Оја, шај. О Девел грижинела пе пле слугенге кеда тане насвале. Башо јекх верно слуга е Девлескоро ки Библија пишинела: „О Јехова нане те бистрел ле џикоте тано насвало ко кревети“ (Псалм 41:3). Ако ту да сиан хронично насвало, акала трин буќа шај те поможинен тут те икљове ко крајо адалеа:

1.   Молин тут баши сила те издржине. Адава ка поможинел туке те добине „о мир таро Девел, кова сој упредер секоја мисла“ (Филипјаните 4:6, 7). Аѓаар нане те ове превише секиримо хем ка овел тут сила те издржине.

2.   Ов позитивно. И Библија вакерела: „О радосно вило тано шукар иљачи, а о пхаго вило лела и сила е манушескири“ (Изреки 17:22). Трудин тут те шалине тут соске о асајбе ка поможинел туке полокхе те накхаве о пхаре моментија, а исто аѓаар шај те влијајнел позитивно ко тло састипе.

3.   Дикх позитивно ки иднина. И сигурно надеж баши иднина ка поможинел туке те ове бахтало иако сиан хронично насвало (Римјаните 12:12). И Библија вакерела кај ка авел време кеда „нијекх со живинела ки пхув нане те вакерел: ’Насвало сиум‘“ (Исаија 33:24). Тегани о Девел ка сасљарел са околен сој хронично насвале — нешто со и авдисутни медицина нашти те керел. На пример, ки Библија пишинела кај о пхуре мануша палем ка овен терне хем састе. Ој вакерела: „Лескоро тело нека овел посвежо него ко тернипе, нека иранел пе ко диве тари пли терникани сила“ (Јов 33:25).

 Забелешка: Иако џанена кај о Девел поможинела ко разна начинија, сепак е Јеховаскере сведокија родена медицинско помош кеда керела пе лафи башо хронично насвалипе (Марко 2:17). Ама амен на препорачинаја несаво посебно третмани, него секој лично ваљани те одлучинел сар ка лечинел пе.