„Ако чаче мангеа те џане башо Девел, понадари да проучин е Јеховаскере сведоконцар.“ На очекујнѓум те шунав акала лафија. Тегани несаво време проучинава сине е Сведоконцар и Библија. Ама, те шај те хаљовен соске изненадинѓе ман акала лафија, те вакерав туменге нешто баши манде.

 Сиум бијандо ко Кесалтепеке, диз ко Ел Салвадор. Ме сиум сине о шовто таро 15 чхаве. Ме родителија трудинена пе сине те воспитинен ман те овав чесно хем те поштујнав о закони. Освен адава, о Леонардо, исто сар о јавера Јеховаскере сведокија, понекогаш авена сине те проучина и Библија. Ама, на дикхава сине бут сериозно ко адава со сикљовава сине хем почминѓум те анав лошна одлуке. Кеда сине ман 14 берш, почминѓум те пијав хем те дрогиринав ман заедно ме амаленцар тари школа. Јекх по јекх, чхинавѓе школујбаја хем овена сине членија ко банде, хем ме да гељум пало ленгоро пример. Накхаваја сине о време ки улица, коте со силаја лаја сине паре таро мануша хем чораја сине те шај понадари да те пија хем те дрогирина амен.

 И банда ули манге фамилија. Сиум сине убедимо кај мора те овав ленге верно. На пример, јекх пути мо амал кова со сине дрогиримо почминѓа те марел пе јекхе ме комшијаја. Џикоте марена пе сине, мо комшија успејнѓа те марел ме амале хем те викинел полиција. Кеда дикхљум адава, почминѓум бизо контрола те кхував лескоро врда баре палкаја те шај те теринав ле те мукхел ме амале. Мо комшија молинела ман сине те чхинавав, ама ме на мангава сине те шунав ле. Пхагљум са лескере џамија хем уништинѓум цело врда.

 Кеда сине ман 18 берш, мли банда марѓа пе е полицијаја. Џикоте спреминава ман сине те фрдав рачно керди бомба, нешто уло хем ој експлодиринѓа манге ко вас. Сетинава ман само дикхљум кај ачхиљум бизо вас, хем пало адава пељум ко несвест. Кеда освестинѓум ман ки болница, вакерѓе манге кај ачхиљум бизо мло десно вас, кај на шунава ме десно канеа хем кај скоро на дикхава ме десно јакхаја.

 Иако сине ман бут повреде, кеда мукхле ман тари болница, палем иранѓум ман ки банда. Ама, кратко пало адава астарѓе ман хем пханле ман ко затвор. Адари мле врске е бандаја уле панда позорале. По цело диве сием сине заедно — таро сабалуко, кеда пушинаја сине и прво марихуана, па са џикоте на пашљоваја сине.

 Кеда сиум сине ко затвор, посетинѓа ман о Леонардо. Џикоте кераја сине лафи, ов сикавѓа ки мли тетоважа ко десно вас хем пучља ман: „Џанеа ли со значинена акала трин тетовириме точке?“ „Сар на“, вакерѓум. „Секс, дрога хем рокенрол.“ Ама, о Леонардо вакерѓа манге: „Грешинеа. Ола значинена болница, затвор хем мерибе. Више сиан сине ки болница, а акана сиан ко затвор. Џанеа сој тано ко редо“.

 Акала лафија погодинѓе ман ко вило. Ко право сине. Адалеа сар живинава сине, коркори рандава манге сине гробо. О Леонардо нудинѓа манге те проучинел манцар и Библија, хем ме прифатинѓум. Адава со дознајнѓум латар поттикнинѓа ман те керав промене ко мло живото. На пример, и Библија вакерела кај „о лошно друштво руминела о шукар навике“ (1. Коринќаните 15:33). Адалеске, и прво бути со ваљани сине те менинав ла сине о друштво. Тари адаја причина чхинавѓум те кхедав ман е бандаја хем наместо адава почминѓум те џав ко состанокија е Јеховаскере сведоконгере со икерена лен сине ко затвор. Ко јекх таро адала состанокија запознајнѓум ман јекхе јавере затвореникоја, кова со викинела пе сине Андрес хем кова со крстинѓа пе ко затвор. Ов викинѓа ман те беша заедно џикоте хаја сабалуко. Оттегани чхинавѓум мо диве те почминав ле марихуанаја. Наместо адава, ме хем о Андрес секова сабај кераја сине лафи заедно башо јекх библиско стихо.

 О членија тари банда одма приметинѓе о промене ки манде. Адалеске јекх таро главна вакерѓа кај мангела те кера лафи. Бут дарандиљум. На џанљум со ка керел манге кеда ка пхенав леске со мангава те керав, соске тано бут пхаро те икљовел пе тари банда. Ов вакерѓа манге: „Дикхаја кај више на авеа те кхеде тут аменцар него џаја ко состанокија е Јеховаскере сведоконгере. Со планиринеа те кере?“ Вакерѓум леске кај мангава те продолжинав те проучинав и Библија хем те менинав о начин сар живинава. Бут изненадинѓум ман кеда вакерѓа манге кај и банда ка поштујнел ман ако чаче сикавава кај мангава те овав е Јеховаскоро сведоко. А пало адава вакерѓа: „Ако чаче мангеа те џане башо Девел, понадари да проучин е Јеховаскере сведоконцар. Очекујнаја кај ка чхинаве те кере лошна буќа. Честитинава туке. Ту сиан ко чачутно друмо. Е Јеховаскере сведокија чаче шај те поможинен туке. Ме проучинава сине и Библија ленцар ко САД, хем несаве тари ми фамилија тане е Јеховаскере сведокија. Ма дара — само англе!“ Панда осетинава сине дар, ама тари јавер страна сиум сине бут бахтало. Благодаринѓум ман е Јеховаске ки манде. Осетинѓум ман сар чирикли мукхли таро кафези! Тегани халиљум со мангља о Исус те вакерел е лафенцар: „Ка џанен о чачипе, хем о чачипе ка ослободинел тумен“ (Јован 8:32).

 Сепак, несаве таро мле пуране амала чхивена ман сине ко искушение те лав дрога. Мора те вакерав кај некобор пути пељум ко адава искушение. Ама, сар со накхела сине о време хем пало бут искрена молитве конечно успејнѓум те икљовав ко крајо мле лошна навикенцар (Псалм 51:10, 11).

 Кеда иклиљум таро затвор, бут џене мислинѓе кај ка иранав ман ко мло пурано живото. Ама, на сине ко право. Наместо адава, акана бут пути иранава ман ко затвор те шај те вакерав е јавере затворениконге башо адава со сиклиљум тари Библија. Ко крајо, мле пуране амала уверинѓе пе кај менинѓум ман. Ама, жално тано адава со мле пуране душмања на мислинѓе аѓаар.

 Јекх диве, џикоте сиум сине ки служба јекхе пхралеа, таро јекх пути опкружинѓе амен јекх група мануша со сине лен оружје. Ола сине членија тари јекх пурани банда која со противинела пе сине аменге, хем мангле те мударен ман. О пхрал со сине манцар љубезно, ама храбро објаснинѓа ленге кај на сиум повише члени ки банда. Ко адала моментија, трудинава ман сине те ачховав смиримо. Откеда марѓе ман хем предупрединѓе ман те на џав палем ко адава тхан, цидинѓе о оружје хем мукхле амен те џа аменге. И Библија чаче менинѓа мло живото. Англедер ка трудинав ман сине те иранав ленге лошнипаја. Ама акана сиум послушно ко совет таро 1. Солуњаните 5:15, коте со пхенела: „Пазинен никој никаске те на иранел башо лошнипе лошнипаја, него секогаш трудинен тумен те керен шукарипе јекх јекхеске хем са е јаверенге“.

 Откеда уљум е Јеховаскоро сведоко, трудинава ман сине те овав чесно мануш иако адава на сине секогаш локхе. Сепак, шај сине те керав адава соске поможинѓе ман о Јехова, о советија таро лескоро Лафи хем и поддршка таро мле неве амала. Никогаш повише на мангава те иранав ман ко адава со керава сине англедер (2. Петрово 2:22).

 Сиум сине насилно хем бут хољамо мануш. Сигурно сиум кај акана нане сине те овав џивдо ако понадари да џава сине ко адава лошно друмо. Адава со сиклиљум тари Библија менинѓа ман таро корено. Поможинѓа манге те чхинавав мле лошна навикенцар. Сикавѓа ман те живинав ко мир мле пуране душманенцар (Лука 6:27). Освен адава, акана иси ман амала кола со поможинена манге те овен ман шукар особине (Изреки 13:20). Сиум бут бахтало хем иси ман смисла ко живото, аѓаар со служинава е Јеховаске, о Девел со сине спремно те простинел манге башо са о лошна буќа со керава сине порано (Исаија 1:18).

 Ко 2006 берш, сиум сине ки јекх посебно школа баши обука башо христијања со нане ко брако. Некобор берш пало адава, женинѓум ман јекхе бут шукар ромњаја, хем акана иси амен јекх чхај. Акана накхавава бут време те сикавав е јаверен башо библиска начелија со поможинѓе манге ко живото. Исто аѓаар, служинава сар старешина ко мло собрание, хем трудинава ман те поможинав е терненге те на керен о грешке со керѓум лен ме ко ленгере берша. Наместо те рандав мо гробо, акана дава мандар са те добинав о вечно живото кова со ветинела ле о Девел ки Библија.