Jovan 13:1-38
13 Angleder i Pasha,* o Isus džanlja kaj alo leskoro vreme te džal peske tari phuv hem te iranel pe ko plo Dad. Adaleske so mangela sine ple sledbenikon kola so sine ko sveto, ov manglja len dži ko krajo.
2 O Isus hem leskere učenikija hana sine večera, a o Beng više čhivgja ko vilo i namera e Juda Iskarioteske, o čhavo e Simoneskoro, te predajnel le.
3 Adaleske so o Isus džanlja kaj o Dad dengja sa o bukja leske ko vasta hem kaj ov alo taro Devel hem ka iranel pe ko Devel,
4 uštilo tari sofra, mukhlja ki strana pli upruni nametka hem phanlja pe ki polovina jekh peškiri.
5 Palo adava, čhorgja pani ko legjeni hem počmingja te thovel o pre e učenikongere hem e peškirea kosela sine lengere pre.
6 Keda alo dži ko Simon Petar, ov vakergja leske: „Gospodare, tu li ka thove me pre?“
7 O Isus vakergja leske: „Akana akava me so kerava na haljovea, ama ka haljove le pokasno“.
8 A o Petar vakergja leske: „Nikogaš nane te mukhav tu te thove me pre!“ O Isus vakergja leske: „Ako na thovava te pre našti te ove mancar“.
9 Tegani o Simon Petar, vakergja leske: „Gospodaru, tegani ma thov samo me pre, thov me vasta da hem mo šero da!“
10 O Isus odgovoringja leske: „Okova so thovgja pe, na valjani te thovel ništo javer osven pe pre, soske celo leskoro telo tano čisto. A tumen sien čista, ama na sarine“.
11 Soske, o Isus džanela sine koj ka predajnel le adaleske vakergja: „Na sien sarine čista“.
12 Otkeda thovgja o pre lengere, uravgja pli upruni nametka, irangja pe ki sofra hem vakergja lenge: „Dali halilen soske thovgjum tumare pre?
13 Tumen vikinena man ’Učitele‘ hem ’Gospodaru‘, hem točno vakerena, soske me sium adava.
14 Adaleske, ako me o Gospodari hem o Učiteli thovgjum tumare pre, tumen da valjani te thoven jekh jekheskere pre.
15 Dengjum tumen primer tumen da te keren agjaar sar so kergjum tumenge me.
16 Čače, čače vakerava tumenge, o robo nane pobaro taro plo gospodari, a ni okova soj bičhaldo nane pobaro taro okova so bičhalgja le.
17 Akana džanena akala bukja, ama ka oven srekjna ako kerena len.
18 Akava so vakerava na važinela sarinenge. Me pendžarava okolen so biringjum len. Ama akava ovela te šaj te ispolninen pe o lafija taro Spisija: ’Okova so hala sine taro mlo maro, ulo protiv mande‘.
19 Me panda akana vakerava tumenge adava so valjani te ovel, te šaj keda ka ovel adava, te verujnen kaj sa adava so sine pišimo baši mande tano čače.
20 Čače, čače vakerava tumenge, koj priminela okole kas so me bičhalava, ov priminela man da. A koj priminela man, priminela okole kova so bičhalgja man“.
21 Otkeda vakergja akava, o Isus voznemiringja pe hem otvoreno vakergja: „Čače, čače vakerava tumenge, jekh tumendar ka predajnel man“.
22 O učenikija počmingje te dikhen pe jekh jekhea hem sine bunime soske na džanena sine baši kaste kerela lafi.
23 Jekh taro učenikija, kaste so o Isus posebno manglja, sine ki sofra uzo Isus.*
24 Adaleske o Simon Petar jakhencar kergja leske hem vakergja leske: „Puč le baši kaske kerela lafi“.
25 Tegani ov čhivgja plo šero popaše uzo Isus hem pučlja le: „Gospodaru, koj tano adava?“
26 O Isus odgovoringja: „Ov tano adava kaske so ka dav o zalago so ka bolav ko čaro“. Otkeda bolgja e marea ko čaro, dengja o zalago e Judaske, o čhavo e Simon Iskarioteskoro.
27 Otkeda o Juda lelja o zalago, o Satana khuvgja ki leste. Tegani o Isus vakergja leske: „Adava so počmingjan te kere, ker le posigate!“
28 Hem nikoj lendar kola so sine ki sofra na džanle soske vakerela leske adava.
29 Adaleske so i kutija e parencar sine ko Juda, nekoj lendar mislingje kaj o Isus vakergja leske te kinel nešto bašo prazniko ili te del nešto e čorolenge.
30 Otkeda o Juda lelja o zalago, odma iklilo, a sine rakjate.
31 Keda ov iklilo, o Isus vakergja: „Akana tano o vreme keda e manušikane Čhaveske* ka del pe čest, hem e Devleske da ka del pe čest preku leste.
32 Hem o Devel ka del čest e manušikane Čhaveske, hem adava odma ka kerel le.
33 Mangle čhavalen, panda hari sium tumencar. Ka roden man, ama akana tumenge da vakerava adava so vakergjum e Evreenge: ’Adathe kote so ka džav me, tumen ka našti te aven‘.
34 Dava tumen nevi zapoved: mangen tumen jekh jekhea! Sar me so mangljum tumen, agjaar tumen da mangen tumen jekh jekhea.
35 Agjaar sarine ka džanen kaj sien mle učenikija, ako isi tumen mangipe maškar tumende“.
36 A o Simon Petar pučlja le: „Gospodare, kote džaja?“ A o Isus odgovoringja leske: „Adari kote so džava, tu akana našti te ave, ama ka ave pokasno“.
37 Tegani o Petar vakergja leske: „Gospodare, soske akana našti te avav tuja? Mo životo ka dav tuke!“
38 Tegani o Isus vakergja leske: „Ka de li to životo baši mange? Čače, čače vakerava tuke, o bašno nane te giljavel sa džikote tu trin puti na vakerea kaj na pendžarea man“.
Footnotes
^ Doslovno: „sine pružimo ki sofra paše e Isuseske ko kolin“. Ko biblisko vreme o manuša na bešena sine ki sofra, nego hana sine maro agjaar so pružinena pe sine ki strana hem potprinena pe sine jekhe laktoja.
^ Dikh ko rečniko bašo „Manušikano Čhavo“.
