Dži ko Rimjanja 9:1-33
9 Sar sledbeniko e Hristoseskoro, me vakerava o čačipe hem na hovavava. Mli sovest koja soj vodimi tari e Devleskiri sila* svedočinela bašo adava,
2 kaj isi man bari žal hem dukh ko vilo so na nakhela.
3 Spremno sium me te ovav kaznimo ko than mle phralenge e Evreenge, kola so na džana palo Hristos, ako adava pomožinela lenge.
4 Ola tane Izraelcija hem o Devel biringja len te oven leskere posvojme čhave. O Devel lenge dengja i slava, kergja lencar sojuzija,* dengja len o Zakoni, dengja len i prednost te služinen leske hem lenge dengja plo lafi kaj ka blagoslovinel len.
5 Ola tane o potomcija amare parapapongere, kotar so o Hristos da avela sar manuš. Neka ovel falimo zasekogaš o Devel kova so vladinela upro sa! Amin.
6 Ama, adava na značinela kaj e Devleskoro lafi na ispolningja pe. Soske, nane čačutne Izraelcija sa okola so avena taro Izrael.
7 Hem nane sarine e Avraameskere čhave samo adaleske soj tane leskoro potomstvo. Nego o Devel vakergja e Avraameske: „Okola so ka aven taro Isak, lenge ka vakerel pe kaj tane tlo potomstvo“.
8 Adava značinela kaj na sa o čhave so bijandile e Avraameske tane čače e Devleskere čhave. Nego o čhave e Devleskere tane okola so sine vetime hem anglo Devel ola tane e Avraameskoro potomstvo.
9 Soske, o Devel vetingja leske akava: „Dži berše akava vreme ka avav, hem e Sara ka ovel la čhavo“.
10 Ama o Devel na dengja samo tegani akava vetuvanje. Nego hem keda i Rebeka ačhili khamni, hem valjani sine te oven la bliznakija taro amaro parapapo o Isak.
11 Panda angleder te bijangjoven adala čhave hem te keren nešto šukar ili lošno, o Devel angleder vakergja kas ka birinel. Soske, o Devel birinela kas so ov mangela, a na sprema adava so kerela jekh manuš.
12 Adaleske o Devel vakergja lake: „O pobaro ka ovel robo e potikneske“.
13 Sar so sine pišimo ko Spisija: „Mangljum e Jakove, a mrzingjum e Isave“.
14 Tegani, dali šaj te vakera kaj o Devel nane pravedno? Sigurno na!
15 Soske, o Devel vakergja e Mojseeske: „Ka sikavav milost okoleske kas so ka birinav, hem ka sikavav sočuvstvo okoleske kaske so ka mangav“.
16 Adaleske adava na zavisinela tari e manušeskiri želba ili taro leskoro trudo, nego taro Devel, kova so sikavela milost.
17 Soske, o Devel ko Spisija bašo faraoni vakergja: „Mukhljum tut dživdo te šaj upri tute te sikavav mli sila hem te šaj o manuša tari celo phuv te džanen bašo mlo anav“.
18 Znači, o Devel sikavela milost kaske so mangela ov, ama nesaven mukhela te oven tvrdoglava, soske agjaar mangela.
19 Tegani, nekoj šaj ka pučel man: „Ako našti nikoj te džal protiv e Devleskiri volja, tegani soske o Devel ponadari da krivinela e manušen?“
20 Ama tu kova so sian obično manuš, savo pravo isi tut te kere protiv lafi e Devlea? Šaj li adava so sine kerdo te vakerel okoleske so kergja le: „Soske kergjan man agjaar?“
21 Nane li pravo e grnčare tari isto glina te kerel jekh čaro so ka koristinel pe ki posebno prilika hem jekh obično čaro so ka koristinel pe sekova dive?
22 Agjaar tano e Devlea da. Iako ov manglja te sikavel pli holi hem pli mokj upro lošna manuša, sepak ov sine strplivo okolencar so holjankergje le* hem so zaslužingje te oven uništime.
23 Ov kergja agjaar te šaj te sikavel pli bari slava upri okolende kolenge so ka sikavel pli milost.* Ov len spremingja len te šaj te del len slava.
24 Ustvari adala siem amen, so o Devel vikingja amen, na samo taro Evreija, nego hem taro javera narodija.
25 Agjaar pišinela hem ko lil taro proroko o Osija: „Okola so nane mlo narodo, ka vikinav len ’mlo narodo‘ hem okolen kas so na mangava, ka vikinav len ’me mangle‘.*
26 Hem ko than kote so sine lenge vakerdo: ’Tumen na sien mlo narodo‘, adathe ka oven vikime ’čhave e dživde Devleskere‘“.
27 O Isaija da bašo Izrael vakergja akava: „Te oven da o Izraelcija doborom but kobor so isi pošik ko more, samo hari džene* lendar ka oven spasime.
28 Soske, o Jehova* ka sudinel e manušenge soj ki phuv hem sigate ka izvršinel i kazna upri lende“.
29 Hem isto sar so prorokujngja o Isaija: „Te na mukhel sine o Jehova,* o zapovedniko e vojskengoro, te ovel amen potomstvo, ka ova sine isto sar o dizja Sodom hem Gomor“.
30 Tegani, so šaj te vakera? E manušen taro javera narodija kola so sikavgje vera, o Devel dikhlja len sar pravedna, iako ola na rodingje i pravednost.
31 Ama o Izraelcija, iako trudingje pe te ikeren pe ko zakoni e pravdakoro, sepak na uspejngje te živinen sprema adava zakoni.
32 Soske? Adaleske so ola mislingje kaj ka oven pravedna bašo ple postapke, a na baši pli vera. Ola sopkingje pe ko „bar sopkibaske“,
33 sar so vakerena o Spisija: „Ake, me mukhava ko Sion bar kova so ka kerel o manuša te sopkinen pe hem karpa so ka kerel te peren, ama sekoj so ka verujnel ki leste nane te razočarinel pe“.
Footnotes
^ Ili: „taro sveti duh“. Dikh ko rečniko baši „Devleskiri sila“.
^ Ili: „dogovorija“.
^ Doslovno: „e čarencar baši holi“.
^ Doslovno: „upri o čare baši milost“.
^ Doslovno: „Okola so na mangljum la, ka vikinav la ’mli mangli‘“.
^ Doslovno: „jekh ostatok“.
