Панда хари о Јехова ка анел крајо акале светоске. И ховавни религија ка овел уништими, јекх коалиција таро народија ка нападинел е Девлескере народо хем о Јехова ка уништинел е лошна манушен ко Армагедон. Амен едвај аџикераја те случинен пе акала важна настанија.

Џанѓола пе, амен на џанаја са о деталија баши бари неволја. На пример, на џанаја кеда точно ка почминел. На џанаја кола причине ка вакерен о политичка силе те шај те оправдинен пе кеда ка нападинен и религија. На џанаја кобор ка трајнел о напад упро е Девлескоро народо хем со ка овел вклучимо ки лесте. Исто аѓаар, на џанаја со точно ка користинел о Јехова те шај те уништинел е лошна манушен ко Армагедон.

Сепак, и Библија дела амен са о информацие со ваљани аменге те шај те овел амен доверба хем храброст. На пример, џанаја кај живинаја ко крајо таро „последна диве“ (2Ти 3:1). Џанаја кај о напад упри религија ка овел „кратимо“ те шај те на овел уништими и чачутни религија (Мт 24:22). Џанаја кај о Јехова ка спасинел пле народо (2Пе 2:9). Хем џанаја кај о Јехова биринѓа јекхе сој тано праведно хем моќно со ка уништинел е лошна манушен, а ка спасинел јекхе баре мноштво ко Армагедон (От 19:11, 15, 16).

О настанија со ка авен сигурно бут ка даравен е манушен. Ама, адава со ка читина хем ка размислина сар о Јехова спасинѓа пле народо ко пурано време хем сар откринѓа ленге со ка овел ки иднина, ка поможинел аменге те овел амен доверба кај амаро спасение тано паше (Лк 21:26, 28).