрема о Јехова барило џикоте сикљовеа сине са повише баши лесте. Сигурно мангеа те ове леа са попаше акана хем засекогаш, хем ту шај те кере адава. Ов љубезно поттикнинела тут те радујнкере лескоро вило (Изр. 23:15, 16). Адава шај те кере ле на само лафенцар, него хем  постапкенцар. О начин сар живинеа ка сикавел кај чаче мангеа е Јехова (1. Јов. 5:3). Акаја тани и најшукар цел со шај те чхиве туке ко живото.

15. Сар шај те сикаве тло мангипе спрема о Јехова?

¹⁵ Сар шај те сикаве тло мангипе спрема о Јехова? Прво, аѓаар со ки јекх посебно молитва ка де лафи е Јеховаске кај ка служине само леске (Пс. 40:8). Тегани адава со вакерѓан ки молитва ка сикаве ле јавно аѓаар со ка крстине тут. Сар со керѓем лафи ки акаја статија, о крстибе тано јекх радосно хем бут важно моменти ко тло живото. Почминеа јекх нево живото, на живинеа више туке него е Јеховаске (Рим. 14:8; 1. Пет. 4:1, 2). Акава шај те изглединел сар јекх бари одлука хем чаче тано аѓаар. Ама акаја одлука ка пхравел туке о удар башо најшукар живото. Сар?

16. Спрема Псалм 41:12, сар о Јехова ка наградинел околен со користинена пумаро живото те служинен леске?

¹⁶ О Јехова тано и најдарежливо личност. Бизи разлика кобор деа леске ов секогаш ка иранел туке бут повише (Мар. 10:29, 30). Ов ка дел тут о најинтересно, најкорисно хем најуспешно живото со постојнела, чак акана ко акава лошно свето. Тло крстибе тано само почеток таро јекх друмо хем ко адава друмо шај те служине тле мангле Дадеске засекогаш. О мангипе машкар туте хем тло Дад понадари да ка бајрол хем ка шај те живине добором кобор со ов живинела — ки цели вечност. (Читин Псалм 41:12.)

17. Со шај те де е Јеховаске?

¹⁷ Кеда деа завет е Јеховаске хем крстинеа тут иси тут и чест те де ле нешто сој бут скапоцено. Ов денѓа тут бут шукар буќа ко живото, буќа коленге со шај те радујне тут хем коленде со шај те уживине. Со шај ту те де е Јеховаске иако са со постојнела тано лескоро? Шај те де ле нешто со панда нане ле, тли спремност верно те служине леске (Јов 1:8; 41:11; Изр. 27:11). Акава тано о најшукар начин сар шај те користине тло живото. Чаче, тло мангипе спрема о Јехова тани и најшукар причина соске те крстине тут.

18. Кола пучиба шај те пуче тут?

¹⁸ Дали ка крстине тут? Само ту шај те одговорине ко акава пучибе. Ако на сиан сигурно шај те пуче тут: „Соске аџикерава?“ (Дела 8:36). Сетин тут ко трин причине баши коленде со керѓем лафи. Прво, мангеа о чачипе хем и праведност. Дујто, мангеа е Исус Христосе. Трито хем најважно, мангеа е Јехова. Адалеске пуч тут: „Дали едвај аџикерава о диве кеда сарине ка вакерен о чачипе хем ка керен адава сој исправно? Дали мангава е Девлескоро Чхаво те овел мло Цари хем те џав пало лескоро пример? Дали мангава те радујнкерав е Јехова аѓаар со ка служинав леске?“ Ако тле одговорија ко акала пучиба тане оја, тегани соске те на крстине тут? Соске аџикереа? (Дела 16:33).

19. Соске шај те ове сигурно кај ваљани те крстине тут? Вакер пример (Јован 4:34).

¹⁹ Ако на сиан сигурно дали те крстине тут размислин баши јекх споредба со вакерѓа ла о Исус. (Читин Јован 4:34.) Приметин кај о Исус спорединѓа о керибе пле Дадескири волја хајбаја. Соске? О хајбе тано башо амаро шукарипе. О Исус џанља кај са со родела амендар о Јехова тано башо амаро шукарипе. О Јехова на мангела те кера нешто со ка керел аменге штета. Ама дали мангела те крстине тут? Оја (Дела 2:38). Адалеске шај те ове сигурно кај ако сиан послушно ки заповед те крстине тут адава ка овел тле шукарипаске. Исто сар со сиан сигурно кај ка уживине ко тло омилено хајбе, аѓаар шај те ове сигурно кај ваљани те крстине тут.

20. Со ка дикха ки следно статија?

²⁰ Соске несаве панда на крстинена пе? Бут џене шај ка одговоринен: „На сиум спремно“. Точно тано кај те де лафи е Јеховаске хем те крстине тут тани и најважно одлука со ка ане ла ко живото. Адалеске, ваљани шукар те размислине хем ваљани туке време хем трудо те шај те крстине тут. Ама ако искрено мангеа те кере адава, тегани сар шај панда акана те спремине тут? О одговор башо акава пучибе ка дикха ки следно статија.