Амен користинаја мудро амари сила кеда чхиваја аменге духовна целија те шај те кера нешто повише е Јеховаске (1Ко 9:26). О целија ка поможинен аменге те шај те користина најшукар со шај амаро време ко акала последна диве (Еф 5:15, 16). Џикоте икерена тумари фамилијарно рат, соске на пробинена те чхивен туменге целија башо нево службено берш? Ко акава број таро листија спремибаске иси некобор статие со ка поможинен тут те размислине башо несаве целија хем те молине тут (Јк 1:5).

На пример, ако сарине сар фамилија соработинена, шај те поможинен барем јекхеске таро тумаро кхер те овел пионери. Ако сумнинеа тут кај башо тле околностија нашти те исполнине о саатија со родена пе тутар, кер лафи несаве пионеренцар со аракхљовена ки слично ситуација сар тли (Из 15:22). Шај те канинен јекхе пионере ки тумари фамилијарно рат хем те пучен ле сар успејнела ов те керел пли служба. Пало адава кер туке распоред. Ако служинѓан англедер сар пионери размислин дали тле околностија дозволинена туке палем те служине.

Дали шај некој тари тли фамилија те служинел сар помошно пионери јекх масек или повише? Ако иси тут проблемија састипаја шај те ове помошно пионери аѓаар со ка џа ки служба секова диве похари време. А ако нане тут бут време адалеске со кереа бути цело работно време или џаја ки школа, шај те бирине масек коте со иси празникија или иси ле панџ викендија. Ко календари пишин кеда мангеа те служине сар помошно пионери, хем кер туке распоред (Из 21:5).

ДИКХ О КЛИПИ ОВ ХРАБРО... ПИОНЕРИ, ХЕМ ПАЛО АДАВА ОДГОВОРИН КО АКАВА ПУЧИБЕ:

• Сар е Емакоро искуство сикавела аменге кобор о Јехова мангипаја грижинела пе околенге со керена жртве те овен пионерија?