Matej 17:1-27
17 Palo šov dive o Isus lelja pea e Petare, e Jakove hem leskere phrale e Jovane ki jekh uči planina hem adathe ola sine korkori.
2 Tegani meningja plo izgled angli lende. Leskoro muj svetingja sar kham hem leskere šeja počmingje but te svetinen.
3 Taro jekh puti pojavingje pe lenge o Mojsej hem o Ilija kola so kerena sine lafi e Isusea.
4 Tegani o Petar vakergja leske: „Gospodare, but šukar amenge akate. Ako mangea me ka čhivav trin šatorija akate, jekh tuke, jekh e Mojseeske hem jekh e Ilijaske“.
5 Džikote panda kerela sine lafi, jekh svetlo oblako učhargja len hem šundilo glaso taro nebo sar vakerela: „Akava tano mlo manglo Čhavo kova so kerela man radosno. Leste šunen le“.
6 Keda šungje adava, o učenikija but darandile hem pele tele ple moja dži ki phuv.
7 Tegani o Isus alo paše uzi lende, pipingja len hem vakergja: „Ušten, ma daran“.
8 Keda vazdingje plo šero, ola na dikhle nikas javere, nego samo e Isuse.
9 Hem džikote hulena sine tari planina o Isus zapovedingja lenge: „Ma vakeren nikaske adava so dikhlen sa džikote o manušikano Čhavo* na voskresninela“.
10 A o učenikija pučle le: „Soske o učitelija e zakoneskere vakerena kaj prvo valjani te avel o Ilija?“
11 Ov odgovoringja lenge: „Čače o Ilija mora te avel hem palem te anel ko redo sa o bukja.
12 Ama vakerava tumenge kaj o Ilija više alo, hem ola na pendžargje le, nego postapingje lea sar so mangle. Agjaar o manušikano Čhavo da ka ovel mučimo taro lengere vasta“.
13 Tegani o učenikija halile kaj vakerela lenge bašo Jovan Krstitel.
14 Keda ale ko narodo, jekh manuš alo ki leste, pelo ko kočaka hem vakergja:
15 „Gospodare, sikav milost mle čhaveske soske tano but nasvalo. Isi le epilepsija hem but puti perela ki jag hem ko pani.
16 Angjum le ko tle učenikija, ama ola našti sine te sasljaren le“.
17 Tegani o Isus vakergja: „Tumen sien lošno generacija so nane la vera ko Devel.* Dži keda mora te ovav tumencar? Dži keda mora te trpinav tumen? Anen le ki mande“.
18 Tegani o Isus strogo zapovedingja e demoneske te ikljol hem ov iklilo taro čhavo, hem o čhavo odma sastilo.
19 Palo adava, keda o Isus sine korkori, ale ki leste o učenikija hem pučle le: „Soske amen našti sine te palda e demone?“
20 Ov vakergja lenge: „Adaleske so isi tumen tikni vera. Soske, čače vakerava tumenge, ako tumari vera tani bari samo kobor jekh zrno taro sinap,* ka vakeren akale planinake: ’Premestin tut akatar adari‘, hem oj ka premestinel pe. Hem tumen ka šaj sa te keren“.
21 *——
22 Keda khedingje pe ki Galileja o Isus vakergja lenge: „O manušikano Čhavo ka ovel predajmo e dušmanenge ko vasta,
23 hem ola ka mudaren le, a ko trito dive ka voskresninel“. Tegani, ola sine but tažna.
24 Keda resle ko Kapernaum, o manuša so khedena sine danok taro duj drahme,* ale ko Petar hem pučle le: „Platinela li tumaro učiteli danok taro duj drahme?“
25 Ov odgovoringja: „Oja, platinela“. A keda khuvgja ko kher, angleder te vakerel nešto, o Isus pučlja le: „So mislinea Simon, kastar o carija ki phuv lena danok hem javera davačke?* Taro ple čhave ili taro jabandžie?“
26 Keda odgovoringja: „Taro jabandžie“, o Isus vakergja leske: „Znači o čhave na valjani te platinen danok.
27 Ama, te šaj ma te vredžina len, dža ko more hem frde i jadica, pa le o prvo mačho so ka astare. Keda ka phrave o muj leskoro ka arakhe jekh srebreno para.* Laja platin danok tuke hem mange“.
Footnotes
^ Dikh ko rečniko bašo „Manušikano Čhavo“.
^ Doslovno: „preljubničko generacija“.
^ Dikh i fusnota bašo Matej 13:31.
^ Akava stiho arakhljola ko nesave prevodija tari Biblija ama na arakhljola ko grčko teksti taro Vestkot-Hort (Westcott-Hort) kova so temelinela pe ko najpurane grčka rakopisija.
^ Davačke ako nekoj kerela trgovija ili te platinel pe carina.
