Со вакерена бут џене: Е Јеховаскере сведокија на џана ко доктори хем на прифатинена медицинско помош.

 Чачипе: Амен мангаја те добина и најшукар медицинско помош аменге хем амаре фамилијаке. Кеда иси амен проблемија е састипаја, родаја помош таро докторија кола со иси лен искуство те користинен методе коте со на користинела пе рат хем кола со керена операцие бизи трансфузија. Авдиве, и медицина бут напредујнѓа. О методе коте со на користинела пе рат кола сој развиме те шај те поможинел пе е пациентенге кола сој е Јеховаскере сведокија акана успешно користинена пе башо јавера да мануша. Ко бут пхувја, секова пациенти иси ле право те одбинел те приминел рат преку трансфузија хем адалеа те избегинел насвалипа кова со пренесинела пе преку рат, негативно реакција ко имунолошко систем, манушикани грешка хем јавер.

 Со вакерена бут џене: Е Јеховаскере сведокија мислинена кај ленгири вера ка поможинел лен те сасљон.

 Чачипе: Амен на сасљараја ни амен ни е јаверен преку амари вера.

 Со вакерена бут џене: О методе бизо рат тане бут скупа.

 Чачипе: О трошакија башо методе бизо рат тане потикне таро трошакија со користинена пе баши трансфузија. a

 Со вакерена бут џене: Секова берш, бут џене таро е Јеховаскере сведокија, машкаро кола иси чхаве, мерена адалеске со на приминена рат.

 Чачипе: Нане нисави основа башо акава со вакерела пе. О хирургија редовно керена сложена операцие сар сој, операција ко вило, ортопедска операцие хем трансплантација е органенге бизо те користинел пе рат. b О пациентија со на приминена рат, машкаро кола иси чхаве да, обично сасљона сар о јавера пациентија со приминѓе рат, а ко несаве случаија посигате лендар. c Никој нашти сигурно те вакерел кај несаво пациенти ка мерел само адалеске со одбинѓа те приминел рат или ка живинел само адалеске со приминѓа рат.

 На приминаја рат таро религиозна причине, а на таро медицинска причине. Хем ко Пурано хем ко Нево завет и Библија дела јасно заповед са е манушенге те на приминен рат (1. Мојсеева 9:4; 3. Мојсеева 17:10; 5. Мојсеева 12:23; Дела 15:28, 29). Исто аѓаар, англо Девел о рат тано свето хем претставинела о живото (3. Мојсеева 17:14). Значи, на приминаја рат адалеске со мангаја те шуна е Девле, а исто аѓаар, соске поштујнаја ле сар амаро Дад со дела амен о живото.

 Поангле, бут стручњакија мислинена сине кај и медицина бизо рат тани опасно хем кај те одбинел пе трансфузија тано исто сар те мударе тут коркори. Ама, ко последна берша ола менинѓа пло мислење. На пример, ко 2004 берш ки јекх статија објавими ко медицинско списание пишинела сине кај „бут методе сој тане користиме башо е Јеховаскере сведокија ки иднина ка овен вообичаена ки медицина“. d Ко списание Heart, Lung and Circulation ко 2010 берш пишинела сине кај „о методе баши операција бизо рат на ваљани те користинен пе само е Јеховаскере сведоконге, него е јавере манушенге да“.

 Милја докторија ко цело свето користинена разна методе коленцар со чхинавена те нашавел пе рат, а адава поможинела ленге те керен сложена операцие бизо рат. Асавке методе керена пе чак ко пхувја сој ко развој. Бут јавера пациентија со нане е Јеховаскере сведокија биринена те на приминен рат.