Сар Јеховаскере сведокија, трудинаја амен те кера позорали амари фамилија, а поможинаја е јаверенге да ко адава. Поштујнаја е Девле кова со керѓа и фамилија (1. Мојсеева 2:21-24; Ефешаните 3:14, 15). Ки Библија, ов денѓа начелија кола поможинѓе е манушенге таро цело свето те овел лен стабилно хем бахтало брако.

 Трудинаја амен ко са те шуна о библиска советија, кола со поможинена амен те ова пошукар рома, ромња хем родителија (Изреки 31:10-31; Ефешаните 5:22-6:4; 1. Тимотеј 5:8). И мудрост со иси ки Библија поможинела чак ко фамилие коте со нане сарине ки исто религија (1. Петрово 3:1, 2). Аке со вакерена несаве со нане Јеховаскере сведокија, а каскоро брачно партнери уло Сведоко:

•   „О прва шов берш ко брако накхле аменге ко расправие хем ки нервоза. Ама, откеда и Ивети ули е Јеховаскоро сведоко ули пољубезно хем пострпливо. Адава керѓа те спасина амаро брако“ (Клауир таро Бразил).

•   „Бут сиум сине против кеда мо ром почминѓа те проучинел е Јеховаскере сведоконцар соске мислинава сине кај ола растуринена о фамилија. Ама, дикхљум уствари кај и Библија бут поможинѓа аменге ко брако“ (Агнес тари Замбија).

 Кеда проповединаја, сикаваја е манушенге кај и мудрост тари Библија шај те поможинел ленге:

•   мудро те биринен брачно партнери

•   те издржинен о прво берш ко брако

•   те накхен шукар пе брачно партнерескере родителенцар

•   те џанен сар те трошинен о паре

•   те на расправинен пе

•   те сикљовен те простинен

•   те воспитинен е чхавен

 Понекогаш оја. На пример, спрема јекх извештај таро 1998 берш е истражувачко компанијакоро Софрес, ко секова бишто брако коте со јекх таро брачно партнерија уло е Јеховаскоро сведоко ало џи ко сериозна проблемија.

 О Исус пророкујнѓа кај окола со ка живинен спрема лескере сикљојба ка овен лен притисок тари фамилија (Матеј 10:32-36). Спрема о историчари Вил Дјурант, ко Римско Царство „о христијања сине обвиниме кај растуринена о фамилие“, a а о иста обвиненија добинена несаве таро Јеховаскере сведокија авдиве. Дали адава значинела кај о Сведокија тане причина башо проблемија ко фамилие?

 Башо обвиненија кај е Јеховаскере сведокија растуринена о фамилие, о Европско судо башо манушикане правија анѓа пресуда колате со вакерела пе кај бут пути и причина башо расправие тани адаја со о членија тари фамилија со нане Сведокија на мангена „те прифатинен хем те поштујнен о право со иси е јаверен ки фамилија те биринен ко со ка верујнен“. О судо исто аѓаар вакерела: „Акава случинела пе ко са о бракија коте со о јавер брачно партнери нане ки исто религија, а адава случинела пе е Јеховаскере сведоконцар да“. b Ама, чак кеда о јавера малтретиринена лен баши ленгири религија, е Јеховаскере сведокија трудинена пе те применинен о библиско совет: „Никаске ма иранен лошнипаја... Кобор со шај, ако адава зависинела тумендар, овен ко мир са е манушенцар“ (Римјаните 12:17, 18).

 О Сведокија шунена о библиско совет те кхувен ко брако „само ко Господари“, јавере лафенцар некасаја со иси ле исто верување (1. Коринќаните 7:39). Акаја заповед тани хем библиско хем практично. На пример, ки јекх статија таро 2010 берш, со иклили ко списание Journal of Marriage and Family пишинѓа кај „о брачна партнерија сој ки исто религија хем иси лен о иста обичаија хем верувања“ обично иси лен постабилно брако. c

 Ама, е Јеховаскере сведокија ко нисаво случај на охрабринена околен сој ки ленгири религија те мукхен пумаре брачно партнере ако нане Сведоко. И Библија вакерела: „Ако несаво пхрал иси ле ромни со на верујнела, а ој мангела те живинел леа, ма те мукхел ла, а исто аѓаар и ромни каскоро со ром нане вернико, хем ов мангела те живинел лаја, ма те мукхел пе роме“ (1. Коринќаните 7:12, 13). Е Јеховаскере сведокија шунена акаја заповед.