Dži ko Rimjanja 3:1-31
3 Tegani, koja tani i prednost te ovel pe Evrei hem te ovel pe suneti?
2 Isi but prednostija. Prvo, o Devel e Evreenge dengja* ple sveta lafija.
3 Tegani, so šaj te vakerav bašo nesave Evreija kolen so nane len vera? Dali adava so nane len vera značinela kaj o Devel nane te ikerel pe ko plo lafi?
4 Sigurno na! Ka sikavel pe kaj o Devel sekogaš vakerela o čačipe, čak ako sa o manuša hovavena. Sar so pišinela ko Spisija: „Tle lafija ka sikaven kaj sian pravedno hem keda ola ka krivinen tut bašo nešto, ka dokažine lenge kaj grešinena“.
5 Nesave manuša vakerena: „Keda amen keraja lošna bukja, tegani o manuša šaj te dikhen kaj o Devel tano pravedno. Ako amaro sebepi o manuša dikhena kaj o Devel tano pravedno, tegani na postapinela li o Devel amencar nepravedno keda kazninela amen?“
6 Sigurno na! Ako o Devel tano nepravedno, sar ka sudinel e svetoske?
7 Ili jekh javer buti so vakerena o manuša: „Ako mlo hovajbe jasno sikavela kaj o Devel vakerela o čačipe hem adava kerela o manuša te falinen le, tegani soske o Devel osudinela man sar grešniko?“
8 Hem soske na vakeraja: „Ajde te kera lošna bukja te šaj te aven o šukar bukja“, sar so nesave manuša hovavena kaj amen agjaar sikavaja e javeren? Asavke manuša zaslužinena te oven kaznime.
9 Znači, šaj li te mislina kaj amen o Evreija siem ki pobari prednost taro javera? Na! Soske, sar so dikhlem, hem o Evreija hem o Grkija tane robija e grevoske,
10 sar so pišinela ko Spisija: „Nane pravedno manuš, nane ni jekh.
11 Nane ni jekh soj mudro,* nane ni jekh manuš so rodela e Devle.
12 Sa o manuša cidingje pe taro Devel, sarine ola ule manuša so na vredinena, nane nikoj so kerela šukaripe, nane ni jekh“.
13 „Pumare lafencar mudarena,* ple čhibjaja vakerena hovajba.“ „Adava so ikljola taro lengoro muj tano sar otrov e sapengoro.“
14 „Lengoro muj tano pherdo armanja hem holi.“
15 „Lengere pre sigjarena te mudaren.“*
16 „Ola sekogaš kerena bari šteta e manušenge hem kerena o javera te ciden muke,
17 hem ola na džanena sar te oven ko mir e javerencar.“*
18 „Nane len dar taro Devel.“
19 Ama amen džanaja kaj sa adava so pišinela ko Zakoni, tano okolenge so ikerena pe ko Zakoni, te šaj sarine okola so vakerena kaj nane kriva, o Zakoni te phandel o muj lengoro hem te sikavel kaj celo sveto tano krivo anglo Devel hem zaslužinela te ovel kaznimo.
20 Adaleske, nijekhe manušeske našti te vakerel pe kaj tano pravedno anglo Devel adaleske so ikerela o zapovedija taro Zakoni. Ustvari, o Zakoni kerela panda pošukar te haljova o grevo.
21 A akana tano jasno kaj jekh manuš šaj te ovel pravedno anglo Devel bizo te ikerel e Mojseeskoro zakoni. Bašo akava, isto agjaar vakergje o Zakoni hem o Prorokija.
22 Bizi razlika tari koja nacija tano nekoj, ako isi le vera, hem adava vera ko Isus Hristos, šaj te ovel pravedno anglo Devel.
23 Soske, sarine grešingje hem našti sovršeno te sikaven e Devleskere osobine.
24 O Isus Hristos spasingja len adalea so platingja i otkupnina* bašo grevo. Agjaar ola tane pravedna anglo Devel. O Devel dengja len adava poklon adaleske so manglja te sikavel lenge plo šukaripe so na zaslužinaja le.
25 O Devel dengja e Isuse sar žrtva te šaj o manuša te smirinen pe lea agjaar so ka ovel len vera ki e Hristoseskiri žrtva.* O Devel kergja adava te šaj te sikavel pli pravednost. Ov na samo so sikavela pli strplivost adalea so prostinela o grevija so sine kerde angleder,
26 nego ov isto agjaar sikavela pli pravednost amenge akana, agjaar so vakerela kaj tane pravedna o manuša so sikavena vera ko Isus.
27 Tegani, šaj li te falina amen bašo nešto? Na. Kova zakoni na mukhela amen te falina amen? Dali o zakoni kova so vakerela kaj tano važno adava so keraja? Na, nego o zakoni kova so vakerela kaj valjani te ovel amen vera.
28 Soske, džanaja kaj jekhe manušeske šaj te vakerel pe kaj tano pravedno baši leskiri vera, a na bašo adava so ikerela o zapovedija taro Zakoni.
29 Zarem o Devel tano samo Devel e Evreenge, nane li ov isto agjaar Devel e manušenge taro sa o narodija? Oja, ov tano Devel e manušenge taro sa o narodija.
30 Adaleske so isi samo jekh Devel, angli leste o manuša ka oven pravedna baši pumari vera — hem okola soj kerde suneti hem okola so nane kerde suneti.
31 Tegani, dali amare veraja keraja te na važinel o Zakoni? Na. Namesto adava, amen jasno sikavaja kaj o Zakoni tano važno amenge.
Footnotes
^ Doslovno: „dengja ko poverenje“.
^ Ili: „so haljola“.
^ Doslovno: „Lengoro krlo tano phravdo grobo“.
^ Doslovno: „te čhoren rat“.
^ Doslovno: „na pendžarena o drumo bašo mir“.
^ Doslovno: „ko e Hristoseskoro rat“.
