Тло брачно партнери вакерела или керела нешто со бут хољанкерела тут. Иако трудинеа тут те гараве и холи, ов осетинела кај нешто нане ко редо хем почминела те испитинел тут. Адава панда повише хољанкерела тут. Сар те контролирине тли холи ко асавке ситуацие?

•  Со ваљани те џане

•  Со шај те кере

•   Ако сикавеа холи адава шај те уништинел тло састипе. О истражувања сикавена кај ако на контролиринела пе и холи, тегани шај те бајрол о ризик те овел тут учо притисок, насвалипе ко срце, депресија хем дигестивна проблемија. И холи исто аѓаар шај те керел те на сове, те ове претерано секиримо, те овен тут проблемија ки кожа хем те анел џи ко мозочен удар. И Библија иси ла шукар причине кеда вакерела: „Ма нервирин тут соске адава анела само лошнипе“ (Псалм 37:8).

•   Ако икереа и холи ки туте, адава исто аѓаар шај те овел штетно. И холи со кхедела ла некој ки песте шај те личинел сар јекх насвалипе со хала андрал. На пример, асавке мануша шај те овен цинична хем секогаш те критикујнен. Асавке манушенцар тано пхаро те живинел пе хем адава шај лошно те влијајнел ко брако.

•   Размислин башо шукар особине со иси тле брачно партнере. Бројн трин особине со ценинеа ко тло брачно партнери. Јавер пути кеда ка хољане тле брачно партнереске сетин тут ко акала особине. Адава шај те поможинел туке те контролирине тли холи.

   Библиско начело: „Овен благодарна!“ (Колошаните 3:15).

•    Овен спремна те простинен. Прво, трудин тут те хаљове сар дикхела тло брачно партнери ко буќа. Адава ка поможинел туке те ове сочувствително (1. Петрово 3:8). Пало адава пуч тут: „Дали иси ман добором бари причина те хољанав со нашти те простинав?“

   Библиско начело: „О хаљојбе чхинавела и холи е манушескири, хем ка анел леске чест ако накхела преку е јаверескири грешка“ (Изреки 19:11).

•    Ов љубезно хем тактично кеда вакереа сар осетинеа тут. Вакер сар ту осетинеа тут. На пример, наместо те вакере: „Чаче на сиан обѕирно. Ваљанѓан те јавине тут манге хем те вакере кај сиан“. Пошукар ка овел те вакере: „Секиринѓум ман соске сине касно хем на џанљум дали са и шукар“. Ако башо тле чувствија кереа лафи ко љубезно начин, адава ка поможинел туке те контролирине тли холи.

   Библиско начело: „Тумаро лафи секогаш те овел љубезно“ (Колошаните 4:6).

•    Шун шукар. Откеда ту ка вакере сар осетинеа тут, аџикер тло брачно партнери да те вакерел со мислинела. Ма чхинав ле. Кеда ка завршинел, повторин адава со вакерѓа те шај те дикхе дали шукар халиљан ле. Адава со шукар ка шуне ле ка поможинел туке те контролирине тли холи.

   Библиско начело: „Секова мануш ваљани те овел спремно те шунел, а похари те керел лафи, хем сигате те на хољанел“ (Јаков 1:19).