Keda prandinea tu, tumen o duj džene ovena jekh nevi familija. Iako sekogaš ka mange te roditelen hem ka poštujne len, akana najvažno manuš ko to dživdipe tuke ti romni ili to rom. Tumare roditelenge šaj ka ovel pharo te prifatinen akava. O sovetija tari Biblija ka pomožinen tumen te arakhen jekh sredina hem te nakhen šukar tumare roditelencar džikote kerena tumaro brako te ovel pozoralo. Akala sovetija isto agjaar važinena keda kerela pe lafi bašo devero, zolva, jatrva, kako, tetka, bratučetija hem javera tari familija.

SO VAKERELA I BIBLIJA: „Poštujn te dade hem te daja“ (Efešanite 6:2). Sekogaš valjani te poštujne te roditelen, bizi razlika kobor berš isi tu. Haljov kaj te bračno partnere da isi le roditelija hem ov valjani te grižinel pe lenge da. „O manuš kova so isi le mangipe nane ljubomorno“, adaleske nikogaš ma osetin tu nesigurno ako ti romni ili to rom tano paše pe roditelencar (1. Korinkjanite 13:4; Galatite 5:26).

SO ŠAJ TE KERE:

• Ma vaker: „Ti familija sekogaš kerela man nesposobno“ ili „Sa so kerava, te dajake nane šukar“.

• Trudin tu te dikhe o bukja sar so dikhela len ti romni ili to rom.

SO VAKERELA I BIBLIJA: „O manuš ka mukhel pe dade hem pe daja hem ka spojnel pe pe romnjaja, hem ola ka oven jekh telo“ (1. Mojseeva 2:24). Keda ka prandine tu, te roditelija šaj ka mislinen kaj panda tane odgovorna tuke hem šaj ka mangen te mešinen pe ko to brako pobuter nego so valjani.

Tu hem to bračno partneri valjani te keren lafi bašo adava kobor ka dozvolinen e roditelenge te mešinen pe tumenge ko brako hem ljubezno vakeren lenge adava. Keren lencar iskreno lafi, ama pazinen te na povredinen len (Izreki 15:1). Ako sien smirime, ljubezna hem strpliva adava ka pomožinel tumen te nakhen šukar tumare roditelencar (Efešanite 4:2).

SO ŠAJ TE KERE:

• Ako mislinea kaj tumare roditelija but mešinena pe tumenge ko brako, tegani ker smireno lafi te romnjaja ili te romea bašo adava.

• Dogovorinen tumen sar te rešinen adava problemi.