Matej 3:1-17
3 Ko adava vreme o Jovan Krstitel alo ki Judejsko pustina te propovedinel
2 hem vakerela sine: „Kainen tumen soske o nebesno Carstvo tano paše“.
3 Ustvari baši leste o proroko o Isaija vakergja: „Nekoj vikinela ki pustina: ’Spreminen e Jehovaske* o drumo. Keren leske ramna o drumija!‘“
4 O Jovan uravela sine šeja kerde taro e kamilakere bala hem ki polovina sine phanlo kaiši tari koža. Ov hala sine skakulcija hem divo avgin.
5 O manuša taro Erusalim, tari celo Judeja hem taro sa o thana okolu o Jordan avena sine ki leste,
6 hem ov krstinela* len sine ki reka Jordan, a ola javno priznajnena sine pumare grevija.
7 Keda dikhlja kaj but fariseija hem sadukeija* ale ko than kote so krstinela sine, ov vakergja lenge: „Tumen sien sar sapa! Koj vakergja tumenge kaj šaj te našen tari e Devleskiri holi so avela?
8 Adaleske, sikaven tumare postapkencar kaj kainena tumen.
9 Hem ni ma mislinen te vakeren korkori tumenge: ’O Avraam tano amaro dad‘. Soske vakerava tumenge kaj o Devel šaj taro akala bara te kerel čhave e Avraameske.
10 O tover više tano spremno te čhinel o kašta taro koreno. Sekova kaš so na dela šukar plodi, čhinela pe hem frdela pe ki jag.
11 Adaleske so kainena tumen me krstinava tumen pajnea, ama okova so avela pali mande tano posilno mandar hem me na zaslužinava ni leskere sandale te ikalav. Ov ka krstinel tumen e Devleskere silaja* hem jagaja.
12 Ko vasta isi le lopata kolaja so ka čistinel o giv tari leskiri lušpa. O giv ka čhivel ko ambarija,* a o lušpe ka tharel e jagaja so našti te ačhavel pe“.
13 Tegani o Isus alo tari Galileja ko Jordan te šaj o Jovan te krstinel le.
14 Ama o Jovan probingja te čhinavel le hem vakergja: „Tu valjani man te krstine, a tu avea me te krstinav tut?“
15 O Isus vakergja leske: „Mukh akava puti te ovel agjaar, soske agjaar ka kera sa adava so o Devel mangela“.* Tegani o Jovan prifatingja te krstinel le.
16 Otkeda krstingja pe, o Isus odma uštilo taro pani. Tegani o nebo phravdilo hem o Jovan dikhlja sar e Devleskiri sila* hulela sar gulubi hem avela upro Isus.
17 Tegani šundilo glaso taro nebo: „Akava tano mlo manglo Čhavo, kova so kerela man radosno!“
Footnotes
^ Ili: „potopinela telo pani“.
^ Ili: „e sveti duhoja“. Dikh ko rečniko baši „Devleskiri sila“.
^ Than kote so čhivela pe o giv.
^ Ili: „sa adava soj pravedno“.
^ Ili: „o sveti duh“. Dikh ko rečniko baši „Devleskiri sila“.
