Авдиве случинена пе са повише хем повише природна катастрофе. Кеда случинена пе асавке катастрофе, и помош со дела пе ваљани те овел шукар организирими хем ваљани те овел шукар соработка. Тари адаја причина, о Водечко тело одлучинѓа ки секоја подружница те овел јекх Одделение баши помош ко катастрофе.

Кеда о пхраља таро адава одделение шунена кај случинѓа пе несави катастрофа, ола одма контактиринена е старешинен таро адава тхан те дознајнен сави помош ваљани е објавителенге. Ако и штета тани бари хем о пхраља коте со случинѓа пе и катастрофа нашти те икљовен ко крајо коркори, тегани и подружница ка биринел несаве пхрален те организиринен те поможинел пе ленге. Ола ка роден доброволција те поможинен лен, или ка организиринен те кхеден пе о потребна материјалија. А ако ваљани ка џан коркори те кинен хем те анен са сој потребно.

Ако керена пе о буќа ко асавко начин, иси бут предностија. Спротивно таро адава, ако о пхраља керена нешто ки пли иницијатива, шај те случинел пе те овел недоразбирање, дупло бути, те нашавел пе време, трудо хем материјалија.

О пхраља сој тане бириме тари подружница ка одлучинен кобор паре хем кобор доброволција тане потребна те шај те поможинел пе ко тхан коте со сине и катастрофа. Исто аѓаар, шај о пхраља те роден помош тари локално власт те шај посигате хем ко поефикасно начин те поможинел пе. Адалеске, некој коркори пестар на ваљани те организиринел те кхедел паре, те бичхалел хајбе, или јавера буќа или палем те џал ко тхан коте со сине и катастрофа, а бизо те овел викимо.

Ама акава на значинела кај нашти поможинаја. Амен мангаја амаре пхрален хем пхењен хем адалеске кеда иси природна катастрофе, мангаја те поможина (Ев 13:16). Со шај те кера? Јекх таро најважна буќа со шај те кера тано те молина амен околенге со сине погодиме тари катастрофа хем околенге со поможинена лен. Исто аѓаар, шај те да доброволна прилогија башо меѓународно дело. Преку о Водечко тело, секоја подружница шај те дикхел коте најшукар шај те користинен пе о прилогија. Ако мангеа ту да те поможине, шај те пхере и Молба за локален доброволец за изградба (DC-50). Аѓаар о пхраља ка џанен кај сиан спремно те поможине лично.

ДИКХ О КЛИПИ БАРЕ ПОПЛАВЕ КО БРАЗИЛ, А ПАЛО АДАВА ОДГОВОРИН КО АКАВА ПУЧИБЕ:

Со мукхља туке впечаток баши помош со денѓе е Јеховаскере сведокија пали поплава ко Бразил ко 2020 берш?