Бариљум ки диз Тампере (Финска), јекх тикно хем мирно тхан пхердо зеленило. Мле родителија на сине бут религиозна, ама ценинена сине о образование хем о шукар манирија. Ми дај тани Германка, адалеске кеда сиум сине тикно понекогаш џава сине ки ми баба хем ко мо папо кола со живинена сине ки Западно Германија.

 Панда сар тикно замангљум о спорт. Учествујнава сине ко различна спортија, ама кеда сине ман околу 14 берш, решинѓум те посветинав ман ко тенис. Ко 16 берш ко диве сине ман дуј џи ко трин тренингија — дуј пути професионално тренереа, а ко акшами тренеринава сине коркори. Сиум сине воодушевимо таро тенис. Акава спорт сине манге баро предизвик баши мли ментално хем физичко издржливост. Иако мангава сине те дружинав ман ме амаленцар хем понекогаш те икљова те пија по јекх пиво, ама никогаш на матиљум хем на дрогиринѓум ман. Ко мло живото најважно сине манге о тенис.

 Кеда сине ман 17 берш, почминѓум те учествујнав ко АТП турнирија. * Откеда побединѓум ко некобор турнирија, уљум пенџардо ки мли пхув. Ко 22 берш сиум сине машкар о 50 најшукар тенисерија ко свето.

 Бершенцар патујнава сине ко различна пхувја хем кхелава сине професионално тенис. Дикхљум бут шуже тхана, ама уљум хем свесно башо бут баре светска проблемија, сар сој о криминал, и дрога хем загадими околина. На пример, кеда сиум сине ко САД, вакерѓе аменге те на џа ко несаве делија таро несаве дизја адалеске со иси бут баро криминал. Са адава бут вознемиринѓа ман. Освен адава, иако керава сине нешто со бут мангава, сепак осетинава сине ман бут чучо.

 Ми џувли, и Сана, почминѓа те проучинел и Библија е Јеховаскере сведоконцар. Сине манге хари смешно адава со ој интересинела пе сине баши религија, ама на сине ман ништо против адава со проучинела сине. Лелем амен ко 1990 берш, хем јекх берш пало адава ој крстинѓа пе сар е Јеховаскоро сведоко. На дикхава ман сине сар религиозно мануш, ама верујнава сине кај иси Девел. Сетинава ман сар ми баба тари Германија бут пути читинела сине и Библија, па чак сикавѓа ман те молинав ман.

 Јекх диве, ме хем и Сана сием сине ко гостија ко јекх брачно пари е Јеховаскере сведокија. О ром, о Кари, сикавѓа манге јекх библиско пророштво башо „последна диве“ (2. Тимотеј 3:1-5). Адава мукхља манге баро впечаток адалеске со халиљум соске овена добором лошна буќа ко свето. Адава диве на керѓем повише лафи баши религија. Ама, оттегани почминѓем те кера лафи леа баши Библија, хем са со дознајнѓум сине ле смисла. Адалеске со сиум сине бут зафатимо хем бут пути патујнава сине, нашти сине редовно те дикха амен, ама о Кари на откажинела пе сине. Ко пучиба со пучава ле сине џикоте проучинаја сине и Библија, ов одговоринела манге сине преку писмија. Дикхљум кај ки Библија иси логична одговорија башо важна пучиба ко живото, хем хари по хари почминѓум те хаљовав која тани лакири главно тема — кај о Девел ка исполнинел пли намера преку пло Царство. Адава со дознајнѓум е Девлескоро анав, Јехова, хем адава со халиљум кај керѓа бут баши аменде, мукхља манге баро впечаток (Псалм 83:18). Највише воодушевинѓа ман и откупно жртва — ој нане денди само башо несаве техничка или правна причине, него лаја о Девел сикавѓа кобор баро мангипе иси ле спрема аменде (Јован 3:16). Сиклиљум исто аѓаар кај шај те овав паше амал е Девлеа хем кај шај те живинав засекогаш ко рај ки Пхув (Јаков 4:8). Почминѓум те пучав ман: „Сар шај те сикавав кај ценинава адава со керѓа о Девел баши манде?“

 Бут размислинѓум башо мло живото. Тари Библија сиклиљум кај о најбаро бахталипе ко живото авела таро адава кеда даја, хем сине ман желба те вакерав е јаверенге башо адава ко со верујнава (Дела 20:35). Адалеске со професионално спортујнава сине хем учествујнава сине ко бут турнирија, на сиум сине кхере околу 200 диве ко берш. Ки мли фамилија са вртинела пе сине околу манде — мле тренингија, мли рутина, мли кариера. Сине манге јасно кај ваљани нешто те менинав.

 Џанљум кај бут џене нане те хаљовен ман ако мукхава мли успешно кариера таро религиозна причине. Ама, и можност пошукар те пенџарав е Јехова хем те добинав вечно живото сине бут повредно тари било сави јавер награда со шај сине те освојнав ла ко тениска натпреварија, хем адалеске на сине манге пхаро те одлучинав ман со те керав. Одлучинѓум те на секиринав ман со ка вакерен о јавера — и одлука сине мли. Кеда сиум сине ко притисок, бут поможинѓа манге о стихо таро Псалм 118:6: „О Јехова тано ки мли страна; нане те дарав. Со шај те керел манге мануш?“

 Баш ко адава периоди, добинѓум јекх бут примамливо понуда таро спонзорија — те керав договор кова со ка керел бершенцар професионално те кхелав тенис бизо те мислинав ништоске. Ама, адава на перавѓа ман пишмани тари мли одлука. Одбинѓум и понуда, хем пало несаво време чхинавѓум те учествујнав ко АТП турнирија. Понадари да проучинава сине и Библија хем крстинѓум ман сар е Јеховаскоро сведоко ко 2 јули 1994 берш.

 Ки мли ситуација на ваљани сине те овел несави трагедија те шај те почминав те размислинав башо Девел, ни палем, сиум сине мануш со родела сине о чачипе. Мислинава сине кај иси ман шужо живото хем кај нане фер те родав нешто повише. Сепак, изглединела сине кај о библиско чачипе аџикерѓа те аракхав ле. Бизо те очекујнав дознајнѓум кај о живото иси ле побари смисла, хем мло живото добором уло пошукар со нашти сине ни те замислинав манге. Амари фамилија никогаш на сине добором паше хем зорали сар акана. Хем бут сиум бахтало со мле трин чхаве слединена мло пример — ама на сар спортисти, него сар христијани.

 Панда мангава те кхелав тенис. Бершенцар заработинава сине аѓаар со керава сине бути сој поврзими тенисеа, на пример, керава сине бути сар тренери хем ки управа ко јекх тениско центар. Сепак, о спорт нане манге више најважно ко живото. Англедер секова курко трениринава сине саатенцар те шај те овав пошукар тенисери, те овав шампиони. Ама акана, секова курко накхава повише саатија ко адава те поможинав е манушенге те дознајнен хем те икерен пе ко мерилија е Библијакере со менинѓе мло живото. Авдиве сиум бут бахтало со мло амалипе е Јеховаја манге ко прво тхан хем адалеске шај е јаверенге да те вакерав баши мли надеж баши пошукар иднина (1. Тимотеј 6:19).