Бијамо сиум ки диз Сиудад Обрегон, ко северно Мексико. Сиум сине панџто таро ења чхаве. Живинаја сине аври тари диз, коте со ме даде сине ле тикни фарма. Сине аменге адатхе бут шукар, хем амари фамилија сине бахтали хем ко јекхипе. Ама кеда сине ман само панџ берш о урагани уништинѓа амари фарма хем мора сине те селина амен ки јавер диз.

 Мо дад почминѓа те заработинел шукар, ама ко исто време уло алкохоличари. Адава лошно влијајнѓа упро лескоро брако хем упри аменде о чхаве. Почминѓем те пушина, а о цигаре чораја сине таро мо дад. Кеда сине ман шов берш, прво пути матиљум. Сигате пало адава ме родителија одвојнѓе пе хем ман почминѓе те овен ман лошна навике.

 Ми дај леља амен пеа хем гели те живинел јавере манушеа. Ов на дела сине пле паре лаке, хем амен нашти сине те живина таро адава со ми дај заработинела сине. Аѓаар амен о чхаве почминѓем те кера бути било со ка аракха, хем едвај икљоваја сине ко крајо. Ме чистинава сине кундре, бикинава сине маро, новине, мастике хем јавера буќа. Исто аѓаар хајбаске родава сине ко канте ѓубреске ко барвале населбе.

 Кеда сине ман деш берш, јекх мануш викинѓа ма те керав леске бути ки е дизјакири депонија. Прифатинѓум и понуда, мукхљум и школа хем гељум манге кхерал. Платинела сине манге похари таро јекх долари ко диве, а хајбаске дела ман сине адава со ка кхеда таро ѓубре. Живинава сине ки шупа која со керѓум ла таро буќа со аракхаја лен сине ко ѓубре. О мануша околу манде користинена сине безобразна лафија хем живинена сине неморално. Бут лендар дрогиринена пе сине хем сине алкохоличарија. Адава сине најпхаро периоди ко мо живото, ровава сине секоја рат хем тресинава сине тари дар. Лаџава сине бут адалеске со сиум сине чороло хем бизи школа. Живинава сине ко ѓубре околу трин берш са џикоте на селинѓум ман ко јавер тхан ко Мексико. Адари керѓум бути ко поле, кхедава сине лулуѓа хем памуко, кхедава сине компирија хем шеќерно трска.

 Пало штар берш иранѓум ман ко Сиудад Обрегон. Јекх мли тетка, која со сине бајачка, денѓа ман јекх соба ко пло кхер. Почминѓе те овен ман лошна суне хем уљум депресивно со чак размислинава сине те мударав ман. Јекх рат молинѓум ман е Девлеске: „Девла, ако постојнеја, мангава те пенџарав тут хем те служинав туке секогаш. Ако иси чачутни религија, мангава те аракхав ла“.

 Секогаш мангава сине те џанав нешто повише башо Девел. Чак кеда сиум сине тикно, џава сине ко разна цркве, ама са о религие разочаринѓе ман. Нијекх лендар на керела сине бут лафи баши Библија хем на поможинѓе манге те џанав повише башо Девел. Несаве мангена сине повише о паре, а таро несаве цркве о верникија живинена сине неморално.

 Кеда сине ман 19 берш, јекх мло џамутро вакерѓа манге кај е Јеховаскере сведокија сикавѓе леске со вакерела и Библија башо користибе религиозна слике хем идолија. Читинѓа манге о стихија тари 2. Мојсеева 20:4, 5. Адатхе пишинела кај на смејнаја те кера аменге резбиме идолија. Ко 5 стихо вакерела: „На ваљани те клањине тут или те служине ленге, соске ме, о Јехова тло Девел, сиум Девел со родела само леске те служине“. Тегани мо џамутро пучља ман: „Ако о Девел користинела слике хем идолија те шај те керел чудија или ако мангела амен те користина лен кеда обожавинаја ле, тегани соске забранинела лен?“ Адава поттикнинѓа ман те размислинав. Пало адава панда некобор пути керѓем лафи баши Библија. Добором бут уживинава сине ко адала разговорија, со о време летинела сине манге.

 Покасно, мо џамутро ингарѓа ман ко состанокија е Јеховаскере сведоконгере. Сиум сине воодушевимо таро адава со дикхљум хем со шунѓум адари. Чак о тикне чхаве учествујнѓе ки програма хем шукар керѓе лафи тари бина. Мислинѓум манге: „Саво образование добинена о мануша акате!“ Иако сине ман баре бала хем на сине харавде, е Јеховаскере сведокија сине бут љубезна манцар. Јекх фамилија чак викинѓа ман ки вечера пало состанок.

 Таро проучибе и Библија е Јеховаскере сведоконцар, сиклиљум кај о Јехова, о Девел, тано амаро Дад кова сој пхердо мангипе хем грижинела пе аменге бизи разлика сави тани амари финансиско состојба, општествено статус, која раса сием или саво образование иси амен. Ов тано чаче непристрасно (Дела 10:34, 35). Конечно, дознајнѓум повише башо Девел! Више на осетинава сине кај мо живото тано чучо.

 Мло живото целосно менинѓа пе, хем адава ко шукар. Чхинавѓум те пушинав, те пијав хем те користинав безобразна лафија. И бари холи со сине ман таро тикнипе нашавдили заедно мле лошно суненцар со мучинена ман сине. Повише на осетинава сине кај на врединава ништо, а адава мислинава сине таро тикнипе соске бут цидинѓум хем чхинавѓум е школаја.

 Акана иси ман бут шукар ромни која мангела е Јехова хем дела ман бари поддршка. Акана служинава сар покраинско надгледнико е Јеховаскере сведоконгоро, или јавере лафенцар, посетинава о собранија те шај те охрабринав хем те поучинав мле духовно пхрален хем пхењен. И Библија, која со сине сар иљачи ме душаке, хем о шукар образование таро Јехова променинѓе ман хем акана ме на лаџава више коркори мандар.