Несаве манушенге ваљани бут време те шај те сикљон нешто таро пле лошна искуствија ко живото. Ме сиум сине асавко. Ме бијандиљум хем бариљум ки Барселона, и дујто најбари диз ки Шпанија. Мли фамилија живинела сине ко јекх дело тари Барселона со викинела пе Соморостро, тхан со сине узо плаже хем сине пенџардо пало криминал хем дрога.

 Мле родителен сине лен ења чхаве, а ме сиум сине о најбаро. Адалеске со сием сине бут чороле, мо дад бичхалѓа ман те керав бути ко јекх тениско клуби со сине аменге паше. Адатхе кхедава сине о топке. Сине ман деш берш хем керава сине по деш саатија бути ко диве. Адалеске, нашти џава сине ки школа сар о јавера чхаве ко мле берша. Ко 14 берш почминѓум те керав бути ки јекх работилница башо металија.

 Ко 1975 берш викинѓе ман ки воено служба, која со сине задолжително ки Шпанија. Мангљум те пробинав неве буќа ко живото, адалеске пријавинѓум ман те служинав ки Шпанско легија е странцонгири ки Мелиља, шпанско територија ки Северно Африка. Ко адава периоди, кхувѓум хор ко свето е дрогакоро хем е алкохолескоро.

 Откеда мукхљум и Шпанско легија, иранѓум ман ки Барселона хем керѓум банда. Чораја сине са со ка реса, а о чордикане буќа бикинаја лен сине те шај те овел амен паре баши дрога. Почминѓум те лав ЛСД хем амфетаминија, хем главна буќа ко мло живото сине о секс, о алкохол хем о комари. Асавко живото керела ман сине те овав бут насилно. Манцар секогаш пхиравава сине чхурик, тикно товер, хем мачета хем на размислинава сине дали те користинав лен ако ваљанена манге.

 Јекх пути амари банда чорѓа врда хем слединела сине амен и полиција. Сине сар ко филми. Возинѓем о врда скоро 30 километрија, хем тегани и полиција почминѓа те пукајнел ки аменде. Ко крајо, адава со возинела сине кхувѓа о врда хем тегани сарине нашлем. Нормално, кеда мо дад дознајнѓа башо адава, палдинѓа ман кхералдан.

 О наредна панџ берш и улица сине мло кхер. Совава сине ко влезија, ко камионија, ко клупе хем ко гробија. Кратко време живинѓум ки пештера да. Манге о живото на сине ле смисла, адалеске сине манге сајекх дали сиум џивдо или муло. Џикоте сиум сине дрогиримо, чхинава ман сине ко васта. Панда иси ман белегија.

 Сине ман 28 берш кеда ми дај родинѓа ман хем викинѓа ман те иранав ман кхере. Согласинѓум ман хем ветинѓум лаке кај ка срединав мло живото. Ама, ваљани сине манге време те шај те исполнинав мло ветување.

 Јекх диве, ко амаро удар але дуј Јеховаскере сведокија. Џикоте шунава сине со иси лен те вакерен манге, мо дад андралдан викинела сине манге те пхандав ленге о удар англо муј. Никогаш на мангљум некој те нарединел манге, адалеске на шунѓум ле. Нудинѓе манге трин тикне лила хем ме цело вилеа лељум лен. Пучљум лен коте кхедена пе хем пало некобор диве гељум англи ленгири сала.

 Највише со мукхља манге впечаток сине адава со сарине сине уредно уравде. Различно лендар, ман сине ман баре бала, мли брада на сине средими хем сине ман пхиравде шеја. Дикхјола сине кај на сине ман ленцар ништо заедничко, адалеске ачхиљум авријал. Изненадинѓум ман кеда адатхе дикхљум е Хуане, јекх пурано амал тари мли банда, уравдо ко одело. Покасно дознајнѓум кај уло е Јеховаскоро сведоко англедер јекх берш. Адава со дикхљум лесте денѓа ман храброст те кхував ко состанок. Таро адава моменти мло живото почминѓа те менинел пе.

 Прифатинѓум те проучинав и Библија хем сигате халиљум кај, ако мангава о Девел те прифатинел ман, ваљани те менинав ман аѓаар со нане те овав насилно хем нане те живинав неморално. Ама, на сине локхе те керен пе акала промене. Те шај те угодинав е Јеховаске, ваљани сине те менинав о начин сар размислинава хем те овав нево мануш (Римјаните 12:2). Е Девлескири милост бут погодинѓа ман. Иако керѓум бут грешке ко живото, осетинѓум кај о Девел дела ман дујто шанса. Адава со сиклиљум ле башо Девел, о Јехова, кхувѓа манге ко вило. Халиљум кај постојнела Створители кова со грижинела пе манге (1. Петрово 5:6, 7).

 Акава поттикнинѓа ман те почминав те керав промене. На пример, џикоте проучинава сине, кеда реслем ки тема башо пушибе, вакерѓум манге: „Ако о Јехова мангела те овав чисто ко секова поглед, тегани ваљани те чхинавав е цигаренцар!“ (2. Коринќаните 7:1). Хем аѓаар о цигаре завршинѓе ки канта.

 Исто аѓаар, ваљани сине те чхинавав те користинав хем те бикинав дрога. Башо акава ваљанѓа манге повише време хем сила. Џанава сине кај ако мангава те керав адава, ваљани те чхинавав са о контактија мле пуране амаленцар. Ленгоро влијание на мукхела ман сине духовно те напредујнав. Сар со накхела сине о време, барили мли доверба ко Јехова хем ко пхраља таро собрание. Прво пути ко живото осетинѓум со значинела некој те мангел тут хем те овел заинтересиримо туке сар личност. Пало некобор масекија конечно ослободинѓум ман тари дрога хем уљум нево мануш, а адава поможинѓа манге те овав ко шукар однос е Девлеа (Ефешаните 4:24). Ко август 1985 берш крстинѓум ман хем уљум е Јеховаскоро сведоко.

 И Библија менинѓа мло живото ко пошукар. Поможинѓа манге те чхинавав е лошна навикенцар со уништинена сине мло састипе хем достоинство. Повише таро 30 мануша таро адала со дружинава ман сине ленцар муле терне тари СИДА или таро јавера насвалипа сој поврзиме е дрогаја. Те на применинав сине о библиска начелија, сигурно ка завршинав сине сар ленде.

 Ни на мислинѓум кај јекх диве наместо чхурика хем товера манцар ка пхиравав и Библија те шај те поможинав е манушенге. Акана, заедно мле ромњаја накхава бут време те шај те сикава е јаверен башо Девел.

 Мле родителија никогаш на уле е Јеховаскере сведокија, ама сине бахтале со и Библија поможинѓа манге те керав промене ко живото. Мо дад чак бранинела сине е Јеховаскере сведокон англо пле колеге. Сине свесно кај мли вера менинѓа ман ко пошукар. Ми дај често џанела сине те вакерел кај ваљани сине порано те почминав те проучинав и Библија. Согласинава ман лаја!

 О живото сикавѓа ман кај нане нисави смисла те роде задоволство ки дрога хем ко јавера лошна навике. Чачутно задоволство аракхава акана, џикоте сикавава е јаверен башо е Девлескоро Лафи кова со спасинѓа мло живото.