O lil Bibliska stihija so pomožinena amen ko životo ka pomožinel tut polokhe te arakhe bibliska stihija hem izveštaija so ka pomožinen tut te ikljove ko krajo e problemencar so isi tut. Isto agjaar ka pomožinel tut te arakhe baš adala stihija so valjani te šaj te ohrabrine e javeren hem te pomožine len te anen odluke so ka anen čest e Jehovaske. Birin i tema so interesinela tut hem athe šaj te arakhe interesna pučiba hem kratka objasnuvanja bašo bibliska izveštaija. (Dikh i ramka „ Sar te koristine akava lil“.) Ko akava lil šaj te arakhe sovetija hem uteha tari Biblija. Isto agjaar ka šaj te arakhe korisna načelija tari Biblija kolencar so ka šaj te pomožine hem te ohrabrine e javeren.

Ko akava lil, nane čhivde sa o stihija soj povrzime jekhe temaja. Kerdo tano agjaar te šaj te arakhe o stihija so najviše ka koristinen tuke, ama ako mangea pohor te istražine šaj te koristine javera alatke istražibaske (Iz 2:1-6). Te šaj te istražine pohor, koristin o margine tari Biblija — prevod Nevo sveto hem o beleške kote so isi poviše informacie bašo nesavo stiho (na primer akala beleške ko angliski vikinena pe study notes), ako tane dostapna ki nesavi čhib so haljovea la. Koristin o Priračniko istražibaske e Jehovaskere svedokongoro ili o Indeks bašo publikacie taro e Jehovaskere svedokija te šaj pošukar te haljove so značinena o stihija.

O lil Bibliska stihija so pomožinena amen ko životo neka pomožinel tut te doznajne i mudrost, o džandipe hem o haljojbe so isi ki Biblija. Džikote koristinea akaja publikacija ka ove panda pouverimo kaj „e Devleskoro lafi tano dživdo hem silno“ (Ev 4:12).