И војна конечно завршинѓа, ки долина Ила сине тишина. Џикоте палоручко пхудела сине и балвал ко логорска шаторија, о цари о Саул керела сине лафи несаве пле манушенцар. Јекх лендар сине лескоро најбаро чхаво, о Јонатан. Ленцар сине јекх терно пастири да кова со возбудимо вакерела сине со случинѓа пе леске. Акава терно чхаво сине о Давид, ов сине пхердо ревност хем сине воодушевимо џикоте керела сине лафи. О Саул шунела сине внимателно секова лескоро лафи. А сар осетинела пе сине о Јонатан џикоте шунела сине са адава? Ов ко пло живото побединѓа ко бут војне џикоте служинела сине ки војска е Јеховаскири. Ама, ки авдисутни војна на побединѓа о Јонатан, него акава терно чхаво. О Давид мударѓа е џине, е Голијате. Дали о Јонатан сине љубоморно баши слава со добинѓа ла о Давид?

 Шај ка изненадинел тут и реакција е Јонатанескири. Ки Библија пишинела: „Кеда о Давид завршинѓа о разговор е Саулеа, о Јонатан хем о Давид уле бут паше амала, о Јонатан мангља ле сар коркори песте.“ О Јонатан денѓа е Давидеске пли воено опрема, ки која сине вклучими хем лескоро лако. Адава сине посебно поклон соске о Јонатан бут сине шукар стрелцо. Ама адава на сине са. О Јонатан хем о Давид керѓе сојуз, или денѓе лафи кај ка овен паше амала кола со ка поможинен јекх јекхеске (1. Самоилова 18:1-5).

 Аѓаар почминѓа јекх таро најбаре амалипа сој спомниме ки Библија. Е Девлескере верна слугенге бут тано важно о амалипе. Ако мудро биринаја аменге амала, ако сием ленге верна хем ако поможинаја лен, ка бајрара амари вера ко акала пхаре диве (Изреки 27:17). Те дикха со шај те сикљова таро Јонатан башо амалипе.

 Сар шај сине добором сигате те бијанѓовел асавко амалипе? Те шај те џана о одговор те дикха ко со темелинѓа пе акава амалипе. О Јонатан накхела сине таро пхаро периоди. О дад лескоро, о Саул, бут менинѓа пе ко берша со накхле, хем адава таро лошно ко полошно. Ко почеток, о Саул сине понизно, послушно хем верно мануш, ама сар со накхела сине о време ов уло гордо хем непослушно цари (1. Самоилова 15:17-19, 26).

 Е Јонатанеске сигурно сине бут пхаро кеда дикхела сине пе даде кобор сине менимо, соске сине леа бут паше (1. Самоилова 20:2). Ов шај пучела пе сине сави штета би анела сине о Саул е Девлескере народоске. Дали о народо ка шунел сине акале непослушно царе хем ко крајо ка нашавел сине е Девлескири милост? Сигурно, адала сине пхаре диве јекхе Девлескере слугаске, сар сој о Јонатан.

 Акава шај те поможинел аменге те хаљова соске о Јонатан мангља е Давиде. О Јонатан дикхља кобор бари вера сине е Давиде. На пример, о Давид на дарандило таро џини, о Голијат, ама е Саулескере војникија дарандиле. О Давид џанела сине кај тано посилно таро Голијат хем таро лескоро оружје соске боринела пе сине ко анав е Јеховаскоро (1. Самоилова 17:45-47).

 Англедер несаве берша, о Јонатан размислинѓа ко слично начин. Сине уверимо кај само дуј мануша — ов хем лескоро слуга — шај те нападинен хем те побединен бари група војникија. Соске сине уверимо ко адава? О Јонатан вакерѓа: „Ништо нашти те чхинавел е Јехова те спасинел“ (1. Самоилова 14:6). Значи е Јонатане хем е Давиде сине лен дуј важна заедничка буќа — е солдујен сине лен бари вера ко Јехова хем баро мангипе спрема лесте. Акава сине најшукар темели башо амалипе машкар акала дуј мануша. О Јонатан сине моќно принцо хем сине ле околу 50 берш, а о Давид сине понизно пастири хем веројатно панда на сине ле ни 20 берш. Ама, и разлика ко берша машкар ленде на сине важно. *

 О сојуз со керѓе ле машкар песте сигурно сине бари заштита башо ленгоро амалипе. Ки која смисла? О Давид џанља сави намера иси е Јехова леа — ов ваљани сине те овел цари ко Израел! Дали адава гаравела сине таро Јонатан? Сигурно на. Ола сине паше амала. Те шај јекх амалипе те овел цврсто хем трајно, ваљани те овел искрено комуникација, бизо тајне хем ховајбе. Сар влијајнѓа упро Јонатан адава со џанља кај о Давид ка овел цари? Дали о Јонатан шај надинела пе сине кај јекх диве ов ка овел цари хем кај ка испрајнел са о лошна буќа со керѓа лен лескоро дад? И Библија на вакерела аменге кај ов мучинела пе сине несаве негативна чувствонцар. Ама, вакерела аменге нешто сој тано бут важно — кај о Јонатан сине верно амал хем кај сине ле бари вера. Ов шај сине те дикхел кај е Јеховаскоро духо поддржинела сине е Давиде (1. Самоилова 16:1, 11-13). Адалеске о Јонатан икерела пе сине ко адава со ветинѓа хем понадари да е Давиде дикхела ле сине сар пло амал, а на сар конкуренција. Најважно сине леске те керел пе е Девлескири волја.

 Акава амалипе сине бари награда солдујенге. Со шај те сикљова тари е Јонатанескири вера? Шукар тано секој амендар те размислинел кобор врединена о амалипа. Амаре амален на ваљани те овен лен иста берша сар амаре или те овел лен исто потекло. Ама, важно тано те овел лен зорали вера соске адава позитивно ка влијајнел упри аменде. Е Јонатане хем е Давиде сине лен бут прилике те керен јекх јекхескири вера позорали хем те охрабринен пе машкар песте. Адава ваљани сине е солдујенге соске покасно ленгоро амалипе сине чхивдо ко побаро испит.

 Ко почеток, о Саул бут мангела сине е Давиде хем чхивѓа ле те овел заповеднико лескере војскаке. Пало кратко време, о Саул почминѓа те овел ле јекх лошно особина — и љубомора. Ама, о Јонатан на мукхља ки лесте те бајрол акаја лошно особина. О Давид побединѓа бут пути ко војне против о Филистејција, кола со сине душмања е Израелцонгере. Адалеске, о мануша славинена ле сине хем дена леске сине чест. Несаве џувља таро Израел чак гиљавѓе леске: „О Саул мударѓа милја, а о Давид деш милје пле душманен“. Е Саулеске на свиџинѓа пе адаја гили. Ки Библија пишинела: „Таро адава диве е Сауле на сине ле доверба ко Давид“ (1. Самоилова 18:7, 9). Ов дарандило кај о Давид ка лел лескири царско власт. Ама, адава на сине ле нисави смисла! Иако о Давид џанела сине кај ка наслединел е Сауле, ов никогаш на мислинѓа те лел о престол таро е Јеховаскоро помазимо цари са џикоте ов панда владинела.

 О Саул планиринѓа ки јекх војна те овел мудардо о Давид, ама адава на успејнѓа леске. О Давид понадари да побединела сине ко војне хем о мануша бут мангена ле сине. Пало адава, о Саул вакерѓа пле слугенге хем пле најбаре чхавеске кај иси ле намера те мударел е Давиде, хем надинела пе сине кај ола ка поможинен леске. Замислин туке кобор сине разочаримо о Јонатан кеда шунѓа адава таро пло дад! (1. Самоилова 18:25-30; 19:1). О Јонатан сине верно пле дадеске, ама сине верно пле амалеске да. Ама, ки акаја ситуација ваљани сине те биринел каске ка овел верно. Тари која страна ка овел о Јонатан?

 О Јонатан вакерѓа: „О цари ма те грешинел спрема пло слуга о Давид, соске ов на грешинѓа спрема туте, хем адава со керѓа сине башо тло шукарипе. Пло живото чхивѓа ки опасност хем мударѓа е Филистејцо, хем аѓаар о Јехова анѓа победа башо цело Израел. Ту дикхљан адава хем бут бахтало сиан сине. Тегани соске те грешине спрема невино рат хем те мударе е Давиде бизи причина?“ Акаја сине ретко прилика ки која о Саул сикавѓа кај тано разумно. Шунѓа пле чхаве, па чак денѓа совли кај нане те керел штета е Давидеске. Ама о Саул на икерела пе сине ко пло лафи. Сар со овела сине о Давид са поуспешно ко војне, ов панда повише сине леске љубоморно хем чак фрдинѓа леске копје те шај те мударел ле (1. Самоилова 19:4-6, 9, 10). Ама, о Давид спасинѓа пе хем нашља тари царско палата.

 Дали ту да некогаш аракхљан тут ки асавки ситуација те бирине каске ка ове верно? Адава шај те овел бут пхаро. Ко асавке ситуацие, несаве шај те вакерен туке кај и фамилија ваљани те овел туке најважно. Ама, о Јонатан џанља кај адава нане исправно. Сар шај те овел ки страна пле дадескири кеда о Давид сине верно хем послушно слуга е Јеховаскоро? Адалеске со сине решимо те ачхол верно е Јеховаске, о Јонатан одлучинѓа те ачхол тари страна е Давидескири. Сепак, иако сине првенствено верно е Девлеске, о Јонатан сикавѓа кај тано верно пле дадеске да аѓаар со денѓа ле искрено совет наместо те вакерел леске адава со ов би мангела те шунел. Аменге да ка користинел адава со ка ова верна сар о Јонатан.

 О Јонатан палем трудинѓа пе те поможинел е Саулеске те смиринел пе е Давидеа, ама акава пути о Саул на мангља ни те шунел ле. О Давид гаравиндор гело ко Јонатан хем вакерѓа леске кај дарала башо пло живото. Ов вакерѓа пле попхуре амалеске: „Само јекх чекори делинела ман таро мерибе“. О Јонатан вакерѓа леске кај ка трудинел пе те дознајнел со планиринела лескоро дад хем кај ка вакерел леске сар тани и ситуација. Џикоте о Давид гаравела пе сине, о Јонатан ваљани сине те бичхалел леске порака аѓаар со ка користинел лако хем стреле. Ов родинѓа таро Давид те исполнинел леске само акаја молба: „Никогаш ма чхинав тли милост спрема мли фамилија. Чак ни кеда о Јехова ка уништинел тари пхув са е Давидескере душманен“. О Давид денѓа лафи кај секогаш ка грижинел пе лескере фамилијаке (1. Самоилова 20:3, 13-27).

 О Јонатан почминѓа те вакерел е Саулеске шукар буќа башо Давид, ама ов бут хољанѓа! Вакерѓа леске кај о Јонатан тано бунтовнико хем кај адалеа сој тано верно е Давидеске анела лаџ пле фамилијаке. Трудинѓа пе те теринел е Јонатане те мислинел баши пли иднина, адалеске вакерѓа леске: „Са џикоте тано џивдо ки пхув е Јесејескоро чхаво, ту хем тло царство нане те овен безбедна.“ Ама, адава е Јонатанеске на сине важно. Ов вакерѓа пле дадеске: „Соске мора те мерел? Со керѓа?“ Тегани о Саул панда повише хољанѓа! Иако сине ко берша, ама панда сине силно војнико. Ов фрдинѓа о копје те мударел пле чхаве! Иако адава џанела сине бут шукар те керел ле, ама на успејнѓа те погодинел ле. О Јонатан сине бут повредимо хем понижимо таро пло дад, адалеске бут хољанѓа хем гело песке (1. Самоилова 20:24-34).

 Тајсутно диве, о Јонатан иклило ко поле паше коте со гаравела пе сине о Давид. Сар со договоринѓе пе англедер, о Јонатан фрдинѓа стрела колаја со денѓа ле знако кај о Саул панда мангела те мударел ле. Пало адава о Јонатан бичхалѓа пле слуга те иранел пе ки диз. Ов хем о Давид ачхиле коркори, хем шај сине кратко те керен лафи. О солдуј џене рунѓе, хем е Јонатанеске сине бут пхаро со лескоро потерно амал, о Давид, мора сине те нашел таро Саул таро јекх тхан ко јавер (1. Самоилова 20:35-42).

 Ко акала пхаре ситуацие, о Јонатан сикавѓа кај тано верно хем нане себично. О Сатана, кова сој душмани са е Девлескере слугенге, сигурно мангља о Јонатан те џал пало пример е Саулескоро хем те чхивел пли желба баши моќ хем слава ко прво тхан. Те на бистра кај о Сатана мангела те теринел е манушен те чхивен пумаре себична желбе ко прво тхан. Адава успејнѓа леске амаре прва родителенцар, е Адамеа хем е Еваја (1. Мојсеева 3:1-6). Ама, на успејнѓа леске е Јонатанеа. О Сатана сигурно сине бут хољамо! Дали амен да ко слична ситуацие ка противина амен леске? Авдиве живинаја ко свето коте со и себичност бут сигате ширинела пе (2. Тимотеј 3:1-5). Дали ка ова верна хем несебична сар о Јонатан?

 Сар со накхела сине о време, о Саул размислинела сине само башо адава кобор мрзинела е Давиде. О Јонатан нашти сине ништо те керел џикоте дикхела сине кај лескоро дад постапинела сар делино. О Саул кхединѓа пле војска хем водинѓа ла таро јекх тхан ко јавер тхан те шај само те мударел јекхе мануше кова со на сине криво! (1. Самоилова 24:1, 2, 12-15; 26:20). Дали о Јонатан да џала сине ленцар? Интересно тано со ки Библија ко нијекх тхан на пишинела кај ов да сине ленцар. О Јонатан сине верно е Јеховаске, е Давидеске хем верно икерѓа пе ко сојуз со керѓа ле леа.

 Адава со о Јонатан осетинела сине спрема о Давид никогаш на менинѓа пе. Пало несаво време, ов палем аракхља начин те аракхел пе пле амалеа. Адава сине ко Орес, со значинела „тикни шума“. О Орес аракхљола сине ко јекх пусто планинско тхан, веројатно ко некобор километрија југоисточно таро Хеврон. Соске о Јонатан анѓа пло живото ки асавки опасност? Тари Библија дикхаја кај гело те дикхел пе е Давидеа те шај те поможинел леске те бајрарел пли доверба ко Јехова (1. Самоилова 23:16). Сар керѓа адава?

 О Јонатан вакерѓа пле терне амалеске: „Ма дара“. А пало адава уверинѓа ле: „Мо дад о Саул нане те аракхел тут“. Соске о Јонатан сине уверимо ко адава? Соске сине ле бари вера кај о Јехова ка исполнинел пли намера. Пало адава вакерѓа: „Ту ка ове цари упро Израел“. Некобор берша англедер, о Јехова бичхалѓа е пророко е Самоиле те вакерел е Давидеске адава. Ки акаја прилика, о Јонатан сетинкерѓа е Давиде кај о Јехова секогаш исполнинела пле ветувања. А со мислинела сине о Јонатан баши пли иднина? Ов вакерѓа: „Ме ка овав дујто, одма пали туте“. Кобор бари понизност сикавѓа акава мануш! О Јонатан сине спремно те шунел е Давидескере заповедија, кова со сине 30 берш потерно лестар хем те овел леске десно вас! Ко крајо, о Јонатан вакерѓа: „Мо дад о Саул шукар џанела адава“ (1. Самоилова 23:17, 18). О Саул хор ки песте џанља кај адава со противинела пе е Давидеске нане те успејнел леске, соске о Давид сине биримо таро Јехова те овел цари!

 Сар со накхена сине о берша, о Давид сигурно бут пути сине бахтало џикоте сетинела пе сине ко адава со керѓа лафи е Јонатанеа. Тегани дикхле пе последно пути. Жално сине со и желба е Јонатанескири те овел дујто мануш ко царство пало Давид никогаш на исполнинѓа пе.

 О Јонатан гело заедно е Саулеа те боринел пе против о Филистејција, кола со сине баре душмања е Израелцонгере. Бизи разлика ко грешке со керѓа лен лескоро дад, ов шај сине те овел ле чисто совест џикоте боринела пе сине заедно пле дадеа адалеске со леске најважно сине те керел адава со родела лестар о Јехова. О Јонатан боринѓа пе верно хем храбро сар стално. Сепак, о Израелција нашавѓе ки акаја војна. О Саул уло добором лошно со почминѓа те мешинел пе ко спиритизам, грево колеске со слединела сине мударибе спрема е Девлескоро закони. Адалеске о Јехова повише на дела ле сине берекети. Е Саулескере трин чхаве, машкар кова сине о Јонатан да, муле ки акаја војна. О Саул сине повредимо хем коркори мударѓа пе (1. Самоилова 28:6-14; 31:2-6).

 Е Давиде бут дукхандило ле адава. Ов сине добором шукар хем сине спремно те простинел со чак тугујнѓа е Саулеске, кова со керела леске сине баре неволје ко живото. О Давид пишинѓа гили ки која сикавѓа кобор сине леске пхаро башо Саул хем башо Јонатан. Адава со вакерѓа башо пло мангло амал хем советнико чаче сине бут жално: „Тугујнава баши туте, мо пхрал Јонатан! Сиан сине манге бут мило! Тло мангипе спрема манде сине побаро таро џувљакоро мангипе“ (2. Самоилова 1:26).

 О Давид никогаш на бистерѓа адава со ветинѓа е Јонатанеске. Бершенцар покасно, ов леља ки царско палата е Мефивостеје, е Јонатанескере чхаве, кова со сине сакати те грижинел пе леске (2. Самоилова 9:1-13). Сигурно о Давид сиклило бут таро Јонатан, кова со сине верно, сикавела сине поштовање хем на мукхља пле амале чак кеда лескоро живото сине ки опасност. Дали амен да ка сикљова нешто лестар? Дали амаре амала тане сар о Јонатан? Дали амен сием асавке амала? Ка ова сар о Јонатан хем ка овел амен вера сар со сине ле ако поможинаја амаре амаленге те овел лен побари доверба ко Девел, ако аменге најважно те ачхова верна е Јеховаске хем ако сием верна хем несебична амала.