Dži ko Efešanja 4:1-32
4 Adaleske me, kova so sium phanlo ko zatvor bašo Gospodari, molinava tumen te živinen agjaar so ka sikaven kaj sien dostojna bašo adava so sien sine vikime.
2 Sekogaš oven ponizna, krotka, strpliva hem mangipaja trpinen tumen jekh jekhea.
3 Oven ko mir jekh jekhea hem iskreno trudinen tumen te ikeren o jekhipe kova so dobinela pe preku e Devleskiri sila.*
4 Jekh tano o telo hem jekh tani e Devleskiri sila,* sar soj tani jekh hem i nadež ki koja so sien vikime,
5 jekh Gospodari, jekh vera, jekh krstibe,
6 jekh tano o Devel hem Dad sarinenge. Ov tano najbaro taro sekova jekh, dejstvujnela preku sarinende hem upro sarinende.
7 Sekova jekh amendar dobingja taro Devel leskoro šukaripe so na zaslužinaja le hem o Hristos sine adava kova so sekaske amendar dengja akava poklon.
8 Soske, o Spisija vakerena: „Keda uklilo ko nebo oslobodingja manušen kola so sine phanle hem adale manušen dengja sar poklon“.
9 A adava so vakerela kaj „uklilo“, značinela kaj angleder ov hulilo tele ki phuv.
10 Okova so hulilo tele ki phuv, ov isto hem uklilo poupre taro nebo te šaj te ispolninel sa.
11 Hem dengja nesave te oven apostolija, nesave te oven prorokija, nesave te propovedinen o šukar haberi, a nesave te oven pastirija hem učitelija,
12 te šaj te pomožinen okolenge soj sveta te džan ko ispravno drumo, te šaj te služinen e javerenge hem te šaj te zajakninen o sobranie kova soj tano e Hristoseskoro telo.
13 Ola ka keren adava sa džikote sarine amen na ovaja ko jekhipe ko sa so verujnaja hem sa džikote šukar na pendžaraja e Devleskere Čhave, te šaj agjaar te ova zrela manuša sar soj o Hristos.
14 Adaleske, ma te ova više sar tikne čhave so šunena razna hovavne sikljojba taro manuša so prevarinena e javeren, soske ola tane sar o čamco ko more kole so i bavlal hem o branija ingarena akari-okori.
15 Namesto adava, amen mora te vakera o čačipe, hem o mangipe neka pomožinel amen te bajrova ko sa o bukja te šaj te ova sar o Hristos, kova soj o šero e teloskoro.
16 Preku leste celo telo tano šukar povrzimo hem sa leskere delija složno sorabotinena, soske sekova zglobo so povrzinela len ispolninela adava bašo soj kerdo. Keda sekova jekh delo kerela pli uloga, adava pomožinela o telo te bajrol hem adaleske so isi mangipe celo telo ovela pozoralo.
17 Adaleske, anglo Gospodari vakerava tumenge akava hem ohrabrinava tumen te na živinen više sar so živinena o manuša kola so nane vernikija, soske ola razmislinena samo bašo bukja so na vredinena.
18 Ola* tane ki temnica hem dur tari nadež koja so dela o Devel adaleske so na mangena te pendžaren le hem lengere vile tane zorale sar bar.
19 Adaleske so nane len više nisavo čuvstvo bašo adava soj šukar a soj lošno, ola mukhle pe ko bezobrazno ponašibe,* te šaj te keren sekova melalipe bizo te čaljon.
20 Ama tumen siklilen hem džanena kaj o Hristos nane asavko.
21 Ov sikavgja soj tano o čačipe hem ako tumen šungjen hem sien sine sikavde lestar, tegani tumen šukar džanena akala bukja.
22 Tumen džanena kaj valjani te huljaven i purani ličnost, koja soj oblikujmi sprema tumaro purano način sar živinena sine hem kola so ruminena la sine o lošna želbe so hovavena tumen.
23 Adaleske, valjani ponadari da te meninen tumaro način sar razmislinena,
24 hem te uraven i nevi ličnost sprema e Devleskiri volja hem agjaar ka keren adava soj čače pravedno hem ka ačhoven verna e Devleske.
25 Adaleske, akana otkeda frdingjen tumendar o hovajbe, vakeren o čačipe jekh jekheske. Soske, sarine amen siem delija taro jekh isto telo hem zavisinaja jekh jekhestar.
26 Ako holjanena, ma grešinen. Ma mukhen te nakhel o dive, a tumen panda te oven holjame.
27 Ma mukhen than e Bengeske.
28 Koj čorgja, te na čorel više, nego neka kerel vredno hem česno buti ple vastencar, te šaj te del nešto okoleske so nane le.
29 Nijekh lošno lafi te na ikljol taro tumaro muj, nego samo adava soj šukar, te šaj te izgradinel e javeren keda valjani hem te ovel korisno okolenge so šunena le.
30 Ma razočarinen e Devle adalea so ka protivinen tumen leskere silake,* kolaja so zapečatingja tumen bašo dive keda ka oslobodinel tumen preku i otkupnina.*
31 Ciden tumendar sekoja omraza, holi, gnev, vikibe, lafija so vredžinena hem sa o javera lošna bukja.
32 Oven šukar jekh jekhea, sočuvstvitelna, hem spremno prostinen jekh jekheske sar o Devel so preku o Hristos spremno prostinela tumenge.
Footnotes
^ Ili: „o sveti duh“. Dikh ko rečniko baši „Devleskiri sila“.
^ Ili: „o sveti duh“. Dikh ko rečniko baši „Devleskiri sila“.
^ Doslovno: „lengere misle“.
^ Dikh ko rečniko bašo „Bezobrazno ponašibe“.
^ Ili: „e sveti duhoske“. Dikh ko rečniko baši „Devleskiri sila“.
