О слике хем о видеоклипија лена о внимание е манушенгоро хем поможинена ленге те хаљовен хем те памтинен о поуке. Амаро Најбаро Учители, о Јехова, користинѓа буќа со шај те дикхен пе те шај те дел важна поуке е јаверенге (1Мо 15:5; Ере 18:1-6). А исто акава керѓа амаро Баро Учители, о Исус (Мт 18:2-6; 22:19-21). Ко берша со накхле, о видеоклипија сикавѓе пе сар бут успешна. Дали користинеа лен џикоте сикавеа е интересентен?

Спремиме сине 10 видеоклипија те шај пошукар те сикава е манушен е брошураја Шукар хабери таро Девел! О наслов скоро таро секова клипи тано исто сар јекх таро пучиба ки лекција, сој тано пишимо покале буквенцар. Ко електронско издание тари акаја брошура иси линкија кола со поможинена аменге те на бистра те мукха о видеоклипи. Освен адава, иси јавера да видеоклипија кола со шај те користина лен кеда сикаваја е интересентен несаве публикацијаја таро главна публикацие службаке.

Шај тле интересентеа проучинеа несави библиско тема со нане локхе те хаљовел ла. Или, шај иси ле несаво проблеми. Те шај те поможине леске, роде несаво видеоклипи ко jw.org® или ко JW Broadcasting®. Шај заедно те дикхен ле, а пало адава те дискутиринен баши лесте.

Секова масек икљона неве клипија. Џикоте дикхеа лен, размислин ко кола прилике шај те користине лен кеда сикавеа е интересентен.