Различна интересија, различна навике, различна карактерија — са адава шај те овел причина башо несогласувања машкар о брачна партнерија. Ама несаве буќа, сар акала сој потеле пишиме, шај те овен панда побаро предизвик:

•   Кобор време накхавена пле фамилијаја

•   Сар трошинена о паре

•   Дали те овел лен чхаве или на

 Со ако ту хем тло брачно партнери иси тумен различно мислење башо нешто?

•  Со ваљани те џане

•  Со шај те кере

 На постојнена дуј иста личностија. Чак ко брачна партнерија кола со бут пути дикхена слично ко буќа појавинена пе разлике, хем адава башо буќа кола сој бут важна.

 „Бариљум ки фамилија коте со сарине сине бут паше. Ко викендија џаја сине ко гости ки ми баба хем ко мо папо, ко ме какија хем тетке хем ко ме братучедија. Ама ме ромеске ки фамилија на сине баш аѓаар. Адалеске на сине амен исто стави баши адава кобор време те посветина амаре родителенге хем кобор често те шуна амен амаре фамилијаја која со живинела подур амендар.“ (Тамара)

 „Ме хем ми ромни сине амен различна ставија баши адава сар те трошинен пе о паре. Баш башо адава, панда ко прва некобор масекија таро амаро брако, почминѓем те акоша амен. Ваљани сине аменге повише време хем повише дискусие те шај те решина о проблемија.“ (Тајлер)

 Несаве проблемија нане лен едноставно решение. На пример, со ако некој таро тумаре родителија насвалило хем ваљани те грижинен тумен леске? Или, со ако јекх таро брачно партнери мангела чхаве, а о јавер на? *

 „Ме ромњаја некобор пути бешлем хем керѓем лафи баши адава дали те овел амен чхаве. Ој са повише мангела те овел амен чхаве, хем са повише разликујнела пе амаро стави баши акаја тема. На дикхава сар шај те согласина амен баши акаја тема.“ (Алекс)

 Иако дикхена различно ко буќа сепак шај те согласинен тумен. Несаве брачна советникија вакерена кај, ако ту хем тло брачно партнери дикхена различно ки несави важно бути, ваљани те керен са те шај те добинен адава со мангена, ако ваљани чак те развединен тумен. Ама нане ли акава „решение“ себично? На денѓан ли завет англо Девел кај ка ове узо тло брачно партнери бизи разлика со ка овел?

 Ов одлучно те икере тут ко тло брачно завет. Ако о солдуј џене размислинена башо тумаро брачно завет, о проблемија ка решинен лен сар тими, а на сар противникија.

 Библиско начело: „О Девел со пханља те овел јекх, о мануш ма те одвојнел“ (Матеј 19:6).

 Рачунин о трошако. На пример, јекх брачно партнери мангела чхаве, а о јавер на. Ко акава случај ваљани те ла ко предвид повише буќа сар, на пример:

•   Кобор тано цврсто тумаро брако.

   Дали ка шај те икљовен ко крајо додатно стресеа адалеске со ваљани те грижине тут башо нево члени ки фамилија?

•   И одговорност те ове родители.

   Ко акава тано вклучимо повише него само те анен хајбаске урајбаске хем те овел тумен тхан живибаске.

•   Тумари финансиско состојба.

   Ка шај ли те овел тумен рамнотежа машкар и бути, и фамилија хем о јавера обврске?

 Библиско начело: „Кој тумендар, кеда мангела те керел кула, нане прво те бешел те рачунинел о трошако?“ (Лука 14:28)

 Ле ко предвид повише фактија. Ко адава начин шај ка решинен пе несаве аспектија таро проблеми. На пример, ако иси тумен проблеми башо адава дали те овел тумен чхаве, о брачно партнери сој тано против адава, шај те пучел пе:

•   „Кеда вакерава кај на мангава те овен амен чхаве, дали никогаш на мангава те овен амен чхаве или само ко моменти?“

•   „Дали на мангава те овен ман чхаве соске мислинава кај нашти те овав шукар родители?“

•   „Дали дарава кај мло брачно партнери нане те сикавел манге доволно внимание?“

 Тари јавер страна, о брачно партнери со мангела чхаве, шај те пучел пе:

•   „Дали сием спремна башо одговорностија со иси јекхе родителе?“

•   „Дали ка шај те грижина амен башо трошакија?“

 Библиско начело: „И мудрост со авела упралдан тани... разумно“ (Јаков 3:17).

 Трудин тут те аракхе нешто позитивно ко адава сар тло брачно партнери дикхела ко буќа. Замислин туке кај дуј џене дикхена исто пејсажи. Дали о солдуј џене ка приметинен о иста буќа? На. Слично аѓаар, ко јекх исто проблеми, о брачна парија шај те дикхен ко различно начин — на пример башо адава сар те трошинен пе о паре. Англедер те почминен те керен лафи баши несави бути со на сложинена тумен, најангле трудин тумен те керен лафи башо кола аспектија тари адаја бути сложинена тумен.

•   Кола тане тумаре заедничка целија?

•   Шај ли те аракхе нешто позитивно ко адава сар дикхела ко буќа тло брачно партнери?

•   Шај ли јекх тумендар или о солдуј те попуштинен ко несаве буќа те шај те керен позорало тумаро брако?

 Библиско начело: „Никој те на родел пли корист, него и корист е јаверескири“ (1. Коринќаните 10:24).