Читин со уло е Каринаке хем размислин со би кереа сине ту те ове сине лаке ко тхан.

 Карина: Џикоте возинава сине те џав ки школа, јекх полицајцо ачхавѓа ман хем пишинѓа манге казна соске возинава сине бут сигате. Бут сиум сине хољами! Пхенѓум ме дајаке хем ој вакерѓа манге те керав лафи ме дадеа. А адава на мангљум ни најхари те керав.

  Со би кереа сине ту?

1.  А: Ка керав ман сар те пхене ништо на уло хем ка надинав ман кај мо дад никогаш нане те дознајнел адава.

2.  Б: Ка вакерав са ме дадеске.

 Шај ка ове ко искушение те бирине и опција А. Шај ти дај мислинела песке кај ту више вакерѓан те дадеске хем адалеске ој нане те вакерел леске ништо. Ама, иси шукар причине соске те признајне тле грешке, бизи разлика дали добинѓан казна со возинѓан сигате или керѓан нешто јавер.

1.  1. Адалеске со адава тано исправно те керел пе. О христијања ваљани те живинен спрема акала лафија тари Библија: „Мангаја ко са о буќа те ова поштена“ (Евреите 13:18).

    „Трудинѓум ман бут те овав искрено, те пхиравав о последице таро мле постапке хем те признајнав мли грешка одма“ (Алексис).

2.  2. Адалеске со о јавера ка овен поспремна те простинен околенге со признајнена пумаре грешке. Ки Библија пишинела: „Кој гаравела пле гревија нане те овел ле успех, а окова со признајнела лен хем на керела лен више, ка сикавел пе леске милост“ (Изреки 28:13).

    „Ваљани храброст те признајнел пе јекх грешка, ама аѓаар о јавера ка овел лен доверба ки туте. Аѓаар ола ка дикхен кај сиан искрено. Кој признајнела пли грешка, екваш простинела пе леске“ (Ричард).

3.  3. Сој најважно, адалеа кераја е Јехова бахтало. Ки Библија пишинела: „Е Јеховаске тане одвратна о нечесна мануша, а паше тано околенцар сој тане праведна“ (Изреки 3:32).

    „Откеда керѓум јекх сериозно грешка, халиљум кај, ваљани те признајнав ла, соске само аѓаар о Јехова ка наградинел ман“ (Рејчел).

 Со керѓа и Карина? Ој мангља те гаравел и казна таро пло дад. Ама адава нашти сине те гаравел ле вечно. Ој вакерела: „Пало јекх берш, џикоте мо дад дикхела сине о документија башо осигурување, аракхља и казна со добинѓум. Адалеа керѓум манге панда побаре проблемија — чак ми дај хољанѓа со на керѓум адава со вакерѓа манге!“

 Со сикљоваја таро акава: И Карина вакерела: „Кеда гаравеа тле грешке, кереја туке побаре проблемија. Кога-тогаш, ка овен тут последице таро адава!“

 Секова мануш керела грешке (Римјаните 3:23; 1. Јованово 1:8). Исто аѓаар сар со дикхлем, ако одма признајнаја амаре грешке, сикаваја кај сием зрела хем понизна мануша.

 Јавер бути со ваљани те кере тани те сикљове таро тле грешке. Жално тано адава, со бут терне на керена адава. Ола шај осетинена пе исто сар јекх тинејџерка, и Присила, која со вакерела: „Поангле сине манге бут пхаро кеда керава сине несаве грешке. Адалеске со сине ман лошно мислење баши манде, секоја мли грешка дикхјола пе сине манге сар пхаро товари кова со нашти те пхиравав ле. Осетинава ман сине бут разочарими хем мислинава сине кај манге нане нисави надеж“.

 Дали ту да осетинеа тут некогаш аѓаар? Ако оја, ма бистре акава: Ако стално размислинеа башо тле грешке со керѓан лен, адава тано исто сар те возине врда хем цело време те дикхе ко ретровизор. Ако концентриринеа тут ко адава со уло поангле, ка осетине тут кај на врединеа хем нане те овел тут сила те икљове ко крајо е предизвиконцар со ка овен.

 Наместо адава трудин тут те дикхе урамнотежено ко тле грешке.

 „Сетин тут ко тле грешке, сикљов лендар те шај те на кере лен палем. Ама ма те вртинен пе туке ки годи цело време те шај те на разочарине тут“ (Елиот).

 „Трудинава ман тари секоја мли грешка те сикљовав сар те овав пошукар личност хем сар те постапинав ако палем аракхљовава ки слично ситуација. Адава ка поможинел ман те овав позрело“ (Вера).